Lau Ura Bada Sekes Ida Lau Loaloa

Zoya Dimitrova ese Ia Sivarailaia

Lau maragi neganai lau ura sekes a ta ida lau loaloa, bena egu mauri lagani be 15 neganai, unai ia guguru. September 4, 1970 ai, dika badana ta ia vara. Sekes lalonai gadara ta lau karaia noho neganai, atai amo tano dekenai lau moru.

LAU be December 16, 1952 ai lau vara, bona egu tama sina ida Bulgaria ena gabu ta ladana, Sofia dekenai ai noho. Unai negai, Bulgaria be Komunis tanona, bona ena be tomadiho karana idia koua lasi, to taunimanima idia hagoadaia lasi tomadiho idia laloa bada totona. Taunimanima momo be Dirava idia abidadama henia lasi, to haida sibona be hehuni dalanai Dirava idia abidadama henia. Ena be egu ruma bese taudia be Otodoks taudia, to lau dekenai tomadiho karadia idia hadibaia lasi bona Dirava idia laloa lasi.

Lau maragi neganai, lau be spot gadara idauidau lau ura henia, to jimnasi gadarana lau ura henia dikadika. Egu mauri lagani be 13 neganai, tau ta be emai sikuli dekenai ia mai, kekeni ta ia tahua sekes gadara totona ia treinini. Egu jimnasi tisa ese lau ia gwauraia hidi. Lau moale bada badina sekes biaguna ena motuka namo hereana dekenai lau guia, bona intaviu bona treinini idauidau totona lau lao. Lau idia abia hidi dainai, lau moale dikadika. Lagani rua mai kahana lalonai, lau be aniani maorodia lau ania bona hanaihanai lau treinini goadagoada. Egu mauri lagani be 15 neganai, egu treinini lau haorea bona sekes ida lau loaloa matamaia. Matamanai, lau be Bulgaria ena gabu ibounai dekenai lau loaloa. Bena guna Soviet Union ena hanua haida dekenai lau loaloa bona gabeai Algeria, Hungary, bona guna Yugoslavia dekenai danu.

Lagani toi lalonai, lau be sekes ida lau loaloa. Bena Titov Veles, Macedonia ai, sekes lalonai gadara lau karaia noho neganai, sivarai ena matamanai lau gwauraia gauna be lau dekenai ia vara. Lau be jimnasi gadara lau karaia noho lalonai, lau ida ai gadara hebou tauna ese lau ia negea daekau ataiai bona do lau diho neganai, lau do ia gobea. To ena imana lau reaia bona lau ia dogoatao varona ia makohi neganai, atai amo tano dekenai lau moru, ena padana be mita 6. Karaharaga hospital dekenai lau idia abia lao, bona unuseniai doketa idia davaria egu imana ta lau hamakohia, egu rudu turiana bona egu doruna turiana idia makohi danu. Lau hoa bona ia vara gauna lau laloatao lasi. Metairametaira gorere amo lau namo neganai, egu gabana amo ia diho egu aena be ia paralais. To lau do matamata dainai, lau laloa doketa edia heduru bona opereisen amo lau raka lou diba, bona reana sekes ida do lau loaloa hebou.

 Lagani rua mai kahana ai, hospital idauidau ai medikol heduru lau abia, bona lau laloa do lau namo. To gabeai lau laloparara sekes ida do lau loaloa lou lasi. Lauegu ura badana be sekes ida do lau loaloa, to egu ura gauna ia guguru lasi, badina wilsea dekenai lau helai.

Mauri Matamata Lau Matamaia

Guna egu mauri ai lau loaloa momo, to hari lau paralais dainai, lau laloa ia auka momokani inai mauri lau manadailaia totona. Lau diba do lau namo lou lasi dainai, lau lalometau momokani. Bena lagani 1977 ai, tau matamata ta ladana Stoyan be egu ruma dekenai ia mai. Lau kamonai ia be guna lau ida ia gaukara turana ena kakana neganai, ia lau boiria vareai. Ai herevahereva noho lalonai, lau ia nanadaia bema egu gorere amo do lau namo lou. Lau lalohisihisi bada dainai, lau hamaoroa, dala be lasi do lau namo lou totona. Ia ese lau ia hamaoroa Dirava sibona ese lau do ia durua neganai, lau be mai badu ida lau haere, “Bema Dirava ia noho, dahaka dainai lau be inai bamona?”

Stoyan be guna America dekenai sekes ta ida ia gaukara neganai, ia be Iehova ena Witnes tauna ta ai ia lao. Ia ese lau dekenai Baibel ena gwauhamata namodia vaira nega totona ia gwauraia. Lau kamonai tanobada be paradaiso ai do ia lao neganai, lau moale bada. Inai gwauhamata herevana, “mase be do ia ore, bona lalohisihisi, taitai, bona hisihisi danu be do idia ore” lau kamonaia neganai, unai ese egu kudouna ia hamarerea. (Apokalupo 21:4) Lau ura dikadika egu tauanina ia goada lou! Unai neganai Baibel stadi lau abia dae. Unai amo mauri dala matamatana lau badinaia matamaia. Momokani, helaro korikorina lau davaria unai!

Wiki ta ta ai egu Baibel stadi negadia lau moalelaia bada. Matamanai Stoyan ese lau ia stadi henia bona gabeai Totka ida lau stadi, ia be Witnes taihu namona ta. Ena heduru dainai, egu diba Baibel dekenai ia bada bona egu mauri be Iehova Dirava dekenai lau gwauhamatalaia. Unai negai, Sofia ai ta ia hegeregere lasi egu bapatiso ia karaia totona, unai dainai Macedonia amo do ia mai tadikaka ta lau naria. Lagani ta Baibel lau stadilaia murinai, September 11, 1978 ai, egu ruma ai, digu gauna (bathtub) lalonai bapatiso lau abia. Bona Iehova ena Witnes ta ai lau lao be moale bada gauna bona egu mauri be mai ena anina danu.

Egu lalona dekenai, Baibel amo lau dibaia hereva momokani be lahi bamona. Mai egu ura bada ida egu ruma ai idia mai taudia dekenai egu helaro lau herevalaia. To idia ta ese egu hereva idia laloa bada lasi, reana idia laloa lau davaria dika dainai lau kavakava sisina.

 Kerere Badana Ta

Unai negai, Bulgaria dekenai gavamani ese Iehova ena Witnes taudia edia gaukara ia koua bona unuseniai Witnes taudia haida sibona idia noho. Kongrigeisen be lasi dainai lau hebou lasi, bona tadikaka taihu lau bamodia momo lasi. Unai badina bona Baibel ena taravatu idia badinaia lasi taudia lau bamoa momo dainai, kerere badana ta lau karaia.

Egu lalomamina ese lau ia hahisia bada, bona lau mamia Iehova Dirava amo lau daudau dainai, lau lalohisihisi bada. Lau lalometau bona hemarai dainai, mai egu lalona ibounai ida Iehova lau guriguri henia egu kara dika ia gwauatao totona. Gabeai, Keristani elda taudia edia heduru dainai, egu hetura karana Iehova ida lau hagoadaia lou bona mai moale ida Ia lau hesiai henia noho. Mai egu lalomamina goevana ida Iehova lau hesiai henia, bona ena orea goevana lau bamoa karana lau laloa bada!

Ena be Lau Paralais to Lau Moale

Lagani 40 gunanai lau davaria dika dainai, sekes ida lau loaloa diba lasi bona hari wilsea dekenai lau helai. To unai lau laloa neganai, egu mauri lau lalohisihisilaia lasi. Baibel ena hereva momokani ese lau ia durua dainai lau laloparara, sekes amo lau abia moalena be do ia noho daudau lasi. Lau itaia, guna sekes ai lau ida idia gaukara hebou taudia be edia mauri idia moalelaia lasi. To lau davaria harihari gauna hereadaena be, egu Havaraia Tauna, Iehova Dirava lau tura henia. Unai ese sekes amo lau abia diba moalena ia hereaia momokani.

Danu, ma haida be Baibel ena hereva momokani idia dibaia bona Iehova dekenai edia mauri idia gwauhamatalaia lau itaia neganai, lau moale. Lagani 1977 ai, Baibel lau stadilaia matamaia neganai, Witnes taudia be momo lasi. Komunis gavamani ia moru bena lagani 1991 dokonai, Iehova ena Witnes taudia edia orea idia rejistaia neganai, Bulgaria ai Witnes taudia edia namba be handred ta ia hanaia lasi. Lau moale bada badina lau itaia Basileia harorolaia taudia edia namba ia bada daekau, 1,800 bamona!

To Bulgaria dekenai gaukara bada ia do noho. Momo be Dirava ena Hereva amo diba  idia tahua noho. Lagani 2010 ai, Keriso ena mase ena Memorial dekenai idia mai taudia edia namba 3,914 ese unai ia hamomokania. Bulgaria ai Iehova ese Witnes taudia edia gaukara ia hanamoa dainai, edia namba ia bada daekau, unai ese lau ia hamoalea bada. Lau itaia Isaia 60:22 ena peroveta herevana ia momokani, “ladana maragi momokani tauna, be bese badana” ai ia lao.

Egu mauri lalonai lau moalelaia gauna ma ta be, New World Translation Baibel be Bulgaria gado ai idia halasia. Unai be August 2009, Sofia dekenai idia karaia “Gima Noho!” Distrik Hebouhebouna ai idia halasia. Lau ura bada egu gado korikorina ai Baibel ta lau abia bona unai ia momokani! Oibe, unai Baibel ese momo do ia durua Bulgaria ai Baibel ena hereva momokani idia diba totona.

Ena be egu gorere dainai Dirava ena Basileia sivarai namona lau harorolaia momo lasi, to egu neiba bona egu ruma dekenai idia vadivadi taudia ida Baibel lau herevalaia neganai, lau moale bada. Nega ta egu varenda dekenai lau noho neganai, ia raka hanai hahinena ta lau boiboi henia. Egu hereva ia abia dae bona ia ida Baibel ena hagoadaia hereva haida lau kikilaia murinai, maoromaoro Baibel stadi ia abia dae. Lau moale bada, badina gabeai ia bapatiso bona egu Keristani taihu ai ia lao. Lau ese taunimanima foa lau durua Iehova dekenai edia mauri idia gwauhamatalaia totona.

Goada bona moale bada lau abia dalana be, hanaihanai Keristani heboudia dekenai tadikaka bona taihu​—handred mai kahana​—ida lau hebou, idia be egu ruma bese bamona. Lau noho tanona dekenai, buruka bona gorere taudia totona motuka be lasi, unai dainai ia auka kongrigeisen heboudia lau lao totona. To tadikaka matamatana ta be mai lalokau ida lau ia naria dainai, unai lau laloa bada. Hebou negadia ta ta ai, egu ruma amo lau ia huaia lao ena motuka dekenai, bona ena motuka amo Kingdom Hall dekenai ai lao bena hebou murinai unai bamona ai karaia lou. Iehova lau tanikiu henia, badina Keristani ruma besena lalonai lau noho!

Egu mauri lau laloa lou bona lau laloparara, lau matamata neganai lau ura hagugurua gauna ia vara lasi. Iehova hesiai henia karana ese hari lau ia hamoalea bada bona vaira negana ena helaro namona ia henia. Dirava ena gwauhamata be tanobada paradaisona ai, “aena idia dika taudia be do idia roho bona mavaru.” (Isaia 35:6) Lau diba momokani, nega ta egu aena do ia namo lou bona egu wilsea amo do lau roho isi, unai nega be mai moale ida lau naria.

[Futnout]

[Blurb on page 30]

“Hanaihanai Keristani heboudia lao henia karana ese lau ia hagoadaia bona hamoalea bada”

[Blurb on page 31]

“Egu mauri lalonai lau moalelaia gauna ma ta be, New World Translation Baibel be Bulgaria gado ai idia halasia”

[Foto Rau Ai 29]

Egu mauri lagani be 15 neganai, sekes ida lau loaloa