Dirava Ena Basileia be Edena Negai Do Ia Mai?

“LOHIABADA e, inai negana be, basileia do oi henia lou Israela taudia dekenai, a?” (Kara 1:⁠6) Aposetolo taudia idia ura dikadika do idia diba Iesu be edena negai iena Basileia do ia haginia. Hari danu, ena be lagani 2,000 idia hanaia vadaeni, to taunimanima be idia ura dikadika idia diba: Dirava ena Basileia be edena negai do ia mai?

Iesu ena haroro gaukara lalonai ia be Basileia ia herevalaia momo dainai, reana ia ese unai henanadai ena haere ia herevalaia danu, ani? Oibe! Iesu be nega momo ena “lou mai” eiava “noho,” (NW ) ena nega ia herevalaia. (Mataio 24:37) Dirava ese Basileia ia haginia neganai, Keriso ena “noho” negana ia hamatamaia. Unai “noho” ena anina be dahaka? Baibel be Keriso ena noho negana ia herevalaia neganai, point 4 ia hahedinaraia. Mani, unai point 4 ita itaia.

1. Keriso ia mase bena nega daudau ia ore murinai, ena noho negana ia matamaia. Iesu be parabole ta ia herevalaia bona unai parabole lalonai ia sibona be lohia tauna ta bamona ia gwauraia. Ia gwau: “Lohia ta hanua daudau dekenai ia lao, iena basileia dekenai king dagina do ia abia, vadaeni inai murinai do ia giroa mai.” (Luka 19:12) Unai peroveta herevana be edena bamona ia guguru? Iesu ia mase bona ia toreisi lou murinai, “hanua daudau” dekenai ia lao, anina be ia be guba dekenai ia daekau. Iesu be parabole ma ta lalonai ia gwau, “nega daudau ia lao” murinai, ia be mai ena siahu bada ida King bamona do ia giroa mai.​​—⁠Mataio 25:⁠19.

Iesu be guba dekenai ia daekau murinai, Paulo ia gwau: “To Keriso ese, kara dika kokia totona, boubou gauna tamona sibona ia henia. Inai boubou gauna be mai ena siahu ela bona hanaihanai. Keriso ese unai bamona ia karaia murinai, Dirava ena idiba kahanai ia helai diho. Unuseni ia naria noho, ela bona Dirava ese ia idia tuari henia taudia be iena aena henunai do ia atodia.” (Heberu 10:​12, 13) Unai siri ese ia hahedinaraia, Iesu be guba dekenai ia daekau murinai, nega daudau lalonai do ia naria. Iehova Dirava ese iena Natuna, Iesu, be Basileia ena King ai ia halaoa neganai, ena naria noho negana ia doko. Unai nega ai Keriso ena noho negana ia matamaia. Tanobada ai  taunimanima ese unai mai anina bada karana do idia itaia, a?

2. Taunimanima ese Keriso ena noho be edia matana amo do idia itaia lasi. Namona be ita laloatao, Iesu be do ia giroa mai eiava ena noho negana ena toana ia herevalaia. (Mataio 24:⁠3) Bema ena noho negana be taunimanima edia matana amo idia itaia diba, toa ia herevalaia be anina lasi, ani? Haheitalai ta mani oi laloa, oi ura lao davara oi itaia. Dala dekenai saini idia noho bona unai saini ese idia hahedinaraia edena dala do oi badinaia. To, oi ginidae bona kone ai, oi gini bona davara oi itaia neganai, saini badana ta do idia atoa, ia gwau “Davara” be maoro, a? Lasi! Emu matana amo davara oi itaia diba dainai, saini idia atoa be anina lasi.

Iesu be ena noho negana ia herevalaia neganai, ia gwau lasi taunimanima be edia matana amo do idia itaia, to ia gwau idia vara toa ese do ia durudia guba dekenai ia vara gauna idia lalopararalaia totona. Unai dainai, Iesu ia gwau: “Umui danu ese inai gaudia do idia vara do umui itaia, vadaeni do umui diba Dirava ena Basileia ia kahirakahira vadaeni.” (Luka 21:31) Edena dala ai Iesu ese ia gwauraia toa idauidau be taunimanima dekenai do idia hahedinaraia Keriso ena noho negana be ia hamatamaia vadaeni?

3. Iesu ena noho negana ai, tanobada dekenai dika badadia momo do idia vara. Iesu ia gwau ia be guba dekenai King bamona ia noho neganai, tanobada dekenai tuari, hitolo, tano mareremarere, daihanai gorere bona taravatu utua karadia momo do idia vara. (Mataio 24:​7-​12; Luka 21:​10, 11) Daika ese unai hekwakwanai ia havaraia? Baibel ia hahedinaraia Keriso be King bamona ia noho vadaeni dainai, “inai tanobada ena lohia” Satani be ia badu dikadika, badina ia diba iena nega be ia kwadogi. (Ioane 12:31; Apokalupo 12:​9, 12) Iseda nega lalonai, Keriso be ia noho vadaeni ena toa idauidau ita itaia bona Satani ia badu bada herea dainai ia havaraia kara dikadia be bada herea. Histori idia stadilaia taudia idia gwau, lagani 1914 be lagani idauna ta, badina unai nega amo tanobada ai dika badadia idia vara matamaia.

Reana, oi laloa unai be sivarai dikana, to lasi ia be sivarai namona. Ia hahedinaraia Mesia ena Basileia be hari guba dekenai ia lohia noho. Kahirakahira, unai gavamani ese tanobada ibounai do ia lohiaia. To, taunimanima be edena bamona unai Basileia do idia diba, ena lohia dalana do idia abia dae bona ena lohia siahu henunai do idia noho?

4. Iesu ia noho negana ena toana ta be, tanobada hegegemadai haroro gaukara do idia karaia. Iesu ia gwau iena noho negana be “Noa ena nega bamona.” * (Mataio 24:​37-​39) Noa be lagatoi sibona ia karaia lasi, to ia be “kara maoromaoro ia harorolaia tauna” danu. (2 Petero  2:⁠5) Noa ese taunimanima ia hadibaia Dirava ena hahemaoro negana be ia mai noho. Iesu ia gwau ena noho negana ai, tanobada dekenai iena murinai idia raka taudia be unai bamona gaukara do idia karaia. Ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”​​—⁠Mataio 24:⁠14.

Hereva ginigunana ai oi duahia hegeregerena, Dirava ena Basileia ese inai tanobada ena gavamani ibounai do ia hadikaia ore. Unai haroro gaukarana ese taunimanima ia hadibaia, kahirakahira guba Basileiana be unai do ia karaia. Bona idia dekenai dala ia kehoa, tanobada ena dokona amo do idia roho mauri bona ena lohia siahuna henunai do idia noho totona. Vadaeni, henanadai badana be inai: Oi be dahaka do oi karaia?

Oi Dekenai Dirava Ena Basileia be Sivarai Namona, A?

Iesu ese ia harorolaia herevana be helaro namo hereana ia hahedinaraia. Guna, Eden umana lalonai ia vara gwau-edeede murinai, Iehova Dirava be gavamani ta do ia haginia ena palani ia karaia. Unai gavamani ese unai gwau-edeede karana do ia hamaoromaoroa bona Dirava ena ura ginigunana hegeregerena, taunimanima edia mauri do ia hanamoa bona tanobada paradaiso ai do idia noho ela bona hanaihanai. Hari, unai gavamani be guba dekenai ia lohia noho, unai ita diba dainai ita moale, ani? Inai be gori sibona lasi, to do ia vara momokani gauna!

Hari, Dirava ese ia abia hidi King be iena inai taudia huanai ia lohia noho. (Salamo 110:⁠2) Inai Dirava ia diba lasi tanobada dikana lalonai, Mesia be ena Tamana ena ura ia hagugurua noho, ia ese Dirava idia ura dibaia bona “lauma bona momokani” ai do idia tomadiho henia taudia ia tahua noho. (Ioane 4:​24) Dirava ena Basileia henunai mauri hanaihanai helarona be mauri dala idauidau idia noholaia taudia, mauri lagani idauidau bona kopina idauidau taudia ese idia moalelaia diba. (Kara 10:​34, 35) Ai ese oi ai boiria unai hahenamo oi abia dae totona. Namona be hari, Dirava ena Basileia oi dibaia, unai amo oi ese unai kara maoromaoro lohia siahuna henunai, mauri hanaihanai do oi moalelaia!​​—⁠1 Ioane 2:​17.

[Footnote]

[Pictures on page 8, 9]

Dina ta ta ai ita kamonai sivarai dikadia ese idia hamomokania gau namodia be kahirakahira do idia vara

[Credit Line]

Antiaircraft gun: U.S. Army photo