“Edena Negai . . . Oi ese Ai Do Oi Durua?”

Jayne be mai matana ranu ida ia gwau: “Lau ura hisihisi ia ore!” Ia be kensa gorerena ia abia, bona unai gorere be tauanina ibounai dekenai ia lao. Iena ruma bese taudia bona turadia idia ura iena gorere bona hisihisi idia kokia! Dirava idia guriguri henia, Jayne ia durua totona. Dirava ia kamonai, a? Dirava be Jayne ia laloa, eiava?

DIRAVA be iseda hisihisi bona metau ia diba. Baibel ia gwau: “Dirava ese ia karadia gaudia ibounai be idia hisihisi noho, . . . Oibe, idia tai noho.” (Roma 8:22) Dirava ia diba, taunimanima milioni momo be Jayne bamona dina ta ta ai hisihisi idia abia, tauanina ai, hemami dekenai, o lalona dekenai. Dirava ia itaia, taunimanima 800 milioni bamona be hanuaboi ibounai mai hitolo danu idia mahuta, milioni haida be edia ruma bese taudia amo hisihisi idia abia, bona tama sina momo be natudia edia vaira nega maurina idia laloa momo. Nega haida reana oi henanadai: ‘Dirava ese unai hekwakwanai do ia haorea eiava lasi? Bema ita ura eda ruma bese taudia ita durua, vadaeni ita gwau diba Dirava danu ia ura taunimanima ibounai ia durua, ani?

Oi sibona lasi, to haida danu be unai bamona henanadai idia henia. Lagani 2,600 mai kahana gunanai, tau namona ta, Habakuku, be unai bamona lalohadai ia abia dainai, Dirava ia nanadaia: “Lohiabada e, nega momo oi dekenai lau boiboi vadaeni. Edena negai lauegu boiboi do oi kamonai, bona oi ese ai do oi durua, vadaeni inai dagedage dainai dika do ai davaria lasi? Lau ese taunimanima edia metau bona hisihisi bada lau itaia noho. Badina dahaka inai bamona hisihisi oi koua lasi? Badina dahaka oi ese inai hisihisi bona metau oi itaia noho, to hanamoa kara ta oi karaia lasi? Kahana ibounai dekenai lau itaia, taunimanima ese idia heatu bona heai henia noho, bona taunimanima edia kohu idia hadikaia noho.” (Habakuku 1:2, 3) Peroveta tauna Habakuku, Heberu tauna, be ena negai heatu bona dagedage dika rohorohodia ia itaia. Hari, unai bamona karadia be hanaihanai niusi dekenai idia halasia, unai ese hebogahisi taudia dekenai lalohisihisi ia havaraia.

Dirava ese Habakuku ena lalohadai ia laloa maragi, a? Lasi. Ia be Habakuku ena henanadai ia kamonai bona ia hagoadaia. Iehova Dirava ia gwauhamata hisihisi ibounai do ia haorea, bona unai ese Habakuku ena abidadama ia hagoadaia. Unai gwauhamata ese oi ia hagoadaia diba​—⁠Jayne bona ena ruma bese ia hagoadaia bamona. Hereva gabedia ese inai henanadai do idia haerelaia: Edena bamona ita diba Dirava ese ita ia laloa eiava? Edena dala ai Dirava ese hisihisi do ia haorea, bona edena negai?