Iesu Ena Mase ese Oi Ia Hamauria Diba Dalana
Iesu Ena Mase ese Oi Ia Hamauria Diba Dalana
LAGANI 2,000 bamona gunanai, Iuda taudia edia Pasova laganina 33 C.E. ai, tau namona ta ia mase, ma haida ia hamauria totona. Ia be daika? Ia be Nasareta tauna, Iesu. To, daidia be Iesu ena mase amo namo idia davaria? Tanobada taudia ibounai. Baibel ena siri ta—momo idia diba sirina—ese Iesu ena mase be inai bamona ia herevalaia: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”—Ioane 3:16.
Herevana momo be Ioane 3:16 ena hereva idia diba, to idia be unai siri ena anina idia lalopararalaia lasi. Idia henanadai: ‘Dahaka dainai ita dekenai Keriso ena mase be mai anina bada? Edena dala ai tau tamona ena mase ese taunimanima be mase amo ia hamauria diba?’ Baibel be unai henanadai ia haerelaia goevagoeva.
Dahaka Dainai Taunimanima Idia Mase?
Haida idia laloa, Dirava ese taunimanima ia karaia neganai, idia be tanobada dekenai nega sisina idia noho, hisihisi idia ania, idia moale sisina, bena idia mase bona gabu namona dekenai idia lao. Unai lalohadai idia abia taudia idia gwau, taunimanima idia mase be Dirava ena palani ena kahana ta. To Baibel be taunimanima idia mase ena badina badana ia gwauraia. Ia gwau: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.” (Roma 5:12) Unai siri ese ia hahedinaraia, taunimanima ibounai be “tau tamona” ena kara dika dainai idia mase. To, unai “tau tamona” be daika?
Buka ta (The World Book Encyclopedia) ia gwau, saiens taudia momo idia gwau taunimanima ibounai edia tamana eiava tubuna be tamona, bona Baibel ese unai “tau tamona” ia gwauraia. Genese 1:27 ia gwau: “Vadaeni Dirava ese taunimanima ia karaia, ia sibona ena laulau bamona, Dirava ena toana hegeregerena ia karaia. Tau bona hahine ia karaia.” Unai dainai Baibel ese ia hahedinaraia, tau bona hahine ginigunadia be Siahu Ibounai Diravana ese ia karaia hairai momokani gaudia.
Genese bukana be Iehova Dirava ese tau bona hahine ginigunadia ia karaia ena sivarai sibona lasi, to ma gau haida ia gwauraia danu. Unai sivarai ibounai lalonai, Dirava ese “mase” be nega tamona sibona ia herevalaia—hegeregere ia gwau, bema Adamu bona Heva idia gwau-edeede, vadaeni do idia mase. (Genese 2:16, 17) Dirava ia ura tanobada paradaisona ai taunimanima be do idia moale, idia gorere lasi, bona idia mauri hanaihanai. Dirava ia ura lasi taunimanima idia buruka, idia hisihisi, bena idia mase. Vadaeni, dahaka dainai taunimanima idia mase?
Baibel bukana Genese ese ia hahedinaraia, Adamu bona Heva be mai edia ura ida Iehova Dirava idia dadaraia. Unai dainai, Dirava be matamanai ia gwauraia taravatuna ia badinaia—anina be Adamu bona Heva be do idia mase. Ia gwau: “Tano dekenai do oi giroa lou, badina be tano dekena amo oi mai.” (Genese 3:19) Dirava ena hereva bamona, unai gwau-edeede tauna bona hahinena be idia mase momokani.
Adamu bona Heva sibona idia mase lasi. To, idia ruaosi idia gwau-edeede dainai, edia natudia bona tubudia be mauri goevadaena idia haboioa. Adamu bona Heva be natudia idia do havaraia lasi neganai, Iehova be inai gwauhamata ia gwauraia: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua. Davara ena gwarume bona ataiai manudia, bona mauri gaudia, tanobada dekenai idia marere gaudia ibounai do umui biagua.” (Genese 1:28) Unai ena anina be tanobada ai, taunimanima do idia noho, do idia moale bada bona do idia mase lasi. To Adamu—“tau tamona”—ese ena natuna bona tubuna ibounai be kara dika ena hesiai taudia ai ia halaodia dainai, idia ibounai be mase ese ia guidia bamona. Aposetolo Paulo, Adamu ena tubuna ta, ia gwau: “Lau be tauanina ena, kara dika ese lau ia guia, vadaeni lau be kara dika ena hesiai tauna.”—Roma 7:14.
Vanegai laganidia lalonai, raskol haida be ma haida ese idia penia davana bada laulau namodia haida idia hadikaia. Unai hegeregerena, Adamu ia kara dika neganai, ia be Dirava ena gau hereadaena—taunimanima unai—ia hadikaia. Adamu ena natudia be natudia idia havaraia, bena natudia bona tubudia idia vara, bona unai bamona ia vara noho. To, unai uru ta ta idia vara neganai, idia tubu daekau, natuna idia havaraia, bena dokonai idia mase. Dahaka dainai? Badina idia be Adamu ena bese taudia. Baibel ia gwau: “Tau tamona, Adamu ena kara dika dainai, taunimanima momo ese mase idia davaria.” (Roma 5:15) Adamu be ena bese taudia ia hadikaia dainai, idia gorere, buruka, idia ura kara dika idia karaia, bona idia mase. Ita be Adamu ena bese taudia danu.
Aposetolo Paulo be Roma Keristani taudia ia tore henia neganai, ia gwau goevadae lasi taudia—Paulo danu—edia mauri be dika momokani bona kara dika dainai idia hekwarahi bada. Ia gwau: “Lau madi o! Lau be dika momokani inai! Lauegu tauanina ese lau ia hamasea noho, be daika ese lau do ia hamauria?” Unai henanadai be mai anina bada, ani? Daika ese Paulo bona mauri hanaihanai idia ura taudia ma haida be kara dika bona mase amo do ia hamauria? Paulo be haere ia henia: “Dirava lau tanikiu henia, ia ese lau ia hamauria, Iesu Keriso dekena amo!” (Roma 7:14-25) Oibe, iseda Havaraia Tauna be dala ia karaia ena Natuna, Iesu Keriso amo ita ia hamauria totona.
Dirava be Iesu amo Taunimanima Do Ia Durua
Iesu be ia hahedinaraia, taunimanima be kara dika bona mase amo do ia hamauridia. Ia gwau: “Taunimanima ena Natuna . . . ia mai . . . iena mauri do ia atoa diho, taunimanima momo edia dika davana karaia totona.” (Mataio 20:28) Edena dala ai Iesu be unai ia karaia diba? Edena dala ai Iesu ena mase be ita ia durua?
Baibel ese ia hahedinaraia, “Iesu ese kara dika ta ia karaia lasi” bona “ia be kara dika taudia bamona lasi.” Iesu ena mauri lalonai, ia be Dirava ena Taravatu ia badinaia momokani. (Heberu 4:15; 7:26) Unai dainai, Iesu ena mase be Adamu ena mase bamona lasi—Adamu be kara dika bona gwau-edeede dainai ia mase. (Esekiela 18:4, NW ) Iesu be kerere ta ia karaia lasi, to ia ura ia mase badina unai amo ena Tamana ena ura do ia hagugurua—taunimanima be kara dika bona mase amo do ia hamauria. Ataiai ita herevalaia bamona, Iesu be mai ena ura ida ia mai, ‘iena mauri ia atoa diho, taunimanima momo edia dika davana karaia totona.’ Iesu be tau hereadaena, badina ia ese taunimanima ia lalokau henia bona mai ena ura ida ‘taunimanima ibounai dainai ia mase.’—Heberu 2:9.
Iesu ese ia bouboulaia maurina be Adamu ia kara dika neganai ia haboioa mauri goevadaena ida ia hegeregere momokani. To, Iesu ia mase neganai, dahaka ia vara? Iehova be Iesu ena mauri davalaia boubouna ia abia dae. (1 Timoteo 2:6) Momokani, Iehova be Iesu ena mauri amo taunimanima be kara dika bona mase amo ia hoidia bamona.
Taunimanima ia Havaraia Tauna ena lalokau kara badana be Baibel ese ia gwauraia momo. Paulo be Keristani taudia ia hadibaia, ia gwau: “Dirava ese umui ia hoia, mai davana.” (1 Korinto 6:20; 7:23) Petero ia gwau, Dirava be golo o siliva ia gaukaralaia lasi, to Iena Natuna ena rarana ia gaukaralaia Keristani taudia be mase amo ia hamauria totona. (1 Petero 1:18, 19) Iehova be Keriso ena mauri davalaia boubouna amo dala ia karaia, taunimanima be mase amo ia hamauridia totona.
Iesu Ena Mauri Davalaia Boubouna amo Namo Do Oi Abia, A?
Keriso ena mauri davalaia boubouna be namo bada do ia havaraia, badina Ioane ia gwau: “Keriso sibona be iseda kara dika gwauatao dalana. Bona iseda dika sibona lasi, to Keriso be taunimanima ibounai edia dika gwauatao dalana.” (1 Ioane 2:2) Oibe, Keriso ena mauri davalaia boubouna be taunimanima ibounai ia durua diba. To, taunimanima ibounai be maoromaoro Keriso ena mauri davalaia boubouna amo namo do idia abia, a? Lasi. Rau 3 ai, maini ena haheitalai oi laloatao, a? Heduru taudia ese maini ena guri lalonai idia noho tatau 9 idia durua totona keij ta idia atoa diho—to unai tatau 9 idia mauri totona, namona be idia ta ta idia hekwarahi, unai keij dekenai idia guia totona. Unai hegeregerena, bema taunimanima idia ura Keriso ena mauri davalaia boubouna amo namo idia davaria, vadaeni namo lasi idia naria ela bona Dirava be idia do ia hanamoa. Lasi, idia sibona ese kara ta idia karaia be namo.
Dirava ia ura dahaka ita karaia be namo? Ioane 3:36 ia gwau: “Dirava ena Natuna ia abidadama henia tauna ese mauri hanaihanai do ia abia, to iena Natuna ia kamonai henia lasi tauna be mauri do ia itaia lasi, badina Dirava ena badu be iena latanai do ia noho.” Dirava ia ura Keriso ena mauri davalaia boubouna ita abidadama henia. To, unai sibona lasi. Baibel ia gwau, Iesu “ena hahegani ita badinaia; unai amo ia ita diba momokani.” (1 Ioane 2:3, BHğ) Ia hedinarai goevagoeva, bema taunimanima be Keriso ena mauri davalaia boubouna idia abidadama henia bona ena taravatu idia badinaia, Keriso ese kara dika bona mase amo idia do ia durua.
Keriso ena mauri davalaia boubouna ita abidadama henia dalana badana ta be inai: Iesu ena taravatu hegeregerena, iena mase ita laloatao be namo. Iesu ia do mase lasi neganai, ia be ena kamonai aposetolo taudia ida mai anina bada anibou ta ia karaia, bona ia gwau: “Inai bamona do umui karaia, lau dekenai do umui laloa totona.” (Luka 22:19) Iehova ena Witnes taudia be idia ura bada Dirava ena Natuna idia tura henia noho, bona ena taravatu idia badinaia.
Hari inai negai, taunimanima haida sibona be edia Havaraia Tauna bona ena Natuna edia kara badana—mase amo taunimanima hamauria dalana—idia lalopararalaia dainai, idia tanikiu. Unai bamona abidadama taudia be idia moale. Aposetolo Petero be ena Keristani tadikaka ia herevalaia neganai, ia gwau: “Umui ese Iesu . . . umui abidadama henia noho. Unai dainai do umui moale bada, bona emui moale ese tanobada ena moale do ia hanaia momokani. Inai emui moale be ia bada herea dainai, emui uduna dekenai do umui herevalaia diba lasi. Inai moale ena badina korikori be inai: Emui lauma ese hamauria idia davaria. Bona inai hamauria ena badina korikori be emui abidadama.” (1 Petero 1:8, 9) Bema Iesu Keriso bona ena mauri davalaia boubouna oi abidadama henia, vadaeni hari emu mauri oi moalelaia diba bona do oi naria ela bona Iesu ese kara dika bona mase amo oi ia hamauria.
[Picture on page 6]
Iesu ese ena mauri ia henia, Adamu ese ia haboioa gauna ia hoia lou totona
[Picture on page 7]
Lagani ta ta ai, Iehova ena Witnes taudia be Iesu Keriso ena mase ena Memorial idia karaia