“Tuari Ibounai Do Ia Haorea Tuarina”

‘Umui lau gwauhamata henia, inai be tuari dokona ​—tuari ibounai do ia haorea tuarina.’ ​—WOODROW WILSON, U.S. PRESIDEN (1913-​21).

LAGANI 90 gunanai, Tanobada Tuarina Ginigunana ia ore murinai, unai presiden tauna be unai hereva ia gwauraia. Unai tuari lalonai taunimanima momo herea idia mase dainai, kwalimu taudia idia ura unai tuari ese namo bada do ia havaraia. To, taunimanima be hekwakwanai bona tuari idia haorea diba lasi.

Presiden Wilson be unai gwauhamata herevana ia gwauraia, bena lagani 20 murinai, Tanobada Tuarina Iharuana ia vara. Unai tuari ese ia havaraia dika bona mase be tuari ginigunana ena ia hanaia. Taunimanima ese tuari kohu matamatadia idia karaia dainai, taunimanima momo herea be nega tamona idia hamasea diba. Tanobada Tuarina  Iharuana ia ore murinai, tanobada ena lohia taudia idia laloparara tuari ma haida be do idia vara lou.

Lagani 1945 ai, U.S. Jeneral Douglas MacArthur ia gwau: “Unai tuari ese tuari ibounai ia hadokoa lasi. Bema hekwakwanai hamaoromaoroa dalana namona ta ita davaria lasi, Aramagedono do ia vara.”

Tanobada Tuarina Iharuana dokonai atom bomu rua ese Nagasaki bona Hiroshima ia hadikaia momokani, bona Jeneral MacArthur be unai dika badana ia itaia dainai ia gwau “Aramagedono” be tanobada ibounai do ia hadikaia niuklia tuarina.

Hari danu, taunimanima be niuklia tuarina dainai idia gari noho. Lagani 1960 lalodiai, tanobada ena gavamani badadia ese palani ta idia karaia. Unai palani lalonai idia gwau, herevana edena tano ese tuari ia hamatamaia, to bema tano ta ta be edia niuklia bomu momo idia haboua, vadaeni idia ta ta be hegeregere idia inai henia tanona ena bese taudia 25 pesen do idia hamasea bona faktori 50 pesen bamona do idia hadikaia. Idia laloa, unai palani ese tano momo do ia hagaria bena niuklia tuari do idia hamatamaia lasi. To, taunimanima momo idia laloa unai palani ese tanobada dekenai maino do ia havaraia lasi.

Hari, tanobada besedia be niuklia bomu momo idia karaia noho bona gabu momo ai idia vara tuari lalonai taunimanima momo idia mase noho. Taunimanima idia laloa niuklia tuarina be do ia vara. Ena be taunimanima idia ura tuari ia ore, to idia laloa tuari ma ta eiava gavamani ena palani ma ta be hegeregere lasi tuari ibounai ia haorea totona.

To, Baibel be tuari idauna ta ia herevalaia, unai tuari ese tuari ibounai do ia haorea. Ia gwau, unai tuari ladana be “Aramagedono.” Taunimanima idia laloa ia be niuklia tuarina ta. To, edena dala ai Aramagedono be tuari ibounai do ia haorea diba tuarina? Hereva iharuana ese unai henanadai do ia haerelaia.

[Picture Credit Line on page 3]

DTRA Photo

[Picture Credit Line on page 4]

Nagasaki, Japan, 1945: USAF photo