Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

Dokona ia mai neganai, dahaka gaudia haida do idia ore?

Do idia ore gaudia haida be hari idia lohia gavamani, tuari bona kara gageva, Dirava bona taunimanima idia koia tomadiho oreadia, bona Dirava idia badinaia lasi taudia.—7/1, rau 3-5.

Esekiela bukana ese ia gwauraia Magoga tauna Goga be daika?

Ia hahedinaraia inai ladana Magoga tauna Goga be Satani ia herevalaia lasi, to idia haboua tanobada besedia ia herevalaia. Hisihisi badana ia matamaia murinai, unai besedia do idia ura Dirava ena taunimanima idia hadikaia ore.—5/15, rau 29-30.

Iesu ese ia karaia hoa karadia ese edena dala ai iena hariharibada karana idia hahedinaraia?

Kana, Galilea ai, headava aria ta dekenai Iesu ese hodu 6 lalonai ia noho ranu be wain ai ia halaoa. Nega ma ta ai, Iesu be hoa dalanai taunimanima 5,000 mai kahana ia ubudia. (Mat. 14:14-21; Ioa. 2:6-11) Unai nega rua ai, ia ese iena Tamana ena hariharibada karana ia tohotohoa.—6/15, rau 4-5.

Babulonia Badana idia hadikaia neganai, tomadiho koikoi taudia ibounai do idia mase, a?

Lasi. Sekaraia 13:4-6 ese ia hahedinaraia dubu taudia haida be edia tomadiho daladia do idia rakatania, bona idia gwau idia be tomadiho koikoi taudia lasi.—7/15, rau 15-16.

Keristani tauna be dahaka gaudia haida ia laloa noho diba?

Unai gaudia haida be Iehova ena havaraia gaudia, Dirava ena hereva, guriguri ena hahenamo, bona mauri davalaia boubouna.—8/15, rau 10-13.

Mero o kekeni ese edena dala ai hebamo dikadia ia dadaraia diba?

Dirava ena taravatu idia badinaia lasi taudia dekenai kara namodia ita hahedinaraia. To Dirava ena taravatu ia badinaia lasi mero o kekeni ita tura henia be kerere. (1 Kor. 15:33)—8/15, rau 25.

Edena dala ai Petero ena abidadama ia manoka, to ena abidadama ia hagoadaia?

Abidadama dainai Petero be davara latanai Iesu dekenai ia raka lao. (Mat. 14:24-32) To Petero be lai badana ia itaia neganai, ia gari. Bena Iesu ia itaia bona ena heduru ia abia dae.—9/15, rau 16-17.

Mareta ena sivarai amo dahaka ita dibaia?

Mareta be aniani badana ia hegaegaelaia totona ia gaukara. To Iesu ia gwau, iena taihuna be iena hahediba herevadia ia kamonai karana amo gau namona ia abia hidi. Namo lasi anina lasi gaudia ese ita idia koua Dirava ena hesiai gaukara ita karaia totona.—10/15, rau 18-20.