March 2011 ai, Japan dekenai tano mareremarere ena bada 9.0 bona sunami idia vara neganai, politikol tauna ta ia gwau: “Dika idia davaria taudia dekenai lau hebogahisi, to lau laloa [unai] be tembatsu (Dirava ena panisi karana).”

January 2010 ai, Haiti dekenai tano mareremarere ese taunimanima 220,000 mai kahana ia hamasea neganai, televisen ai ia haroro tauna ta ia gwau, idia be “diabolo ena ura idia badinaia” dainai unai dika idia davaria, bona “dirava dekenai idia giroa lou” be namo.

Manila, Philipines ai, hutuma idia heau haraga lalonai taunimanima 79 idia moia bona idia mase, unai neganai Katolik pris ta ia gwau: “Dirava ia ura iseda lalomamina ia hamauria.” Philipines ena niuspepa ta ia gwau, “taunimanima 21 pesen idia abia dae, ororo idia makohi, lai badadia, bona dika ma haida amo Dirava ese ena badu ia hahedinaraia,” unai gaudia be unai tano ai idia vara loulou.

IDAUNEGA amo ema bona hari, taunimanima idia laloa Dirava ese kara dika taudia panisia totona, disasta ia havaraia. Lagani 1755 ai, Lisbon, Portugal dekenai, tano mareremarere, lahi, bona sunami ese taunimanima 60,000 bamona idia hamasea. Unai ia vara murinai, diba bada tauna Voltaire ia henanadai: “Reana Lisbon ai idia karaia kara dikadia ese Paris ai idia karaia moale kara dikadia idia hereaia dainai, unai dika idia vara, a?” Momokani, milioni momo idia laloa Dirava ese disasta amo taunimanima ia panisia. Tano momo dekenai taunimanima idia gwau unai be Dirava ena kara.

Unai ibounai ita laloa neganai, ita henanadai: Momokani Dirava ese disasta amo taunimanima ia panisia, a? Vanegai idia vara disasta be Dirava ena panisi karadia, a?

Haida be haraga idia gwau unai be Dirava ena kerere, badina Baibel sivaraidia ai idia itaia Dirava ese abata bona lahi amo kara dika taudia ia haorea. (Genese 7:​17-​22; 18:20; 19:​24, 25; Numera 16:​31-​35) To unai Baibel sivaraidia ita tahua namonamo neganai, gau toi ita dibaia: (1) Dirava ese hadibaia hereva ia gwauraia guna. (2) Dirava ese kara dika taudia sibona ia hamasea. (3) Dirava ese dala ia kehoa kara maoromaoro taudia idia roho mauri totona.​​—⁠Genese 7:​1, 23; 19:​15-​17; Numera 16:​23-​27.

Hari negai idia vara disasta ese taunimanima milioni momo edia mauri idia hadikaia, to gau ta ese ia hamomokania lasi Dirava ese unai ia havaraia. Vadaeni, dahaka dainai disasta momo idia vara? Edena dala ai do ita hanaidia? Bona nega ta disasta do idia ore, a? Hereva gabedia ese unai do idia haerelaia.