Sinana ta Ena Abidadama Dainai​​— Hekwakwanai ta Ia Haheaukalaia

“Bema oi be inai revareva oi duahia, anina be egu opereisen lau abia lalonai lau mase bona hari umui danu lau noho lasi.”

UNAI revareva be taihu ta ladana Carmen ese ena natuna toi totona ia torea​—natuna ginigunana ena mauri lagani be 25, iharuana be 19, bona ihatoina be 16. Carmen be opereisen ia abia lalonai ia mase.

Bema ta dekenai unai bamona hekwakwanai ia vara bona ena natuna ia rakatania, madi, do ia lalometau bada. To, Carmen be Iehova ia abidadama henia bona Iena gwauhamata herevadia ese ena lalona ia hagoadaia bada dainai, ia torea revarevana dekenai inai ita itaia diba. Carmen ese ena natuna kekenidia toi dekenai ia torea herevana mani ita itaia, ia gwau:

“Gau ginigunana be inai, lau ura umui lau hadibaia lau be mai egu kudouna ibounai ida umui lau lalokau henia bada. . . . Umui be egu natuna kekeni hereadaedia bona umui dekenai lau moale bada.

“Lau ura umui danu lau noho ela bona Dirava ese ia gwauhamatalaia tanobada matamatana ia ginidae . . . , to umui do lau rakatania dainai, guriguri amo Dirava lau noia, Ia ese umui do ia durua Ia do umui abidadama henia noho totona. Ena be hekwakwanai momo ita davaria, to Iehova ese ita ia rakatania diba lasi. . . . Unai dainai, iena orea amo ia halasia hakaua herevadia umui badinaia noho, bona kongrigeisen bona elda taudia umui durua be gau badana. Emui goada hegeregerena haroro gaukara umui karaia hanaihanai, bona tadikaka taihu umui lalokau henia.

“Nega kwadogi lalonai umui do lau itaia lasi. . . . Mani egu dika umui gwauatao, bona lau sori badina guna nega momo emui hereva haida dekenai lau laloparara lasi, bona umui lau lalokau henia bada herevana lau gwauraia lasi. . . . Lau diba umui ta ta emui ura gaudia be idauidau. Iehova be emui ura gaudia ibounai ia diba, bona unai ibounai be umui dekenai do ia henia. Bona emui haheauka dainai Ia ese umui do ia hanamoa.

“Namona be tanobada matamatana ai do idia vara gau namodia umui laloaboio lasi, bona umui hekwarahi unai hahenamo umui abia totona. Iehova ese umui do ia hanamoa bona hagoadaia, unai amo do umui noho namonamo ela bona dokona. . . . Egu natuna namodia e, umui lalohisihisi lasi. Lau be umui lau lalokau henia bada!”

Nega idauidau ai hekwakwanai be idia vara kava. King Solomona ia gwau: “Ibounai ese nega dika idia davaria noho, bona inai dika ia vara kava noho.” (Hadibaia Tauna 9:​11) To Dirava idia abidadama henia taudia be aposetolo Paulo ena hereva idia abia dae, ia gwau: “Lau diba momokani vadaeni, gau ta ia goada lasi, mase o mauri . . . o tanobada dekenai idia karaia gaudia, ta ese Dirava ena lalokau, Keriso Iesu iseda Lohiabada ese ia hedinaraia vadaeni gauna, dekena amo ita do ia kokia diba lasi.”​​—Roma 8:​38, 39; Heberu 6:​10.