Duahia Taudia Idia Henanadai

Dahaka Dainai Iehova Ena Witnes Taudia Idia Tuari Lasi?

Idaunega amo ema bona hari, herevana Iehova ena Witnes taudia be edeseniai idia noho, to idia be tano eiava bese ta ena tuari lalonai idia vareai lasi. Lagani 50 gunanai, buka ta (Australian Encyclopædia) ia gwau: “Iehova ena Witnes taudia be tuari amo idia gini siri momokani.”

Witnes taudia idia tuari lasi ena badina badana be inai: Edia lalomamina ia namo be gau badana. Edia lalomamina be Iesu Keriso ena haheitalai bona hahegani amo idia hadibaia vadaeni. Iesu be ena hahediba taudia ia haganidia, edia dekena taudia do idia lalokau henia be gau badana. Iena hahegani ma ta be inai: “Umui dekenai idia badu taudia do umui lalokau henia, bona umui dekenai idia hadikaia taudia be do umui kara namo henia.” (Luka 6:​27; Mataio 22:39) Iesu hamauria totona, hahediba tauna ta be kaia ia gaukaralaia neganai, Iesu ia gwau: “Emu tuari kaia be ena gabu dekenai oi atoa lou, badina be tuari kaia idia iusilaia taudia ibounai, be tuari kaia dekenai do idia mase.” (Mataio 26:52) Iesu be ena kara bona hereva amo ia hahedinaraia goevagoeva, ia murinai idia raka taudia ese tuari gaudia idia gaukaralaia be maoro lasi.

Witnes taudia idia tuari lasi ena badina ma ta be inai: Tanobada hegegemadai Witnes taudia ibounai be tomadiho tamona taudia. Bema tuari lalonai tomadiho tamona taudia idia tuari heheni, idia be Iesu ena taravatu idia utua unai, badina Iesu ia gwau: “Ta ta dekenai do umui lalokau henia.”​​—⁠Ioane 13:⁠35.

Witnes taudia ese Iesu ena hakaua herevana​—⁠ma haida lalokau henia karana​—⁠be edia uduna ai idia gwauraia sibona lasi, to edia mauri lalonai idia badinaia danu. Tanobada Tuarina Iharuana (lagani 1939 ia lao lagani 1945) ai ia vara gauna ita laloa. United States ai, Witnes taudia 4,300 mai kahana be dibura rumadia ai idia atoa, badina idia ura lasi tuari lalonai idia vareai. Britain ai, Witnes taudia 1,500 mai kahana​—⁠hahine ibounai be 300 mai kahana​—⁠be dibura ruma dekenai idia atoa, badina idia ura lasi tuari karadia haida idia durua. Nazi Germany dekenai, gavamani be oda ia henia Witnes taudia 270 mai kahana idia hamasea totona, badina idia ura lasi idia tuari. Nazi gavamani henunai, Witnes taudia 10,000 mai kahana be dibura rumadia eiava dibura kamepadia ai idia atoa. Japan ai, Witnes taudia be dika bada idia davaria danu. Bema emu ruma bese tauna ta eiava turana ta be Tanobada Tuarina Iharuana​​—⁠o tuari ma ta⁠​—⁠​lalonai ia mase, namona be oi diba, Iehova ena Witnes taudia be unai tuari lalonai idia vareai lasi bona emu ruma bese tauna o turana idia hamasea lasi.

Wolfgang Kusserow be hereva ginigabedia amo ia hahedinaraia dahaka dainai Witnes taudia be idia tuari lasi. Lagani 1942 ai, Nazi gavamani ese unai German Witnes tauna, ena mauri lagani be 20, ena kwarana idia utua oho, badina ia ura lasi tuari lalonai ia vareai. (Isaia 2:⁠4) Wolfgang Kusserow be ami taudia edia kota dekenai ia gwau: “Lau vara negana amo ema bona hari, lau be Iehova ena Witnes tauna ta, bona Baibel amo diba maoro lau abia. Dirava ese taunimanima dekenai ia henia taravatu hereadaena bona helagana be inai: ‘Oiemu Dirava oi ura henia be gau badana, bona oiemu dekena tauna oi ura henia, oi sibona oi ura henia bamona.’ Taravatu ma ta be inai: ‘Taunimanima oi alaia lasi.’ Iseda Havaraia Tauna ese unai taravatu be au ese idia badinaia totona ia torea lasi, ani?”​​—⁠Mareko 12:​29-​31; Esodo 20:⁠13.

Iehova ena Witnes taudia idia abia dae momokani, Siahu Ibounai Diravana, Iehova sibona be tanobada ai maino do ia havaraia. Idia naria noho badina Iehova ena gwauhamata be inai: “Tuari be Dirava ese ia hadokoa noho, tanobada kahana ibounai dekenai.”​​—⁠Salamo 46:⁠9.