Revareva ta Grenada Amo

Dina ta Kone Dekenai

BEMA oi idia siaia tano ma ta dekenai haroro gaukara oi karaia totona, do oi moale bada. Unai tano ena taunimanima, edia noho dalana bona haroro gaukara ai do oi davaria gaudia idauidau do oi laloa.

Lau bona egu adavana be haroro gaukara karaia totona Grenada dekenai ai lao, ia be motumotu ta mai ena hairai bona ena kone ibounai be 45 bamona. Kahirakahira ai be unai kone ta dekenai do ai hebou bona gau ta do ai moalelaia, to unai gabu ai idia noho taudia edia kara ai moalelaia.

Grenada dekenai emai noho gabuna amo ai heau lao Grand Anse Konena be daudau lasi, bona kone ai lao henia dalana be mai ena hairai! Ia giroa momo dalana amo ai heau lao neganai, gabu hairaidia momo ai itaia namonamo diba. Ororo maragidia be grin, ororo badadia, uda badadia, waterfall momo bona davara ai itadia. Unai dainai tanobada ena kahana idauidau amo idia mai turist taudia be unai gabu dekenai idia vadivadi! Unai gabu be mai ena hairai dainai, motuka taria tauna ia naria namonamo, dika unai gabu ena hairai ese ena matana ia veria bona dala do ia itaia lasi. Ena be ia giroa momo daladia be maragi, to motuka ta ese motuka ma ta ia hanaia neganai, idia bampa lasi.

Ai be hebouhebou ta totona Grenada Trade Center dekenai ai lao, ia be Grand Anse Konena ena dala dekenai ia noho. Iehova ena Witnes taudia 600 bamona be mai moale ida do idia hebou bona Baibel ena hadibaia herevadia do idia kamonai. Lesley bona ena adavana Daphne​—⁠edia mauri lagani be 70 bamona​—⁠dekenai unai dina be mai anina bada. Lesley be bapatiso do ia abia, bona Daphne be mai moale ida nega daudau lalonai unai dina ia naria. Ia be lagani 1958 ai bapatiso ia abia bona Iehova ena Witnes hahinena ta ai ia lao.

Iehova ena Witnes taudia dekenai, bapatiso​—⁠ranu lalonai tauanina ibounai hadihoa karana⁠​—⁠​be mai anina bada. Ta be Baibel ena hereva momokani ia dibaia bona ena mauri lalonai ia badinaia neganai, bapatiso ia abia. Unai amo taunimanima ibounai edia vairanai ia hahedinaraia ia be Iehova Dirava dekenai ena mauri ia gwauhamatalaia.

Lau idia noia Baibel amo bapatiso ena anina be helai taudia dekenai lau herevalaia totona. Egu hereva ena dokonai, Lesley bona ia ida bapatiso do idia abia headava tau bona hahine idia gini. Lesley be siedi kurokurona bona neketai ia karaia bona moale toana ia hahedinaraia. Lau henanadai: “Emu kara dika amo oi helalo-kerehai vadaeni, bona Iehova dekenai  sibona oi henia vadaeni, iena ura do oi karaia totona, a?” Lesley bona headava tau bona hahine be mai kudouna ibounai ida idia haere, “Oibe!”

Lesley ena sivarai lau dibaia neganai, unai ese lau ia hagoadaia bada. Lagani momo lalonai, ia ura lasi Baibel ia stadilaia. Ia bona ena adavana be motumotu ta dekenai idia lao. Unuseniai, edia lalona idia hadaia ta ta be ena dubu dekenai do ia lao. Lesley be Daphne ia hamaoroa: “Oi be emu dubu dekenai oi lao bona lau be egu dubu dekenai do lau lao.”

Lesley be motuka amo Daphne ia abia lao bona Kingdom Hall dekenai ia rakatania, bena ia be Anglican dubu dekenai ia lao. Lesley be ena dubu gaukaradia idia ore neganai, ia giroa lou Kingdom Hall dekenai Daphne ia udaia totona. Kingdom Hall ai, ia be tura namodia ese idia welkam henia, ena be guna ia idia hedavari henia lasi. Unai ese Lesley ena lalona ia hagoadaia. Ena dubu ai, ta be ia dekenai unai bamona ia karaia lasi. Lesley be Daphne ia hamaoroa: “Lau be egu dubu dekenai do lau giroa lou lasi. Ta be lau ia hereva henia lasi, pris tauna danu be lau ia laloa lasi. Dubu lalonai lau raka vareai bona raka-lasi neganai, ta be lau ia hedavari henia lasi.” Lesley be ena dubu amo ia raka-lasi neganai, ia giroa lou lasi.

Unai murinai, Lesley be Baibel ia stadilaia matamaia. Bona hari ia hegeregere bapatiso ia abia totona. Bapatiso do idia abia gwauraia taudia be kone dekenai idia raka lao, bona ai be edia murinai ai raka. Nega momo Iehova ena Witnes taudia edia hebouhebou ai bapatiso ena ranu tanika idia hegaegaelaia, to ai be unai ai gaukaralaia lasi badina davara be kahirakahira. Ai be dala kahanai ai raka hanai sibona.

Grand Anse Konena ena lata be kilomita toi bona kone ena miri be kurokuro momokani, bona lagani ibounai lalonai davara be ia bulu bona siahu. Kone dekenai ai ginidae bona turist taudia be ai idia itaia neganai, idia hoa bada, badina ai be mai hemataurai ida dabua namodia ai hahedokilaia. Lesley be ena dabua ia haidaua bona T-siedi bona piripou kwadogina ia hahedokilaia. Mani oi laloa, Daphne be bapatiso ia abia bona lagani 50 bamona murinai ena adavana ia itaia bapatiso do ia abia dainai, ia moale bada! Dina tubua ena dina ia diari bamona, Dephne ena toana be ia moale bada. Turist taudia be ai ida unai dina ai moalelaia hebou. Lesley bona headava tau bona hahine be bapatiso idia abia neganai, unai turist taudia be edia imana idia patapataia danu.

Guba ena kala be bulu, kone ena miri be kurokuro bona davara ena hurehure ese Havaraia Tauna ena hairai idia hahedinaraia. Bapatiso idia abia taudia matamatadia toi be ranu amo idia daekau neganai, unai ese Iehova ena ladana ia hanamoa bada. Bapatiso idia abia taudia ai itaia neganai, ai moale bada. Unai be dina namo hereana. Lesley bona Daphne dekenai unai dina be mai anina bada.