Mauri Sivaraina

Guba Basileiana Lau Naria Noho

Nikolai Gutsulyak ese ia sivarailaia

Dina bona hanuaboi 41 lalonai, emai kamepa dekenai dagedage bada ia vara. Ipidi badadia edia regena dainai lau noga. Tuari tanika bona ami taudia be kamepa lalonai idia vareai bona dibura taudia danu idia heai. Lau laloa do lau mase.

DAHAKA dainai unai bamona ia vara lau dekenai? Mani lau gwauraia. Lagani 1954 ai unai ia vara, unai nega ai egu mauri lagani be 30. Soviet gavamani henunai idia noho Iehova ena Witnes taudia momo bamona, lau be politikol karadia lalonai lau vareai lasi bona Dirava ena Basileia lau harorolaia dainai, dibura ruma dekenai lau idia atoa. Unai dibura ruma lalonai, Iehova ena Witnes taudia ibounai be 80​—⁠tatau 46 bona hahine 34. Kazakhstan ena hanua ta, Kengir, ena kamepa dekenai ai idia atoa. Unuseniai, ai be dibura taudia tausen momo huanai ai noho.

Soviet Union ena lohia tauna, Joseph Stalin, be lagani 1953 ai ia mase bena lagani ta murinai unai ia vara. Kamepa dekenai dibura taudia momo edia mauri be ia auka dainai, idia laloa Moscow ena gavamani matamata ese edia noinoi do ia kamonai. Dibura taudia idia moale lasi dainai, idia dagedage matamaia. Unai nega lalonai, ai Witnes taudia ese dagedage dibura taudia, bona ami edia gima taudia dekenai ai hahedinaraia, unai dagedage karana dekenai do ai vareai lasi. Ai gini siri totona, Dirava ai abidadama henia be gau badana.

 Dagedage Ia Vara!

May 16 ai, kamepa lalonai dagedage karana ia matamaia. Dina rua murinai, dibura taudia 3,200 idia ura lasi gaukara, badina idia ura gavamani ese kamepa idia hanamoa, bona politikol karadia dainai dibura dekenai idia atoa taudia idia kara henidia namonamo. Dagedage karana idia vara haraga. Matamanai, dagedage dibura taudia ese ami edia sekuriti taudia idia oda henidia kamepa idia rakatania totona. Unai murinai, kamepa ena magu dekenai matu idia karaia. Bena, hahine bona tatau edia kamepa ia hapararaia haba idia makohia, bona dibura ruma badana tamona ai idia halaoa. Dibura taudia haida idia headava bona dibura dekenai idia noho pris taudia ese edia headava hereva idia karaia. Unai dagedage karana be dibura ruma toi lalonai ia vara, bona dibura taudia kahirakahira 14,000 be unai kara lalonai idia vareai.

Unai dagedage taudia ese komiti ta idia karaia ami taudia danu idia herevahereva totona. To daudau lasi murinai, unai komiti ena memba taudia huanai hepapahuahu ia vara, bona dagedage bada dibura taudia ese kamepa idia biagua bona dagedage karana be ia bada momokani. Komiti taudia ese sekuriti dipatmen, ami dipatmen, bona sivarai halasia oreana idia haginia, unai amo gau ibounai do idia heau namonamo. Edia hakaua taudia ese kamepa ena spika idia gaukaralaia edia badu herevadia halasia totona. Unai dagedage taudia ese dala idia koua dainai, ta ia heau boio diba lasi. Edia hereva idia kamonai henia lasi taudia idia panisidia, bona idia ura henia lasi taudia idia hamasedia haraga. Ai kamonai idia ese dibura taudia haida idia hamasea vadaeni.

Dagedage dibura taudia idia diba ami taudia do idia mai idia danu idia heai totona, unai dainai idia hegaegae namonamo. Dagedage taudia edia hakaua taudia ese dibura taudia ibounai idia hamaoroa edia heatu kohu do idia abia hegaegae, unai amo kamepa idia gimaia diba. Unai bamona idia karaia totona, idia ese dibura ruma ena uindo amo auri idia kokia bona unai amo kaia bona heai kohudia ma haida idia karaia. Ipidi bona bomu idia abia danu.

Ai Idia Doria Ai Vareai Totona

Unai nega dekenai, dagedage taudia rua be lau dekenai idia mai. Idia ta be idia segea vadaeni kaia ta lau dekenai ia henia gwauraia. Lau ia hamaoroa: “Inai oi abia! Oi sibona oi gimaia totona.” Egu lalona dekenai lau guriguri bona Iehova lau noia lau do ia durua. Lau hamaorodia: “Lau be Iehova ena Witnes tauna ta. Lau bona Witnes taudia ma haida be kamepa dekenai ai noho badina, taunimanima danu ai heai lasi, to ai itaia lasi lauma dikadia ai heai henia. Aiemai abidadama Dirava ena Basileia dekenai be aiemai tuari kohuna ta.”​—⁠Efeso 6:⁠12.

 Lau hoa badina unai tauna ese egu hereva ia lalopararalaia. To, iena bamona ese lau ia botaia. Unai murinai lau idia rakatania. Dagedage taudia be dibura ruma ta ta dekenai idia lao bona Witnes taudia idia doridia edia orea lalonai idia vareai totona. To iseda Keristani tadikaka bona taihu ibounai be unai bamona idia karaia lasi.

Iehova ena Witnes taudia edia gini siri karana be dagedage taudia edia komiti ena hebou ta dekenai idia herevalaia. Idia gwau: “Dubu idauidau taudia ibounai​—⁠Pentecostal, Adventist, Baptist​—⁠be inai dagedage karana lalonai idia vareai. To Iehova ena Witnes taudia sibona idia vareai lasi. Idia dekenai dahaka do ita karaia?” Ta ia gwau Witnes tauna ta be kamepa ena aveni dekenai do ita negea, ai idia hagaria totona. To guna ami gaukara ia karaia tauna ta, ma haida ese idia matauraia tauna, ia gini bona ia gwau: “Unai be aonega karana lasi. Namona be Witnes taudia ibounai be geiti badinai ia noho dibura ruma ta lalonai ita atodia. Unai amo, ami taudia be edia tuari tanika danu idia mai neganai, idia ese Witnes taudia do idia hamasedia guna. Bona ita be edia mase dainai kerere do ita abia lasi.” Ma haida be ena hereva dekenai idia lalotamona.

Idia Ura Ai Idia Hamasea

Daudau lasi murinai, dibura taudia be kamepa idia raka hagegea bona idia boiboi: “Iehova ena Witnes taudia umui raka-lasi!” Ai ibounai 80 be geiti badinai ia noho dibura ruma dekenai idia hakaua lao. Gabu ia bada totona dibura ruma lalonai idia noho bedi ibounai idia kokidia bona ai idia hamaoroa do ai vareai totona. Kamepa lalonai, unai ruma be aiemai dibura rumana ai ia lao.

Keristani taihu ese dabua idia turia hebou, bona unai ai gaukaralaia emai dibura ruma be kahana rua dekenai ai hapararaia totona​—⁠tatau edia kahana bona hahine edia kahana. (Gabeai, Russia ena Witnes ta ese unai dibura ruma ena laulau ia penia, henunai dekenai oi itaia diba.) Unai gabu maragina lalonai ai noho neganai, nega ibounai ai guriguri hebou bona  Iehova ai noia ai dekenai aonega bona “siahu badana” ia henia totona.​—⁠2 Korinto 4:⁠7.

Unai dibura ruma dekenai ai noho neganai, ai be dagedage dibura taudia bona Soviet gavamani ena ami edia huanai ai noho. Ai diba lasi unai orea rua be gabeai dahaka do idia karaia. Tadikaka burukana ta ese ai ia hamaoroa: “Do ia vara gauna umui laloa lasi. Iehova be ita do ia rakatania lasi.”

Keristani taihu​—⁠matamata bona buruka​—⁠be mai haheauka ida idia gini goada. Taihu ta ena mauri lagani be 80 bona ia manoka dainai ai durua. Ma haida be idia gorere bona medikol heduru idia abia be namo. Unai dibura ruma dekenai ai noho neganai, ena iduara be hanaihanai ia kehoa, unai amo dagedage dibura taudia ese ai idia itaia diba. Hanuaboi ai, dibura taudia be ipidi danu emai dibura ruma lalonai idia vareai. Nega haida ai kamonai idia gwau: “Dirava ena Basileia be ia mahuta noho.” Dina ai, kamepa ena aniani gabuna dekenai ai lao neganai, hanaihanai ai noho hebou, bona Iehova ai noia dagedage taudia amo ai do ia gimaia.

Kamepa dekenai ta ta ai durua emai abidadama dekenai ai gini goada totona. Hegeregere, nega momo tadikaka ta be Baibel amo sivarai ta ia gwauraia. Bena, unai sivarai be emai noho dalana ida ia hahegeregerea. Lo tadikaka ta be hanaihanai ia ura Gideona ena tuari orea ena sivarai ia gwauraia. Ai ia hamaoroa: “Iehova ena ladanai, tatau 300 mai edia kibi be tuari taudia 135,000 danu idia heai. Inai tatau 300 idia giroa neganai, idia ta be bero ta ia davaria lasi.” (Gunalaia Taudia 7:​16, 22; 8:​10) Unai sivarai bona Baibel ena sivarai ma haida ese emai abidadama idia hagoadaia. Lau be vanegai sibona Witnes tauna ai lau lao, to lo tadikaka bona taihu edia abidadama goadana lau itaia neganai, unai ese lau ia hagoadaia bada. Lau mamia Iehova be momokani ai ida ia noho.

Heai Ia Matamaia

Wiki momo idia hanaia, bona kamepa lalonai hekwakwanai ia bada ia lao. Dagedage taudia bona gavamani taudia padanai heiriheiri bada ia vara matamaia. Dagedage taudia edia hakaua taudia idia hereva goada idia ura Moscow ena gavamani ese gwaukau tauna ta do idia siaia bona idia ida do ia herevahereva. To gavamani taudia ese dagedage taudia idia oda henia edia dagedage karana do idia rakatania, edia heai kohudia idia atoa diho bona edia gaukara dekenai do idia giroa lou. To unai orea rua be idia ura lasi unai bamona idia karaia. Unai nega ai, ami taudia ese kamepa idia hagegea bona edia biaguna ena oda idia naria. Dagedage taudia danu idia hegaegae, idia ese edia magu goadadia idia haginia bona heai kohudia momo idia haboua danu. Ibounai idia diba dagedage taudia bona ami taudia huanai heai bada be kahirakahira do ia hamatamaia.

June 26 ai, ipidi badadia edia regena ese ai idia hanogaia. Tuari tanika ese magu idia makohia bona kamepa lalonai idia vareai. Idia  murinai ami taudia idia mai bona edia ipidi amo dagedage taudia idia pididia. Dibura taudia​—⁠tatau bona hahine​—⁠be tuari tanika dekenai idia heau lao bona idia boiboi, “Hurei!” bona nadi, sibodia idia karaia bomu bona gau ma haida idia negea. Heai badana ia vara matamaia bona ai Witnes taudia be ai diba lasi dahaka do ai karaia. Emai guriguri heduru totona be Iehova ese edena bamona do ia haerelaia?

Karaharaga, ami taudia be emai dibura ruma lalonai idia heau vareai. Idia boiboi: “Umui helaga taudia, umui raka-lasi! Karaharaga, magu ena murimuri kahanai umui lao!” Ofesa badana ese ami taudia ia oda henia ai do idia pidia lasi, to do idia gimaia. Idia heai noho lalonai, ai be kamepa murimurinai rei dekenai ai helai. Hora foa lalonai kamepa amo bomu, ipidi, taunimanima edia boiboi bona tai regena ai kamonai. To, gabeai regerege ta ai kamonai lasi. Daba ena diari ia hedinarai neganai, ai itaia ami taudia ese kamepa amo mase tauanina idia huaia raka-lasi. Ai kamonai taunimanima handred momo be bero idia abia eiava idia mase.

Gabeai, lau diba ofesa ta be ai dekenai ia mai. Bona mai heagi ida ia henanadai: “Nikolai e, daika ese umui ia hamauria? Ai eiava Iehova?” Ia ai tanikiu henia badina ai idia hamauria, bena ai gwau: “Ai diba emai Siahu Ibounai Diravana, Iehova, ese umui ia doria dainai, ai umui hamauria. Baibel negadiai ma haida ia doria iena hesiai taudia idia hamauria hegeregerena.”​​—⁠Esera 1:​1, 2.

Danu, unai ofesa ese ai bona ai noho gabuna idia diba dalana be ai dekenai ia gwauraia. Ia gwau, dagedage taudia bona ami taudia edia herevahereva ta lalonai, ami taudia ese dagedage taudia idia samania idia gwau, idia ese edia orea lalonai idia vareai lasi taudia idia hamasedia. Dagedage taudia be unai hereva idia hakoikoia totona, idia gwau Iehova ena Witnes taudia be inai dagedage karana lalonai idia vareai lasi, to idia hamasedia lasi. Unai Witnes taudia panisia totona, idia ibounai be dibura ruma ta dekenai idia atoa. Ami ofesa taudia be unai hereva idia laloatao.

Basileia Totona Ai Gini Goada

Toretore tauna, Aleksandr Solzhenitsyn, ena buka ta (The Gulag Archipelago) lalonai ia ese kamepa lalonai ia vara dagedage karana ia gwauraia. Ia gwau, unai dagedage karana ia hamatamaia badina, “ai ura dibura ruma amo ai do idia hamauria bona do ai noho namonamo, . . . to daika ese unai ia karaia diba?” Ai Iehova ena Witnes taudia be ai ura ta ese ai do ia hamauria danu. Dibura ruma amo ai do ia ruhaia sibona lasi, to gau ma haida danu ai ura, bona ai diba Dirava ena Basileia sibona ese ai dekenai unai gaudia ia henia diba. Dibura ruma dekenai ai noho neganai, ai ura Dirava ena Basileia ena kahanai ai gini bona unai ai karaia totona, Dirava amo goada ai abia be namo. Bona Iehova ese ai ura gaudia ibounai ia henia. Ena be kaia eiava bomu ai gaukaralaia lasi, to Ia ese ai dekenai kwalimu ia henia.​​—⁠2 Korinto 10:⁠3.

Iesu Keriso ese Pilato ia hamaoroa: “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari.” (Ioane 18:36) Unai hegeregerena, ai be Keriso murinai ai raka taudia dainai, politikol ena heai lalonai ai vareai lasi. Ai moale badina unai dagedage karana ia vara lalonai bona murinai, ma haida idia itaia ai ese Dirava ena Basileia ai badinaia momokani. Solzhenitsyn ena buka lalonai, ia ese emai kara unai nega dekenai ia herevalaia: “Iehova ena Witnes taudia be edia tomadiho taravatudia idia badinaia auka bona magu eiava sekuriti gaukara idia karaia lasi.”

Unai dagedage karana be lagani 50 gunanai ia vara. To, hanaihanai unai nega lau laloa bona Iehova lau tanikiu henia, badina kara namodia lau dibaia, hegeregere Iehova lau naria bona ena imana goadana lau abidadama henia diba. Oibe, guna Soviet Union gavamani ena siahu henunai idia noho Witnes taudia ma haida bamona, lau itaia Iehova ese ena Basileia idia naria taudia ia ruhaia, gimaia bona hamauria diba.

[Pictures on page 8, 9]

Kazakhstan dekenai ai noho kamepa

[Picture on page 10]

Witnes taihu edia dibura ruma ena laulau

[Picture on page 11]

Lau bona Keristani tadikaka ma haida, kamepa ai rakatania negana