Dahaka Dainai Keristani Heboudia Dekenai Ita Lao?

CHRISTINE bona ena tau be lagani 20 idia headava murinai, ena tau ese ia rakatania. Christine be ena natuna memerodia seven bona natuna kekeni tamona ia naridia. Edia mauri laganidia be 7 amo ia lao 18. Ia gwau, “Unai neganai lau sibona ese abia hidi badadia lau karaia. Unai maduna be sibona ese lau huaia dainai lau lalometau bona lau ura heduru lau abia.” Christine be edeseniai heduru ia abia?

Christine ia gwau, “Lau bona egu ruma bese be Keristani heboudia amo heduru ai abia. Hebou dekenai emai turadia ese ai idia hagoadaia bona Dirava ena Hereva amo hakaua hereva namodia ai abia. Hebou ai lao henia hanaihanai dainai, emai ruma bese maurina ia durua bada.”

Inai “metau dikadia momo” negana lalonai, ita ibounai be hekwakwanai idauidau ita davaria. (2 Timoteo 3:⁠1) Christine bamona, Iehova ena Witnes taudia edia Keristani heboudia ese emu abidadama do ia hagoadaia bona unai be Iehova tomadiho henia karana ena kahana badana ta. Wiki ta ta ena kongrigeisen hebou faiv ese emu lalokau Dirava dekenai ia habadaia, emu vaira negana ena helaro ia hagoadaia, bona Baibel ena hakaua herevadia amo oi idia durua hahetoho oi hanaia totona.

To, haida dekenai hebou lao henia hanaihanai karana be auka. Dina ta ena gaukara murinai idia hesiku bada bona idia laloa idia hegoeva bona hebou dekenai idia lao be mai ena hekwarahi. Haida be edia moni gaukara dainai hebou momo idia reaia. Bema hebou ibounai idia lao, anina be pei maragina do idia abia eiava edia moni gaukara do idia haboioa diba. Haida idia laloa, kongrigeisen ena hebou amo lasi, to moale karadia amo moale do idia davaria.

Dahaka badina namodia dainai Keristani heboudia ita lao henidia be namo? Edena dala ai Keristani heboudia oi moalelaia diba? Unai henanadai ita haerelaidia totona, mani Iesu ena hereva Mataio 11:​28-​30 dekenai ita itaia. Ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”

“Lau Dekenai Umui Mai”

Iesu ia gwau: “Lau dekenai umui mai.” Unai boiboi herevana ita badinaia totona, dala ta be hanaihanai Keristani heboudia dekenai ita lao. Hebou dekenai ita lao be namo, badina ma nega ta Iesu ia gwau: “Bema  lauegu ladanai tau rua o toi idia hebou gabu ta dekenai, lau danu be idia dekenai lau noho.”​​—⁠Mataio 18:⁠20.

Aposetolo edia nega bamona, Iesu be noho daladia idauidau taudia ia boiridia ia murinai idia raka totona. Bona unai ese dala ia kehoa idia ese ia idia tura henia totona. Haida be karaharaga iena murinai idia raka. (Mataio 4:​18-​22) Haida be kohu idia laloa momo dainai Iesu ena boiboi herevana idia abia dae lasi. (Mareko 10:​21, 22; Luka 9:​57-​62) To Iesu ena murinai idia raka taudia dekenai Iesu be inai hagoadaia herevana ia gwauraia: “Umui ese lau umui abia hidi lasi. Lau ese umui lau abia hidi.”​​—⁠Ioane 15:⁠16.

Keriso be ia mase bona ia toreisi lou murinai, ena hahediba taudia ida ia noho lasi. To lauma dalanai idia danu ia noho, anina be edia gaukara ia hakaua bona ia itaia iena sisiba herevana idia badinaia eiava lasi. Hegeregere, Iesu ia toreisi lou bena lagani 70 idia ore murinai, Asia Minor dekenai idia noho kongrigeisen seven ia sisiba henia bona hagoadaia. Iena hereva amo ia hahedinaraia, unai kongrigeisen taudia ta ta edia kara namodia bona edia manoka gaudia ia diba namonamo.​​—⁠Apokalupo 2:1–​3:​22.

Iesu be ena hahediba taudia ta ta ia laloa bada. Ia gwauhamata: “Lau be hanaihanai umui danu ita noho ela bona tanobada dokona.” (Mataio 28:20) Hari ita be nega ena dokona dekenai ita noho dainai, namona be Iesu ena boiboi herevana dainai kara ta ita karaia haraga. Unai bamona ita karaia totona, hanaihanai Keristani heboudia dekenai ita lao. Iesu ia ura ia ita kamonai henia bona Baibel stadilaia karana bona Keristani heboudia ai ita kamonai herevadia amo, ‘iena hereva momokani ita dibaia.’ (Efeso 4:​20, 21) Iesu ena boiboi herevana, “Lau dekenai umui mai” oi badinaia noho, a?

“Tauanina Manokamanoka Bona Gaukara Metau Taudia Ibounai”

Keristani heboudia dekenai ita lao ena badina badana be hagoadaia herevadia ita kamonai totona. (Heberu 10:​24, 25) Ita momo be dala idauidau ai “tauanina manokamanoka bona gaukara metau taudia.” Hegeregere, gorere dainai oi lalometau. Keristani heboudia dekenai ta ta hagoadaia heheni karana do oi moalelaia. (Roma 1:​11, 12) Hegeregere, emu abidadama hagoadaia hereva namodia do oi kamonai, Baibel amo oi dibaia helarona do oi laloa lou, bona edia abidadama dainai hahetoho idia haheaukalaia taudia oi itaia. Unai gaudia ese oi do ia durua emu hekwakwanai oi haheaukalaia bona lalohadai maorona oi abia totona.

Ia gorere bada Keristani taihu ta ena hereva mani ita laloa. Ia gwau, “Egu gorere dainai nega haida hospital dekenai lau noho. To hospital lau rakatania murinai, hebou dekenai lau lao be mai ena hekwarahi, to unuseniai lau noho namo. Tadikaka bona taihu edia lalokau karana ese lau ia hamoalea bada, bona Iehova bona Iesu edia hadibaia herevadia dainai lau laloa egu mauri be mai anina.”

“Lauegu Huaia Auna be Metau Lasi, Bona Huaia Neganai Danu Hekwarahi Lasi”

Mataio 11:29 ai Iesu ia gwau: “Lau dekenai diba do umui tahua.” Iesu amo diba ita abia neganai, ita be iena hahediba taudia ai ita lao. Bona iseda mauri ita gwauhamatalaia bona bapatiso ita abia neganai, ita be iena huaia auna ita huaia. (Mataio 28:​19, 20) Ita be Iesu ena hahediba taudia, bema hanaihanai hebou ena kahana idauidau ita durua. Dahaka dainai? Badina Keristani heboudia dekenai ita be Iesu, iena hadibaia herevadia, bona iena hadibaia dalana ita dibaia.

Keriso ia ura edena huaia auna ita huaia? Unai be ia ese ia huaia gauna​​—⁠Dirava hesiai henia ena maduna hereadaena unai. (Ioane 4:​34; 15:⁠8) Dirava ena taravatu ita badinaia totona namona be ita hekwarahi, to unai maduna be ia metau lasi. Bema ita sibona ese unai huaia auna ita huaia, unai huaia auna be do ia metau. To, bema Dirava ena lauma helaga totona ita guriguri bona Keristani heboudia dekenai Baibel  amo idia henia hereva ita kamonai, Dirava amo “siahu badana” do ita abia. (2 Korinto 4:⁠7) Keristani heboudia totona ita hegaegae bona ita haere neganai, iseda lalokau Iehova totona be do ia goada. Bona bema lalokau dainai unai bamona ita karaia, Dirava ena taravatu ita dekenai “be metau lasi.”​​—⁠1 Ioane 5:⁠3.

Taunimanima ibounai be vaia hekwakwanai idauidau idia davaria hegeregere gorere, moni gaukara, bona sibodia edia hekwakwanai ma haida. To unai hekwakwanai ita hanaia totona, namona be taunimanima edia aonega dekenai ita tabekau lasi. Kongrigeisen ena hebou ese ita ia durua ita “laloa momo lasi,” badina Iehova be iseda ura gaudia ia henia bona ita do ia durua hekwakwanai ita hanaia totona. (Mataio 6:​25-​33) Oibe, Keristani heboudia amo Dirava be ena lalokau ita dekenai ia hahedinaraia.

“Lau be Dagedage Lasi Bona Manau Tauna”

Iesu be hanaihanai ia karaia bamona, dubu helaga dekenai ia lao Dirava ena Hereva ia herevalaia totona. Iesu be nega ta dubu dekenai ia lao neganai, Isaia ena lokua toretorena ia duahia: “Lohiabada ena Lauma ese lau ia hahonua. Ia ese lau ia abia hidi vadaeni, Sivarai Namona ogogami taudia dekenai do lau haroro henia. Lau ia siaia vadaeni, idia guia taudia do lau ruhaia totona, bona matakepulu taudia edia matana kehoa hereva do lau gwauraia, bona mai edia bero taudia dekenai mauri do lau henia. Ma danu Lohiabada ese iena taunimanima do ia hamauria, ena nega do lau harorolaia.” (Luka 4:​16, 18, 19) Unai murinai Iesu be ma ia gwau: “Inai umui kamonaia herevana, be hari dina ia momokani vadaeni”! Bema unai negai ita noho, bona unai hereva ita kamonai do ita moale bada.​​—⁠Luka 4:​21.

Manau tauna bona “Mamoe Naria Tauna Badana” Iesu, be ena hahediba taudia ia naria noho. (1 Petero 5:​1-4) Iesu ena hakaua henunai, “hesiai tauna mai ena kamonai, bona mai ena kara maoromaoro” ese tatau haida idia abia hidi, Iehova ena Witnes taudia tanobada hegegemadai idia noho kongrigeisen idia naria totona. (Mataio 24:​45-​47; Tito 1:​5-9) Unai tatau be mai manau ida ‘mamoe oreana ibounai idia naria’ bona hebou idia lao henia hanaihanai amo haheitalai namona idia hahedinaraia. Unai tatau, Dirava ena “harihari gaudia” dekenai tanikiu karana ita hahedinaraia totona, hebou ita lao henia bona hebou ena kahana idauidau ita durua.​​—⁠Kara 15:​30-​33; 20:28; Efeso 4:​8, 11, 12.

“Emui Laumana be Do Idia Laga-Ani”

Keristani heboudia dekenai oi lao neganai, edena bamona oi hahedinaraia unai hebou oi moalelaia? Dala ta be Iesu ena sisiba oi badinaia: “Umui emui kamonai do umui naria namonamo.” (Luka 8:​18) Idia ura dikadika diba idia abia taudia be Iesu ena hereva idia kamonai namonamo. Bona Iesu idia nanadaia ia gwauraia parabole edia anina ia herevalaia dainai, edia laloparara ia bada.​​—⁠Mataio 13:​10-​16.

Unai bamona taudia edia kara ita tohotohoa diba, bema hebou dekenai hereva ita kamonai namonamo. (Mataio 5:​3, 6) Gau ta ese oiemu lalona ia veria lasi totona, namona be hereva ia henia tauna ena hereva oi badinaia. Sibona oi nanadaia: ‘Egu mauri lalonai unai sisiba be edena bamona lau badinaia diba? Edena dala amo unai lau gaukaralaia ma haida lau durua totona? Edena dala amo ma haida dekenai unai lau herevalaia diba?’ Bona danu, hereva henia tauna ese ena hereva badadia durua totona ia gwauraia siridia oi itaia. Bema oi kamonai namonamo, hebou do oi moalelaia bada.

Hebou murinai ma haida ida hebou ai idia herevalaia gaudia umui kikilaia. Unai gaudia badinaia daladia umui herevalaia. Bema unai bamona dala ai ta ta umui hagoadaia heheni, hebou do umui moalelaia bada.

Oibe, badina namodia momo dainai hebou dekenai ita lao be namo. Hari unai badina namodia oi diba dainai, sibona oi nanadaia, ‘Iesu ena boiboi herevana: “Lau dekenai umui mai” lau badinaia noho, a?’

[Picture on page 13]

Ma gau haida ese emu hebou lao henia karana ia koua, a?