Inai Oi Diba, A?

Aonega taudia be edena negai Iesu idia vadivadi henia?

Mataio ena Evanelia bukana lalonai ia gwau, “aonega taudia be dina daekau kahana dekena amo” idia lao Iesu idia vadivadi henia, bona harihari gaudia idia henia. (Mataio 2:​1-​12) Baibel ia gwau lasi aonega taudia hida be Iesu idia vadivadi henia, bona taunimanima idia laloa aonega taudia toi idia lao hamomokania herevana ta be lasi; danu Baibel ese edia ladana ia gwauraia lasi.

Buka ta (New International Version Study Bible) ese Mataio 2:​11 be inai bamona ia herevalaia: “Taunimanima momo idia abia dae, aonega taudia be Iesu ia vara hanuaboina ai idia vadivadi henia, mamoe naria taudia ese idia karaia hegeregerena, to unai be maoro lasi. Idia be hua haida murinai, Iesu be ‘mero maragi’ neganai ena ‘ruma’ dekenai idia vadivadi henia.” Unai be momokani, badina Heroda ia ura mero maragina ia hamasea neganai, ena tuari taudia ia oda henidia lagani rua idia do abia lasi memero ibounai Betelehema bona ena badinabadina tanodia ai do idia alaia mase. Heroda ese unai mauri lagani memero maragidia ia alaia “badina be aonega taudia be guna idia hamaoroa, lagani rua ia lao vadaeni hisiu ia hedinarai.”​​—⁠Mataio 2:​16.

Bema unai aonega taudia be Iesu ia vara hanuaboina ai idia vadivadi bona edia harihari gaudia, golo bona herahera gau namodia idia henia, reana Maria be dina 40 murinai Ierusalema ena dubu dekenai Iesu ia abia lao neganai, manu maragidia rua ia bouboulaia lasi. (Luka 2:​22-​24) Mose ena Taravatu lalonai, bema ogogami taudia edia moni be hegeregere lasi mamoe idia hoia totona, vadaeni manu maragidia rua idia bouboulaia diba. (Levitiko 12:​6-8) To, Iesu ena ruma bese ese idia abia harihari gaudia be Aigupito dekenai idia abia lao bona unuseniai idia noho neganai idia gaukaralaia.​​—⁠Mataio 2:​13-​15.

Dahaka dainai Iesu be dina foa murinai Lasaro idia guria gabuna dekenai ia gini dae?

Reana, Iesu ia ura unai bamona do ia karaia. Dahaka dainai unai bamona ita hereva? Mani Ioane karoa 11 lalonai ia noho sivaraina ita itaia.

Lasaro be Iesu ena turana bona ia be Betania dekenai ia noho. Ia gorere bada herea neganai, ena taihudia be Iesu dekenai hereva idia siaia. (Ioa karoa 11 Siri 1-3) Unai negai, Iesu be hanua ma ta dekenai ia noho bona Betania dekenai ia lao totona dina rua do ia raka. (Ioane 10:40) Iesu be Lasaro ena gorere sivaraina ia kamonai neganai, Lasaro be ia mase vadaeni. Iesu be dahaka ia karaia? Unai sivarai ia kamonai neganai, ia be “dina rua ma unai gabu dekenai ia noho,” bena gabeai Betania dekenai ia lao. (Ioa karoa 11 Siri 6, 7) Iesu be dina rua ia naria bona ma dina rua lalonai Betania dekenai ia raka lao. Unai dainai ita gwau diba, Lasaro ia mase bena dina foa murinai Iesu ia ginidae.​​—⁠Ioa karoa 11 Siri 17.

Betania dekenai ia do lao lasi neganai, Iesu be mase taudia rua ia hatorea isi lou​​—⁠ta be ia mase murinai karaharaga Iesu ese ia hatorea isi lou, bona ma ta be hora haida murinai ia hatorea isi lou. (Luka 7:​11-​17; 8:​49-​55) Vadaeni, dina foa ia mase bona iena tauanina ia bodaga vadaeni tauna be Iesu ese ia hatorea isi lou diba, a? (Ioa karoa 11 Siri 39) Baibel ia herevalaia bukana ta ia gwau, Iuda taudia edia hadibaia herevana ta be “dina foa ia mase vadaeni tauna be do ia toreisi lou lasi; unai dina ai mase tauanina be ia bodaga matamaia, bona mase tauna ena badinai ia loaloa soulina be unai gabu ia rakatania vadaeni.”

Bema Lasaro ena gara gabuna dekenai idia haboua taudia be mai edia daradara, vadaeni hari Iesu be mase tauna ia hatorea isi lou diba ena siahu do idia itaia. Iesu be gara gabuna ena iduara badinai ia gini bona ia boiboi: “Lasaro e, oi mai murimuri dekenai!” Bena, “mase tauna be ia raka murimuri dekenai.” (Ioa karoa 11 Siri 43, 44) Oibe, toreisi lou be mase taudia edia helaro korikorina. Mase murinai souli ia mauri noho be hahediba koikoi herevana ta.​​—⁠Esekiela 18:4; Ioane 11:⁠25.