Dirava Ena Basileia be Dahaka?

IESU ese ia harorolaia hereva badana be dahaka? Iesu ena hereva amo ia hahedinaraia, ia harorolaia momo gauna be Dirava ena Basileia. (Luka 4:​43) Iesu be taunimanima ia haroro henidia neganai, Basileia ia herevalaia momo. Kamonai taudia idia daradara, a? Iesu idia nanadaia Basileia be dahaka, a? Lasi. Evanelia bukadia lalonai unai bamona henanadai ta ia hedinarai lasi. Unai taudia be Dirava ena Basileia ena anina idia diba, a?

Iuda taudia ese idia gaukaralaia Buka Helagana ese ia hahedinaraia goevagoeva Basileia be dahaka bona dahaka do ia karaia. Hari inai negai, ita danu be Baibel ita stadilaia karana amo Basileia ita dibaia diba. Baibel ese ita dekenai Basileia ena point 7 ia hadibaia. Mani unai gaudia ita itaia. Point ginigunadia toi be Iesu ia do mai lasi negana bona ia mai negana lalonai idia noho Iuda taudia dekenai idia hedinarai. Ma point toi be Iesu eiava iena aposetolo taudia ese idia hahedinaraia. Point ginigabena be iseda nega ai ia hedinarai.

1. Dirava ena Basileia be gavamani korikorina ta bona do ia noho ela bona hanaihanai. Baibel ena peroveta herevana ginigunana ese ia hahedinaraia, Dirava be hamauria tauna ta do ia siaia abidadama taudia ia durua totona. Unai hamauria tauna eiava “garana” ese Adamu, Heva, bona Satani edia gwau-edeede karana amo ia vara hekwakwanai do ia haorea. (Genese 3:​15, BHğ ) Dirava ese King Davida dekenai unai “garana” eiava Mesia ese do ia karaia gauna ia herevalaia. Ia be Basileia ta do ia lohiaia. Inai gavamani be gavamani iboudiai amo do ia idau, badina do ia noho ela bona hanaihanai.​​—⁠2 Samuela 7:​12-​14.

2. Dirava ena Basileia ese taunimanima edia gavamani ibounai do ia kokia. Peroveta tauna Daniela ese matahanai lalonai guna amo ema bona hari idia lohia tanobada ena basileia badadia idauidau ia itaia. Unai matahanai ena dokona mani ita duahia: “Unai basileia namba 4 [basileia ginigabena] ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.” Dirava ena Basileia ese inai tanobada ena gavamani iboudiai​​—⁠mai edia tuari, hisihisi bona kara gageva​​—⁠do ia hadikaia ore vaitani. Daniela ena peroveta herevana ia hahedinaraia, Dirava ena Basileia be kahirakahira tanobada ibounai do ia lohiaia. (Daniela 2:​44, 45)  Ia be gavamani korikorina, bona tanobada hegegemadai ia sibona do ia lohia. *

3. Dirava ena Basileia ese tuari, gorere, hitolo bona mase danu do ia haorea. Baibel ena peroveta herevadia ese Dirava ena Basileia be tanobada dekenai do ia karaia gaudia idia hahedinaraia. Unai gavamani ese taunimanima edia gavamani idia karaia diba lasi gaudia do ia karaia. Mani oi laloa, tuari ena kohu ibounai do ia hadikaia ore! “Tuari be Dirava ese ia hadokoa noho, tanobada kahana ibounai dekenai.” (Salamo 46:⁠9) Gorere idauidau do idia ore, doketa taudia bona hospital be lasi. “Idia noho taudia ta ese do ia gwau lasi, ‘Lau be gorere.’ ” (Isaia 33:24) Doe, hitolo bona aniani namonamo lasi dainai idia vara gorere be lasi. “Koni momo herea, be tano dekenai do ia vara namonamo.” (Salamo 72:16) Mase dainai do idia noga ela bona daba rere ena kastom karadia be lasi, mase guria karana be lasi, gara gabudia be lasi, hospital mogi be lasi; bona lalohisihisi do ia ore. Dirava ese “mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.” (Isaia 25:⁠8) Oibe, mase, iseda inai tauna be do ia ore vaitani.

4. Dirava ena Basileia be mai ena Lohia Tauna, Dirava ese ia abia hidi. Mesia be sibona ia abia hidi lasi, eiava goevadae lasi taudia ese idia abia hidi lasi. To Iehova Dirava sibona ese ia abia hidi. Dagi ladadia Mesia bona Keriso ese unai idia hamomokania. Unai hereva rua edia anina be “Horoa Tauna.” Oibe, inai King be Iehova ese ia abia hidi gaukara badana ia karaia totona. Dirava ese inai bamona ia herevalaia, ia gwau: “Lauegu Hesiai Tauna, lau ese lau hagoadaia Tauna be inai, lau ese ia lau abia hidi, bona ia dekenai lau ura henia bada noho. Lau ese egu Lauma iena latanai lau atoa vadaeni, bona ia ese kota maoromaoro bona momokani, be bese ibounai dekenai do ia mailaia.” (Isaia 42:1; Mataio 12:​17, 18) Iseda Havaraia Tauna sibona ese ita do ia gunalaia Lohia Tauna namona ia abia hidi diba.

5. Dirava ena Basileia ena Lohia Tauna be taunimanima dekenai ia hahedinaraia ia be hegeregere ia lohia totona. Idia perovetalaia Mesia be Nasareta tauna, Iesu. Dirava ese ia gwauraia iduhu amo ia vara. (Genese 22:18; 1 Sivarai 17:11; Mataio 1:⁠1) Iesu be tanobada dekenai ia noho neganai, ia ese idaunegai idia gwauraia Mesia ena peroveta herevadia ia hagugurua. Guba amo gado ta ese ia hahedinaraia ia be Mesia. Edena bamona unai ia vara? Dirava be guba amo ia hereva, Iesu be iena Natuna; aneru idia hahedinaraia Iesu be idia perovetalaia Mesia; bona taunimanima momo vairanai Iesu ese hoa karadia momo ia karaia​​—⁠Dirava ena siahu amo unai gaudia ia karaia. * Iesu be ia karaia karadia amo ia hahedinaraia loulou, ia be edena bamona lohia tauna ai do ia lao. Ia be mai ena siahu taunimanima do ia durua totona, bona danu ia ura dikadika unai do ia karaia. (Mataio 8:​1-3) Ia be gari lasi bona manau tauna, sibona ia laloa bada lasi, to ma haida ia hebogahisi henidia. Tanobada dekenai ia noho ena sivarai be Baibel lalonai idia torea, ita ibounai ese ita duahia totona.

6. Dirava ena Basileia lalonai taunimanima 144,000 be Keriso ida do idia lohia. Iesu ia gwau haida, iena aposetolo taudia danu, be ia ida guba Basileia lalonai do idia lohia. Unai taudia ia gwauraia “orea maragi.” (Luka 12:32) Gabeai, matahanai amo aposetolo Ioane ia itaia unai orea maragi taudia edia namba be 144,000. Idia be guba dekenai gaukara namona do idia karaia, Keriso ida king bona hahelaga taudia ai do idia lao.​​—⁠Apokalupo 5:​9, 10; 14:​1, 3.

7. Dirava ena Basileia be hari guba dekenai ia lohia noho, bona ia hegaegae tanobada ibounai do ia lohiaia totona. Inai point namba 7 ita diba be moale bada gauna. Baibel lalonai gau idauidau ese idia hamomokania, Iesu be guba dekenai Basileia ena King dagina  ia abia vadaeni. Ia be hari guba dekenai ia lohia noho, bona kahirakahira tanobada do ia lohiaia bona peroveta hereva namodia do ia hagugurua. To, edena bamona ita diba momokani Dirava ena Basileia be hari ia lohia noho? Bona, edena negai tanobada do ia lohiaia?

[Footnotes]