Tanobada Ena Hekwakwanai, Hanamoa Dalana

TANOBADA hegegemadai hisihisi ita itaia, bona hebogahisi taudia momo be hisihisi taudia idia durua. Hegeregere, doketa bona nesi be hora momo lalonai idia gaukara, gorere taudia o idia bero taudia idia durua totona. Lahi habodoa taudia, pulisi taudia, taravatu henia taudia, bona ambalans taudia idia gaukara goada, ma haida edia hisihisi idia koua totona. Ena be idia ese taunimanima idia durua namo herea, to tau ta o orea ta be ia hegeregere lasi tanobada ibounai dekenai hisihisi ia haorea totona. Dirava sibona ese tanobada hegegemadai hisihisi ibounai ia haorea diba.

Baibel bukana ginigabena ena hagoadaia herevana be inai: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:4) Oi laloa taunimanima hida dekenai unai gwauhamata ena anina do ia guguru? Dirava ena ura be inai: Hisihisi ibounai do ia haorea. Anina be, Iehova ese tuari, hitolo, gorere, kara gageva bona kara dika taudia ibounai be tanobada dekena amo do ia kokia. Tanobada tauna ta be unai bamona ia karaia diba lasi.

Dirava Ena Basileia be Dahaka Do Ia Karaia?

Dirava ese Iesu Keriso​—mase amo ia toreisi lou bona iunives ai siahu bada tauna namba 2​—amo ena gwauhamata herevadia do ia hagugurua. Nega do ia ginidae, King Iesu do ia kwalimu bona tanobada ibounai do ia lohiaia. Tanobada ena king, presiden, o politikol taudia be taunimanima do idia  lohiaia lasi. To, King tamona bona gavamani tamona​—Dirava ena Basileia​—ese taunimanima do ia lohiaia.

Unai Basileia ese tanobada ena gavamani ibounai do ia haorea. Idaunegai, Baibel ia peroveta: “Guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.” (Daniela 2:44) Tanobada taudia ibounai be mai lalotamona ida kara maoromaoro gavamani tamona​—Dirava ena Basileia​—henunai do idia noho.

Iesu be tanobada dekenai ia noho neganai, nega momo unai Basileia ia herevalaia. Iena guriguri ai unai Basileia ia herevalaia, bona ena hahediba taudia ia hamaoroa inai bamona do idia guriguri: “Oiemu Basileia do ia mai, oiemu ura gauna tanobada dekenai do ia karaia, guba dekenai idia karaia bamona.” (Mataio 6:10) Mani oi laloa: Iesu ese ia hahedinaraia Basileia be Dirava ena ura gauna tanobada ai do ia karaia​—Dirava ia ura tanobada hegegemadai hisihisi ibounai ia haorea.

Dirava ena kara maoromaoro gavamanina ese hahenamo do ia mailaia​—tanobada gavamanidia be unai bamona idia karaia diba lasi. Mani oi laloa: Iehova ese ena Natuna ia henia mauri davalaia boubouna ia karaia totona, unai amo reana taunimanima be mauri hanaihanai do idia abia. Unai Basileia henunai, taunimanima be metairametaira do idia goevadae. Bena dahaka do ia vara? Iehova ese “mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.”​—Isaia 25:8.

Reana haida idia henanadai: ‘Dahaka dainai Dirava be kara ta ia karaia haraga lasi? Dahaka ia naria noho?’ Matamanai, Iehova be hisihisi ibounai ia koua diba. To, unai bamona ia karaia haraga lasi ena badina be inai: Ia be sibona ena namo ia laloa lasi to ia ura tanobada ai ena natudia ese namo do idia davaria ela bona hanaihanai. Lalokau tama sina be edia natuna ena hisihisi do idia koua haraga lasi bema idia diba unai ese idia noho daudau hahenamo idauidau do ia mailaia. Unai hegeregerena, badina namodia dainai Iehova ese taunimanima edia hisihisi ia koua lasi, bona Baibel be unai ia gwauraia hedinarai. Unai badina haida be inai: Ura kwalimu, kara dika, bona Iehova ena lohia siahuna maorona hepapahuahulaia karana. Danu, Baibel ia gwau, Iehova ese nega kwadogina sibona ia henia, aneru dikana be tanobada ia lohiaia totona. *

Inai rau be hegeregere lasi unai badina ibounai ai herevalaia totona, to hereva momokani rua ese ita ia hagoadaia bona ita ia durua vaira nega ai idia vara gaudia ita naria noho totona. Ginigunana be inai: Iehova ese ita do ia hanamoa karana ese hari ita davaria hisihisi do ia hereaia. Dirava ia gwau: “Kara gunadia be do idia laloa lou lasi, do idia laloaboio momokani.” (Isaia 65:17) Oibe, Dirava ese nega kwadogina lalonai ia do koua lasi hisihisi ibounai be gabeai do ia hamaoromaoroa bona haorea vaitani.

Iharuana be inai: Dirava be nega ta ia makaia vadaeni, hisihisi ibounai ia haorea totona. Reana inai oi laloatao: Peroveta tauna Habakuku be Iehova ia nanadaia, edena negai dagedage bona heai do ia koua. Iehova ena haere be inai: “Unai matahanai be ena nega ia do naria noho . . . Do ia leiti lasi.” (Habakuku 2:3, NW) Rau 8 ai do ita itaia “nega” ia kahirakahira.

[Futnout]

 [Maua rau 7 ai]

Moale Negana Idia Hamomokania Siridia

TUARI DO IDIA ORE:

“Umui mai! Lohiabada ena gaukara do umui itaia. Tanobada dekenai hadikaia karadia momo ia karaia vadaeni. Tuari be Dirava ese ia hadokoa noho, tanobada kahana ibounai dekenai.”​—Salamo 46:8, 9.

OI LALOKAU HENIA TAUDIA DO IDIA LOU MAI:

“Mase taudia dohore idia toreisi lou, kara maoromaoro taudia, bona kara maoromaoro lasi taudia danu.”​—Kara 24:15.

ANIANI DO IDIA MOMO HEREA:

“Namona be koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo.”​—Salamo 72:16.

GORERE DO IDIA ORE:

“Ta ese do ia gwau lasi, ‘Lau be gorere,’”​—Isaia 33:24.

KARA DIKA TAUDIA DO IDIA ORE:

“Kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.”​—Aonega Herevadia 2:22.

HAHEMAORO GOEVA DO IA NOHO:

“Kamonai! Dina ta be king ta [Keriso Iesu] ese kara maoromaoro momokani dekena amo iena taunimanima do ia gunalaia. Lohia taudia danu ese taunimanima do idia kota henia mai maoromaoro danu.”​—Isaia 32:1.

[Foto rau 7 ai]

Dirava ena Basileia ese iseda hisihisi ibounai do ia haorea