BROOKINGS, South Dakota, U.S.A. ai, daba ena lai keruma ia toa neganai, lau diba kahirakahira gabu be do ia keru momokani. Unai dina ai, ai haida be animal edia aniani haboua rumana lalonai ai noho, unai ruma hasiahua gauna be lasi dainai, ai keru bada. Ai be animal edia ranu atoa mauana kahirakahira ai gini, bona unai maua lalonai ia noho ranuna be ia keru bada! Unuseni ai noho ena badina mani umui dekenai lau gwauraia.

Lau be March 7, 1936 ai lau vara, natudia 4 amo lau be ginigabena. Bona South Dakota ena ist kahanai ai noho. Emai famili lalonai animal naria gaukarana be mai anina bada, to unai be mai anina bada gauna momokani lasi. Lauegu tama sina be lagani 1934 ai idia bapatiso. Idia ese iseda guba Tamana, Iehova, dekenai edia mauri idia gwauhamatalaia, unai dainai edia mauri lalonai Dirava ena ura idia atoa guna. Emai kongrigeisen maragina Conde, South Dakota ai, egu tamana, Clarence, bona gabeai egu vavana, Alfred, be elda orea ena kodineita ai ia lao (unai negai idia gwauraia kampani naria tauna).

Emai famili be hanaihanai Keristani heboudia dekenai ai lao, bona ruma-ta-ruma-ta gaukara amo ma haida dekenai Baibel ena helaro namona ai herevalaia. Lauegu tama sina edia haheitalai bona edia hadibaia karana ese ai ia durua bada. Lau bona egu taihuna emai mauri lagani be 6 neganai, Basileia pablisa taudia ai ai lao. Lagani 1943 ai, Tiokratik Haroro Sikuli lalonai lau vareai, unai nega ai unai sikuli be iseda hebou ena kahana ai ia lao.

Hebouhebou badadia bona maragidia dekenai ai lao. Lagani 1949, Sioux Falls, South Dakota dekenai ai karaia hebouhebouna ai, Tadikaka Grant  Suiter, ia be vadivadi tadikakana, ese tok ia henia. Unai tok lau do laloatao noho, ena hereva kwarana be “Inai Tanobada Ena Dokona be Kahirakahira!” Unai tok lalonai, ia ese edia mauri idia gwauhamatalaia vadaeni Keristani taudia ia hagoadaia, Dirava ena Basileia ena sivarai namona idia harorolaia totona. Unai ese lau ia hagoadaia dainai egu mauri be Iehova dekenai lau gwauhamatalaia. Brookings dekenai idia karaia sekit hebouhebou ma ta ai lau bapatiso, matamanai lau herevalaia aniani haboua rumana lalonai. November 12, 1949 ai, lau bona ma taudia toi be animal edia ranu atoa mauana lalonai ai bapatiso.

Bena painia gaukara be egu tahua gauna ai lau halaoa. January 1, 1952 ai, painia gaukara lau matamaia, unai nega ai egu mauri lagani be 15. Baibel ia gwau: “Aonega tauna danu ia raka hebou noho tauna, be do ia aonega.” (Aon. 13:20) Oibe, egu famili ai aonega taudia be momo bona idia ese lau idia durua lau painia totona. Lauegu vavana, Julius, ena mauri lagani be 60, be egu painia turana. Ena be emai mauri laganidia be idau, to haroro gaukara ai moalelaia bada. Ia amo gau momo lau dibaia, bona unai ese lau ia durua bada. Daudau lasi Dorothy ia painia matamaia danu.

Egu matamata negana amo, egu tama sina ese vaia sekit taudia bona edia adavadia idia boiria ai ida idia noho totona. Tadikaka Jesse bona taihu Lynn Cantwell amo heduru bada lau abia. Momokani, edia hagoadaia herevadia dainai, painia gaukara lau matamaia. Idia ese lau idia laloa bada dainai, mai ura bada ida tiokratik tahua gaudia lau atoa. Emai gabu kahirakahira idia noho kongrigeisen idia vadivadi henia neganai, nega haida lau idia boiria idia lau bamoa totona. Unai negadia lau moalelaia bona goada lau abia!

Bud Miller bona ena adavana, Joan, be gabeai sekit gaukara idia karaia. Unai nega ai, egu mauri lagani be 18 bona ami gaukara totona lau idia boiria. Ena be ami ofesa taudia be unai idia karaia, to Iesu ese ena murinai idia raka taudia dekenai ia henia hahegani lau laloatao. Unai dainai politikol karadia amo lau gini siri. Bona lau ura Basileia ena sivarai namona lau harorolaia. (Ioa. 15:19) Unai dainai ami ofesa lau hamaorodia lau be haroro tauna ta.

Lau moale badina ami ofesa itaia totona lau lao neganai, Tadikaka Miller be lau ia bamoa. Ia be hereva momo tauna bona ia gari lasi. Oibe, ia be  egu badibadinai ia noho dainai, lau gari lasi! Ami ofesa taudia ida lau hebou murinai, lau idia gwauraia haroro naria tauna, unai be lagani 1954 ena siahu negana ai ia vara. Unai ese dala ia kehoa tiokratik tahua gauna ma ta lau atoa totona.

Gabeai Betele gaukara totona lau idia boiria, unai nega ai idia gwauraia Watchtower Farm, unai be Staten Island, New York ai. Unuseniai lagani toi lau gaukara. Bona ekspiriens namodia lau davaria, badina aonega taudia momo lau hedavari henia bona idia ida lau gaukara.

Staten Island ena farm ai, reidio steiseni WBBR ia noho danu. Unai reidio steiseni be Iehova ena Witnes taudia ese lagani 1924 ia lao 1957 ai idia gaukaralaia. Betele taudia 15 ia lao 20 sibona be unai farm ai idia gaukara. Ai momo be matamata bona gaukara diba namonamo lasi. To horoa tadikaka burukana, Eldon Woodworth, be ai ida ia gaukara. Bona ia be aonega tauna ta. Ia ese tama ta bamona ai ia kara henia bona unai ese ai ia hagoadaia. Ma haida edia kerere ai haheaukalaia be auka negadiai, Tadikaka Woodworth be ai ia hamaoroa, “Iehova ese ia karaia noho gaudia ibounai be namo herea, ena be ia ese goevadae lasi taudia ia gaukaralaia.”

Tadikaka Frederick W. Franz ese ai ia vadivadi henia neganai, ai moale. Ia be Baibel ia diba namonamo bona ai ta ta ia laloa bada, unai ese ai ia hagoadaia. Tadikaka Harry Peterson be ai totona aniani ia nadua; unai ladana ai gaukaralaia, badina iena ladana ginigunana be auka—Papargyropoulos. Ia danu be horoa tadikakana bona haroro gaukara ia goadalaia. Tadikaka Peterson ese iena Betele gaukara ia karaia namonamo, bona haroro gaukara ia reaia lasi. Hua ta ta ai iseda magasin handred momo ia hariharilaia. Iena diba Baibel dekenai be bada danu, bona emai henanadai momo ia haerelaia.

Uma amo ai abia aniani ai hegaegaelaia bona kavabu lalonai ai udadia. Lagani ta lalonai, Betele famili totona au huahua bona uma aniani be kavabu 45,000 bamona lalonai ai udadia. Lau moale badina lau be aonega taihuna, Etta Huth, ida lau gaukara. Kavabu lalonai ai udaia aniani ibounai ena recipe be ia ese ia torea. Kavabu lalonai aniani udaia negana ai, kongrigeisen amo  taihu haida idia mai heduru idia henia totona, bona Etta ese idia dekenai gaukara karaia dalana ia hadibaia. Ena be Etta be unai gaukara dekenai heduru bada ia henia, to ia ese farm ai gaukara idia naria tadikaka ia matauraidia. Momokani, tiokratik dalanai kwara dagi matauraia karana dekenai ia be haheitalai namona.

Heduru henia totona ia mai taihu matamata ta be Angela Romano. Ia be hereva momokani ia dibaia matamaia neganai, Etta ese ia ia durua. Betele ai lau gaukara noho lalonai, aonega taihu ma ta lau hedavari henia, bona lagani 58 lalonai ia ida lau raka hebou. April 1958 ai, lau bona Angie ai headava, bona hesiai gaukara ena hahenamo momo ai moalelaia hebou. Idia hanaia laganidia lalonai, Angie be Iehova ia badinaia momokani, bona unai ese emai headava ia hagoadaia. Ena be dahaka hekwakwanai ai davaria, to ia dekenai lau tabekau diba.

Lagani 1957 ai, Staten Island ena reidio steiseni WBBR idia hoihoilaia neganai, lau be nega sisina lalonai Brooklyn Betele dekenai lau gaukara. Bena lau bona Angie ai headava murinai, Betele lau rakatania bona lagani toi bamona lalonai, Staten Island dekenai painia gaukara ai karaia. Nega sisina lalonai, reidio steiseni ena biaguna matamata totona lau gaukara, unai steiseni idia gwauraia WPOW.

Lau bona Angie be kohu momo ai tahua lasi, unai amo ai idia siaia gabudia dekenai ai lao diba. Bena lagani 1961 ai, Falls City, Nebraska dekenai ai idia siaia, spesel painia gaukara ai karaia totona. Daudau lasi murinai, Basileia Hesiai Gaukara Sikuli dekenai ai idia boiria, unai be South Lansing, New York dekenai, unai sikuli be hua tamona lalonai ai karaia. Unai sikuli ai moalelaia bona ai laloa Nebraska dekenai do ai giroa lou. To asainmen matamata ai abia—Cambodia dekenai misinari gaukara do ai karaia! Unai be Southeast Asia ai, ia be hairai gabuna, bona regerege bada gabuna danu, ena aniani ena bonana be namo herea, guna unai ai mamia lasi. Ai ura bada unuseniai sivarai namona ai harorolaia.

To, politikol dalanai heiriheiri ia vara dainai, South Vietnam dekenai ai lao. Lagani rua lalonai lau gorere bada dainai, emai hanua dekenai ai giroa lou. Unuseni ai noho ela bona egu goada lau abia lou, bena ful-taim hesiai gaukara ai karaia matamaia lou.

March 1965 ai, sekit gaukara ai karaia matamaia. Lagani 33 lalonai, lau bona Angie be sekit bona distrik gaukara ai moalelaia—hebouhebou ena gaukara idauidau danu. Hebouhebou negadia lau moalelaia, unai dainai mai moale ida hebouhebou gaudia hegaegaelaia totona heduru lau henia. Lagani haida lalonai, New York City dekenai ai noho, bona Yankee Steidiam dekenai hebouhebou momo ai karaia.

Ful-taim hesiai taudia ma haida hegeregerena, lau bona Angie ese ai abia asainmen haida ai moalelaia, to idia be mai edia hekwarahi danu. Hegeregere, lagani 1995 ai, lau idia noia Hesiai Gaukara Hadibaia Sikulina do lau hadibaia. Lagani  toi murinai, Betele dekenai ai idia boiria. Lau moale bada, badina lagani 40 gunanai, egu ful-taim hesiai gaukara be unuseniai lau hamatamaia. Haroro Naria Dipatmen dekenai lau gaukara sisina bona sikuli momo lau hadibaia. Lagani 2007 ai, Hakaua Oreana ese Betele ai idia karaia sikuli be Tiokratik Sikuli Dipatmen henunai ia atodia, bona lagani haida lalonai lau ese unai dipatmen lau naria.

Vanegai laganidia lalonai tiokratik ena sikuli idauidau dekenai gau momo idia idau. Lagani 2008 ai, Kongrigeisen Elda Taudia Edia Sikuli ia matamaia. Lagani rua murinai, Patterson bona Brooklyn Betele ai, elda taudia 12,000 mai kahana be unai sikuli idia abia. Gabu ma haida ai unai sikuli idia karaia danu, bona treinini idia abia tadikakadia ese idia hadibaia. Lagani 2010 ai, Hesiai Gaukara Hadibaia Sikulina ena ladana idia haidaua bona idia gwauraia Singul Tadikaka Edia Baibel Sikuli, bona sikuli matamata idia hamatamaia danu, Keristani Headava Taudia Edia Baibel Sikuli unai.

Lagani 2015 ena hesiai laganina ai, unai sikuli rua idia atoa hebou bona idia gwauraia Basileia Evanelia Sikuli. Headava taudia bona singul tadikaka o taihu be unai sikuli dekenai idia lao diba. Tanobada hegegemadai idia noho tadikaka taihu idia moale, badina idia kamonai unai sikuli be brens idauidau ai do idia karaia. Tiokratik sikuli idauidau idia karaia noho, bona lau moale badina unai sikuli idauidau dekenai idia mai taudia momo lau hedavari henia diba.

Lauegu mauri lau laloa lou neganai,—lau do bapatiso lasi negana amo ema bona hari—Iehova lau tanikiu henia, badina aonega taudia ese lau idia durua dainai, hereva momokani ena dala dekenai lau raka. Ena be edia mauri lagani be bada o egu tano taudia lasi, to idia be abidadama goada taudia. Edia kara bona hereva amo idia hahedinaraia idia be Iehova idia lalokau henia bada. Iena orea lalonai, aonega taudia momo idia noho bona idia ida ita raka hebou diba. Lau be unai lau karaia bona namo bada lau davaria.