Duahia Taudia E

MAI MOALE ida umui ai hadibaia, inai Gima Kohorona bona gabeai do ai halasia magasin edia toana do idia idau sisina. To, ai ura do idia idau lasi gaudia ai herevalaia guna.

Inai magasin ena ladana, Gima Kohorona Iehova Ena Basileia Ia Harorolaia, do ia idau lasi. Ia ese Dirava momokanina, Iehova, do ia hanamoa bona Dirava ena Basileia ena sivarai namona ese inai magasin idia duahia taudia do ia hagoadaia. Inai magasin ena rau 5 ia lao 9 lalonai be Dirava ena Basileia be dahaka bona edena negai do ia mai ia herevalaia. Ma danu, Gima Kohorona ese duahia taudia do ia hagoadaia Iesu Keriso idia abidadama henia, Baibel ena hereva momokani idia badinaia, bona peroveta herevadia edia anina ia hahedinaraia namonamo totona.

To dahaka do idia idau? Hua ta ta ai, pablik Gima Kohorona * lalonai be gau namodia haida do idia hedinarai.

Pablik magasin ai do idia hedinarai gaudia haida be inai: “Inai Oi Diba, A?” ese Baibel ena sivarai haida edia anina do ia hahedinaraia. “Dirava Kahirakahira Oi Lao” ese Baibel ena hereva haida do ia herevalaia namonamo, unai amo Iehova do ita dibaia. “Duahia Taudia Idia Henanadai” ese henanadai badadia haida do ia haerelaia. Hegeregere, taunimanima momo idia henanadai, “Dirava ena Basileia be emu kudouna dekenai ia noho, a?” Unai haere be rau 13 ai oi davaria diba.

Magasin ena kahana haida be ruma bese do ia durua. Hegeregere “Famili Ena Moale Havaraia Daladia” ese ruma bese lalonai idia vara hekwakwanai sibona lasi, to Baibel ese unai hekwakwanai hamaoromaoroa dalana do ia herevalaia danu. “Emui Natudia Hadibaia,” ese tama sina do ia durua edia natudia ida do idia duahiduahi hebou totona. “Iseda Matamata Taudia Totona” dekenai be eksasais ta do ia noho, matamata taudia ese idia karaia totona.

Lagani ta ta ai do idia hedinarai gaudia haida be inai: “Edia Abidadama Tohotohoa” ese ita do ia hagoadaia Baibel ese ia gwauraia tauna ta ena kara ita tohotohoa totona. “Revareva ta . . . Amo” ese misinari taudia bona tanobada hegegemadai idia noho taudia ma haida edia ripoti ia hahedinaraia. “Iesu amo Ita Dibaia Gaudia” ese Baibel ena hahediba herevadia haida be auka lasi dalana ai do ia herevalaia.

Ai diba Gima Kohorona ese Baibel idia matauraia taudia bona dibaia taudia edia lalona do ia veria. Ai ura inai magasin ese oi do ia durua Baibel ena hereva momokani oi moalelaia totona.

INAI MAGASIN KARAIA TAUDIA

[Footnote]