1. (a) Dirava ese Adamu dekenai dahaka gaukara ia henia? (b) Unai nega amo, Dirava ena taunimanima ese edena dala ai edia gado idia gaukaralaia?

IEHOVA DIRAVA ese ita dekenai ia henia harihari gauna namo hereana be iseda gado. Eden umana ai, Dirava ese Adamu dekenai gaukara ia henia, animal ta ta dekenai ladana do ia hatoa. Bona Adamu ese ena diba ia gaukaralaia unai ia karaia totona. (Gen. 2:19, 20) Unai nega amo, Dirava ena taunimanima ese edia gado idia gaukaralaia, Iehova idia hanamoa bona ma haida dekenai ia idia herevalaia totona. Hari, Dirava ena taunimanima ese unai harihari gauna idia gaukaralaia Baibel idia hahanaia totona, unai amo taunimanima momo be Iehova do idia dibaia.

2. (a) New World Bible Translation Committee ese edena hakaua hereva toi idia badinaia? (b) Inai stadi ai dahaka do ita herevalaia?

² Hari Baibel tausen momo idia noho, idia haida be toretore gunadia edia hereva ta ta idia badinaia, to ma haida be lasi. Baibel idia hahanaia maoromaoro totona, New World Bible Translation Committee ese inai hakaua hereva toi idia badinaia: (1) Dirava ena ladana idia hahelagaia totona, unai ladana be ena gabu korikorina ai do idia atoa lou. (Mataio 6:9 duahia.) (2) Toretore ginigunadia edia hereva ta ta do idia hahanaia, to bema idia hegeregere  lasi, ena anina korikori sibona do idia hahanaia. (3) Idia auka lasi bona taunimanima ese idia lalopararalaia herevadia do idia gaukaralaia. * (Nehemia 8:8, 12 duahia.) Unai hakaua hereva toi be gado idauidau 130 mai kahana ai idia badinaia. Inai stadi ai, do ita itaia edena bamona New World Translation Baibel matamatana bona gado ma haida Baibel ese unai hakaua hereva toi idia badinaia.

3, 4. (a) Tetragramaton be edeseni ita davaria diba? (b) Baibel hahanaia taudia momo be Dirava ena ladana dekenai dahaka idia karaia?

³ Idaunega Heberu Baibel maniuskrip, hegeregere Mase Davara Lokua Toretoredia, idia stadilaia taudia idia hoa badina unai toretoredia edia gabu momo ai Tetragramaton ia noho. * Dirava ena ladana be unai idaunegai Heberu maniuskrip sibona ai ia hedinarai lasi, to Greek Septuagint ena kopi haida dekenai ia hedinarai danu. Unai kopi gunadia be lagani 200 B.C.E. ia lao lagani 100 C.E. ai idia torea.

⁴ Unai ese ia hahedinaraia goevagoeva, Dirava ena ladana be Baibel lalonai ia noho be namo. To Baibel momo ai Dirava ena ladana helagana idia kokia. Hegeregere, lagani 1950 ai, New World Translation of the Christian Greek Scriptures Baibel idia halasia bena lagani rua murinai, Revised Standard Version Baibel idia halasia. Lagani 1901 ai idia halasia Revised Standard Version Baibel ai Dirava ena ladana ia noho, to lagani 1952 ai idia halasia gauna amo idia kokia. Dahaka dainai? Badina unai Baibel idia hahanaia taudia idia laloa “ia maoro lasi” Dirava ena ladana idia gaukaralaia. English bona gado ma haida Baibel ai unai bamona idia karaia danu.

5. Dahaka dainai Baibel lalonai Dirava ena ladana ia noho be namo?

⁵ Hahanaia taudia ese Dirava ena ladana be Baibel lalonai idia atoa be mai anina bada, a? Oibe! Baibel ia Torea Tauna, Iehova, ia ura taunimanima be iena ladana idia diba. Hahanaia tauna namona be toretore tauna ena ura ia diba be namo, unai amo ena hahanaia gaukarana do ia karaia namonamo. Baibel siri momo ese idia hahedinaraia Dirava ena ladana be mai anina bada bona ita hanamoa be namo. (Sal. 83:18; Ioa. 17:6, 26; Kara 15:14) Oibe, Iehova ese Baibel toretore taudia ia hasiahua, maniuskrip gunadia ai iena ladana be nega tausen momo idia torea totona. (Esekiela 38:23 duahia.) * Unai dainai hahanaia taudia ese Dirava ena ladana idia kokia neganai, idia be Iehova idia matauraia lasi.

6. Dahaka dainai New World Translation Baibel matamatana ai Dirava ena ladana be gabu matamata 6 ai idia atoa lou?

⁶ Hamomokania gaudia momo ese idia hahedinaraia Dirava ena ladana be Baibel ai ia noho be namo. New World Translation Baibel matamatana ai Dirava ena ladana be nega 7,216 ia hedinarai, anina be gabu matamata 6 ai idia atoa lou. Hegeregere 1 Samuela 2:25; 6:3; 10:26; 23:14, 16 ai, Dirava ena ladana idia atoa lou, badina vanegai idia davaria Mase Davara Lokua Toretoredia ai unai ladana ia noho. * Bona Gunalaia Taudia 19:18 ai Dirava ena ladana idia atoa lou danu, badina Baibel maniuskrip gunadia ai ia noho.

7, 8. Inai hereva “Sibona Ia Halaoa” ena anina be dahaka?

 ⁷ Keristani taudia momokanidia idia abia dae, Dirava ena ladana ena anina ita diba be mai anina bada. Iena ladana ena anina be “Sibona Ia Halaoa.” * Guna, iseda buka bona magasin ese Dirava ena ladana ena anina idia hahedinaraia neganai, nega momo Esodo 3:14 idia gaukaralaia. Ia gwau: “Dahaka ai Lau Ura Sibona Lau Halaoa be Do Lau Halaoa.” (NWT) New World Translation Baibel gunana ena Apendiks 1A ese ia hahedinaraia, unai ladana ena anina be Iehova “be gwauhamata Hagugurua Tauna ai ia sibona ia halaoa.” To, New World Translation Baibel matamatana ena Apendiks A4 ia gwau: “Iehova ena ladana ena anina be unai sibona lasi, iena ladana ena anina ma ta be, ia ese ia havaraia gaudia be gau idauidau ai ia halaoa diba iena ura ia hagugurua totona.” (Dirava Ena Hereva Stadilaia buklet, rau 5 itaia danu.)

⁸ Iehova ese ia havaraia gaudia be ena ura gauna ai ia halaoa diba, iena ura ia hagugurua totona. Hegeregere, ia ese Noa be lagatoi haginia tauna ai ia halaoa, Besalele be ima gaukara idauidau karaia tauna ai ia halaoa, Gideona be tuari tauna goadana ai ia halaoa, bona Paulo be misinari tauna ai ia halaoa. Oibe, Dirava ena taunimanima dekenai iena ladana be mai anina bada. Unai dainai New World Bible Translation Committee ese unai ladana be inai Baibel matamatana ai idia atoa.

9. Dahaka dainai Baibel be gado ma haida ai idia hahanaia?

⁹ Hahanaia taudia ese Baibel momo amo Dirava ena ladana idia kokia, bona ena gabu ai inai dagi ladana, “Lohiabada” o dirava ma ta ena ladana idia torea. Unai badina badana dainai Hakaua Oreana ia laloa, gado idauidau taudia ese Dirava ena ladana ia hanamoa Baibel ta idia abia be mai anina bada. (Malaki 3:16 duahia.) * Hari, New World Translation Baibel be gado 130 mai kahana ai idia hahanaia vadaeni bona inai Baibel ese Dirava ena ladana ia hanamoa.

10, 11. New World Translation be gado ma haida ai idia hahanaia neganai, dahaka hekwakwanai idia davaria?

¹⁰ New World Translation Baibel be gado ma haida dekenai idia hahanaia neganai, hekwakwanai haida idia davaria. Hegeregere, Hadibaia Tauna 9:10 bona siri ma haida ai, New World Translation Baibel gunana ese Heberu gado herevana “Sheol” ia gaukaralaia. Unai hereva be English gado Baibel ma haida ai idia torea danu. To gado momo ai unai idia karaia diba lasi, badina unai gado idia duahia taudia be unai Heberu gado herevana idia diba lasi. Danu, unai hereva be edia diksenari ai ia noho lasi, bona haida idia laloa ia be gabu ta ena ladana. Unai dainai hahanaia taudia be gwaumaoro idia abia, inai Heberu gado herevana “Sheol” bona Grik gado herevana “Hades” do idia hahanaia “Mase Gurina.” Unai be maoro bona duahia taudia ese idia lalopararalaia diba.

¹¹ Gado ma haida ai, inai Heberu gado herevana neʹphesh bona Grik gado herevana psy·kheʹ hahanaia totona inai English herevana “souli” idia gaukaralaia, to unai ese daradara ia havaraia. Badina unai gado idauidau ai, inai hereva “souli” ese tau ta ena lauma tauanina ia herevalaia. Unai lalohadai kererena dadaraia totona, hahanaia taudia ese gwaumaoro idia abia, inai hereva “souli” be siri ena anina hegeregerena idia hahanaia  totona. Unai hereva ena anina idauidau be New World Translation of the Holy Scriptures—With References Baibel ena apendiks ese ia hahedinaraia. Bena inai Heberu bona Grik gado herevadia be futnout ai idia atoa, unai amo Baibel siri ita duahia bona lalopararalaia diba.

12. New World Translation Baibel matamatana idia hahanaia neganai, dahaka gaudia idia haidaua? (Atikol ladana “New World Translation Baibel Matamatana,” itaia danu.)

¹² Baibel hahanaia taudia ese idia siaia henanadai momo ese idia hahedinaraia, gado momo ai unai bamona hekwakwanai haida idia davaria danu. Unai dainai September 2007 ai, Hakaua Oreana ese gwaumaoro idia henia, New World Translation Baibel matamatana idia karaia totona. Unai Baibel matamata idia karaia lalonai, New World Bible Translation Committee ese Baibel hahanaia taudia amo idia abia henanadai tausen momo idia stadilaia. Idaunega English herevadia edia gabu ai hereva matamatadia idia atoa, unai amo do ia auka lasi ita duahia bona lalopararalaia totona. Gado ma haida ai idia hahanaia vadaeni Baibel edia heduru amo inai Baibel matamatana ai hereva matamatadia idia atoa diba.—Aon. 27:17.

13. Momo ese New World Translation Baibel matamatana be edena bamona idia laloa?

¹³ Taunimanima momo ese New World Translation Baibel matamatana be edena bamona idia laloa? Momo be unai Baibel matamata idia moalelaia dainai, Iehova ena Witnes taudia edia hedikwota Brooklyn dekenai revareva tausen momo idia siaia. Momo edia hemami be inai taihu ena hemami hegeregerena, ia gwau: “Baibel be dava bada gaudia amo ia honu maua ta bamona, ia diaridiari. New World Translation Baibel matamatana amo Iehova ena hereva ai duahia neganai, ia be hegeregere unai dava bada gaudia ta ta edia kahana idauidau, kala, bona hairai ai stadilaia. Siri ta ta be auka lasi dalanai idia hahanaia dainai, Iehova lau dibaia namonamo diba, ia be hegeregere tama ta be lau ia rosia bona lau dekenai inai hereva namodia ia duahia.”

14, 15. Edena dala ai New World Translation Baibel ese gado idauidau taudia ia durua?

¹⁴ Gado ma haida ai New World Translation Baibel idia duahia taudia danu idia moale. Tau burukana ta, Bulgaria ena siti Sofia amo, ese Bulgaria Baibel be inai bamona ia  herevalaia: “Lau ese lagani momo lalonai Baibel lau duahia, to inai Baibel be idau momokani. Iena hereva ibounai lau lalopararalaia bona egu kudouna ia hamarerea.” Albania taihu ta danu ia gwau: “Albania gado ai Dirava ena Hereva lau duahia be namo herea! Ita moale badina Iehova be iseda gado ai ita ia hereva henia!”

¹⁵ Tano momo dekenai, Baibel ena davana be bada eiava idia davaria diba lasi, unai dainai Baibel ta idia abia be hahenamo bada herea. Rwanda amo idia abia ripoti ia gwau: “Nega daudau lalonai, tadikaka taihu ese idia stadilaia taudia momo be edia stadi karana idia goadalaia lasi, badina idia be Baibel lasi. Danu, edia moni ia hegeregere lasi Baibel ta idia hoia totona. Bona Baibel ena siri momo edia anina idia lalopararalaia lasi, unai dainai idia goada lasi.” To New World Translation Baibel be edia gado ai idia hahanaia neganai, unai ia idau. Rwanda tadikaka bona taihu ta mai natudia foa, idia gwau: “Iehova bona igui hesiai tauna mai ena kamonai bona mai ena kara maoromaoro ai tanikiu henia, badina ai dekenai inai Baibel idia henia. Ai be ai ogogami dainai, sibona ta ta totona Baibel ai hoia diba lasi. To hari ai ta ta be mai emai Baibel. Iehova dekenai emai tanikiu karana ai hahedinaraia totona, dina ta ta ai, ai ibounai ese Baibel ai duahia.”

16, 17. (a) Iehova ia ura ena taunimanima be dahaka idia karaia? (b) Namona be iseda lalona ita hadaia dahaka ita karaia totona?

¹⁶ Daudau lasi New World Translation Baibel matamatana be gado ma haida ai do idia hahanaia. Satani ia ura iseda gaukara ia koua, to ita diba momokani Iehova be ia ura ita lalopararalaia gado ai ita ibounai ia hereva henia. (Isaia 30:21 duahia.) Vaira nega ai “tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.”—Isa. 11:9.

¹⁷ Namona be iseda lalona ita hadaia Iehova amo idia mai harihari gaudia ibounai, Dirava ena ladana ia hanamoa Baibel matamatana danu, ita gaukaralaia totona. Namona be dina ta ta ai iena Hereva oi duahia, bona ia ese unai dala amo oi do ia hereva henia. Oibe, ia ese iseda guriguri ibounai ia kamonai namonamo. Unai bamona herevahereva karana ese ita ia durua Iehova ita dibaia totona, bona iseda lalokau ia dekenai be do ia bada ia lao.—Ioa. 17:3.