Natudia amo Dahaka Oi Dibaia?

“OI BE natuna maragi ta bamona oi kara!” Bema ta ese ita dekenai unai hereva ia gwauraia, do ita lalohisihisi. Natu maragidia ita itaia neganai ita moale, to edia kara bona lalohadai be taunimanima badadia edia bamona lasi, bona gau momo idia diba lasi.​​—⁠Iobu 12:⁠12.

To nega ta Iesu be ena hahediba taudia dekenai ia gwau: “Umui lau hamaoroa momokani, bema umui emui lalona umui giroa lasi, bona memero maragi bamona do umui halaoa lasi, umui be Guba Basileia lalonai do umui raka vareai diba lasi.” (Mataio 18:⁠3) Iesu ena hereva ena anina be dahaka? Natu maragidia ese edena bamona kara idia hahedinaraia be taunimanima badadia ese idia tohotohoa diba?

Natu ta Bamona Oi Manau

Mani ia vara gauna dainai Iesu ena hereva ita laloa. Kaperanauma dekenai idia ginidae neganai, Iesu ese ena hahediba taudia ia nanadaia: “Dala dekenai dahaka umui herevahereva?” Idia hemarai dainai idia hereva lasi, badina sibodia edia huanai daika be herea idia hepapahuahulaia. Gabeai, idia be mai gari lasi ida Iesu idia nanadaia: “Daika be Guba Basileia lalonai do ia bada herea?”​​—⁠Mareko 9:​33, 34; Mataio 18:⁠1.

Reana unai be hoa gauna, badina lagani toi mai kahana lalonai idia be Iesu danu idia loaloa, to dagi totona idia hepapahuahu. Unai bamona idia laloa badina idia be Iuda tomadihona lalonai idia tubu daekau, unai tomadiho lalonai momo be dagi bada abia karana idia laloa bada. Reana edia tomadiho, bona idia  goevadae lasi dainai, ma ta hereaia lalohadaina idia abia.

Iesu ia helai diho, bena ena hahediba taudia ia boiria bona ia hamaorodia: “Bema tau ta ena ura be ia gini, gunalaia tauna o biaguna, unai tau dohore ia lao gabeai, bona ia be dohore taunimanima ibounai edia hesiai tauna.” (Mareko 9:​35) Iena hereva dainai idia hoa. Iesu ena hereva ese Iuda taudia edia lalohadai dagi bada abia karana dekenai ia hamomokania lasi! Bena Iesu ese mero maragi ta ia boiria. Unai mero maragina ia rosia bona ia gwau: “Umui lau hamaoroa momokani, bema umui emui lalona umui giroa lasi, bona memero maragi bamona do umui halaoa lasi, umui be Guba Basileia lalonai do umui raka vareai diba lasi. Unai dainai, inai mero maragi bamona do ia manau tauna be Guba Basileia lalonai do ia bada herea.”​​—⁠Mataio 18:​3, 4.

Iesu ese idia dekenai manau karana ena anina ia hadibaia unai! Mani ia vara gauna oi laloa. Unai mero maragi be tatau badadia huanai ia gini bona idia ibounai be ia sibona idia raraia. Ia hemarai bona ia gari, to unai tatau badadia ia abidadama henia diba! Ta hereaia karana bona inai henia karana ia hahedinaraia lasi! Ia hemataurai bona ia manau! Oibe, unai mero maragi ese Dirava ena manau karana ia hahedinaraia goevagoeva.

Iesu ena hereva amo inai ita dibaia: Bema ita ura Dirava ena Basileia lalonai ita vareai, natu ta bamona ita manau be namo. Iehova ena taunimanima huanai, ma ta hereaia karana eiava hekokoroku karana idia hahedinaraia lasi. (Galatia 5:​26) Satani Diabolo be unai kara dainai Dirava ia gwau-edeede henia. Unai dainai, Dirava ese unai kara ia inai henia!​​—⁠Aonega Herevadia 8:​13.

Keristani taudia momokanidia be ma haida hesiai henia karana idia laloa bada, to dagi tahua karana idia laloa bada lasi. Ena be ita karaia gaukarana ita moalelaia lasi, eiava ladana bada lasi tauna ita durua, to manau dainai ma haida ita hesiai henia. Unai bamona manau karana ese hahenamo momo ia mailaia diba. Iesu ia gwau: “Daika ese natuna maragi inai bamona ia abia dae lauegu ladana dainai, be lau danu ia abia dae. Bema tau ta ese lau ia abia dae, lau sibona ia abia dae lasi, to lau ia siaia Dirava danu ia abia dae.” (Mareko 9:​37) Natu ta bamona bema ita manau, ita be guba dekenai ia noho Atai Herea Momokani Tauna  bona ena Natuna ida ita lalotamona. (Ioane 17:​20, 21; 1 Petero 5:⁠5) Henia karana amo ia mai moalena do ita mamia diba. (Kara 20:35) Bona Dirava ena taunimanima huanai ia noho lalotamona bona maino do ita abia danu.​​—⁠Efeso 4:​1-3.

Ita Hadibadia Bona Taunimanima Idia Abidadama Henia Diba

Natudia amo ita dibaia gauna ma ta be Iesu ese ia gwauraia: “Daika ese Dirava ena Basileia be natuna maragina bamona ia abia dae lasi, ia be do ia vareai lasi unuseni.” (Mareko 10:15) Natudia maragidia be idia manau sibona lasi, to ita hadibadia diba. Sina ta ia gwau: ‘Maragidia be gau matamatadia idia dibaia haraga, sipanisi ese ranu ia veria haraga bamona.’

Unai dainai, Dirava ena Basileia lalonai ita vareai totona, namona be Basileia sivaraina ita abia dae bona badinaia. (1 Tesalonika 2:​13) ‘Beibi matamata ese rata ia ura dikadika bamona, ita ese lauma ena rata goevagoeva do ita ura henia. Badina be unai rata ita inua neganai, iseda lauma do idia tubu daekau, bona Dirava ena hamauria do ita davaria.’ (1 Petero 2:⁠2) To bema Baibel ena hahediba herevana ta ita lalopararalaia lasi, dahaka do ita karaia? Natu maragidia ia naria hahinena ta ia gwau: “Natudia be hanaihanai idia henanadai idia gwau, ‘Dahaka dainai?’ ela bona edia henanadai ena haere idia davaria.” Namona be edia haheitalai ita tohotohoa. Unai dainai, Baibel oi stadilaia noho. Lo Keristani taudia oi hereva henidia. Iehova oi noia aonega ia henia totona. (Iamesi 1:⁠5) Emu guriguri loulou karana dainai, Iehova ese emu noinoi gauna do ia henia.​​—⁠Mataio 7:​7-​11.

Reana haida do idia gwau, ‘To, ma haida ese idia hadibadia diba taudia be idia koidia diba.’ Unai do ia vara lasi bema idia ese hakaua hereva maorodia idia badinaia. Hegeregere, natudia idia diba edia tama sina amo heduru idia tahua be namo. Tama ta ia gwau: “Dina ta ta ai, tama sina be edia natudia idia naria bona edia ura gaudia idia henia dainai, natudia ese edia tama sina idia abidadama henia diba.” Unai hegeregerena, iseda guba Tamana, Iehova ita abidadama henia diba. (Iamesi 1:​17; 1 Ioane 4:​9, 10) Iehova be iena Hereva amo hakaua hereva namodia ia henia. Iena lauma helaga  bona orea amo ita ia durua bona hagoadaia. (Mataio 24:​45-​47; Ioane 14:26) Bema ita ia henia gaudia ita gaukaralaia namonamo, iseda hetura karana Iehova ida be gau ta ese do ia hadikaia lasi.​​—⁠Salamo 91:​1-​16.

Unai hegeregerena bema Dirava ita abidadama henia, lalomaino do ita abia. Baibel ia diba momo tauna ta ia gwau: “Ita maragi neganai tama sina ida ita loaloa negadiai basi ena davana ita laloa lasi, bona ita lao henia gabuna ita diba lasi, to ita diba momokani iseda tama sina ese gabu maorona dekenai ita idia hakaua lao diba.” Iseda mauri ibounai lalonai iseda abidadama Iehova dekenai be unai bamona, a?​​—⁠Isaia 41:⁠10.

Dirava abidadama henia momokani karana ese ita ia durua iseda hetura karana Iehova ida ia hadikaia diba kara bona lalohadai ita dadaraia totona. Iesu ena hereva be momokani, ia gwau iseda guba Tamana be iseda kara ia diba namonamo, unai dainai bema Dirava ena Basileia bona kara maoromaoro ita tahua guna, Dirava ese ita do ia naria. Unai ese ita do ia durua kohu tahua momo karana do ita laloa bada lasi, to lauma dalanai iseda maduna ita huaia namonamo totona.​​—⁠Mataio 6:​19-​34.

“Dika Karaia Totona Natuna Maragi Bamona” Laloa

Ena be natu maragidia idia vara neganai, idia be goevadae lasi, to edia kudouna bona lalona be ia goeva. Unai dainai, Baibel ese Keristani taudia ia hagoadaia: “Dika karaia totona natuna maragi bamona do umui laloa.”​​—⁠1 Korinto 14:⁠20.

Mauri lagani 5 kekenina, Monique mani ita laloa. Ia be mai moale ida ena sinana ia hamaoroa: “Egu turana matamatana, Sarah, ena huina be egu huina bamona!” Monique be ena turana ena kopina ena kala bona ena bese ia herevalaia lasi. Sina ma ta ia gwau: “Natu maragidia be ma ta ena kopina kala, iduhu, eiava ma ta inai henia kava karana idia laloa lasi.” Unai ese ia hahedinaraia, natudia be toana ia laloa lasi Diravana ena kara idia hahedinaraia, badina Dirava be bese ibounai ia lalokau henia.​​—⁠Kara 10:​34, 35.

Dika gwauatao karana dekenai, natudia be haheitalai namona idia hahedinaraia. Tama ta ia gwau: “Emai natuna Jack bona Levi idia heai neganai, ai hamaorodia idia sori heheni totona, unai murinai mai moale ida idia gadara hebou lou. Edia badu be ia noho daudau lasi, ma ta ese ma ta ena kerere gunadia ia laloa lou lasi, eiava ia gwau lasi ma ta ese kara ta do ia karaia guna bena ena dika do ia gwauatao. Idia hetura heheni lou bona idia gadara hebou.” Unai be haheitalai hereadaena, ita ese ita tohotohoa totona!​​—⁠Kolose 3:⁠13.

Danu, natu maragidia ese idia hamomokania Dirava ia noho. (Heberu 11:⁠6) Unai dainai idia be mai gari lasi ida ma haida idia haroro henia diba. (2 King Taudia 5:​2, 3) Bona mai kudouna ibounai ida idia gwauraia guriguri kwadogidia ese ma haida edia kudouna ia hamarerea diba. Bona hahetoho idia davaria neganai, kara maoromaoro idia badinaia diba. Natudia be harihari gaudia namodia!​​—⁠Salamo 127:​3, 4.

Ia Hairai Lou

Reana do oi laloa, ‘Taunimanima badadia be idia maragi neganai idia karaia karadia idia hahedinaraia lou diba, a?’ Oibe! Iesu ena hereva “memero maragi bamona do umui halaoa,” ese ia hahedinaraia unai ita karaia diba.​​—⁠Mataio 18:⁠3.

Haheitalai be inai: Laulau idia penia taudia haida be dava bada laulau ta idia ura hanamoa lou. Unai idia karaia totona, laulau ena miro idia kokia bona guna idia penia namonamo lasi kahadia be idia penia lou. Idia hekwarahi unai laulau ena toana idia hanamoa lou totona, unai dainai ena kala namona ia hedinarai lou. Unai hegeregerena, ita hekwarahi Iehova ena lauma helaga ena heduru ita tahua, bona Keristani kongrigeisen taudia ida ita gaukara hebou neganai, ita maragi neganai ita karaia kara namodia do ita hahedinaraia lou diba.​​—⁠Efeso 5:⁠1.

[Picture on page 19]

Natu maragidia be idia manau

[Picture on page 20]

Natu maragidia be ma ta idia inai henia kava lasi, bona dika idia gwauatao haraga bona idia laloaboio