Baibel ese Mauri Ia Haidaua

DAHAKA ese tau ta ia durua ia rakatania tomadihona dekenai ia giroa lou totona? Edena dala ai tau ta ia ura tamana ta ia davaria? Edia sivarai mani oi duahia.

“Iehova dekenai lau giroa lou be namo.”​—⁠ELIE KHALIL

IA VARA LAGANINA: 1976

TANO: CYPRUS

GUNA: IA GWAU-EDEEDE BONA TAMA SINA IA RAKATANIA

EGU MAURI GUNANA: Lau be Cyprus ai lau vara, to Australia ai lau bada. Egu tama sina be Iehova ena Witnes taudia, bona idia hekwarahi lau idia hadibaia Iehova bona iena Hereva, Baibel, lau ura henia totona. To lau bada neganai idia lau gwau-edeede henia matamaia. Hanuaboi ai lau be ruma amo lau heau, egu turadia ida ai hedavari totona. Motuka ai henaodia bona kerere momo ai karaia.

Matamanai, hehuni dalanai unai gaudia lau karaia, egu tama sina lau habadua garina. To metairametaira unai gari mamina ia ore. Egu turadia edia mauri lagani be bada bona Iehova idia lalokau henia lasi, idia ese lau idia hakaua kerere. Gabeai, egu tama sina lau hamaoroa lau ura lasi edia tomadiho lalonai lau noho. Mai haheauka ida lau idia durua toho, to edia heduru lau dadaraia. Egu tama sina idia lalometau bada.

Ruma lau rakatania murinai, drag lau abia matamaia, mariuana momo lau hadoa bona hoihoilaia. Matabodaga karadia lau karaia bona nega momo klab dekenai lau lao pati totona. Lau badu haraga danu. Bema ta ese lau ura henia lasi gauna ta ia herevalaia o karaia, lau badu haraga, nega momo taunimanima dekenai lau boiboi badabada bona idia lau botaia. Lau be Keristani taudia ese idia karaia lasi karadia ibounai lau karaia.

BAIBEL ESE EGU MAURI IA HAIDAUA DALANA: Lau ida drag ai abia hebou merona ta be egu tura namona ai ia lao, ia maragi neganai ena tamana ia mase. Nega momo ai herevahereva ela bona hanuaboi momokani. Nega haida ena hemami ia gwauraia hedinarai, ia gwau ena tamana ia reaia bada. Lau maragi negana amo, toreisi lou helarona lau diba, unai dainai ia dekenai Iesu lau herevalaia. Iesu be mase taudia ia hatorea isi lou bona ia gwauhamata nega vairai unai bamona do ia karaia. (Ioane 5:28, 29) Lau gwau: “Mani oi laloa, emu tamana do oi itaia lou. Ita ibounai be tanobada Paradaisona ai do ita noho hanaihanai.” Unai hereva ese egu turana ia hagoadaia.

Nega haida, egu turana ese dina gabedia o toi  tamona ia herevalaia. Unai negadiai, ena Baibel amo Iehova Dirava, Iesu bona dina gabedia ia herevalaia siridia lau hahedinaraia. (Ioane 14:28; 2 Timoteo 3:1-5) Egu turana dekenai Iehova lau herevalaia negadiai, Iehova lau laloa.

Metairametaira, egu kudouna ai hereva momokani ena uhe​—⁠egu tama sina ese mai hekwarahi ida idia hadoa gauna​—⁠ia tubu matamaia. Hegeregere, nega haida pati gabunai egu turadia ida drag ai abia neganai, karaharaga Iehova lau laloa. Egu turadia momo idia gwau idia be Dirava idia lalokau henia, to edia kara amo unai idia hahedinaraia lasi. Lau ura lasi unai bamona lau karaia dainai kara ta lau karaia be namo. Iehova dekenai lau giroa lou be namo.

Momokani, do ita karaia gauna ita diba be auka lasi, to karaia totona be mai ena hekwarahi. Gau haida lau haidaua be auka lasi, hegeregere drag abia karana lau dadaraia. Danu egu turadia gunadia lau bamodia lou lasi bona Keristani elda tauna ta ida Baibel lau stadilaia matamaia.

To, gau ma haida lau haidaua be auka. Hegeregere egu badu karana lau biagua diba lasi. Nega haida egu badu karana lau biagua, to gabeai lau badu haraga lou. Unai ia vara neganai, egu hemami ia dika bona lau laloa unai hekwakwanai do lau hanaia lasi. Lau lalomanoka dainai, lau ia stadi henia elda tauna dekenai lau lao. Ia be nega ibounai mai haheauka bona hebogahisi ida lau ia hagoadaia. Nega ta, lau ia hamaoroa Gima Kohorona ta ai hesiku lasi karana ia herevalaia atikol lau duahia totona. * Egu badu karana lau biagua diba daladia ai herevalaia. Unai atikol lau laloa bona Iehova lau guriguri henia loulou dainai, metairametaira egu badu karana lau biagua diba. Gabeai, April 2000 ai, bapatiso lau abia bona Iehova ena Witnes tauna ta ai lau lao. Egu tama sina idia moale bada.

NAMO LAU DAVARIA DALANA: Hari lalomaino lau abia bona egu lalomamina ia goeva, badina lau diba drag o matabodaga karadia ese egu tauanina ia hadikaia lasi. Herevana dahaka lau karaia​—⁠lau gaukara, Keristani heboudia lau lao o moale karadia haida lau karaia, to lau moale bada. Egu mauri dekenai lalohadai maorona lau abia.

Iehova lau tanikiu henia, badina egu tama sina be lau durua totona idia hesiku lasi. Danu Iesu ena hereva Ioane 6:44 dekenai lau laloatao, ia gwau: “Tau ta be lau dekenai do ia mai diba lasi, bema Tamana, lau ia siaia tauna ese ia veria mai lasi.” Egu kudouna ia hamarerea gauna be inai: Lau diba Iehova ese lau ia veria mai dainai ia dekenai lau giroa lou diba.

“Lau ura tamana ta lau davaria.”​—⁠MARCO ANTONIO ALVAREZ SOTO

IA VARA LAGANINA: 1977

TANO: CHILE

GUNA: DEATH-METAL MIUSIKI ENA MEMBA

 EGU MAURI GUNANA: Egu sinana ese lau ia naria Punta Arenas ai, unai be Strait of Magellan ena taoni namona ta, South America ena saut kahana dekenai ia noho. Egu mauri lagani be faiv neganai, egu tama sina idia parara, bona lau mamia lau be sibona lau noho. Lau ura tamana ta lau davaria.

Egu sinana be Iehova ena Witnes taudia ida Baibel ia stadilaia, bona Keristani heboudia totona Kingdom Hall dekenai lau ia abia lao. To, lau ura lasi hebou dekenai lau lao bona nega haida hebou ai lao henia lalonai lau badu bona taitai. Egu mauri lagani be 13 neganai, hebou lao henia karana lau hadokoa.

Unai negai, lau be miusiki lau ura henia bada bona lau laloparara miusiki dekenai lau be mai egu diba. Egu mauri lagani be 15 neganai, aria badadia bona maragidia ai, bona ba o inuinu gabudiai, heavy-metal bona death-metal miusiki lau gadaralaia. Miusiki idia diba momo taudia lau bamoa dainai, egu lalona idia veria klasikal miusiki lau ura henia. Miusiki sikulina ai miusiki lau stadilaia matamaia. Egu mauri lagani be 20 neganai, siti badana, Santiago dekenai lau lao diba ma haida abia totona. To danu, heavy-metal bona death-metal miusiki lau gadaralaia noho.

Unai nega lalonai lau mamia lau be anina lasi. Unai hemami koua totona, egu turadia​—⁠idia be egu famili bamona​—⁠ida lau inuinu kekero bona drag ai abia. Lau gwau-edeede bona egu toana amo unai ia hedinarai. Dabua koremadia lau hahedokilaia, adena huina lau habadaia, bona egu huina lau halataia ela bona egu gabana.

Nega momo lau heatu bona pulisi ese lau idia abia. Nega ta, lau kekero bona drag hoihoilaia taudia haida lau heatu henidia, badina idia ura lau bona egu turadia idia heatu henia. Unai taudia ese lau idia botaia dikadika bona egu aukina idia hamakohia.

To lau ia hahisia bada gauna be inai, nega ta lau davaria egu kekeni be lau ia koia, lagani momo lalonai ia be egu turana namona ida ia hetura, bona egu turadia ibounai ese lau idia hadibaia lasi. Lau lalohisihisi bada.

Punta Arenas dekenai lau giroa lou, bona miusiki hadibaia gaukarana lau hamatamaia, bona miusiki gauna ta ladana cello lau gadaralaia. Danu, heavy-metal bona death-metal miusiki taudia ida ai gadara bona rekodi ai karaia hebou. Lau ese kekeni namona ta ladana Sussan, lau davaria bona ai noho hebou. Gabeai, Sussan ia davaria iena sinana be Toi Tamona hahediba herevana ia abia dae, to lau be unai lau abia dae lasi. Bena lau ia nanadaia, “Edena be hereva momokani?” Lau hamaoroa Toi Tamona herevana be koikoi, to Baibel amo lau hamomokania diba lasi. To lau diba daidia be unai idia karaia diba. Lau hamaoroa Iehova ena Witnes taudia ese ia dekenai Baibel amo hereva momokani idia hadibaia diba. Bena lagani momo lalonai lau karaia lasi gauna ta lau karaia​—⁠Dirava ena heduru totona lau guriguri.

Dina haida murinai, tau ta lau itaia, toana be ia lau diba, bona lau nanadaia bema ia be Iehova ena Witnes tauna ta. Ena be egu toana dainai  ia gari sisina, to Kingdom Hall heboudia totona lau gwauraia henanadai ia haerelaidia namonamo. Lau diba unai be egu guriguri ena haere. Kingdom Hall dekenai lau lao bona murina kahanai lau helai, ta ese lau ia itaia lasi totona. To, momo be lau idia diba badina lau maragi neganai hebou dekenai lau lao. Lau idia welkam henia bona idia rosia, unai ese egu lalona ia hagoadaia bada. Unai be hegeregere ruma dekenai lau giroa lou. Guna lau dekenai Baibel ia hadibaia tauna lau itaia bona lau noia lau ia stadi henia lou totona.

BAIBEL ESE EGU MAURI IA HAIDAUA DALANA: Dina ta, Aonega Herevadia 27:11 lau duahia, ia gwau: “Egu natuna e, do oi aonega, vadaeni do lau moale.” Lau hoa badina lau itaia taunimanima ese iunives ia Havaraia Tauna idia hamoalea diba. Lau laloparara Iehova be egu mauri ibounai lalonai lau ura davaria Tama namona!

Lau ura egu guba Tamana lau hamoalea bona ena ura lau karaia, to lagani momo lalonai drag lau abia bona lau inuinu kekero. Iesu ena hereva, Mataio 6:24 ai lau lalopararalaia matamaia, ia gwau: “Tau ta be biaguna rua edia igui hesiai gaukara ia karaia diba lasi.” Lau hekwarahi egu mauri lalonai gau haida lau haidaua neganai, 1 Korinto 15:33 ena hereva ese lau ia hagoadaia, ia gwau: “Hebamo dikadia ese ta ena kara namodia idia hadikaia diba.” Lau diba bema guna lau lao gabudia dekenai lau lao bona egu tura gunadia lau bamoa noho, egu kara dikadia do lau hadokoa lasi. Baibel ena hereva lau lalopararalaia: Namona be lau idia hahekwakwanaia gaudia lau dadaraia.​—⁠Mataio 5:30.

Miusiki lau ura henia bada dainai heavy metal miusiki lau dadaraia be auka. To, kongrigeisen ai egu turadia edia heduru dainai unai lau dadaraia diba. Inuinu kekero bona drag abia karana lau dadaraia. Danu egu kwarana bona adena huidia lau utua bona dabua koremadia sibona hahedokilaia karana lau hadokoa. Sussan lau hadibaia egu huina do lau utua neganai, ia ura diba Kingdom Hall ai dahaka lau karaia. Ia gwau, “Oi ida do lau lao bona Kingdom Hall ai idia vara gaudia lau itaia!” Ia itaia gaudia ia ura henia bona daudau lasi ia danu be Baibel ia stadilaia. Gabeai, lau bona Sussan ai headava. Lagani 2008 ai, ai bapatiso bona Iehova ena Witnes taudia ai ai lao. Ai moale badina egu sinana ida Iehova ai hesiai henia.

NAMO LAU DAVARIA DALANA: Inai tanobada ena moale koikoina bona tura dikadia lau rakatania. Miusiki lau do ura henia noho, to lau abia hidi namonamo. Lau dekenai guna idia vara gaudia lau herevalaia, egu famili bona ma haida, matamata taudia danu, lau durua totona. Lau ura do idia itaia inai tanobada ena moale karadia be “momoru sibona.”​—⁠Filipi 3:8.

Keristani kongrigeisen lalonai lalokau bona maino ia noho, bona unuseniai tura korikoridia lau davaria. To gau badana be inai, Iehova kahirakahira lau lao neganai, ia be egu Tamana ai ia lao.

[Footnote]

[Blurb on page 13]

“Lau diba Iehova ese lau ia veria mai dainai ia dekenai lau giroa lou diba”