UNAI henanadai ese taunimanima momo edia lalona ia veria dainai, idia ura dikadika haere idia dibaia. Baibel ese ia hahedinaraia hari inai negai Iehova be guriguri ia kamonai henidia. Ita karaia gaudia dainai Dirava be iseda guriguri do ia kamonai eiava lasi.

Iesu be iena negai idia noho tomadiho gunalaia taudia ia gwau henidia, badina koikoi dalanai idia guriguri; idia laloa edia guriguri amo taunimanima do idia itaia idia be kara maoromaoro taudia. Iesu ia gwau unai bamona taudia be “edia davana ibounai idia abia vadaeni,” anina be idia ura gauna sibona idia abia​—taunimanima ese do idia itaia bona hanamoa bada, to Dirava ese edia guriguri do ia kamonai o lasi be idia laloa lasi. (Mataio 6:5) Unai hegeregerena, hari inai negai momo be edia ura hegeregerenai idia guriguri bona Dirava ena ura idia laloa lasi. Baibel ena hakaua herevadia, ita herevalaia vadaeni gaudia, idia badinaia lasi dainai Dirava ese edia guriguri ia kamonai lasi.

To, oi be edena bamona? Dirava be emu guriguri ia kamonai bona haerelaia, a? Herevana oi be tano idau, gado idau, ogogami o taga tauna, to Dirava be emu guriguri ia kamonai diba. Baibel ese ita ia hagoadaia: “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” (Kara 10:34, 35) Unai siri be oi ia herevalaia, a? Dirava oi gari henia anina be, Ia oi mataurai bada bona do oi ura lasi Ia oi habadua. Kara maoromaoro oi karaia neganai, oi be Dirava ese ia gwauraia maoro gaudia oi badinaia, to emu ura eiava ma haida edia ura oi badinaia lasi. Oi ura Dirava ese emu guriguri ia kamonai, a? Baibel ese oi ia hadibaia dahaka do oi karaia Dirava ese emu guriguri ia kamonai totona. *

Oibe, momo idia ura Dirava ese hoa karana ta amo edia guriguri do ia haerelaia. To Baibel negadiai, Dirava be nega ta ta ai hoa karadia ia karaia. Nega haida hoa karana ta ia karaia bona lagani handred momo murinai hoa karana ma ta ia karaia. Danu, Baibel ese ia hahedinaraia aposetolo edia nega murinai hoa karadia idia ore. (1 Korinto 13:8-10) Unai ena anina be, hari inai negai Dirava ese guriguri ia haerelaia lasi, a? Lasi! Dirava ese ia haerelaia guriguri haida mani ita laloa.

Dirava ese aonega ia henia. Iehova be aonega ibounai ena Badina. Edia mauri lalonai idia ura Iena hakaua dalana idia badinaia taudia dekenai aonega ia henia.​—Iamesi 1:5.

Dirava ese lauma helaga bona ena hahenamo ia henia. Lauma helaga be Dirava ena gaukara siahuna. Gau ta ese lauma helaga ena siahu ia hereaia lasi. Ita ia durua hahetoho ita haheaukalaia diba. Lalometau negadiai maino do ia henia, bona ita ia durua kara namodia ita hahedinaraia totona. (Galatia 5:22, 23) Iesu be ena hahediba taudia ia hadibaia Dirava be mai moale ida lauma helaga ia henia.​—Luka 11:13.

Dirava be Ia idia tahua taudia dekenai diba ia henia. (Kara 17:26, 27) Tanobada hegegemadai, taunimanima be hereva momokani idia tahua. Idia ura Dirava idia dibaia​—ena ladana be daika, Iena ura tanobada bona taunimanima totona be dahaka bona edena dala ai Ia kahirakahira idia lao diba. (Iamesi 4:8) Iehova ena Witnes taudia be nega momo unai bamona taudia idia davaria bona mai moale ida Baibel amo edia henanadai idia haerelaia.

Unai badina dainai inai magasin oi abia, a? Oi be Dirava oi tahua, a? Reana inai dala amo Dirava be emu guriguri ia haerelaia.