Baibel be Evolusen Lalohadaina Ia Hamomokania, A?

EVOLUSEN lalohadaina hegeregerena, Dirava ese animal amo taunimanima ia havaraia, a? Ia ese gaigai maragidia be gwarume ai ia halaoa, gwarume be huala ai ia halaoa, bena dokonai, maniki be taunimanima ai ia lao, a? Saiens taudia bona tomadiho gunalaia taudia haida be evolusen lalohadaina bona Baibel idia abia dae. Idia gwau Baibel bukana Genese ai idia torea herevadia be gori sibona. To, oi sibona oi nanadaia, ‘Baibel be evolusen lalohadaina ia hamomokania, a?’

Ita vara dalana ita diba neganai, do ita laloparara ita be daika, edeseni do ita lao, bona edena bamona ita noho be namo. Danu, do ita diba dahaka dainai Dirava be hisihisi ia koua lasi bona vaira neganai Dirava be dahaka namo do ia havaraia taunimanima totona. Bema eda Havaraia Tauna ita diba lasi, Ia do ita tura henia be auka. Unai dainai, Baibel ai taunimanima idia vara dalana, bona taunimanima edia noho dalana hari bona vaira negana ai ita tahua be namo. Unai amo do ita diba Baibel be evolusen lalohadaina ia hamomokania eiava lasi.

Tau Tamona Ia Noho Neganai

Evolusen idia abia dae taudia idia gwau, animal oreana be metairametaira idia senisi ela bona taunimanima ai idia lao, bona idia ese Adamu ia noho lalohadaina idia hakoikoia. To, Baibel ena hereva be idau. Baibel ia gwau, ita ibounai be tau tamona, Adamu amo ita vara. Danu, ia hahedinaraia, Adamu be tau korikorina. Badina Adamu ena adavana bona natudia haida edia ladana ia gwauraia. Ia hahedinaraia Adamu be dahaka ia karaia, dahaka hereva ia gwauraia, edena gabu ai ia noho, bona edena negai ia mase. Iesu dekenai Adamu bona Heva edia sivarai be gori ta sibona lasi bona sikuli bada lasi taudia totona lasi. Iesu be diba bada tomadiho gunalaia taudia dekenai ia gwau: “Be, Buka Helaga umui duahia lasi, a? Ia torea, ‘Hamatamaia nega ia karaia neganai, Dirava ese tau bona hahine ia karaia?’ ” (Mataio 19:​3-5) Unai hereva ia gwauraia murinai, Iesu be Dirava ese Adamu bona Heva dekenai ia gwauraia herevana Genese 2:24 dekenai ia gwauraia.

Luka​​—⁠Baibel torea tauna bona idaunegai sivaraidia ia diba namonamo tauna ta​​—⁠be ia hahedinaraia Adamu be tau korikorina ta, Iesu bamona. Luka ia gwau Iesu tubuna be Adamu. (Luka 3:​23-​38) Danu, Paulo be taunimanima haida bona Greek sikuli badadia ai diba bada idia abia taudia ia hamaoroa: “Tanobada bona ena lalonai noho gaudia ibounai ia karaia Diravana be . . . rara tamona [eiava “tau tamona,” NW ] dekenai ia ese taunimanima bese ibounai ia karaia, bona tanobada ena kahana ibounai dekenai idia noho.” (Kara 17:​24-​26) Momokani, Baibel ese ia hahedinaraia goevagoeva, ita be “tau tamona” dekenai amo ita vara. Unai hereva be evolusen lalohadaina ia hamomokania, a?

Adamu be Goevadae Karana Ia Haboioa

Baibel ia gwau, Iehova ese ia karaia tauna ginigunana be goevadae. Oibe, Iehova be gau ibounai ia karaia namonamo Diravana. Baibel ia gwau: “Dirava ese taunimanima ia karaia, ia sibona ena laulau bamona . . . Bona Dirava ese ia karaia vadaeni gaudia ibounai ia itaia, bona momokani  idia be namo herea.” (Genese 1:​27, 31) Unai tau be edena bamona tauna?

Unai tau goevadaena be mai ena ura kwalimu, bona Dirava ena kara ia tohotohoa diba. Baibel ia gwau: “Dirava ese taunimanima ia karadia mai edia maoromaoro, to idia ese sibodia edia ura daladia idia tahua bona karaia dainai, edia mauri dala be ia auka.” (Hadibaia Tauna 7:​29) To Adamu ese Dirava ia gwau-edeede henia dainai, ia, ena natudia bona tubuna ibounai be goevadae lasi taudia. Unai dainai, nega momo ita be kara kereredia ita karaia, herevana ita ura kara namodia ita karaia. Paulo ia gwau: “Lau ura henia karadia be lau karaia lasi, bona lau ura lasi momokani karadia be lau karaia noho.”​​—⁠Roma 7:​15.

Baibel ena hereva hegeregerena, tau goevadaena be do ia mauri hanaihanai bona noho namonamo. Dirava ese ia gwauraia herevana be inai: Bema tau goevadaena, Adamu, ese Dirava ia gwau-edeede henia lasi, ia be do ia mase lasi. (Genese 2:​16, 17; 3:​22, 23) Iehova be tau ginigunana do ia gwauraia lasi “namo herea,” bema unai tau be do ia gorere o gwau-edeede. To ita diba ita goevadae lasi dainai iseda tauanina, Dirava ese hoa dalanai ia karaia gauna, be ia buruka o gorere ita davaria. Momokani, Baibel be evolusen lalohadaina ia hamomokania lasi. Hari inai negai, evolusen lalohadaina ia gwau taunimanima be animal amo idia mai. To, Baibel ia gwau ita be Adamu ena tubuna.

Danu, Baibel be Dirava ena kara ia herevalaia, bona unai ese evolusen lalohadaina ia hamomokania lasi. Bema evolusen lalohadaina bamona, Dirava ese animal amo taunimanima ia havaraia, anina be hari taunimanima idia gorere bona kara dika idia karaia be Dirava ena kerere danu. To, Baibel ia gwau Dirava be “Nadi Badana, iena gaukara be namo momokani. Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro. To umui be iena vairana dekenai umui kara dika noho. Umui be iena natuna taudia lasi, badina umui be mai emui miro.” (Deuteronomi 32:​4, 5) Ita gwau lasi hisihisi idia vara badina Dirava be animal amo taunimanima ia havaraia. Lasi, unai gaudia idia vara badina Adamu ia gwau-edeede neganai, ia, ena natuna bona tubuna ibounai be idia goevadae lasi. To hari, Iesu ita kikilaia be namo. Bona ita itaia Iesu ena sivarai be evolusen lalohadaina ia hamomokania eiava lasi?

Baibel Ena Hahediba Herevana Bona Evolusen Lalohadaina Oi Abia Dae, A?

“Keriso be ita dainai ia mase.” Unai be Baibel ena hahediba hereva badana ta. (1 Korinto 15:3; 1 Petero 3:18) Unai hereva ese evolusen lalohadaina ia hakoikoia ena badina ita lalopararalaia totona, namona be ita tahua guna, dahaka dainai Baibel ia gwau ita be kara dika taudia, bona kara dika ese ita dekenai dahaka ia havaraia.

Ita be kara dika taudia dainai, Dirava ena kara badadia hegeregere, lalokau bona hahemaoro goeva ita hahedinaraia namonamo lasi. Unai dainai, Baibel ia gwau: “Iboudiai idia kara dika vadaeni, bona iboudiai ese Dirava ena hairaina idia reaia vadaeni.” (Roma 3:​23, BHğ) Baibel ese ia hahedinaraia, kara dika be mase ia havaraia.  Korinto Ginigunana 15:56 ia gwau: “Mase ese iena hisihisi siahuna be kara dika dekena amo ia abia.” Danu, kara dika ese gorere ia havaraia. Iesu ese ia hahedinaraia, ita be kara dika taudia dainai ita gorere. Iesu be gorere tauna ia hamaoroa, “Oiemu kara dika be lau gwauatao vadaeni,” bona unai tau ena gorere ia ore.​​—⁠Mataio 9:​2-7.

Edena dala ai Iesu ena mase karana ese ita ia durua bada? Baibel ese Adamu bona Iesu Keriso be inai bamona ia herevalaia: “Taunimanima ibounai Adamu dainai idia mase vadaeni, unai bamona danu Keriso idia abidadama henia dainai ibounai do idia mauri.” (1 Korinto 15:22) Iesu ia mase neganai, unai be hegeregere Adamu amo ita abia hanai kara dikana ia hoia lou. Unai dainai, Iesu idia abidadama henia bona badinaia taudia ibounai be Adamu ia haboioa gauna, mauri hanaihanai unai, do idia abia.​​—⁠Ioane 3:​16; Roma 6:​23.

Oi itaia diba, Baibel be evolusen lalohadaina ia hamomokania lasi. To bema ita be inai hereva, “taunimanima ibounai Adamu dainai idia mase vadaeni,” ita abia dae lasi, vadaeni inai hereva, “Keriso idia abidadama henia dainai ibounai do idia mauri,” be edena bamona ita abia dae diba?

Dahaka Dainai Evolusen Lalohadaina ese Taunimanima Edia Lalona Ia Veria?

Baibel ese ia hahedinaraia, momo be evolusen lalohadaina do idia abia dae. Baibel ia gwau: “Negana do ia ginidae, taunimanima be hereva maoromaoro do idia ura lasi kamonai. Lasi momokani. To edia ura sibona do idia tahua. Idia ese idia ura henia hadibaia taudia momo do idia haboua. Vadaeni inai hadibaia taudia ese sivarai kavakava do idia gwauraia, unai taudia idia ura kamonai gaudia sibona. Oibe, hereva momokani do idia negea, to gori kavakava do idia kamonai henia.” (2 Timoteo 4:​3, 4) Evolusen lalohadaina be tomadiho ena hahediba herevana ta, ena be taunimanima be nega momo saiens herevadia idia gaukaralaia unai idia kikilaia totona. Unai hahediba herevana amo mauri ia vara dalana bona Dirava ia noho lasi lalohadaina idia hadibaia. Evolusen be taunimanima edia lalona ia veria dainai, taunimanima be sibona edia namo idia laloa bona Dirava idia dadaraia. Evolusen idia abia dae taudia momo idia gwau, idia be Dirava idia abia dae. To idia laloa Dirava be gau ibounai ia havaraia lasi, Dirava be taunimanima edia hisihisi ia koua lasi, bona Dirava be taunimanima do ia hahemaoro henia lasi. Evolusen lalohadaina be taunimanima “idia ura kamonai gaudia sibona.”

Nega momo, evolusen idia hadibaia taudia be hereva momokani idia gwauraia lasi, to ‘edia ura sibona idia tahua’​​—⁠reana idia ura evolusen lalohadaina idia abia dae saiens taudia ese idia abia dae. Profesa Michael Behe (lagani momo lalonai, tauanina ena sel edia gaukara idauidau ia stadilaia tauna) ia gwau, hadibaia taudia idia gwau sel be evolusen dalanai ia vara to edia hereva idia hamomokania dalana ta be lasi. Evolusen be unai sel maragimaragina amo ia hamatamaia diba, a? Profesa Behe ia gwau: “Saiens taudia be unai lalohadai idia abia dae lasi. Saiens ena buka eiava magasin badadia be evolusen lalohadaina​​—⁠sel be evolusen dalanai ia vara lalohadaina​​—⁠idia gwauraia lasi. . . . Darwin ena lalohadai​​—⁠sel be evolusen dalanai ia vara lalohadaina​​—⁠be koikoi.”

Dahaka dainai evolusen idia abia dae taudia be edia lalohadai idia hadibaia, herevana hamomokania dalana idia diba lasi? Behe ia gwau: “Taunimanima momo, ladana bada saiens taudia danu, idia ura lasi idia gwau siahu gauna ta, eiava Dirava, be gau ibounai ia havaraia.”

Pris bona pasto momo be evolusen idia hadibaia, badina idia ura idia hahedinaraia idia be aonega taudia. Aposetolo Paulo be Roma Keristani taudia ia tore henia neganai, ia be unai bamona taudia ia herevalaia danu. Paulo ia gwau: “Dirava ese edia dika davana ia henia noho, badina be iena kara be taunimanima dekena amo ia hunia lasi. Dirava sibona ese iena kara ia hedinaraia vadaeni idia ibounai dekenai. Dirava ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani. Inai bamona idia diba, badina  be edia matana dekenai Dirava ese ia karaia gaudia ibounai idia itaia vadaeni. Inai gaudia idia itaia dainai, idia be Dirava ena hunia gaudia idia kamonai diba danu. Unai dainai idia be dala lasi edia kerere idia hunia, bona ‘Lau diba lasi’ herevana idia gwauraia diba lasi. Idia ese Dirava idia diba vadaeni, to ia dekenai idia matauraia lasi, bona idia tanikiu henia lasi. Unai dainai edia laloa be ia kavakava vadaeni. Edia laloa be anina lasi, bona idia laloa maoro diba lasi. Idia hereva koikoi, idia gwau, ‘Ai be mai aonega.’ To idia be kavakava sibona.” (Roma 1:​19-​22) Unai hadibaia koikoi taudia ese ita ia koia lasi totona, dahaka ita karaia be namo?

Iseda Havaraia Tauna Ita Abidadama Henia Ena Badina

Baibel ese abidadama ena badina be inai bamona ia herevalaia: “Abidadama ena anina be inai bamona: Ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” (Heberu 11:⁠1) Momokani, Dirava ita abidadama henia badina gau momo ese idia hamomokania iseda Havaraia Tauna be ia noho. Bona Baibel be unai gaudia ia herevalaia.

Baibel torea tauna Davida ia gwau: “Oi lau tanikiu henia, badina mai hoa danu lau oi karaia.” (Salamo 139:14) Bema nega ita atoa Dirava ese iseda tauanina bona mauri gaudia ma haida ia karaia dalana ita stadilaia totona, ita be iseda Havaraia Tauna ena aonega karadia do ita moalelaia. Iseda tauanina lalonai idia noho gaudia tausen tausen idia gaukara hebou dainai ita mauri noho be hoa gauna. Danu, guba ena hisiu idauidau be taravatu ta ese ia hakaudia bamona dainai, idia be dala maorona ai idia gaukara namonamo. Davida ia gwau: “Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho.”​​—⁠Salamo 19:⁠1.

Baibel ese ia hamomokania Havaraia Tauna ia noho. Bema nega ita atoa Baibel bukadia 66 idia hamomokania heheni daladia, ena kara maoromaoro taravatudia, bona ena peroveta herevadia ita stadilaia totona, vadaeni do ita hamomokania Dirava be Baibel ia havaraia tauna. Danu, bema Baibel ena hadibaia herevadia ita lalopararalaia, do ita abia dae Baibel be iseda Havaraia Tauna ena Hereva. Hegeregere, bema Baibel amo hisihisi edia badina, Dirava ena Basileia, taunimanima edia vaira negana, bona moale davaria dalana oi diba, oi be Dirava ena aonega ia hahedinaraia dalana ta do oi itaia. Bona Paulo bamona do oi gwau: “Dirava ena namo bona iena hariharibada be bada bona bada herea, ani? Iena aonega bona iena laloa dobu be edena bamona ita tahua diba? Iena dala be daika ese do ia davaria diba?”​​—⁠Roma 11:⁠33.

Unai hamomokania gaudia oi stadilaia bona emu abidadama ia tubu daekau neganai, oi diba Baibel oi duahia neganai, oi be Havaraia Tauna oi kamonai henia unai. Ia gwau: “Lau ese tanobada lau karaia, bona taunimanima be lau ese lau havaraia tanobada latanai. Lauegu siahu dekena amo guba lau karaia. Lau ese dina, hua, bona hisiu lau naria noho.” (Isaia 45:12) Bema oi gaukara goada badina oi ura hahedinaraia Iehova be gau ibounai ia havaraia tauna, unai kara be do oi moalelaia momokani.

[Blurb on page 14]

Aposetolo Paulo be Greek aonega taudia ia hamaoroa: ‘Dirava ese tau tamona dekenai bese ibounai ia karaia’

[Blurb on page 15]

Evolusen lalohadaina ia gwau, taunimanima be animal amo idia mai. To, Baibel ia gwau ita be Adamu ena tubuna

[Blurb on page 16]

“Saiens taudia be evolusen lalohadaina​​—⁠sel be evolusen dalanai ia vara lalohadaina​​—⁠idia abia dae lasi”

[Blurb on page 17]

Iseda Havaraia Tauna ese ia karaia mauri gaudia ibounai ita hoalaia