Memero Kekeni Edia Henanadai

Edena Dala ai Egu Tahua Gaudia Lau Hagugurua Diba?

HENUNAI idia noho gaudia toi amo edena oi ura henia?

● Boga auka

● Turadia momo

● Moale bada

Momokani, unai gaudia toi oi davaria diba! Edena dala ai? Tahua gaudia oi atoa bona hagugurua karana amo unai gaudia oi davaria diba. Mani henunai idia noho herevadia ita itaia.

Boga auka Bema tahua gaudia maragidia oi atoa bona hagugurua, unai ese oi do ia hagoadaia tahua gaudia badadia oi hagugurua totona. Danu dina ta ta ai idia vara hahetoho idauidau​—⁠hegeregere turadia edia laloani karadia o herevadia be mai boga auka ida oi dadaraia diba. Bona ma haida ese emu boga auka karana idia itaia neganai, oi do idia matauraia. Reana haida ese oi do idia tohoa momo lasi. Momokani, reana oi do idia ura henia matamaia.​—⁠Mataio 5:​14-16 hahegeregerea.

Turadia momo Mai anina bada tahua gaudia idia atoa taudia​—⁠edia ura gaudia idia diba bona idia ura dikadika unai gaudia idia hagugurua taudia​—⁠oi bamoa neganai do oi moale. Bona emu tahua gaudia dainai taunimanima be oi idia tura henia neganai, nega momo idia ese oi do idia durua unai tahua gaudia oi hagugurua totona.​—⁠Hadibaia Tauna 4:​9, 10.

Moale bada Bema emu mauri lalonai tahua gaudia oi atoa lasi, do oi moale lasi. To, tahua gaudia oi atoa bona oi hagugurua neganai, do oi moale bada. Unai dainai aposetolo Paulo ia gwau: “Lau heau maoromaoro, mai laloa tamona danu, lauegu heau dokona dekenai do lau ginidae totona.” (1 Korinto 9:26) Laloatao, tahua gaudia badadia oi atoa bona hagugurua neganai, moale bada oi davaria diba!

Oi hegaegae vadaeni emu tahua gauna oi hamatamaia totona, a? Pepa oi utua bona idiba kahana amo oi lokua, bona ai torea lista oi badinaia. *

“Memero Kekeni Edia Henanadai” edia hereva ma haida oi diba totona, inai Web sait www.watchtower.org/ype oi itaia diba

[Footnote]

 OI LALOA GAUDIA

● Tahua gaudia momo be nega tamona oi atoa diba, a?​—⁠Filipi 1:⁠10.

● Tahua gaudia oi atoa ena anina be emu mauri ai miniti ibounai lalonai palani oi karaia, a?​—⁠Filipi 4:⁠5.

[Box/Pictures on page 25, 26]

Emu tahua gaudia oi hagugurua dalana

HAHEDINARAIA Aonega Herevadia 4:​25, 26 1

“Tahua gaudia badadia atoa totona, oi gari lasi. Bema haida be guna edia tahua gaudia idia hagugurua, vadaeni oi danu be unai bamona oi karaia diba.”​​—⁠Roben.

1. Oi atoa diba tahua gaudia oi laloa. Inai dala do oi moalelaia! Oi lalohadailaia gaudia ibounai be pepa ta ai oi torea. Reana oi lalohadailaia gaudia 10 o 20 bamona oi torea diba.

2. Emu lalohadai oi tahua. Edena bamona tahua gaudia oi moalelaia? Edena bamona tahua gaudia be auka? Edena tahua gauna oi ura hagugurua? Laloatao, oi dekenai tahua gaudia namodia be mai anina bada.

3. Oi atoa guna tahua gaudia. Ginigunana be, nega kwadogi o dina haida lalonai oi hagugurua diba tahua gaudia oi abia hidi. Bena nega daudau (wiki o hua haida) lalonai oi hagugurua diba tahua gaudia haida oi abia hidi. Oi ura hagugurua gaudia ta ta edia badinai namba oi torea.

Inai Tahua Gaudia Tohoa

Hetura karana Egu mauri lagani ida ia hegeregere lasi taudia do lau bamoa. Egu hetura karana gunana do lau hagoadaia lou.

Tauanina ia goada Wiki ta ta ai miniti 90 lalonai do lau eksasais. Hora eit lalonai do lau mahuta.

Sikuli Matematik ai maka namodia do lau abia. Stiuden ma haida edia koikoi karana do lau dadaraia.

Tomadiho karadia Dina ta ta ai miniti 15 lalonai Baibel do lau duahia. Inai wiki lalonai egu sikuli turadia dekenai lau abia dae gaudia do lau herevalaia.

 Palani Aonega Herevadia 21:5 2

“Tahua gaudia oi atoa be namo, to oi hagugurua totona palani oi karaia danu be namo. Bema lasi, hanaihanai oi atoa tahua gaudia do oi hagugurua lasi.”​​—⁠Derrick.

Oi abia hidi tahua gaudia ta ta totona, inai dala oi badinaia:

1. Emu tahua gauna oi torea.

2. Do oi hagugurua ena deit oi torea. Bema emu tahua gauna ena deit oi torea lasi, do oi hagugurua lasi!

3. Dala haida palanilaia.

4. Hekwakwanai. Do oi hanaidia dalana oi laloa.

5. Oi gwauhamata. Sibona dekenai oi gwauhamata do oi hekwarahi inai tahua gauna oi hagugurua totona. Vadaeni emu ladana oi sainia bona deit oi torea.

Japan gado dibaia Japan dekenai do lau lao July 1

Dala haida

1. Japan gado ena buka ta do lau abia.

2. Wiki ta ta ai hereva matamatadia 10 do lau dibaia.

3. Japan gado idia herevalaia taudia edia hereva dalana do lau kamonai namonamo.

4. Ta do lau nanadaia unai gado ena grama bona lau herevalaia dalana ia kamonai totona.

Hekwakwanai

Egu hanua kahirakahira idia noho taudia be Japan gado ai idia hereva lasi.

Lau hanaidia dalana

Japan gado ai idia rekodi gaudia be Web sait ladana www.pr418.com. amo do lau abia.

․․․․․ ․․․․․

Ladana sainia Deit

Kara Ta Oi Karaia! Ioane 13:⁠17 3

“Lalona veria gaudia ese oi idia koua bona emu tahua gaudia do oi laloaboio haraga, unai dainai namona be emu tahua gaudia oi laloa bada bona oi hekwarahi oi hagugurudia totona.”​​—⁠Erika.

Hamatamaia haraga. Sibona oi nanadaia, ‘Hari dina dahaka do lau karaia egu tahua gauna lau hamatamaia totona?’ Momokani, reana gau ibounai do idia heau namonamo lasi, to unai ese oi ia koua lasi emu tahua gauna oi karaia matamaia totona. Baibel ia gwau: “Bema oi noho kava, noho kava, ela bona lai bona medu idia namo neganai, oi be gau ta do oi hadoa lasi, bona tano ena anina ta do oi davaria lasi.” (Hadibaia Tauna 11:⁠4) Hari dina tahua gauna ta oi laloa​—⁠herevana ia be gau maragina⁠​—⁠​bona oi karaia.

Dina ta ta ai emu tahua gaudia oi laloa lou. Oi laloatao dahaka dainai oi dekenai tahua gaudia ta ta be mai anina bada. Emu tahua gaudia ta ta oi hagugurua neganai, ena badinai inai maka ✔ oi atoa o deit oi torea.

Palani oi haidaua diba. Herevana oi karaia palani be namo herea, to reana gabeai do oi haidaua be namo. Namo lasi oi laloa momo palani tamona sibona oi badinaia totona. To namona be gau idauidau oi karaia, emu tahua gauna oi hagugurua totona.

Oi lalohadailaia. Ginigunana be, emu lalona ena matana amo oi itaia emu tahua gauna oi hagugurua vadaeni. Iharuana be, tahua gaudia ta ta oi laloa lou. Ihatoina be, unai tahua gaudia ta ta oi karaia. Bona oi itaia emu tahua gauna oi hagugurua neganai do oi moale bada. Hari oi matamaia be namo!

[Picture]

Tahua gaudia be palani torea pepana ta bamona​—⁠oi hekwarahi oi hagugurua totona!

[Box/Pictures on page 25]

EMU TURADIA IDIA GWAU

“Bema emu mauri lalonai tahua gaudia oi atoa lasi, do oi lalomanoka haraga. To tahua gaudia oi atoa bona oi hagugurua neganai, do oi moale.”​​—⁠Reed.

“Bema emu tahua gauna oi hagugurua namonamo lasi o oi laloa negana korikori ai oi hagugurua lasi, sibona oi hadikaia lasi. Badina unai ese oi do ia durua lasi. To oi hekwarahi noho!”​​—⁠Cori.

“Tahua gaudia idia hagugurua vadaeni taudia oi hereva henia. Idia ese oi do idia durua bona tahua gaudia oi hagugurua daladia haida be oi dekenai do idia herevalaia. Danu, emu tahua gaudia be emu ruma bese ida oi herevalaia, unai amo oi idia durua diba.”​​—⁠Julia.

[Diagram on page 24]

(For fully formatted text, see publication)

Utua

Lokua