Revareva ta Nicaragua Amo

“Coco Sinavai Dekenai Oi Ginidae Neganai, Idibana Kahana Oi Lao”

“NAMONA be 4-wil-draiv motuka ta amo oi lao, bona motuka abia isi gauna bona petrol haida oi abia lao danu. Ia be kopukopu gabuna dainai, oi hegaegae be namo. Coco sinavai dekenai oi ginidae neganai, idibana kahana oi lao.”

Unai misinari tauna ena hereva ese lau ia hagoadaia momokani lasi. To, Tuesday dabai egu laolao lau hamatamaia, Nicaragua ena taoni maragina ladana Wamblán dekenai lau lao, Keristani hebouhebou ta ai karaia totona.

Daba momokani ai, egu motuka gunana dekenai lau guia bona Pan-American Highway ena dala namona dekenai lau heau. Jinotega hanua dekenai lau ginidae neganai, dala ta dekenai lau vareai​​—⁠unai dala be hanua taudia ese idia gwauraia dala feo o dala dikana. Jinotega dekenai sitoa rua lau itaia, ta ena ladana be Dirava Ena Hoa Karana bona ma ta ena ladana be Mauri Lou.

Ororo dekenai lau heau daekau bona lau heau diho, kona momo lau gegea. Dala be ia dika dainai, motuka be metairametaira lau taria. Ori ese ia koua ororo badana ta amo ia diho sinavai latana ta lau hanaia. Ena be ninoa o ori ena kwalahu ese gabu ia koua, to au badadia bona flaoa namodia hegeregere, orchids bona Spanish moss lau itaia.

Dala ena kona ta lau gegea neganai, kahirakahira basi ta ida lau bampa. Unai basi be kwalahu bada herea ia halasia bona ena taea ese nadi idia negea daekau. Nicaragua ai, basi idia taria taudia momo edia ladadia be basi ai idia torea, hegeregere: Kwalimu Tauna, Skopion, Lavara Gaigai, o Labana Tauna.

Dina tubu ai, lau be gabu ta ladana Plain of Pantasma lau hanaia. Unuseniai, au amo idia karaia ruma ta lau itaia, bona ena ariara be idia daroa namo herea. Tau buruka ta be sea dekenai ia helai, sisia be au henunai ia mahuta, bona boromakau rua idia gini bona edia murina kahanai be kariota ta ia noho, ena uili be au amo idia karaia. Hanua maragina ta dekenai, natu maragidia momo lau itaia, sikuli gabuna amo idia raka-lasi. Idia be bulu unifom idia karaia dainai, daudau amo lau itadia neganai, idia be hegeregere davara ena hurehure be kone ia botaia bamona.

Wiwilí hanua dekenai lau ginidae neganai, dina be siahu momokani, bona unai be egu nega ginigunana Coco sinavai lau itaia. Unai be hanua ena sinavai badana. Bona misinari tauna ena hereva hegeregerena, idibana kahana lau giroa bona Wamblán hanua ena dala dekenai lau vareai, ena daudau be kilomita 37.

Unai dala dekenai nadi momo, guri momo, ororo momo, bona sinavai 8 o 9 bamona lau hanaia. Idia kaukau vadaeni kopukopu lau hanaia neganai, kahu bada herea lau karaia. Bona toana be kahu lau ania bamona. Wamblán dekenai lau  ginidae neganai, unai hanua be uda lalonai ia noho bamona.

Unai hanua ai, toana be taunimanima be daba 4:30 a.m. ai idia noga. Kokoroku ena tai ese lau ia hanogaia. Lau toreisi bona dala dekenai lau raka loaloa sisina. Gabu ena bonana be aveni ai idia gabua paraoa ladana tortillas ena bonana ese ia hahonua.

Ruma edia haba momo dekenai be paradaiso ena laulau idia noho, bona unai be hanua ena laulau penia tauna ta ese ia penia. Pulperías o sitoa ena kona ta ta dekenai be loliwota idauidau edia laulau idia noho. Gabu idauidau ai idia atoa pepadia edia hereva be taunimanima idia hadibaia gavamani ginigunadia toi edia gwauhamata herevadia idia laloatao totona. Kapa amo idia karaia toileti rumadia be semensi latanai idia gini.

Nega momo Nicaragua taudia hanamoa totona lau gwau, Adiós. Taunimanima idia kiri bona idia ida lau herevahereva namonamo. Emai gadona regena ai habadaia bema hosi o doniki idia hanaia bona edia aena regena be ia bada.

Friday adorahi ai, ruma bese momo be dina rua hebouhebou totona idia ginidae. Idia momo be idia raka, o hosi bona motuka amo idia mai. Memero kekeni maragidia be hora 6 idia raka bona silipasi idia karaia. Herevana sinavai haida edia badinai be bomu idia guria bona doma o rara topoa gaudia momo idia noho, to tadikaka taihu be unai idia laloa lasi. Gabu daudau ai idia noho taudia haida be aniani sisina, hegeregere raisi bona boroma idia abia mai. Dahaka dainai unai taunimanima ibounai idia mai?

Idia mai ena badina be, edia vaira negana ena helaro namona idia hagoadaia totona sibona lasi, to idia ura Baibel ena hereva ena anina idia diba bona Dirava idia hamoalea.

Saturday ai, taunimanima 300 mai kahana be kapa amo idia karaia rumana henunai idia helai. Idia be au amo idia karaia fom bona plastik sea dekenai idia helai. Sinadia be natudia idia ubua. Hebou gabuna kahirakahira idia noho taudia edia boroma bona kokoroku idia boiboi noho.

Dina be siahu momokani, to helai taudia be Baibel ena sisiba namodia bona hakaua herevadia idia kamonai namonamo. Hereva henia tauna be Baibel siri ia gwauraia neganai, idia be edia Baibel idia kehoa bona idia itaia, ane idia abia, bona mai hemataurai ida guriguri herevadia idia kamonai namonamo.

Hebouhebou ia ore murinai, lau be ma haida ida natudia maragidia ida ai gadara. Gabeai, matamata taudia ese edia noutbuk dekenai idia torea hereva badadia ai riviulaia. Lau ese kompiuta amo hisiu idauidau edia laulau lau hahedinaraia. Natudia bona tama sina idia moale.

Hebouhebou ia ore neganai, ibounai be edia noho gabudia dekenai idia giroa. Daba momokani ai, mai moale ida unai gabu lau rakatania, badina unuseniai ekspiriens namona lau abia bona turadia momo lau davaria. Egu lalona lau hadaia idia do lau tohotohoa totona, badina idia be gau momo idia tahua lasi bona Dirava idia naria noho.

[Pictures on page 11]

Ruma bese haida be kilomita momo idia raka Wamblán ena hebouhebou dekenai idia lao totona