Haere Ita Diba be mai Anina Bada, A?

“Umui be hereva momokani do umui diba, bona hereva momokani ese umui do ia ruhaia.”​—⁠IOANE 8:32.

BAIBEL ena hereva momokani ese ita ia ruhaia, unai amo taunimanima ese Iesu dekenai idia abia lalohadai kereredia ita dadaraia. To Iesu dekenai ita abia dae gaudia be mai anina bada, a? Oibe. Iehova bona Iesu dekenai unai be mai anina bada. Unai dainai ita dekenai danu be mai anina bada.

● Dahaka dainai Iehova dekenai unai be mai anina bada? Badina “Dirava be lalokau.” (1 Ioane 4:8) Iehova ia ura ita noho hanaihanai mai moale ida. Iesu ia gwau: “Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be . . . mauri hanaihanai do idia abia.” (Ioane 3:16) Dirava ese ena Natuna ia henia iseda Mauri Hoia Lou Tauna ai ia lao bona dala ia kehoa tanobada paradaisona ai mauri hanaihanai ita abia, Dirava ena palani ginigunana hegeregerena. (Genese 1:28) Dirava ia ura ena Natuna ena sivarai momokanina idia dibaia bona badinaia taudia dekenai ena harihari gauna, mauri hanaihanai do ia henia.​—⁠Roma 6:23.

● Dahaka dainai Iesu dekenai unai be mai anina bada? Iesu danu be taunimanima ia lalokau henia. Sibona ena ura ia dadaraia bona ita totona ena mauri ia atoa diho. (Ioane 15:13) Ia laloparara unai dala sibona amo taunimanima ia hamauria. (Ioane 14:6) Ia ura taunimanima momo be ena mauri davalaia boubouna amo namo idia abia. Unai dainai ena hahediba taudia ia hagania, tanobada ibounai lalonai taunimanima dekenai Dirava ena ura idia hadibaia totona.​—⁠Mataio 24:14; 28:19, 20.

● Dahaka dainai ita dekenai unai be mai anina bada? Mani nega sisina lalonai oi dekenai mai anina bada gaudia​—⁠emu helt bona famili​—⁠oi laloa. Oi ura oi bona emu famili emui helt do ia namo bona mauri namona umui abia, a? Iehova ese Iesu amo umui do ia durua nega matamata ai mauri hanaihanai do umui abia, emui helt do ia namo bona hisihisi be lasi. (Salamo 37:11, 29; Apokalupo 21:3, 4) Oi ura unai negai oi noho, a? Bema oibe, namona be gau ta oi karaia.

Mani hereva kwarana henunai ia noho sirina oi itaia lou, ia gwau: “Umui be hereva momokani do umui diba, bona hereva momokani ese umui do ia ruhaia.” Iesu ena sivarai momokanina bona Dirava ena ura hagugurua totona ia karaia karana, ese ita be kara dika bona mase amo ia ruhaia diba. To unai ia vara totona, namona be “hereva momokani” oi dibaia. Namona be unai hereva momokani dekenai diba ma haida oi abia bona unai ese oi bona emu famili do ia durua daladia oi dibaia. Iehova ena Witnes taudia be mai moale ida oi do idia durua.