Duahia Taudia Idia Henanadai

Dirava Ena Basileia be Emu Kudouna Dekenai Ia Noho, A?

Hari inai negai, taunimanima momo idia laloa Dirava ena Basileia be edia kudouna dekenai ia noho. Hegeregere, The Catholic Encyclopedia ia gwau: “Dirava ena Basileia ena anina be, . . . Dirava be iseda kudouna dekenai ia lohia noho.” Nega momo dubu gunalaia taudia ese unai lalohadai idia hadibaia. To momokani, Baibel ia gwau Dirava ena Basileia be taunimanima edia kudouna dekenai ia noho, a?

Haida idia laloa, Iesu sibona ese unai lalohadai ia gwauraia, Dirava ena Basileia be taunimanima edia kudouna dekenai ia noho. Iesu ia gwau: “Itaia! Dirava ena Basileia be umui bogaraginai ia noho.” (Luka 17:​21, NW ) Baibel haida ese unai siri be inai bamona idia gwauraia: “Dirava ena Basileia be umui emui lalona dekenai ia noho.” Idia be Iesu ena hereva idia hahanaia maoro, a? Iesu ena hereva ena anina be, Dirava ena Basileia be taunimanima edia kudouna dekenai ia noho, a?

Do ita laloa gauna ginigunana be, iseda kudouna. Nega haida Baibel ese kudouna ia herevalaia neganai, ena anina be ta ena lalohadai, kara bona hemami. Haida idia laloa, inai hereva Dirava ena Basileia be taunimanima edia kudouna dekenai ia noho​​—⁠unai ese taunimanima edia kara ia haidaua bona hanamoa​​—⁠be lalohadai maorona, to unai be Baibel ena hereva hegeregerena, a?

Baibel ia gwau: “Taunimanima edia kudouna be mai koikoi bada, bona mai dika rohoroho danu.” (Ieremia 17:⁠9) Danu, Iesu ia gwau: “Taunimanima edia lalona dekena amo daekau gaudia be, laloa dikadia, sihari kava karadia, henaoa kara, taunimanima alaia kara, heudahanai kara, tanobada gaudia ura dikadika kara, kerere idauidau.” (Mareko 7:​20-​22) Mani inai oi laloa: Hari inai tanobada dekenai dika idauidau idia vara, badina taunimanima edia kudouna be kara dika amo ia honu, ani? Unai dainai, Dirava ena Basileia goevadaena be edena bamona taunimanima edia kudouna dekenai do ia noho? Oibe, ava ginigini be fig huahua ena anina do ia havaraia lasi hegeregerena, taunimanima ese Dirava ena Basileia idia havaraia diba lasi.​​—⁠Mataio 7:​16.

Gau iharuana be, Iesu ese Luka 17:21 ena hereva ia gwauraia neganai, ia hereva henia taudia mani oi laloa. Luka 17:20 ia gwau: “Farisea taudia ese Iesu idia nanadaia, idia gwau, ‘Dirava ena Basileia be edena negai do ia mai?’ ” Farisea taudia be Iesu idia inai henia. Iesu ia gwau Farisea taudia, koikoi taudia unai, be Dirava ena Basileia lalonai do idia vareai lasi. (Mataio 23:13) Vadaeni, bema Farisea taudia be Dirava ena Basileia lalonai idia vareai diba lasi, Basileia be edia kudouna dekenai ia noho diba, a? Lasi! Vadaeni Iesu ena hereva anina be dahaka?

Baibel momo ai Luka 17:21 ena hereva idia hahanaia neganai, New World Translation Baibel ena hereva hegeregerena idia gaukaralaia. Haida idia gwau Basileia be “emui huanai ia noho.” Edena dala ai Dirava ena Basileia be Iesu ena negai idia noho taudia, Farisea taudia danu, edia huanai ia noho? Iehova Dirava ese Iesu ia abia hidi, Basileia ena King ai ia lao totona. King ai ia lao tauna Iesu be unai taudia edia huanai ia noho. Ia ese Dirava ena Basileia ia harorolaia bona hoa karadia momo ia karaia danu, unai amo Basileia ese do ia havaraia hahenamo ia hahedinaraia. Momokani, Basileia be edia huanai ia noho.

Ia hedinarai goevagoeva, Baibel ia gwau lasi Dirava ena Basileia be taunimanima edia lalona dekenai ia noho. To, ia be gavamani korikorina ta, bona peroveta taudia edia hereva hegeregerena, unai gavamani ese inai tanobada do ia hanamoa momokani.​​—⁠Isaia 9:​6, 7; Daniela 2:​44.