Ta Ena Ura Gauna Ia Vara Lasi Neganai

ENA BE idia ura headava taudia idia hetura heheni neganai, idia gaukara hebou namonamo, to headava ibounai lalonai lalohisihisi ia vara diba. Dahaka dainai idia headava murinai edia kara ia idau?

Baibel ia gwau, headava taudia be “metau bada do idia abia.” (1 Korinto 7:​28) Nega momo, metau idia vara badina ita be goevadae lasi taudia. (Roma 3:​23) Danu, idia ta eiava idia ruaosi ese Baibel ena hakaua dalana idia badinaia lasi. (Isaia 48:​17, 18) Bona tau o hahine ia headava neganai, nega haida headava lalonai ena ura gaudia haida do idia vara lasi. Unai dainai, lalohadai kereredia idia abia bona unai ese hekwakwanai badadia ia havaraia.

Ura Gaudia Haida Idia Vara Lasi

Bema oi be tau o hahine, oi headava neganai oi be mai emu ura gaudia haida; taunimanima momo be unai bamona. Headava oi lalohadailaia neganai, oi laloa edena bamona mauri do oi abia? Emu headava lalonai unai gaudia idia vara lasi neganai, be edena bamona? Namo lasi ita laloa unai bamona hekwakwanai ita hamaoromaoroa diba lasi. Baibel ena hakaua herevadia oi badinaia neganai, unai ese oi do ia durua hekwakwanai oi hamaoromaoroa totona. * (2 Timoteo 3:​16) Unai dainai, oi do headava lasi neganai oi abia lalohadai headava dekenai mani oi laloa namonamo.

Haida idia laloa edia headava lalonai do idia lalokau heheni sibona, gori sivaraidia dekenai idia duahia hegeregerena. Eiava reana oi laloa, oi bona emu adavana ese nega bada do umui atoa umui ruaosi umui noho hebou o dala namona ai hekwakwanai umui hamaoromaoroa hebou totona. Momo idia laloa idia headava neganai mahuta hebou urana do idia biagua. To unai bamona lalohadai be headava lalonai do ia vara lasi, unai dainai haida be idia lalohisihisi.​​—⁠Genese 3:​16.

Danu lalohadai kererena ta be inai, haida idia laloa idia headava neganai, moale do idia davaria. Momokani, mauri lalonai turana ta oi abia be moale bada gauna. (Aonega Herevadia 18:22; 31:10; Hadibaia Tauna 4:⁠9) To headava ese hekwakwanai ibounai do ia hanamoa, a? Unai bamona idia laloa taudia idia headava murinai, idia lalohisihisi bada!

Edia Ura Gaudia Idia Herevalaia Lasi

Headava lalonai ita ura idia vara gaudia ibounai be dika lasi, idia haida be mai anina bada. To unai ura gaudia haida dainai, hekwakwanai idia vara diba. Headava ia sisibalaia tauna ta ia gwau: “Lau itaia headava taudia idia badu heheni, badina matamanai ta ena ura gauna be ena bamona dekenai ia herevalaia lasi.” Unai bamona ia vara ena badina  ita lalopararalaia totona, inai haheitalai mani ita laloa.

Mary ese David ia adavaia, bona David ena noho gabuna be daudau. Mary ia do headava lasi neganai, ia laloa gabu matamata dekenai do ia lao be auka, badina ia be hemarai kekenina. To, Mary ia diba momokani David ese ia do ia durua, unai gabu matamata ena noho dalana ia manadalaia totona. Hegeregere, Mary ia laloa David be ia ida do ia noho, bona do ia durua David ena turadia ia diba totona. To, unai ia vara lasi. David be nega momo ena turadia ida ia herevahereva, to Mary be sibona ia noho. Mary ia mamia David ese ia laloa lasi. Bona ia laloa, ‘Dahaka dainai David be inai bamona ia karaia?’

Oi laloa Mary ena lalohadai be kerere, a? Lasi. Ia ura ena adavana ese ia do ia durua gabu matamata ia manadalaia totona. Mary be hemarai momo kekeni dainai, ia laloa ia be hegeregere lasi taunimanima momo ia hedavari henia totona. To, Mary ese David dekenai ena lalohadai ia gwauraia hedinarai lasi. Unai dainai, David be Mary ena lalohadai ia diba lasi. Bema Mary ena lalohadai ia gwauraia hedinarai lasi, dahaka do ia vara? Mary be ena adavana dekenai do ia moale lasi, bona nega ia hanaia lalonai, reana do ia laloa ena adavana ese ena hemami ia laloa lasi.

Emu adavana ese emu ura gaudia ia laloa lasi neganai, reana oi danu be oi lalohisihisi. Bema unai ia vara, dahaka do oi karaia?

Umui Herevahereva

Emu ura gaudia idia vara lasi neganai, lalohisihisi ia havaraia. (Aonega Herevadia 13:12) To gau ta oi karaia diba unai oi hanaia totona. Baibel ia gwau: “Bema oi aonega bona hereva maorodia oi gwauraia, ma haida edia lalona oi veria diba.” (Aonega Herevadia 16:​23,  Contemporary English Version) Unai dainai, bema emu ura gauna ta ia vara lasi, namona be emu adavana dekenai oi herevalaia.

Emu lalohadai oi gwauraia hedinarai totona, namona be nega, gabu, bona hereva maorodia oi abia hidi. (Aonega Herevadia 25:11) Manau bona hemataurai dalanai emu adavana oi hereva henia. Namo lasi emu adavana dekenai kerere ibounai oi atoa, to namona be emu ura gauna bona lalohadai oi gwauraia hedinarai.​​—⁠Aonega Herevadia 15:⁠1.

Dahaka dainai unai bamona oi karaia be namo? Emu adavana ese emu ura gaudia ia lalopararalaia, a? Reana, emu adavana be emu lalohadai ia diba lasi, to bema oi gwauraia hedinarai, mai moale ida emu ura gauna do ia lalohadailaia. Emu ura gauna o lalohadai oi gwauraia hedinarai karana ese ia hahedinaraia lasi emu headava ia dika, eiava emu adavana ese oi ia laloa lasi.

Namona be emu adavana dekenai emu ura gaudia oi gwauraia hedinarai. Hegeregere, guna ita herevalaia sivaraina lalonai, Mary be reana David dekenai do ia gwau: “Taunimanima matamatadia lau hedavari henia be ia auka. Ia namo lau oi durua inai gabu taudia lau diba namonamo totona?”

“Hereva Dekenai Do Umui Kamonai Haraga”

Mani dala ma ta amo unai oi laloa. Bema emu adavana be oi ia hamaoroa ia lalohisihisi  badina oi ese ena ura gaudia haida oi laloa lasi, namona be iena hereva oi kamonai! Namo lasi oi gwau emu kara be ia maoro. To Baibel ia gwau, “hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi.” (Iamesi 1:​19; Aonega Herevadia 18:13) Aposetolo Paulo ese Keristani taudia ia hagoadaia: ‘Tau tamona sibona ena namo do idia tahua lasi, to namona be tau haida edia namo do idia tahua.’​​—⁠1 Korinto 10:⁠24.

Unai bamona oi karaia totona, emu adavana ena lalohadai oi lalopararalaia be namo. Baibel ia gwau: “Tatau e, umui danu, emui adavana danu umui noho hebou ena dala do umui laloa namonamo.” (1 Petero 3:⁠7) Oibe, hahine danu ese unai dala idia badinaia be namo.

Laloatao, ena be oi adavaia tauna ida oi gaukara hebou namonamo diba, to gau momo dekenai do umui lalotamona lasi. (“Gabu Tamona, to Gau Idauidau Idia Itaia” mauana itaia.) Unai ese dala ia kehoa gau haida dekenai ma ta ena lalohadai oi abia totona. Oi bona emu adavana emui ruma bese ena noho daladia bona kastom be idauidau dainai, emui lalohadai danu be idauidau. Unai dainai, ena be ta ta umui lalokau henia bada, to emui ura gaudia be idauidau.

Hegeregere, Keristani headava taudia ese Baibel ena hakaua herevana, kwara dagina matauraia dalana idia diba. (Efeso 5:​22, 23) To, tau ese kwara dagina be edena bamona do ia gaukaralaia ena ruma bese lalonai, bona idia ese edena bamona edia kamonai karana do idia hahedinaraia? Umui ruaosi umui hekwarahi unai hakaua herevana umui badinaia totona, a?

Danu dina ta ta ai, umui ura karaia gaudia dekenai emui lalohadai be idauidau. Daika ese ruma gaukaradia do ia karaia? Emu varavara oi vadivadi henia neganai, do oi noho ena daudau be edena bamona? Keristani headava taudia be edena bamona idia hahedinaraia edia mauri lalonai Basileia gaudia idia atoa guna? (Mataio 6:​33) Headava lalonai nega haida moni idia gaukaralaia namonamo lasi dainai, idia abiatorehai. Unai dainai, edia moni idia gaukaralaia namonamo be namo. Unai ena anina be dahaka? Emu adavana ida hemataurai dalanai unai gaudia umui herevalaia hebou neganai, do umui moale.

Unai bamona herevahereva karana ese headava lalonai maino do ia habadaia, ena be hari emui ura gaudia haida idia vara lasi. Unai dainai aposetolo Paulo ena sisiba umui badinaia, ia gwau: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao.”​​—⁠Kolose 3:​13.

[Footnote]

[Box/​Picture on page  18]

GABU TAMONA, TO GAU IDAUIDAU IDIA ITAIA

“Mani inai oi laloa, turist haida be gabu mai hairaina ta idia itaia noho. Ena be idia ibounai be gabu tamona idia itaia, to idia ta ta idia itaia gaudia be idauidau. Dahaka dainai? Badina idia ta ta idia gini gabuna be idauidau. Bona idia itaia gaudia dekenai danu edia lalohadai be idauidau. Headava dekenai be unai bamona danu. Ena be tau bona hahine idia gaukara hebou namonamo diba, to gau haida dekenai edia lalohadai be idauidau. . . . Herevahereva hebou karana ese edia lalohadai do ia hatamonaia. Unai ia vara totona, namona be nega idia atoa idia herevahereva totona.”​​—⁠August 1, 1993, Gima Kohorona, rau 4.

[Box on page 19]

HARI OI KARAIA DIBA GAUDIA

• Oi ura headava lalonai do idia vara gaudia mani oi laloa lou. Idia be mai anina bada, a? Oi ese emu adavana amo gau momo oi noia, a?​​—⁠Filipi 2:4; 4:⁠5.

• Namona be anina lasi ura gaudia haida oi haidaua. Hegeregere, namo lasi oi gwau, “gau ibounai dekenai do ita lalotamona,” to emu lalona oi hadaia umui davaria hekwakwanai be maino dalanai umui hamaoromaoroa totona.​​—⁠Efeso 4:​32.

• Emu ura gaudia be emu adavana ida oi herevalaia. Unai bamona kara ese headava taudia ia durua, ta ta dekenai lalokau bona hemataurai idia hahedinaraia totona.​​—⁠Efeso 5:​33.

[Picture on page 17]

Emu adavana ena lalohadai ia gwauraia neganai, oi “kamonai haraga”