MANI oi piksaia: Adorahi ta ai oi be dala ai oi raka lao noho. Ena be dina ia diho vadaeni, to oi diba do oi boio lasi badina oi be tosi namona ta oi dogoatao. Tosi amo emu raka gabuna oi hadiaria neganai, emu vaira kahanai idia noho gaudia ibounai oi itaia namonamo diba. Bona tosi ena diari be emu vaira kahana dekenai oi poinia lao neganai, ena diari ese vaira kahana ibounai ia hadiaria.

Baibel be unai tosi bamona. Atikol ginigunana ai ita herevalaia hegeregerena, Dirava ena Hereva ese ita ia durua diba ita vairanai idia noho gaudia ita itaia totona, unai gaudia be, inai tanobada dikana ai dina ta ta ai ita davaria hekwakwanai o metau. To unai sibona lasi. Baibel ese eda vaira negana ai do idia vara gaudia ia hadibaia danu, unai amo ita ia durua moale ena dala dekenai ita raka hanaihanai totona. (Salamo 119:105) Edena bamona unai ia karaia?

Mani Baibel ese ita ia durua dala rua ita herevalaia, unai amo vaira negana ai do idia vara gau namodia ita laloa noho: 1 Ita ia hadibaia eda mauri be mai ena badina, bona 2 ita ia hadibaia edena dala ai ita ia havaraia Diravana ita tura henia hanaihanai diba.

Baibel ena sisiba namodia ese ita idia durua diba iseda hekwakwanai o metau idauidau ita hanaia totona. Baibel be sibona eda hekwakwanai ita haheaukalaia dalana sibona ia hadibaia lasi, to danu, ita ia hagoadaia ma haida edia namo ita laloa totona. Unai amo ita diba eda mauri be mai badina korikori.

Mani inai hakaua herevana ita laloa, ia gwau: “Henia kara ena moale be bada, to abia kara ena moale be maragi.” (Kara 20:35) Oi ese ta dekenai dabua, aniani, o moni oi henia negana ta oi laloatao, a? Eiava reana ta ese ena metau ia herevalaia neganai, oi kamonai. Unai nega oi laloatao, a? Unai bamona oi karaia neganai, oi moale, ani?

Idia dabu taudia ita durua neganai, ita moale bada. Buka torea tauna ta ia gwau: “Bema dabu tauna  oi durua neganai, gabeai do oi abia gauna ese oi henia gauna do ia hereaia​—to namona be dabu taudia oi durua, davana abia totona lasi.” Bema mai moale ida haida ita durua, ena be idia hegeregere lasi ita henia gauna ena davana idia henia lou totona, to ahuna do ita abia. Bona gau badana be haida edia namo ita laloa bada. Laloatao, ita be ita ia havaraia Diravana ida ita gaukara hebou noho. Bona bema unai bamona kara namona ita hahedinaraia neganai, Dirava ese emu davana namona do ia henia lou. (Aonega Herevadia 19:17) Ia be ogogami taudia dekenai ita henia gaudia ia laloa bada, bona ia gwauhamata vaira negana ai tanobada paradaisona ai mauri hanaihanai do ita abia. Unai be davana hereadaena!​—Salamo 37:29; Luka 14:12-14. *

Baibel ese ita ia hadibaia gauna badana be inai, bema Dirava momokani, Iehova, ita tomadiho henia, eda mauri be mai badina. Iena Hereva ese ita ia hagoadaia ia ita hanamoa, ita matauraia, bona ia ita badinaia totona. (Hadibaia Tauna 12:13; Apokalupo 4:11) Unai bamona ita karaia neganai, ita ia havaraia Diravana ita hamoalea. Dirava ese ita ia hamaoroa: “Do oi aonega, vadaeni do lau moale.” (Aonega Herevadia 27:11) Laloatao​—Baibel ena hakaua herevadia hegeregerena disisen namodia ita karaia neganai, iseda lalokau guba Tamana ia moale. Dahaka dainai? Badina ia be ita ia laloa bona ia ura ita badinaia dala amo namo ita davaria. (Isaia 48:17, 18) Momokani, mai anina bada gauna be ita ese gau iboudiai ia biagua King ita tomadiho henia bona ita hamoalea!

Danu Baibel ese ita ia hadibaia ita ia havaraia Diravana ita tura henia namona totona. Baibel ia gwau: “Dirava kahirakahira do umui lao bona ia be umui kahirakahira do ia mai.” (Iamesi 4:8) To nega haida ita laloa, Siahu Ibounai Diravana ita tura henia be auka. To Baibel be ia gwau, bema ‘Dirava ita tahua,’ vadaeni ‘ia do ita davaria momokani,’ badina “ia be ita ta ta amo ia noho daudau lasi.” (Kara 17:27) Baibel ese ita ia hagoadaia Dirava ena turana ai ita lao totona, badina iseda vaira nega ai hahenamo do ita abia. Edena dala ai?

Mani oi laloa: Herevana dahaka ita karaia, ita ibounai be nega ta do ita mase danu. (1 Korinto 15:26) To, Dirava be noho hanaihanai Diravana. Ia be ia mase diba lasi, unai dainai ia ura ena turadia danu do idia noho hanaihanai. Iehova ia ura idia tahua noho taudia be do idia mauri hanaihanai badina Baibel ia gwau: “Namona be idia noho namonamo ela bona hanaihanai!”​—Salamo 22:26.

Edena dala ai Dirava ita tura henia hanaihanai diba? Iena Hereva, Baibel, dekenai ena sivarai o kara oi stadilaia noho. (Ioane 17:3; 2 Timoteo 3:16) Dirava oi noia oi ia durua Baibel oi lalopararalaia totona. Baibel ese ita ia hagoadaia bema aonega totona Dirava ita noia, ia ese aonega do ia henia. * (Iamesi 1:5) Namona be oi dibaia gaudia oi badinaia, unai amo Dirava ena Hereva be lamepa bamona, oi ia hakaua noho bona emu dala do ia hadiaria noho hari ela bona hanaihanai.​—Salamo 119:105.