Iehova Ena Hereva Idia Momokani

“LAU sibona be Dirava, bona do umui gwauraia hedinarai, dirava idauna ta, lau hegeregerena ta ia noho lasi. Hamatamaia neganai lau ese dokona lau gwauraia. Gunaguna momokani lau ese, dahaka do ia vara lau gwauraia guna.” (Isaia 46:​9, 10) Momokani, Iehova be vaira negana ia gwauraia maoromaoro diba.

Taunimanima momo idia diba, ta be vaira negana idia gwauraia maoromaoro diba lasi. Unai dainai, hereva momokani idia tahua taudia ese Baibel ena peroveta herevadia idia tahua be namo, badina Baibel sibona ese ia hahedinaraia ia be Dirava ese ia havaraia bukana. Namona be Baibel ese ia perovetalaia bona idia guguru vadaeni herevadia haida ita itaia.

Idaunegai Taudia

Dirava ia peroveta Babulonia, Edoma, Moaba, Amono bona Turo do idia ore vaitani. (Ieremia 48:42; 49:​17, 18; 51:​24-​26; Obadaia 8, 18; Sepanaia 2:​8, 9) Hari inai negai, unai bese taudia idia noho lasi karana ese ia hamomokania, Dirava ena peroveta Hereva be maoromaoro.

Momokani, reana tau ta ia gwau diba, taunimanima be bese goadana ta ena moru o boio herevana idia perovetalaia diba. To, Baibel be ma gau haida ia gwauraia danu. Hegeregere, Baibel be Babulonia ena moru dalana ia gwauraia goevagoeva. Ia gwau, Mede taudia be Babulonia do idia tuari henia, Kurese be tuari taudia do ia gunalaia, bona Babulonia ena sinavai do idia kaukau.​​—⁠Isaia 13:​17-​19; 44:⁠27–45:⁠1.

Nega haida Dirava ia peroveta, idia hadikaia besena be do ia boio lasi. Hegeregere, Ia peroveta Babulonia be Ierusalema do ia hadikaia, to Ierusalema be do ia namo lou​​—⁠herevana Babulonia ena taravatu be, edia hesiai taudia be edia tano korikori dekenai do idia siaia giroa lou lasi. (Ieremia 24:​4-7; 29:10; 30:​18, 19) Unai peroveta herevana be ia guguru, badina Iuda besena be ia boio lasi ema bona hari.

Danu, Iehova ia peroveta basileia badana Aigupito be do ia moru, “to gabeai Aigupito dekenai taunimanima do idia noho lou, nega gunadia hegeregerena.” Bona gabeai, ‘Aigupito  be basileia manokana ta do ia lao.’ (Ieremia 46:​25, 26; Esekiela 29:​14, 15) Unai hereva ia guguru vadaeni. Ma danu, Iehova ia peroveta basileia badana Greece be do ia moru to do ia boio vaitani lasi. Iehova ena peroveta herevadia​​—⁠bese haida do idia noho bona ma haida do idia boio herevadia​​—⁠amo dahaka ita dibaia? Ita dibaia gauna be inai: Baibel lalonai idia noho peroveta herevadia be momokani bona maoromaoro.

Baibel be Gau Momo Ia Gwauraia Goevagoeva

Iehova be Babulonia ena moru dalana ia gwauraia goevagoeva. Unai hegeregerena, Baibel bukana Esekiela be Turo ena moru dalana ia perovetalaia neganai, ia gwau nadi, au bona kahu be “davara ena motumotu maragina” dekenai do idia negea diho. (Esekiela 26:​4, 5, 12) Unai peroveta herevana hegeregerena, lagani 332 B.C.E. ai, Alesana Badana bona ena tuari oreana be Turo ena hanua badana ena momoru amo raka hanai dalana idia karaia bena Turo motumotu idia hadikaia.

Daniela 8:​5-8, 21, 22 bona Daniela 11:​3, 4 ese Greece o ‘Helene basileia ena king’ badana ia herevalaia dalana be idau momokani. Badina ia gwau unai king ia mase neganai, ena basileia be natuna o tubuna ta ese ia biagua lasi to idau taudia foa ese do idia biagua. Unai hereva hegeregerena, lagani 200 mai kahana murinai, Alesana Badana be king goadana ai ia lao. Histori ese idia hahedinaraia, Alesana Badana ia mase neganai, iena basileia be ena natuna o tubuna ta ese ia biagua lasi to ami jeneral foa ese idia haria bena idia biagua.

Haida idia gwau, reana gau ibounai idia vara guna, bena gabeai unai peroveta herevana idia torea. To, Daniela ena peroveta herevana ita laloa lou. Ita hoa badina ia be gau momo ia gwauraia goevagoeva. To bema gau ibounai idia vara murinai peroveta herevana  idia torea, vadaeni dahaka dainai peroveta herevana be gau maragimaragidia ibounai idia gwauraia lasi? Bema Alesana Badana ia mase murinai ia noho koikoi tauna ta be buka ta ia torea bona ia gwau unai be peroveta herevana, vadaeni dahaka dainai Alesana Badana do ia mase murinai, natuna ruaosi do idia ura king dagina idia abia toho, to haida ese do idia hamasea ena sivarai ia noho lasi? Dahaka dainai ami jeneral foa ese lagani momo murinai Alesana Badana ena basileia do idia lohiaia ena sivarai ia gwauraia lasi? Dahaka dainai king badana bona ena ami jeneral foa edia ladana ia gwauraia lasi?

Lagani momo lalonai, haida idia gwau Baibel ena peroveta herevadia be edia anina idia vara murinai idia torea, to edia hereva idia hamomokania diba lasi. Unai bamona taudia be hamomokania gaudia idia stadilaia lasi dainai, idia gwau tau ta be vaira negana ia perovetalaia diba lasi. Idia gwau Baibel be Dirava ena buka lasi dainai, idia ese taunimanima edia lalohadai sibona idia gwauraia. To, aonega Diravana be peroveta hereva haida amo gau ibounai ia gwauraia goevagoeva, unai amo ia hamomokania Ia be Baibel ena peroveta herevadia ia havaraia Diravana. *

Baibel ena peroveta herevadia ese emu abidadama idia hagoadaia diba, bema nega oi atoa peroveta herevadia bona edia guguru karana oi lalohadailaia. Unai dainai, Baibel ena peroveta herevadia oi stadilaia be gau badana. Unai bamona oi karaia totona, “All Scripture Is Inspired of God and Beneficial” * bukana ena rau 343 ia lao rau 346 be oi do ia durua. To, gau badana be oi ura bada unai stadi ese emu abidadama ia hagoadaia. Unai dainai, stadi oi karaia haraga lasi bona oi duahia sibona lasi. To gau badana be mai moale ida unai stadi oi karaia, badina oi diba Iehova ena hereva idia momokani.

[Footnotes]

[Box/​Picture on page 24]

HAKAUA HEREVADIA HAIDA

Ita lalohadailaia gaudia haida be inai: Dirava be basileia badadia edia lohia bona moru dalana sibona ia perovetalaia lasi, to danu, Dirava be Baibel ena hakaua herevadia ia havaraia tauna. Idia haida be inai:

Oi hadoa, vadaeni unai gauna sibona do oi abia.​​—⁠Galatia 6:⁠7.

Henia kara ena moale be bada, abia kara ena moale be maragi.​​—⁠Kara 20:⁠35.

Dirava idia ura tura henia taudia be idia moale.​​—⁠Mataio 5:​3, NW.

Bema unai hakaua herevadia oi badinaia, oi moale bona noho namonamo diba.

[Pictures on page 22, 23]

Baibel ia peroveta inai bese do ia haorea vaitani:

EDOMA

BABULONIA

To inai bese do ia boio vaitani lasi:

HELENE (GREECE)

AIGUPITO (EGYPT)

[Credit Lines]

Pictorial Archive (Near Eastern History) Est.

WHO photo by Edouard Boubat

[Picture on page 23]

Alesana Badana