Surakusa​​—Paulo Ia Laga-Ani Gabuna Ta

LAGANI 59 C.E. bamona ai, bouti ta be Meditereinien ena motumotu ta ladana Melita amo ia lao Italy. Unai bouti ena vairana kahana ai be dirava ladana “Hekapa Memero” edia laulau idia atoa, bona momo idia laloa unai be bouti taria taudia ia naria diravana. Baibel torea tauna Luka ia gwau, unai bouti be ‘Surakusa dekenai ia kamokau,’ Sisili ena saut ist konena ai bona ‘dina toi unuseni ia noho.’ (Kara 28:​11, 12) Bouti dekenai Luka ida idia guia taudia be Arisitako bona aposetolo Paulo. Paulo be Roma dekenai idia abia lao idia kota henia totona.​​—Kara 27:2.

Surakusa ai, ita diba lasi bema Paulo be gwaumaoro idia henia bouti amo ia raka-lasi totona. To, bema ia eiava ena bamodia ese gwaumaoro idia abia bouti amo idia raka-lasi totona, vadaeni unuseniai dahaka idia itaia?

Greek bona Roma taudia edia nega ai, Surakusa be hanua badana ta, Atena bona Roma bamona. Sivarai gunadia ese idia hahedinaraia lagani 734 B.C.E. ai, Korinto taudia ese Surakusa hanua idia haginia. Bona idaunegai taunimanima momo ese idia diba tatau rua, sivarai torea tauna Epicharmus, bona ma ta be matematik ia diba momo tauna Archimedes be unuseniai idia vara. Lagani 212 B.C.E. ai, Roma taudia ese Surakusa idia abia.

Bema hari unai siti oi vadivadi, Paulo ena negai ia noho Surakusa hanuana do oi diba sisina. Unai siti be kahana rua dekenai idia hapararaia​​—ta be motumotu maragina ladana Ortygia, reana unuseniai Paulo ia guia bouti ia stopu, bona kahana ma ta be tano badana dekenai.

Hari Sisili dekenai Greek taudia edia sitaelo ai idia karaia dubu ta ia do noho, bona unai dubu be Apolo ena dubu​—lagani 500 ia lao 601 B.C.E. lalonai ia noho dubuna unai. Danu, Atena diravana ena dubu ena du haida idia do noho, unai be lagani 401 ia lao 500 B.C.E. ai ia noho dubuna, to gabeai bisop taudia edia dubu badana ai idia halaoa.

Hari, Surakusa be tano badana dekenai, unuseniai Neapolis archaeological park oi vadivadi diba. Unai park ena vareai gabuna badinai, Greek taudia edia gadara idauidau itaia steidiam ia noho. Unai be Greek taudia ese idia haginia steidiam namo hereana. Unai steidiam be davara badinai, bona helai taudia ese gadara taudia idia itaia namonamo diba. Danu, unai park ena saut kahanai, Roma taudia ese lagani 301 ia lao 200 C.E. ai idia karaia steidiam ta mai ena helai gabudia ia noho. Unai steidiam ena lata be mita 140 bona ena lababa be mita 119, bona Italy dekenai ia be steidiam badana ihatoina.

Bema Surakusa oi vadivadi, Ortygia dekenai ia noho helai gauna namona ta dekenai oi helai bona emu Baibel oi kehoa Kara 28:​12 dekenai, bena emu lalona ena matana amo aposetolo Paulo oi itaia ia be bouti ia guia bona sisima idia vareai gabuna dekenai ia ginidae.

[Diagram/​Map on page 13]

(For fully formatted text, see publication)

Melita

Sisily

Surakusa

ITALY

Rhegium

Puteoli

Roma

[Picture on page 13]

Greek taudia edia gadara itaia gabu gunana ta Surakusa dekenai