Dirava Kahirakahira Oi Lao

Tamana Hereadaena

Mataio 3:​16, 17

“TAMAGU.” Unai hereva be mai lalokau ida ita gwauraia. Natudia ia lalokau henia tamana ese ena natudia ia durua, taunimanima namodia ai idia lao totona. Badina namona dainai, Baibel ese Iehova Dirava ia gwauraia “Tamana.” (Mataio 6:⁠9) Iehova be edena bamona Tamana? Unai henanadai ita haerelaia totona, namona be Iesu ia bapatiso neganai, Iehova ese ia gwauraia herevadia mani ita laloa. Badina tamana ese ena natuna ia hereva henia dalana amo ia hahedinaraia ia be edena bamona tamana.

October 29 C.E. bamona ai, Iesu be Ioridane Sinavai ai ia bapatiso. Baibel ia gwau: “Iesu ia bapatisoa, vadaeni maoromaoro, ranu dekena amo ia daekau neganai, guba be ia kehoa vadaeni, bona Iesu ese Dirava ena Lauma ia itaia, pune manu bamona ia diho, ia dekenai ia helai. Bona gado ta guba dekena amo ia boiboi, ia gwau, “Inai be lauegu Natuna, egu lalokau, lau moale bada ia dekenai.’ ” * (Mataio 3:​16, 17) Iehova ese Iesu ia hereva henia dalana ese ia hahedinaraia ia be edena bamona Tamana. Iehova ese ena Natuna dekenai ia gwauraia herevadia toi mani ita itaia.

Ginigunana be, Iehova ese inai hereva, “Inai be lauegu Natuna,” ia gwauraia neganai, toana be ia gwau, ‘Lau moale badina lau be oiemu Tamana.’ Natudia be idia ura edia kara namona dainai tama sina ese idia hanamodia o laloa bada, bona tama namona be unai ura ia hagugurua. Namona be tama sina ese edia natudia idia hamaoroa idia be ruma bese lalonai idia noho natudia ibounai idia lalodia bada. Mani oi laloa: Herevana Iesu be ia bada vadaeni, to ita gwau diba Iesu be ena Tamana ena hanamoa herevana ia kamonai neganai, ia moale bada!

Iharuana be, Iehova ese ena Natuna ia hamaoroa “egu lalokau” neganai, taunimanima vairanai ia hahedinaraia Ia ese Iesu ia lalokau henia bada. Toana be Tamana ia gwau, ‘Oi lau lalokau henia.’ Tamana namona be ena natudia ia hamaoroa idia ia lalokau henia bada. Unai bamona herevadia ese natuna ia durua ia moale bona natuna namona ai ia lao totona. Iesu be reana ia moale bada herea badina ena Tamana ese ia hamaoroa, ia lalokau henia bada!

Ihatoina be, Iehova be inai hereva “lau moale bada” amo ia hahedinaraia, Iehova be ena Natuna ia lalonamo henia. Toana be Iehova ia gwau, ‘Natugu e, oi karaia gauna dekenai lau moale bada.’ Tamana namona be ia ura dala idauidau ai ena natuna ia diba, tamana be natuna ena kara o hereva namona ia moalelaia. Tama sina edia hereva namodia ese natudia edia lalona ia hagoadaia. Momokani, ita gwau diba Iesu be ena Tamana ena hereva ia moalelaia!

Momokani, Iehova be Tamana Hereadaena. Oi ura emu tamana be unai bamona, a? Bema oibe, vadaeni oi moale badina oi diba Iehova oi tura henia diba. Bema mai abidadama ida Iehova oi dibaia bona mai emu lalona ibounai ida Iena ura oi karaia, Ia be oi kahirakahira do ia lao. Baibel ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iamesi 4:⁠8) Momokani, Tamana Hereadaena Iehova Dirava oi tura henia be kara hereadaena, ani?

[Footnote]