Itaia! Diari be Gau Hereadaena!

BEMA gabu ia dibura, bona emu raka dalana oi davaria haraga lasi, do oi moale lasi. To bema diari oi itaia, do oi moale bada ani! Unai hegeregerena, bema hekwakwanai ta oi davaria bona hanamoa dalana be lasi. Toana be oi mamia oi be dibura lalonai oi noho. To gabeai unai hekwakwanai hanamoa dalana oi itaia neganai, unai be hegeregere diari oi itaia. Unai dainai do oi moale.

Aposetolo edia negai, taunimanima momo be lauma diburana ai idia noho. To idia haida ese guna idia abia dae hahediba hereva koikoidia idia rakatania bona Keristani dalana idia abia dae neganai, aposetolo Petero be idia dekenai ia gwau: “[Dirava] ese dibura dekena amo umui ia boiria, vadaeni iena diari namo bada herea lalonai do umui noho.” (1 Petero 2:⁠9) Idia dekenai, inai be hegeregere dibura idia rakatania bona diari lalonai idia vareai. Eiava ita gwau diba guna idia be helaro lasi, to hari idia be mai edia helaro vaira nega totona.​​—⁠Efeso 2:​1, 12.

“Guna be Lau Oi Lalokau Henia Bada, to Hari be Lasi”

Keristani taudia ginigunadia ese “hereva momokani” idia davaria​​—⁠Keristani abidadama momokanina unai. (Ioane 18:37) Idia ese hereva momokani ena diari idia itaia bona lauma diburana idia rakatania. Matamanai, Keristani taudia haida edia abidadama be ia goada, to nega ia hanaia lalonai edia goada ia maragi ia lao. Hegeregere, lagani 100 C.E. ia kahirakahira neganai, Efeso kongrigeisen dekenai hekwakwanai badana ta ia vara. Ia toreisi lou tauna Iesu Keriso ese unai hekwakwanai ia hahedinaraia, ia gwau: “Inai gau tamona dekenai oi be kerere: Guna be lau oi lalokau henia bada, to hari be lasi. Guna be kara namodia oi karaia, to inai kara oi rakatania, bona oi moru vadaeni. Unai dainai unai kara namodia dalana do oi laloa lou, bona oiemu lalona do oi giroa, ma oiemu kara gunadia do oi karaia lou.” (Apokalupo 2:​4, 5) Oibe, Efeso Keristani taudia ese edia lalokau Dirava bona hereva momokani totona idia hagoadaia lou be gau badana.

Ita be edena bamona? Ita danu Baibel ena hereva momokani ena diari ita itaia dainai, ita moale bada. Hereva momokani ita ura henia. To vaia mauri ena hekwakwanai idauidau ita davaria dainai, hereva momokani ura henia bada karana ita haboioa diba. Unai sibona lasi, to inai nega dokona lalonai idia vara hekwakwanai idauidau ita davaria danu. Ita be inai “metau dikadia momo” amo ia honu tanobadana ai ita noho​​—⁠taunimanima be “edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, bona helaga karadia do idia negea.” (2 Timoteo 3:​1, 2) Unai gaudia dainai, iseda ura bona lalokau Iehova dekenai be ia maragi ia lao diba.

Bema guna ita abia lalokauna ita haboioa, namona be iseda ‘kara namodia do ita laloa lou bona eda lalona ita giroa.’ Namona be iseda lalokau Iehova dekenai ia goada lou, guna bamona. Danu, namona be ita naria namonamo hereva momokani ura henia karana ita haboioa lasi. Gau badana be lalohadai namona bona moale toana ita hahedinaraia, bona iseda lalokau Dirava bona ena hereva momokani dekenai ita habadaia!

‘Hereva Momokani ese Ita Do Ia Ruhaia’

Baibel lalonai idia noho hereva momokani ese ita ia durua, taunimanima ese lagani momo lalonai  idia daradaralaia henanadai badadia edia haere, ita diba totona. Unai henanadai haida be inai: Dahaka dainai ita noho? Mauri ena anina be dahaka? Dahaka dainai kara dika ia vara noho? Mase murinai mauri ta ia noho, a? Iehova ese ita dekenai Baibel ena hahediba hereva badadia ia hahedinaraia. Unai dainai Iehova ita tanikiu henia be namo, a? Namo lasi ita dibaia gauna ita laloa maragi!

Iesu ese ena hahediba taudia ia hamaoroa: “Hereva momokani be do umui diba, bona hereva momokani ese umui do ia ruhaia.” (Ioane 8:​32) Iesu ena mauri davalaia boubouna ese ita be kara dika bona mase amo ia ruhaia. To hereva momokani ese ita be inai tanobada diburana amo ia ruhaia. Ita dibaia gaudia ita laloa dobu karana ese ita do ia durua eda lalokau Iehova bona ena Hereva dekenai ita hagoadaia totona.

Tesalonika ai idia noho Keristani taudia dekenai, aposetolo Paulo ia gwau: “Dirava ena hereva ai mailaia neganai, umui kamonai henia, bona umui abia dae. Oibe, umui abia dae momokani. Umui dekenai ia be taunimanima edia hereva lasi, to ia be Dirava ena hereva momokani. Badina be Dirava ena hereva ese umui Keriso abidadama henia taudia emui kudouna dekenai ia gaukara noho.” (1 Tesalonika 2:​13) Tesalonika taudia be idia kamonai bona ‘mai moale ida [Dirava ena] hereva idia abia dae.’ Idia be “dibura taudia lasi.” To, “diari ena taudia” ai idia lao. (1 Tesalonika 1:​4-7; 5:​4, 5) Unai Keristani taudia idia diba Iehova be Havaraia Tauna bona ia be mai ena siahu, aonega, lalokau, bona hebogahisi. Keriso murinai idia raka taudia haida bamona, idia diba Iehova be dala ia karaia Iesu Keriso ena boubou gauna amo iseda kara dika ia kokia totona.​​—⁠Kara 3:​19-​21.

Ena be Tesalonika taudia be hereva momokani ibounai idia dibaia lasi, to idia diba edeseniai diba do idia davaria. Baibel ese Dirava ena tau do ia durua, bena “ena goada be hegeregere momokani, vadaeni kara namodia ibounai do ia karaia diba, mai kwalimu danu.” (2 Timoteo 3:​16, 17) Tesalonika dekenai idia noho Keristani taudia be Baibel idia stadilaia noho be namo, unai amo do idia diba Dirava ena amo ia mai diari be gau hereadaena. Idia be badina namona dainai nega ibounai idia moale. (1 Tesalonika 5:​16) Bona ita danu be unai bamona ita karaia diba.

Iseda Raka Dalana Ia Hadiaria

Diari be gau hereadaena ena badina ta ia herevalaia neganai, salamo torea tauna ia gwau: “Lohiabada e, oiemu hereva be lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.” (Salamo 119:105) Dirava ena Hereva amo ita abia hakaua herevadia ese ita ia hakaua bona ia durua mauri namona ita moalelaia totona. Namo lasi ita be davara dekenai ia hure kava bouti bamona. Hereva momokani ita dibaia bona eda mauri lalonai ita badinaia karana ese ita do ia gimaia, unai amo ‘koikoi hereva be lai bamona ita ia doria lao, doria mai’ lasi.​​—⁠Efeso 4:​14.

Baibel ia gwau: “King taudia do umui abidadama henia lasi, badina taunimanima ese umui do idia hamauria diba lasi.” Ma ia gwau: “Iakobo ena Dirava ese ia durua noho taudia, be idia moale noho.” (Salamo 146:​3, 5) Danu, Iehova abidadama henia karana ese ita ia durua gari bona lalometau ita hanaia totona. Aposetolo Paulo ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.” (Filipi 4:​6, 7) Dirava ena Hereva momokani ena diari dainai, namo bada ita davaria.

Tanobada Dekenai Diari Bamona Hedinarai

Dirava ena Hereva amo ia mai diarina be gau hereadaena ena badina ma ta be, ia ese dala ia kehoa mai anina bada gaukarana ita karaia totona. Iesu ese ena murinai idia raka taudia ia hadibaia: “Do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso  henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.” Unai siri ena hamatamaia kahanai, Iesu ia gwau: “Siahu ibounai guba dekenai bona tanobada dekenai be lau dekenai ia henia vadaeni.”​​—⁠Mataio 28:​18-​20.

Keristani taudia momokanidia ese haroro gaukara bona Baibel ena hereva momokani be taunimanima dekenai idia hadibaia neganai, daika ese idia ia durua? Iesu ese ena hahediba taudia ia gwauhamata henidia ia be idia danu ia noho. Haroro gaukara bona edia “kara namodia” amo edia diari idia hahedinaraia neganai, ia ese idia ia durudia. (Mataio 5:​14-​16) Aneru danu be haroro gaukara idia durua. (Apokalupo 14:⁠6) Bona Iehova Dirava be edena bamona? Aposetolo Paulo ia gwau: “Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua.” Dirava ida idia gaukara hebou taudia huanai ita noho be hahenamo badana!​​—⁠1 Korinto 3:​6, 9.

Mani oi laloa, Dirava ese iseda hekwarahi, ia henia gaukarana dekenai be ia hanamoa danu. Dirava ese ita dekenai gaukara ia henia ‘tanobada ita hadiaria’ totona, bona unai gaukara be gau ta ida ita hahegeregerea diba lasi. Iseda hereva bona kara amo Dirava ena Hereva ena diari ita hahedinaraia neganai, ita be kudou-maoro taudia ta ta do ita durua momokani. (Filipi 2:​15) Bona haroro bona hahediba gaukarana ita karaia goadagoada neganai ita moale diba, badina ‘Dirava ena kara be maoromaoro dainai ia ese iseda kara namodia bona ena ladana dainai ita hahedinaraia lalokauna do ia laloaboio lasi.’​​—⁠Heberu 6:​10, BHğ.

‘Matana Muramura Hoia, Matana Dahua Totona’

Iesu ese Laodikea kongrigeisen ia tore henia neganai, ia gwau: “Lau dekena amo . . . matana muramura danu do oi hoia, unai muramura dekenai oiemu matana do oi dahua, vadaeni gau do oi itaia diba. Lau ura henia taudia ibounai, be lau ese lau sisiba henia noho, bona lau matakani henia noho.” (Apokalupo 3:​18, 19) Matakepulu taudia edia matana hanamoa totona, “matana muramura” idia gaukaralaia, unai hegeregerena Iesu ena hahediba hereva bona ena matahakani ita badinaia neganai, lauma dalanai iseda matana do ia namo. Bema ita ura lauma dalanai ita goada, namona be Iesu ena sisiba hereva ita abia dae bona Baibel lalonai idia noho hakaua herevadia ibounai ita badinaia. Danu, Keriso ena laloa dalana ita abia bona ena haheitalai ita tohotohoa be namo. (Filipi 2:5; 1 Petero 2:​21) Matana muramura be mai ena davana. Iesu ia gwau: “Lau dekena amo . . . do oi hoia.” Anina be nega ita atoa bona ita hekwarahi Iesu ena matahakani bona ena hakaua herevadia ita diba totona.

Bema dibura gabuna oi rakatania bona diari gabuna dekenai oi lao, nega sisina murinai emu matana be diari do ia itaia namonamo. Unai hegeregerena, nega bada ita atoa Baibel ita stadilaia totona, unai amo hereva momokani ena diari do ita itaia. Danu nega bada ita atoa ita dibaia gaudia ita laloa dobu totona, bona ita abia dae hereva momokani be mai anina bada. Ena be nega bada ita halusia, to unai be herevana, badina diari be gau hereadaena!

[Picture on page 22]

“Lau dekena amo . . . matana muramura danu do oi hoia, unai muramura dekenai oiemu matana do oi dahua, vadaeni gau do oi itaia diba”