“Hagoadaia Herevadia” amo Emu Ruma Bese Oi Durua

DAVID ia naria daudau dainai ia badu. Motuka lalonai ia helai, ena adavana ia naria noho bona ena dina gauna ia sekea loulou. Iena adavana, Diane be ruma amo ia raka-lasi neganai, David be ena badu ia biagua diba lasi dainai, Diane ia gwau henia.

Ia boiboi: “Lau be oi lau naria daudau herea momokani! Oi be nega ibounai oi leiti! Dahaka dainai oi metairametaira momo?”

Diane ia lalohisihisi bona mai taitai ida ruma lalonai ia heau vareai. David ia diba, ia kerere vadaeni. Mai badu ida adavana ia gwau henia dainai, hekwakwanai ia habadaia. Hari, dahaka do ia karaia? Motuka ia rakatania bona adavana murinai ia lao.

Unai haheitalai be hanaihanai ia vara momokani gauna ia hahedinaraia, ani? Nega ta oi be hereva ta oi gwauraia murinai, oi laloa oi gwauraia herevana be maoro lasi bona oi lalohisihisi, a? Ita laloa namonamo lasi neganai, nega momo ita hereva haraga bona gabeai ita gwauraia herevana ita lalohisihisilaia. Unai dainai, Baibel be inai sisiba namona ia henia: “Kara maoromaoro taudia ese, haere idia henia neganai idia laloa namonamo guna.”​​—⁠Aonega Herevadia 15:⁠28.

To, ita badu, gari eiava lalohisihisi neganai, ita laloa namonamo totona be ia auka bona ita hereva haraga. Oibe, ruma bese lalonai, iseda lalohisihisi gauna ita gwauraia neganai, nega momo ta ita badu henia eiava ita hereva dika henia. Unai kara ese ta ena lalona do ia hahisia eiava hepapahuahu ia havaraia diba.

Unai ita dadaraia totona, dahaka ita karaia be namo? Edena dala ai iseda badu ita biagua diba? King Solomona be Baibel bukana ta ia torea tauna bona ia amo heduru herevadia haida ita abia diba.

Emu Lalohadai Gwauraia Dalana Oi Laloa Guna

Hadibaia Tauna bukana ia torea tauna, King Solomona ese mauri be anina lasi lalohadaina ia herevalaia neganai, ia hahedinaraia ia moale lasi. Ia gwau: “Mauri lau ura henia lasi.” Ma ia gwau: “Gau ibounai be anina lasi.” (Hadibaia Tauna 2:​17; 12:⁠8) To, Hadibaia Tauna bukana lalonai King Solomona ese ena lalohisihisi herevadia sibona ia torea lasi. Ia laloa mauri ena hekwarahi sibona ia herevalaia be maoro lasi. Unai buka dokonai, King Solomona ia gwau, ia be “taunimanima hagoadaia herevadia ia tahua, bona ia torea herevadia be momokani, bona maoromaoro.”​​—⁠Hadibaia Tauna 12:⁠10

King Solomona ia laloparara iena hemami ia biagua be namo. Reana, ia sibona ia nanadaia: ‘Lau ura lau herevalaia gauna be momokani, a? Bema inai hereva lau gwauraia, haida ese do idia moalelaia bona idia abia dae, a?’ Hagoadaia hereva namodia ia tahua neganai, unai ese ia durua ia laloa maoromaoro totona bona ena hemami ia biagua.

Hadibaia Tauna bukana ena hereva be toretore namo hereana ta sibona lasi. To, King Solomona be mauri ena anina ia herevalaia neganai, Dirava  ena aonega ia hahedinaraia. (2 Timoteo 3:​16, 17) King Solomona ena hemami ia biagua karana ese ita ia durua, iseda ruma bese taudia ida ita herevahereva namonamo totona, a? Mani inai haheitalai oi laloa.

Badu Biagua Karana Oi Dibaia

Mani haheitalai ta ita laloa, mero maragina ta be sikuli ena ripoti kadi ia abia lao ena tama sina dekenai bona ena toana be ia moale lasi. Iena tamana ese ripoti ia duahia bona ia itaia sikuli ena kosi ta dekenai ena natuna be maka namona ia abia lasi. Tamana be ia badu dikadika badina ia laloatao natuna be hanaihanai ena homwek ia karaia lasi. Mai badu ida ia gwau henia: “Oi be emu sikuli gaukara oi karaia namonamo diba lasi! Bema unai bamona oi karaia noho, emu mauri lalonai gau namona ta do oi davaria diba lasi!”

To, tamana be natuna ia do gwau henia lasi neganai, namona be sibona ia nanadaia guna, ‘Egu lalohadai be maoro, a?’ Unai henanadai ese do ia durua, idia vara momokani gaudia ia lalopararalaia namonamo totona, bona sibona ena hemami ese iena laloa maoromaoro karana do ia hadikaia lasi. (Aonega Herevadia 17:27) Momokani, ena natuna be kosi ta dekenai maka namona ia abia lasi dainai, ena mauri lalonai gau namona ta do ia davaria diba lasi, a? Ia lahedo eiava kosi haida be idia auka dainai ia hekwarahi noho, a? Baibel ese laloa goevagoeva karana ia herevalaia danu. (Tito 3:2; Iamesi 3:​17) Momokani, tama o sina be natuna ia hagoadaia totona, namona be ia gwauraia “herevadia be momokani, bona maoromaoro.”

Hereva Namodia Oi Gwauraia

Tama be ia ura gwauraia gauna ia laloa namonamo murinai, reana sibona do ia nanadaia, ‘Egu hereva be edena bamona do lau gwauraia, unai amo egu natuna ese do ia abia dae?’ Oibe, hereva maorodia ita tahua bona gwauraia karana be mai ena hekwarahi. To, namona be tama sina do idia laloatao, memero kekeni be nega momo idia laloa, bema idia be gau ta idia karaia maoromaoro lasi, edia mauri lalonai idia be gau namona ta do idia havaraia diba lasi. Kerere tamona idia karaia neganai, unai do idia lalohekwarahilaia bada bona sibona do idia laloa idia be anina lasi. Bema tama sina be natuna idia gwau henia hanaihanai, natuna be unai lalohadai kererena do ia abia. Kolose 3:​21 ia gwau: “Tamana bona sinana, emui natudia do umui habadua kava lasi, do idia hesiku garina.”

Inai bamona hereva, “oi be hanaihanai” eiava “oi be anina lasi” be natuna ena kara momokanina ia hahedinaraia lasi. Bema tama o sina ta ia gwau, “Oi be anina lasi!” Unai hereva ese natuna ena lalona do ia hahisia bada. Bema tama sina be nega momo unai bamona hereva amo natuna idia gwau henia, natuna do ia laloa iena mauri ibounai lalonai, ia be gau namona ta do ia karaia diba lasi. Unai bamona hereva be momokani lasi bona natuna ia durua lasi.

Dala namona be natuna ena kara namodia oi hanamoa. Reana, ataiai haheitalai lalonai tama be inai bamona do ia hereva: “Egu natuna e, lau itaia oi moale lasi badina kosi ta dekenai maka namona oi abia lasi. To, lau diba oi hekwarahi emu sikuli gaukara oi karaia namonamo totona. Namona be inai kosi lalonai, auka gaudia ita herevalaia hebou bona ita tahua edena bamona maka namona oi abia diba.” Dala maorona ai iena natuna ia durua totona, reana tama ese natuna dekenai henanadai haida do ia henia bona ia tahua bema natuna be mai ena hekwakwanai ma haida dainai, unai kosi dekenai maka namona ia abia lasi.

Unai bamona laloa namonamo dalanai ena natuna ia kara henia neganai, natuna do ia durua bada. To, mai badu ida ia gwau henia karana ese namo ta do ia havaraia lasi. Baibel ia gwau: “Hereva namodia mai bogahisihisi danu . . .  edia mamina be namo, lauma dekenai, bona tauanina dekenai danu.” (Aonega Herevadia 16:24) Oibe, bema ruma bese lalonai maino bona lalokau idia noho, natudia bona ruma bese taudia ibounai do idia moale.

“Edia Lalona Dekenai Idia Honu Gaudia, be Do Idia Gwauraia”

Mani haheitalai ginigunana lalonai ita herevalaia tauna David, ita laloa lou. Dala namona be, adavana do ia gwau henia lasi, to “hagoadaia herevadia” ia tahua bona mai gado namo ida adavana ia hereva henia? Bema tau ta be unai bamona hekwakwanai ia davaria, namona be sibona ia nanadaia: ‘Ena be egu adavana be ena kara ia haidaua be namo, to momokani, ia be hanaihanai ia  leiti, a? Inai be nega namona unai kara lau herevalaia totona, a? Badu herevadia bona hereva aukadia ese do idia durua ena kara ia hanamoa totona, a?’ Bema ita ese unai bamona henanadai ita laloa guna, ita do ia durua iseda lalokau taudia do ita hahisia kava lasi.​​—⁠Aonega Herevadia 29:⁠11.

To, bema iseda ruma bese ena herevahereva karana lalonai hepapahuahu ia vara, dahaka ita karaia be namo? Namona be ita sibona iseda hemami ita tahua, dahaka dainai unai hereva ita gwauraia. Ita lalohisihisi eiava hekwakwanai idia vara negadiai, ita gwauraia herevadia ese gau momo idia hahedinaraia. Iesu ia gwau: “Taunimanima ese edia lalona dekenai idia honu gaudia, be do idia gwauraia, edia uduna dekenai.” (Luka 6:​45) Anina be iseda hereva ese ita laloa gaudia, ura gaudia, bona kara idia hahedinaraia.

Iseda mauri lalonai, ita be gau namodia ita laloa bona idia vara gaudia ita laloa maoromaoro, a? Bema ita be unai bamona tauna, ita herevalaia gaudia bona iseda herevahereva dalana ese unai do ia hahedinaraia. Iseda kara be auka, helaro namona ta be lasi bona ma haida ita hahemaoro henidia, a? Bema ita be unai bamona tauna, iseda hereva amo haida edia lalona do ita hahisia diba. Reana ita diba lasi, to iseda lalohadai eiava herevahereva dalana be ia dika ia lao vadaeni. Nega haida, ita laloa iseda lalohadai be maoro, to namona be ita naria namonamo, ita sibona ita koia garina.​​—⁠Aonega Herevadia 14:⁠12.

Ita moale badina Dirava ena Hereva ita gaukaralaia diba. Baibel ese ita do ia durua iseda lalohadai ita tahua namonamo bona kerere gaudia ita hamaoromaoroa totona. (Heberu 4:​12; Iamesi 1:​25) Herevana, ita be edena bamona ruma bese lalonai ita tubu daekau eiava iseda kara be edena bamona, to bema ita ura, iseda kara bona lalohadai ita haidaua diba.​​—⁠Efeso 4:​23, 24.

Ena be Baibel ena sisiba ita badinaia, to ma gau ta ita karaia diba iseda herevahereva dalana ita hanamoa totona. Ma haida ita henanadai henia diba. Hegeregere, emu adavana eiava natuna oi nanadaia, emu herevahereva dalana dekenai dahaka idia laloa bona idia be mai momokani ida oi do idia hamaoroa. Oi ia diba namonamo lo turana ta oi nanadaia danu. Idia gwauraia gaudia oi abia dae bona emu kara oi haidaua totona, oi manau be namo.

Oi Laloa Guna Bena Oi Hereva!

Dokonai, bema ita ura lasi ita gwauraia herevana ese ma haida do ia hahisia, namona be inai siri ena hereva do ita badinaia, Aonega Herevadia 16:23 (NW ), ia gwau: “Aonega tauna ena kudouna dainai ena uduna ese lalo-parara ia hahedinaraia, bona ena uduna bibinadia dekenai lalona veria siahuna ia atoa.” Iseda hemami ita biagua karana be auka. Bema haida ita hadikaia lasi, to mai iseda ura ida edia lalohadai ita lalopararalaia toho, unai ese ita do ia durua, hereva maorodia ita abia hidi totona. Unai bamona ita karaia neganai, iseda lalohadai ita gwauraia hedinarai dalana be do ia auka lasi.

Oibe, ita ibounai be mai iseda kerere. (Iamesi 3:⁠2) Nega haida, ita laloa namonamo lasi dainai hereva kereredia ita gwauraia. (Aonega Herevadia 12:18) To, Dirava ena Hereva ese ita ia durua ita laloa namonamo guna bena gabeai ita hereva totona. Danu, ita ia hadibaia ma haida edia hemami bona namo ita tahua guna be namo. (Filipi 2:⁠4) Oibe, namona be iseda lalona ita hadaia, iseda ruma bese taudia ita hereva henidia neganai, do ita gwauraia “herevadia be momokani, bona maoromaoro” sibona. Bena, unai amo iseda hereva ese iseda lalokau taudia do ia hahisia lasi, to idia do ia hanamoa bona hagoadaia.​​—⁠Roma 14:⁠19.

[Picture on page 12]

Hereva ta oi gwauraia bena gabeai oi laloa unai hereva be maoro lasi karana, be edena bamona oi dadaraia diba?