1, 2. Baibel ai daidia edia sivarai ia noho, bona haida idia gorere neganai, edena bamona idia laloa?

BEMA oi be nega daudau oi gorere, reana sibona do oi nanadaia: ‘Lau be inai gorere amo do lau namo, a?’ Eiava bema emu turana ta o famili lalonai ta ia gorere, reana unai bamona do oi laloa danu. Gorere badana idia abia taudia be vaia unai bamona idia laloa. Peroveta taudia Elia bona Elisaia edia nega ai, king rua be unai idia mamia danu. Ahaba bona Iesebele edia natuna, King Ahasaia, be windo amo ia moru diho bona dika bada ia davaria, unai dainai ia gwau: “Inai gorere dekena amo do lau mauri o lasi.” Gabeai, Suria ena king, Benehadada, be ia gorere bada, bona ia gwau: “Lauegu gorere do ia namo lou o lasi.”—2 Kin. 1:2; 8:7, 8.

² Unai king edia nega ai, nega haida Iehova ese ena peroveta taudia ia gaukaralaia hoa dalanai taunimanima edia gorere idia hanamoa, bona mase taudia idia hatorea isi lou. (1 Kin. 17:17-24; 2 Kin. 4:17-20, 32-35) Hari inai negai, idia gorere taudia be reana do idia laloa, Dirava ese idia do ia durua eiava lasi.

3-5. Dirava bona Iesu be dahaka idia karaia diba, bona edena henanadai idia vara?

 ³ Baibel ese ia hamomokania, Dirava be iena siahu ia gaukaralaia diba, taunimanima edia gorere ia hanamoa totona. Bona nega haida ai, ia ese gorere amo taunimanima ia panisia. Hegeregere, Aberahamo ena negai, ia ese Farao bona gabeai Mose ena tadina Miriama dekenai ia karaia bamona. (Gen. 12:17; Num. 12:9, 10; 2 Sam. 24:15) Dirava ese Israela taudia ia hadibaia bema ia dekenai idia abidadama lasi, ia ese “gorere bona dika idauidau ibounai” amo idia do ia hahisia. (Deu. 28:58-61) Danu, Iehova be gorere ia haorea eiava koua diba. (Eso. 23:25; Deu. 7:15) Bona taunimanima be edia gorere amo ia hanamodia lou diba. Iobu be ia gorere bada bona ia ura dikadika do ia mase neganai, Dirava ese iena gorere ia hanamoa.—Iobu 2:7; 3:11-13; 42:10, 16.

⁴ Oibe, Dirava be mai ena siahu gorere ia hanamoa totona. Ena Natuna ese ia karaia hegeregerena. Baibel ese ia hahedinaraia Iesu be hoa dalanai lepera, epilepsi gorere, matakepulu, bona paralais taudia ia hanamoa. (Mataio 4:23, 24 duahia; Ioane 9:1-7) Oibe, unai nega ai Iesu ese ia karaia hoa karadia ese idia hahedinaraia, vaira nega ai ia ese tanobada matamata ai unai bamona do ia karaia danu. Unai nega ai, “ta be do ia gwau lasi, ‘Lau be gorere.’”—Isaia 33:24.

⁵ To bema ita gorere bada, Dirava eiava Iesu ese hari hoa dalanai ita do ia hanamoa, a? Ita ese gorere badadia be edena bamona do ita laloa, bona dahaka do ita karaia?

6. Aposetolo edia negai, Keristani taudia be edena hoa karadia idia karaia?

⁶ Aposetolo edia negai, Iehova ese horoa Keristani taudia haida dekenai siahu ia henia hoa karadia idia karaia totona. (Kara 3:2-7; 9:36-42) Hegeregere, idia ese taunimanima edia gorere idia hanamoa bona gado idauidau ai idia hereva. (1 Kor. 12:4-11) To Baibel ia hereva bamona, gabeai unai hoa karadia idia ore. (1 Kor. 13:8) Unai dainai hari inai negai, Dirava ese ita eiava ita lalokau henia taudia edia gorere be hoa dalanai do ia hanamoa lasi.

7. Salamo 41:3 ese edena dala ai ita ia hagoadaia?

⁷ Bema ita gorere, Dirava ese ita do ia hagoadaia bona durua, guna iena hesiai taudia dekenai ia karaia bamona. King Davida ia gwau: “Ogogami taudia ia laloa tauna be namo. Lohiabada ese ia do ia durua, bema hisihisi ia davaria neganai. Lohiabada ese unai tau do ia gimaia, bona iena mauri do ia naria.” (Sal. 41:1, 2) To namo lasi ita laloa Davida ena hereva ena anina be unai nega ai, ogogami taudia ia laloa tauna be do ia noho hanaihanai. Lasi, to iena hereva ena anina be Dirava ese ogogami taudia ia laloa tauna do ia durua. Edena dala ai? Davida ia gwau: “Unai tau, ogogami taudia ia laloa tauna, ia gorere neganai, be Lohiabada ese do ia durua. Lohiabada ese unai tau ena gorere, be do ia hanamoa lou momokani.” (Sal. 41:3) Iehova ia diba iena hesiai taudia be hisihisi idauidau idia davaria, bona idia ia laloaboio lasi. Ia ese idia dekenai goada bona aonega do ia henia. Danu, Iehova ese ita ia karaia neganai, iseda tauanina be sibona ia hanamoa dalanai ia karaia.

8. Salamo 41:4 ai, Davida be Iehova amo dahaka ia noia?

⁸ Davida be ia mamia gauna ia herevalaia, ia gwau: “Lohiabada e, lau dekenai do oi bogahisihisi, bona egu gorere mani do oi hanamoa, badina lau ese oi dekenai lau kara dika vadaeni.” (Sal. 41:4) Reana Davida be unai ia gwauraia, badina iena natuna, Abesaloma, ia ura iena king dagina ia abia.  Bona unai negai Davida be ia gorere bona ia hegeregere lasi Abesaloma ia koua totona. Ena be Dirava ese Davida ena kara dika ia gwauatao, to Davida be Bataseba ida ia karaia kara dikana bona edia kerere dainai ia vara dika ia laloaboio lasi. (2 Sam. 12:7-14) To King Davida ia diba Dirava ese ena gorere negana ai ia do ia durua. Oi laloa Davida ia ura Dirava ese hoa dalanai iena gorere do ia hanamoa, a?

9. (a) Iehova ese King Hesekaia dekenai dahaka ia karaia? (b) Davida ia ura Iehova ese ia totona dahaka do ia karaia?

⁹ Lagani haida murinai, King Hesekaia be “gorere ia davaria, bona kahirakahira ia mase” neganai, Dirava ese iena gorere amo ia hanamoa bona lagani 15 lalonai ia mauri. (2 Kin. 20:1-6) Davida ia guriguri lasi Dirava ese iena gorere be hoa dalanai ia hanamoa totona. To ia ura Iehova ese ia do ia durua, ogogami taudia ia laloa tauna ia durua hegeregerena. Dirava ese Davida ena kara dika ia gwauatao dainai, ia ese Dirava ia noia ia do ia hagoadaia bona durua bona iena tauanina be sibona ia hanamoa lou diba. (Sal. 103:3) Ita danu be unai bamona ita karaia diba.

10. Tropimo bona Epafrodito edia sivarai amo dahaka ita dibaia?

¹⁰ Aposetolo edia negai, ena be aposetolo Paulo bona ma haida be gorere idia hanamoa diba, to Keristani taudia ibounai be hoa dalanai edia gorere amo idia namo lasi. (Kara 14:8-10 duahia.) Hegeregere, “Pobelio ena tamana be ia fiva bona ia rara kukuri” neganai, aposetolo Paulo ese hoa dalanai ena gorere ia hanamoa. Paulo “ia guriguri, bona ena imana be ia latanai ia atoa bona ia hanamoa.” (Kara 28:8) To Paulo ese idia gorere taudia ibounai ia hanamoa lasi. Hegeregere, misinari gaukarana lalonai, iena turana ta, Tropimo, be ia ida ia lao. (Kara 20:3-5, 22; 21:29) Ia gorere neganai, Paulo ese ena gorere ia hanamoa lasi. To Mileto dekenai ia rakatania, ia namo lou totona. (2 Tim. 4:20) Paulo ena turana ma ta, Epafrodito, “ia gorere bona kahirakahira ia mase” neganai, Baibel ia gwau lasi Paulo ese hoa dalanai ia hanamoa.—Fili. 2:25-27, 30.

11, 12. Luka be dahaka gaukara ia karaia, bona edena dala ai Paulo ia durua?

¹¹ Luka be doketa tauna, bona Paulo ia bamoa. (Kol. 4:14; Kara 16:10-12; 20:5, 6) Edia misinari laolao lalodiai, Paulo bona ma haida idia gorere neganai, reana ia ese idia ia durua. (Gal. 4:13) Iesu ena hereva hegeregerena, “idia gorere taudia sibona” be doketa idia tahua.—Luka 5:31.

¹² Luka be doketa tauna, ia be medikol heduruna ia henia kava tauna ta lasi. Luka ese ena doketa treinini ia abia gabuna bona negana be Baibel ese ia gwauraia lasi. To ia gwau Paulo ese Luka ena hanamoa herevadia be Kolose taudia dekenai ia siaia. Unai ese ia hahedinaraia, Luka be reana Kolose kahirakahira ia noho taoni, Laodikea, ai ia noho medikol sikuli dekenai ia lao. Danu, Luka ese ena Evanelia bukadia bona Kara bukana ia torea neganai, ia ese medikol herevadia ia gaukaralaia. Bona ia be doketa tauna dainai, Iesu ese taunimanima edia gorere ia hanamoa edia sivarai momo ia torea.

13. Bema ta ese iseda gorere dainai heduru ia henia, dahaka ita laloatao be namo?

¹³ Hari iseda negai, iseda tadikaka bona taihu ese hoa dalanai iseda gorere idia hanamoa diba lasi. To idia ura ita idia durua dainai, ita dekenai heduru hereva idia henia. Momokani, idia henia heduru hereva haida be mai edia namo. Hegeregere, Timoteo ese ia inua ranuna be ia namo lasi dainai ena bogana ia hisihisi, bona Paulo  ese ia hamaoroa wain sisina do ia inua. * (1 Timoteo 5:23 duahia.) To namona be ita naria namonamo. Reana tadikaka ta be ita do ia doria muramura ta do ita inua eiava herbs ita abia o aniani ta ita ania eiava ania lasi totona. Reana ita do ia hamaoroa ena varavara ta be unai ia karaia dainai ena gorere ia ore. To reana unai dala be ita dekenai do ia gaukara lasi. Namona be ita laloatao, ena be taunimanima momo ese muramura idia gaukaralaia, to dika bada ia havaraia diba.—Aonega Herevadia 27:12 duahia.

14, 15. (a) Edena bamona taudia dainai ita naria namonamo be namo? (b) Edena dala ai Aonega Herevadia 14:15 ese ita ia durua?

¹⁴ Ita ibounai ita ura ita noho namonamo bona mai moale ida Dirava ena hesiai gaukara ita karaia. To ita be goevadae lasi dainai, nega ta ta ai ita gorere. Oibe, ita gorere neganai, reana iseda gorere hanamoa dalana be idauidau, bona ita sibona ese unai ita abia hidi diba. To madi, taunimanima bona kampani haida ese muramura idauidau idia hoihoilaia, bona idia gwau unai ese gorere do ia hanamoa. Unai bamona idia karaia badina idia ura moni bada idia abia. Reana do idia gwau momo ese inai muramura idia gaukaralaia bona edia gorere ia ore. Momokani bema ita gorere, reana do ita ura gau idauidau ita tohoa, ita namo bona mauri daudau totona. To namona be Dirava ena Hereva lalonai ia noho sisibana ita laloatao: “Mai ena lalona kehoa lasi tauna ese, hereva ibounai ia hamomokania noho, to laloa kehoa tauna ese, iena raka dalana ia laloa namonamo noho.”—Aon. 14:15.

¹⁵ “Laloa kehoa tauna” be do ia naria namonamo, bema heduru herevana ia henia tauna be medikol sikuli ta dekenai ia lao lasi. Reana sibona do ia nanadaia: ‘Ia gwau inai muramura, herbs, eiava aniani ese taunimanima ia durua, to iena hereva be haida ese idia hamomokania, a? Ena be unai muramura eiava herbs ese ma haida ia durua, to edena bamona do lau diba unai ese lau do ia durua danu? Egu gorere dainai ma haida do lau nanadaia eiava doketa taudia edia heduru do lau tahua, a?’—Deu. 17:6.

16. Iseda gorere dainai abia hidi ita karaia neganai, dahaka ita laloa be namo?

¹⁶ Dirava ena Hereva ia gwau: “Inai nega oromana lalonai do ita noho mai laloa maoromaoro . . . ida.” (Tito 2:12) Bema ta ese gorere hanamoa dalana ta ia gwauraia bona ita daradara, namona be do ita “laloa maoromaoro” eiava laloa namonamo. Oi ia hereva henia tauna ese unai muramura eiava herbs ena gaukara dalana ia hahedinaraia namonamo, a? Doketa taudia momo idia abia dae inai muramura ese ta ena gorere ia hanamoa diba, a? (Aon. 22:29) Reana ta ese oi ia hamaoroa gabu daudauna ta ai gorere hanamoa dala matamatana idia davaria bona doketa taudia be unai idia do diba lasi. To idia davaria gauna ese gorere ia hanamoa diba, a? Reana haida do idia gwau inai muramura be siahu ta eiava hehuni gauna ta amo idia karaia. Unai ese dika ia havaraia diba, badina Dirava ese ita ia sisiba henia “meamea karadia idauidau” bona mase taudia edia lauma hereva henia karana ita dadaraia be namo.—Lev. 19:26; Deu. 18:10-12.

17. Ita ibounai be dahaka ita ura?

¹⁷ Aposetolo edia negai, hakaua oreana ese kongrigeisen ta ta dekenai mai anina  bada revarevana idia siaia. Unai revareva ai, Keristani taudia ese idia dadaraia gaudia idia herevalaia, dokonai inai hereva idia torea: “Bema unai gaudia umui dadaraia, namo do umui davaria. Bamahuta!” (Kara 15:29) Gado ma haida ai, inai hereva “bamahuta” idia hahanaia “namo do umui davaria.” Unai hereva idia gwauraia taunimanima idia bamahuta henia totona, unai ese ia hahedinaraia ita ibounai ita ura do ita namo, unai amo Iehova ita hesiai henia diba.

18, 19. Tanobada matamata ai, dahaka do ita moalelaia?

¹⁸ Ita ibounai be goevadae lasi dainai, nega ta ta ai ita gorere diba. Bona ita gorere neganai, Iehova be hoa dalanai ita do ia hanamoa lasi. To, Apokalupo 22:1, 2 ese ia hahedinaraia Dirava ese ita ibounai be iseda gorere idauidau amo do ia hanamoa momokani. Aposetolo Ioane ese matahanai ta amo ia “mauri ranuna ena sinavai” bona “mauri audia idia gini” ia itaia, bona “unai au edia raurau be bese idauidau hanamoa totona.” Unai be hari eiava vaira nega ai do ita abia herbs ta ia herevalaia lasi. To ia be Iehova ese Iesu amo abidadama taudia dekenai mauri hanaihanai ia henia karana ia herevalaia.—Isa. 35:5, 6.

¹⁹ Unai vaira nega namona ita naria noho lalonai, ita diba ena be ita gorere, to Iehova be ita ta ta ia laloa bada. Ita diba momokani, iseda Dirava ese gorere negadiai ita do ia durua, Davida dekenai ia karaia bamona. Bona Davida hegeregerena do ita gwau: “Oi ese lau do oi durua, badina be lau ese kara maoromaoro lau karaia noho. Oiemu vairana dekenai, oi ese lau do oi haginia noho, ela bona hanaihanai.”—Sal. 41:12.