O Laloamu Eda Tanobada Baine Ore, Eiava?

O LALOAMU vaira neganai eda tanobada be ede baine heto? Momo na eda tanobada ai e varamu ğaudia e itamu dainai, e laloamu eda tanobada na baine ore vaitani.

Momokani, hari ina negai, taunimanima na ranu, uda, bona hodahoda e hadikadiamu. Danu, saiens taudia haida na e gwaumu, nega ta guba amo nadi badadia bae moru, hisiu bae pou o dina ena siahu baine ore neganai, tanobada bona mauri ğaudia iboudiai bae ore vaitani.

Saiens taudia na e laloamu, metairametaira​—reana lağani bilioni momo lalodiai​—ina tanobada na e dika e laomu, una dainai taunimanima na aniani, ranu bona lağa ai be dabumu. Buka ta ladana Encyclopædia Britannica na e gwaumu, tanobada e dika e laomu karana “na ta ese basine hanamoa lou diba.”

To, baita moale badina Baibel na e gwaumu Iehova na eda tanobada baine gimaia bona haida ese bae noholaia hanaihanai. “Goada herea-daena” Diravana na ğau iboudiai e havaradia dainai, Ia na heğereğere ina tanobada baine reğua diba. (Isaia 40:26) * Una dainai, ini hereva na baita abidia dae, Dirava ese ‘tanobada na ia badina latanai vada e hadaia, una dainai nega ta basine heude-heude diba.’ “Dina bona hua, ba imodaia; hisiu mai diarimui, iboumui ai ba imodaia. . . . Badina be ia e gwau isi, bena idia na e vara. Ia ese vada e atodia, bae mia hanaihanai.”​​—Salamo 104:5; 148:​3-6.

Dirava Ena Ura Tanobada ai be Dahaka?

Hari ina negai, taunimanima ese tanobada na se naria namonamomu, a e hadikaiamu; to una be Dirava ena ura, eiava? Lasi, Dirava ese Adamu bona Heva e karadia neganai, idia na uma mai hairaina ta lalonai e atodia. To idia raruosi ese Paradaiso bae habadaia na namo. Una dainai, Dirava ese e hağanidia, una  gabu mai hairaina bae biru henia bona bae reğua. (Genese 2:​8, 9, 15) Unai ğaukara hereadaena na Dirava ese ita tubuda Adamu bona Heva e henidia!

To Dirava ena ura binai: Adamu bona Heva ese una uma bae reğua, bona bae biru henia ela bona tanobada idoinai na paradaiso ai bainela. Una dainai, Dirava ese idia raruosi e hağanidia, eto: “Besemui ba havaradia, ba hutuma; tanobada ba hahonua bona ba biagua; davara gwarumedia bona atai manudia bona mauri ğaudia tanobada ai e loamu iboudiai ba biagudia.”​​—Genese 1:​28.

To, hekokoroku aneruna ladana Satani na Dirava ena ura e hadikaia. Satani na e ura Adamu bona Heva na ia bae toma henia diho. Una dainai, ia ese gaigai ta amo Adamu bona Heva e koidia bena Dirava ena lohia siahuna e dadaraia. (Genese 3:​1-6; Apokalupo 12:9) Idia na Dirava e kara ğaudia asie lalodia dainai, reana Dirava lalona na e hisihisi! To, una gwau-edeede karana ese Iehova Dirava ena ura​​—tanobada idoinai na paradaiso ai bainela​—na se haidaua. Dirava eto: “Lau udugu amo e lasimu herevana na unu baine heto, ia na basine lou henigu kava, a egu ura baine hağuğurua, bona dainai na siaia ğauna ena namo baine habadaia.”​​—Isaia 55:11.

Iehova ese Satani se haorea na mai badina. Una dainai, idaunega amo ema bona hari, Satani na gwau-edeede karadia doini e karamu. Hari ina negai, ena be taunimanima na gavamani idauidau e haginimu, to e varamu ğaudia ese e hamomokanimu Satani ena hereva na koikoi​—taunimanima na sibodia edia mauri basie biagua diba. *​​—Ieremia 10:23.

Idaunega amo ema bona hari, Dirava na kara maoromaoro taudia haida danu e hanamodia. Ma danu, Dirava ena lohia siahuna e dadaraia taudia bona e abia dae taudia ediai e vara sivaraidia na Baibel ai mimia. Bona Iehova na ğau namodia vada e karadia, vaira negadiai namo baita davari totona. Ia na hebogahisi Diravana dainai, natuna lalokauna, Iesu Keriso e siaia baita badinaia dalana baine hadibalaida bona ena mase amo mauri hanaihanai baita abia helaoreana. (Ioane 3:​16) Oibe, Dirava na Iesu ena mase amo Adamu bona Heva ese e haboioa helarona e hoia lou, una dainai tanobada heğeğemadai taunimanima na bae mauri hanaihanai diba. * Bona una baine vara totona, Iehova Dirava na guba gavamanina ta e haginia, taunimanima iboudiai baine lohiadia totona, bona Natuna Iesu Keriso na una Basileia ena King ai e halaoa. Una Basileia ese Dirava ena ura tanobada ai baine hağuğurua.​​—Mataio 6:​9, 10.

Una dainai, Baibel ai Dirava ese e gwauhamatalai herevadia na baita abidia dae, eto: “Badina be kara dika taudia na bae henege daure; a Iehova e nariamu taudia ese tano bae abia.” “Kara maoromaoro taudia ese tano bae abia, bae noholaia hanaihanai.” “ ‘Dirava ena noho gabuna na taunimanima dekedekediai; ia na bogaragidiai baine noho. Idia na iena bese ai baela; ia ese baine bamodia, edia Dirava. Ia ese iruru-matadia iboudiai matadia amo baine dahu oho. Mase bona dara-doko bona taitai bona hisihisi bae ore; badina be ğau gunadia vada e puki. Bena terono ai e helaimu Diravana eto, A itaia, lau na ğau iboudiai na hamatamatamu. Ma eto, A torea; badina be ini hereva na mamaoro-mamaoro bona momomo-kakani.’ ”​​—Salamo 37:​9, 29; Apokalupo 21:​3-5.

Baibel Siridia ese Siri Ma Haida E Hakoikoidiamu, A?

To, reana haida na be henanadaimu, ‘Bema Baibel siridia na unu e gwau tomamu, a ma haida be e gwaumu tanobada na baine puki; una be ede bamona?’ Mani haheitalai haida aita lalodia. Unu haheitalai ese be hahedinaraiamu, Baibel na sibona se hahekoikoimu.

 Ena be saiens taudia e laloamu ğau iboudiai “na ta ese basine hanamoa lou diba,” to idaunegai salamo itorena tauna na ini e gwau toma: “Oi ese gunaguna tanobada badina o hadaia, guba danu oi imamu ese e karaia. Idia na bae ore, a oi na ba hesiriu; idia iboudiai na bae mouka-mouka, dabua na heto. Oi ese o bolodiamu, hahedoki na heto, bena idia na e boiomu; a oi na so idaumu, bona emu lağani na asi dokodia.”​​—Salamo 102:​25-​27.

Salamo itorena tauna na se gwaumu ina tanobada na baine ore momokani. Lasi, to ia na Dirava baine noho hanaihanai karana bona Dirava ese e kara ğaudia bae ore diba karana e haheğereğerediamu. Momokani, Dirava na e noho hanaihanaimu bona ia ese ena siahu amo guba bona tanobada​—bona tanobada e duruamu hisiu oreadia, diari bona ma ğau haida​—e hanamodia louloumu dainai, ğau iboudiai na e mia hanaihanaimu. Una dainai, bema Dirava na ğau ta basine karaia, eda tanobada na baine “mouka-mouka” dabua na heto, bona baine ore vaitani.

Siri ma haida danu, matamanai baita duahidiamu neganai, baita laloamu unu siri na tanobada baine ore vaitani karana e herevalaiamu. Heğereğere, Baibel na e gwaumu, guba bona tanobada ‘vada bae puki.’ (Apokalupo 21:1) To Iesu ena gwauhamata herevana aita laloa, eto: “Manada taudia be nanamo, badina be idia ese tanobada bae abia.” (Mataio 5:5) To, bema Baibel na e gwaumu guba bona tanobada ‘vada bae puki,’ una hereva anina be dahaka?

Nega momo Baibel lalonai ina hereva “tanobada” e ğaukaralaiamu neganai, ia anina na “taunimanima” e gwauraidiamu. Heğereğere, Salamo 96:1 na ini e torea toma: “Ane matamatana avabia, Iehova ena; tanobada idoinai, ane avabia, Iehova ena.” Una ese e hahedinaraia goevagoevamu, una siri bona Baibel siri ma haida ese “tanobada” e ğaukaralaiamu neganai, ia anina na “taunimanima” e gwauraidiamu.​​—Salamo 96:13.

Nega haida Baibel ese tanobada gavamanidia na guba o hisiu ida e haheğereğerediamu. Haheitalai ta binai: Baibel ese Babulonia ena pavapava mai dağedağedia na “hisiu” ida e haheğereğeredia; badina idia na sibodia ladadia e abi isimu. (Isaia 14:​12-​14) Baibel ese vada e perovetalaia heğereğerena, Babulonia ena “guba” o pavapava iboudiai bona ena “tanobada” o gavamani e duruava taudia edia nega na lağani 539 B.C.E. ai e ore. (Isaia 51:6) Bena e helalo-kerehai Iuda taudia na Ierusalema e lou lao, bona unuseniai “guba matamata” o gavamani matamata e haginia, bena una ese “tanobada matamata” o kara maoromaoro taudia e naridiava.​​—Isaia 65:17.

Una dainai, Baibel ai ina hereva guba bona tanobada ‘vada bae puki’ anina binai: Hari e nohomu gavamani dikadia bona e durudiamu taudia na bae ore vaitani. (2 Petero 3:7) Bena Dirava ena guba gavamani matamatana ese kara maoromaoro taudia baine hanamodia, badina Baibel na ini e gwau tomamu: “Ita na guba matamatana bona tanobada matamatana, ena gwauhamata heğereğerena, ta narimu; kara maoromaoro taudia ese bae noholaia.”​​—2 Petero 3:​13.

Una dainai, baita abia dae momokani Dirava ena gwauhamata heğereğerena, ina tanobada na baine mia hanaihanai. Ma danu, Baibel ese e hahedinaraiamu dahaka ba kara na namo, bena tanobada ibounai paradaiso ai bainela neganai, oi na una nega namona ba moalelaia diba. Iesu eto: “Mauri hanaihanai binai: idia ese oi Dirava Korikori tamona bae dibamu, bona Iesu Keriso danu, oi ese o siaia tauna.” (Ioane 17:3) Tanobada ai bona taunimanima ediai be varamu ğaudia na Baibel ese e gwauraidiamu. O uramu unu ğau ba dibadia, a? Emu gabu ai e nohomu Iehova ena Witnes taudia na e ura dikadikamu unu ğau na Baibel amo oi bae hadibalaimu.

[Footnotes]

[Blurb on page 12]

Baibel ena gwauhamata binai: Eda tanobada na baine mia hanaihanai

[Picture Credit Lines on page 10]

Background globe: NASA/The Visible Earth (http://visibleearth.nasa.gov/); polar bear: © Bryan and Cherry Alexander Photography