Aramagedono​—Dirava ese Unai Tuari amo Tuari Ia Haorea

“Idia laloa tau ta alaia karana be kara dika rohorohona; unai dainai, idia dekenai tuari be gau dika rohorohona bona idia inai henia momokani, bona edia gado ai tuari herevana ta be lasi.” ​—LAGANI 1888 AI NORWAY TAUNA FRIDTJOF NANSEN ESE GREENLAND ENA INUIT HANUA TAUDIA BE UNAI BAMONA IA HEREVALAIDIA.

ITA ibounai ita ura ita noho gabuna ai taunimanima ibounai dekenai “tuari be gau dika rohorohona bona idia inai henia momokani.” Ita ibounai ita ura nega ta ia mai bona inai hereva “tuari” be do ia noho lasi, badina taunimanima be tuari karana idia diba lasi. Bema ita laloa taunimanima ese unai bamona tanobadana ta do idia havaraia, reana do ita naria kava.

To, Isaia ena peroveta herevana lalonai, Dirava ia gwauhamata unai bamona tanobada ta do ia havaraia, ia gwau: “Edia io ena auri danu do idia botaia palaka, au rigi utua kaia do idia halaoa. Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.”​​—Isaia 2:4.

Unai gwauhamata ia guguru totona, gau badana be hari inai negai, tanobada hegegemadai soldia taudia 20 milioni bamona be edia gaukara amo do idia hadokoa bona idia vara noho tuari 20 bamona do idia ore guna be maoro. Oibe, siahu ibounai Diravana, Iehova ese tuari ta do ia karaia ena gwauhamata ia hagugurua totona. Iehova ese do ia karaia tuarina be Baibel ese ia gwauraia, Aramagedono.​​—Apokalupo 16:​14, 16.

Ena be taunimanima idia gwau unai hereva “Aramagedono” be tanobada hegegemadai do ia vara niuklia tuarina, to diksenari ta ese ena anina korikorina ia hahedinaraia, ia gwau: “Ia be gabu ta, bona unuseniai kara namo taudia bona kara dika taudia do idia tuari heheni.” Kara namo taudia ese kara dika taudia idia halusia diba, eiava unai be lalohadai kavakavana ta sibona?

Baibel ese ita ia hagoadaia badina nega momo ia gwau, kara dika be do idia ore momokani. Salamo torea tauna ia peroveta, ia gwau: “Lohiabada e, oi ese kara dika taudia tanobada dekena amo do oi lulua, do oi hadikadia ore. Kara kerere taudia do oi haorea momokani.” (Salamo 104:35) Aonega Herevadia 2:​21, 22 ia gwau: “Kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani. To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.”

Baibel ia hahedinaraia danu gwau-edeede lohia taudia be maino dalanai edia lohia siahuna do idia rakatania lasi. Unai dainai, Dirava ese tuari ta amo unai lohia taudia bona tuari do ia  haorea momokani. (Salamo 2:2) Baibel ia gwau unai tuari be Aramagedono, ia be tuari idauna momokani.

Megido Kahirakahira Idia Vara Tuari Gunadia

Unai hereva “Aramagedono” anina be “Megido Ororona.” Megido ena siti gunana bona Ieserele Kourana ai idia karaia tuari momo lalonai, tuari orea ta ese ena inai taudia idia halusia bona hadikaia ore momokani. Sivarai gunadia ia torea tauna, Eric H. Cline ena buka ladana The Battles of Armageddon lalonai ia gwau: “Histori lalonai, Megido bona Ieserele Kourana ai tuari badadia momo idia vara bona unai ese taunimanima edia noho dalana idia haidaua.”

Cline ia hereva hegeregerena, nega momo Megido kahirakahira ai idia karaia tuaridia lalonai, tuari orea ta ese ena inai taudia ia halusia bona hadikaia ore momokani. Lagani 700 gunanai, Mongol tuari taudia be Asia tanona ena kahana badana idia biagua, to unai koura dekenai nega ginigunana tuari lalonai idia lusi. Megido kahirakahira ai, Tanobada Tuarina Ginigunana lalonai, Jeneral Edmund Allenby ese ia gunalaia Britain ena tuari oreana ese Turkey ena tuari oreana ia halusia momokani. Tuari sivaraidia ia torea tauna ta ia gwau, Allenby be unai tuari lalonai ia kwalimu bona “ena inai taudia be nega kwadogina lalonai ia hadikaia ore momokani.”

Baibel danu ia hahedinaraia, guna Megido kahirakahira ai tuari badadia idia vara. Hegeregere, unuseniai, Hahemaoro Tauna Baraki ese Kanana tauna Sisera ena tuari taudia ia halusidia. (Gunalaia Taudia 4:​14-​16; 5:​19-​21) Megido kahirakahira ai, Gideona mai ena tuari orea maragina 300 sibona ese Midiana taudia edia tuari orea badana idia hadikaia ore. (Gunalaia Taudia 7:​19-​22) Gileboa Ororona ai, Pilistia taudia ese Israela taudia idia halusia, bona unai tuari lalonai King Saulo bona iena natuna, Ionatana idia mase.​​—1 Samuela 31:​1-7.

Lagani 4,000 lalodiai Megido bona ena koura tanona ai tuari momo idia karaia. Tuari sivaraidia ia torea tauna ta ia gwau, unai gabu dekenai idia karaia tuari ibounai be 34 bamona!

Guna Megido dekenai idia vara gaudia ese ita idia durua, inai hereva “Aramagedono” ena anina ita lalopararalaia totona. Ena be Baibel lalonai unai hereva be nega tamona sibona ia hedinarai, to Apokalupo bukana ena hereva ma haida ese idia hahedinaraia Aramagedono ese tanobada taudia ibounai edia mauri do ia haidaua.

 Baibel Ena Hereva Aramagedono Dekenai

Ena be Megido kahirakahira idia vara tuari lalonai tuari oreana ta ese ena inai taudia ia halusia momokani, to idia ese kara dika taudia idia haorea momokani lasi. Dirava sibona ese unai bamona tuari ia karaia diba. Iesu ia hereva hegeregerena, “ta ia namo lasi Dirava sibona.” (Luka 18:19) Danu, Baibel ia gwau Aramagedono be Dirava ena tuari.

Baibel lalonai, Apokalupo bukana ia gwau, “tanobada edia king ibounai” be do idia haboua “Siahu Ibounai Diravana ena Dina Badana neganai, be do idia tuari hebou totona.” (Apokalupo 16:14) Unai peroveta herevana ma ia gwau: “King ibounai idia haboua gabu ta dekenai. Inai gabu ena ladana Heberu gado dekenai be Aramagedono.” * (Apokalupo 16:16) Gabeai, Apokalupo bukana ma ia gwau, “tanobada ena king taudia mai edia tuari oreadia” be do “idia haboua, unai hosi kurokuro latanai ia guia tauna mai ena tuari orea do idia tuari henia totona.” (Apokalupo 19:19) Baibel ese ia hahedinaraia, unai hosi ia guia tauna be Iesu Keriso.​​—1 Timoteo 6:​14, 15; Apokalupo 19:​11, 12, 16.

Unai siri amo dahaka ita dibaia? Aramagedono be Dirava bona kamonai lasi taudia huanai do ia vara tuarina. Dahaka dainai Iehova bona ena Natuna, Iesu Keriso, ese unai tuari do idia karaia? Badina ginigunana be, Aramagedono tuarina amo Iehova ese ‘tanobada idia hadikaia vadaeni taudia do ia alaia ore.’ (Apokalupo 11:18) Badina iharuana be, unai tuari ese maino do ia mailaia tanobada dekenai, badina Baibel ia gwau “tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.”​​—2 Petero 3:​13.

Dahaka Dainai Aramagedono Ia Vara be Namo?

Reana, “lalokau bona maino ena Dirava” ese iena Natuna, “Maino ena Lohia” do ia siaia tuari  ta ia karaia, oi abia dae be auka, ani? (2 Korinto 13:11; Isaia 9:6) Unai tuari do idia karaia ena badina oi lalopararalaia be namo. Salamo bukana ese ia hahedinaraia, Iesu be hosi dekenai ia guia tuari tauna bamona. Dahaka dainai Iesu be do ia tuari? Salamo torea tauna ia gwau, Keriso be, “hereva momokani bona kara maoromaoro gimaia totona,” do ia tuari. Ia be do ia tuari badina kara maoromaoro ia ura henia, bona kara dika ia badu henia.​​—Salamo 45:​4, 7.

Unai hegeregerena, Iehova ese tanobada ai kara gageva ia itaia neganai, ena hemami be Baibel ese ia gwauraia. Peroveta tauna Isaia ia gwau: “Lohiabada ese inai kara ia itaia, bona ia badu, kota maoromaoro be lasi dainai. Lohiabada ese kara maoromaoro, kemena dabua aukana bamona, sibona dekenai do ia atoa, bona hamauria kara ena kwara gauna, be iena kwarana dekenai do ia atoa. Ma ia ese dika ena davana henia kara, be do ia atoa, iena dabua, bona badu danu do ia karaia, iena kouti dabua badana.”​​—Isaia 59:​15, 17.

Kara dika taudia idia lohia neganai, kara maoromaoro taudia be maino bona noho namo do idia davaria lasi. (Aonega Herevadia 29:2; Hadibaia Tauna 8:9) Momokani, kara gageva bona kara dika ita haorea diba lasi, bema unai idia karaia taudia be idia do noho. Unai dainai, kara maoromaoro bona maino idia noho hanaihanai totona, Dirava ese kara dika taudia do ia hadikaia ore be namo. Solomona ia gwau: “Kara dika taudia ese, kara namo taudia idia hisihisi henidia noho, to unai idia henia noho hisihisi be Dirava ese, unai kara dika taudia dekenai ma do ia henidia.”​​—Aonega Herevadia 21:18.

Dirava be Diadi Tauna dainai, ita diba momokani Ia be mai maoromaoro ida kara dika taudia do ia hahemaoro henidia. Aberahamo ia henanadai: “Tanobada ibounai ena kota biaguna be kara maoromaoro do ia karaia lasi, a?” Iehova ena haere amo, Aberahamo ia diba, Iehova be nega ibounai ia maoro sibona! (Genese 18:25) Unai sibona lasi, to Baibel ia gwau Iehova be kara dika taudia ia hamasea karana ia moalelaia lasi, to bema idia helalo-kerehai lasi, vadaeni do ia haoredia momokani.​​—Esekiela 18:32; 2 Petero 3:​9.

Aramagedono be Tuari Korikorina Ta

Unai tuari lalonai, oi be edena kahanai do oi gini? Reana, ita ibounai do ita laloa ita be kara namo taudia edia kahanai do ita gini. To, edena bamona unai ita diba momokani? Peroveta tauna Sepanaia ese ita ia hagania, “kara maoromaoro do umui karaia . . . bona do umui manau.” (Sepanaia 2:3) Aposetolo Paulo ia gwau: “Dirava ia ura taunimanima ibounai ese mauri do idia davaria, bona hereva momokani do idia diba.”​​—1 Timoteo 2:4.

Gau ginigunana be inai: Hahemauri ita abia totona, Iehova bona tanobada amo kara dika do ia kokia dalana do ita dibaia. Gau iharuana be inai: Dirava ese ita do ia abia dae bona gimaia totona, kara maoromaoro do ita badinaia.

Bema unai mai anina bada karadia rua ita karaia, mai moale ida Aramagedono do ita naria​​—unai tuari ese taunimanima edia tuari ibounai do ia haorea. Unai tuari ia ore murinai, gabu ibounai taunimanima do idia gwau tuari be gau dika rohorohona bona do idia inai henia momokani. Baibel ia gwau, “tuari dalana be do idia hadibaia lou lasi.”​​—Isaia 2:4.

[Footnote]

[Blurb on page 5]

Dirava be Aramagedono tuari amo kara dika do ia hadokoa

[Picture on page 6]

Megido

[Picture on page 6]

Megido kahirakahira ai, Gideona bona ena tuari taudia be tuari dekenai idia kwalimu

[Picture on page 6, 7]

Aramagedono ia ore murinai, gabu ibounai taunimanima do idia gwau tuari be gau dika rohorohona bona do idia inai henia momokani

[Picture on page 8]

Gau ginigunana be inai: Hahemauri ita abia totona, Iehova bona iena ura do ita dibaia