Edia Abidadama Tohotohoa

Ia Gimaia, Ia Ubua, Bona Ia Haheauka

IOSEPA ese kohu ma haida be doniki ena doruna ai ia atoa. Mani oi laloa, hanuaboi ai Iosepa be Betelehema hanua ia itaia bona doniki ena doruna ia patapataia. Ia be do ia lao henia gabu daudauna, Aigupito, ia laloa. Unai tano ena bese, gado bona kastom be idau, bona edena bamona Iosepa ena famili maragina be unai do idia manadalaia?

Iosepa ese sivarai dikana be ena adavana lalokauna, Maria dekenai ia herevalaia be auka, to ena lalona ia hagoadaia bona ia gwauraia. Ia hamaoroa nihi lalonai Dirava ese aneru ta amo inai hereva ia gwauraia: King Heroda ia ura edia natuna maragina ia hamasea! Hanua idia rakatania haraga be namo. (Mataio 2:13, 14) Maria ia laloa momo. Dahaka dainai ta ia ura ena kerere lasi natuna ia hamasea? Maria bona Iosepa idia laloparara lasi dahaka dainai unai ia vara. To Iehova idia abidadama henia bona edia laolao totona idia hegaegae.

Hanuaboi ai Betelehema taudia idia mahuta neganai, Iosepa, Maria, bona Iesu be hanua idia rakatania. Iosepa be ena famili ia hakaua lao saut kahana dekenai bona dina be ist kahana amo ia daekau matamaia, reana ia laloa noho dahaka do ia vara. Edena dala ai unai kapenta tauna ese ena famili be siahu taudia amo ia gimaia? Nega ibounai idia do ia ubua, a? Do ia gaukara goada Iehova Dirava ese ia henia gaukara badana​—⁠natuna naria gaukarana​—⁠ia karaia totona, a? Iosepa be hekwakwanai badadia ia davaria. Unai hekwakwanai ta ta ia hanaia dalana ita herevalaia neganai, do ita itaia dahaka dainai hari inai negai tama ibounai bona ita ese Iosepa ena abidadama karana ita tohotohoa be namo.

Iosepa ese Ena Famili Ia Gimaia

Hua haida gunanai, Nasareta hanua ai Iosepa be Heli ena natuna kekeni ida ia maoheni murinai ena mauri ia idau. Iosepa ia diba Maria ia kerere lasi bona ia be mai ena abidadama. To gabeai ia kamonai Maria ia rogorogo! Ia ura hehuni dalanai edia headava do ia hadokoa, unai amo ma haida ese Maria do idia hahemaraia lasi. * To, nihi lalonai aneru ta ese ia hamaoroa Maria be Iehova ena lauma helaga amo ia rogorogo. Aneru ma ia gwau, Maria ese do ia havaraia merona ese “taunimanima be kara dika amo do ia hamauria.” Bona Iosepa ia hagoadaia, ia gwau: “Oi laloa momo lasi, Maria emu adavana do oi abia lao emu ruma dekenai.”​—⁠Mataio 1:18-21.

Kara maoromaoro tauna Iosepa, be unai bamona ia karaia. Ia ese gaukara badana ia abia: Natuna ta do ia naria, ena be iena natuna korikorina lasi, to Dirava ese unai natuna ia laloa bada. Gabeai, Iosepa be gavamani ena taravatu ta ia badinaia, bona Maria ia abia lao Betelehema dekenai edia ladana torea totona. Unuseniai Iesu ia vara. *

Iosepa bona ena famili be Nasareta dekenai idia giroa lou lasi. To Betelehema ai idia noho,  Ierusalema amo ena daudau be kilomita haida sibona. Idia be ogogami taudia, to Iosepa ia hekwarahi Maria bona Iesu ia gimaia, idia dabu lasi o hisihisi idia davaria lasi totona. Gabeai, idia be ruma maragina ta dekenai idia noho. Unai negai Iesu be beibi lasi to mero maragi​—⁠reana ena mauri lagani be 1 ia hanaia​—⁠bona edia mauri ia idau haraga lou.

Hisiu stadilaia babalau taudia haida be ist kahana amo idia mai, reana Babulonia amo idia mai. Idia be hisiu ta idia badinaia ela bona Iosepa bona Maria edia ruma dekenai bona Iuda taudia edia king ai do ia lao natuna idia tahua. Unai tatau ese hemataurai karana idia hahedinaraia.

Herevana idia diba o lasi, to unai hisiu stadilaia babalau taudia ese mero maragina Iesu hamasea dalana idia kehoa. Idia itaia hisiu ese idia be Betelehema dekenai ia hakaudia lao lasi, to Ierusalema dekenai ia hakaudia lao guna. Unuseniai King Heroda idia hamaoroa idia be Iuda taudia edia king ai do ia lao natuna idia tahua. Unai ese king ia habadua dikadika.​—⁠Rau 29 ai atikol ladana, “Duahia Taudia Idia Henanadai . . . ‘Hisiu’ be Daika ese Ia Siaia?” itaia.

To, Heroda ena siahu ia hereaia siahuna ia noho. Edena dala ai unai ita diba? Unai tatau ese harihari gaudia idia henia, bona davana idia noia lasi. Reana Iosepa bona Maria idia hoa badina idia itaia idia be mai edia golo, frenkinsens, bona muro​—⁠unai be dava bada gaudia! Unai hisiu stadilaia babalau taudia idia ura King Heroda idia hadibaia Iesu be edeseniai ia noho. To Iehova ese idia ia koua. Nihi ta amo Ia ese idia ia hadibaia dala idauna amo edia hanua dekenai idia giroa lou totona.​—⁠Mataio 2:1-12.

Hisiu stadilaia babalau taudia idia lao murinai, Iosepa be Iehova ena aneru amo inai hadibaia hereva ia abia, ia gwau: “Oi toreisi, natuna maragina bona ena sinana oi abia bona Aigupito dekenai oi heau lao. Bona unuseniai do oi noho ela bona oi lau hamaoroa unai gabu do oi rakatania, badina Heroda ia ura natuna maragina ia hamasea.” (Mataio 2:13) Unai dainai, matamanai ita herevalaia bamona, Iosepa be maoromaoro unai hereva ia badinaia. Ia ese ena natuna ena namo ia laloa guna bona ena famili be Aigupito dekenai ia abia lao. Unai hisiu stadilaia babalau taudia ese dava bada kohudia idia henia dainai, Iosepa bona ena famili be idia hegeregere Aigupito ai idia noho bona sibona idia naria totona.

Apokrifa ena gori sivaraidia ese Aigupito laolaona idia herevalaia neganai, idia gwau mero maragina Iesu be hoa dalanai edia laolao ia hakwadogia, raskol ese dika ta idia karaia lasi, bona deit huahua ena pama audia ia  hadihoa ena sinana ese edia huahua ia abia totona. * To hereva momokani be inai, idia be laolao daudauna idia karaia bona idia diba lasi gabuna dekenai idia lao.

Tama sina be Iosepa amo gau momo idia dibaia diba. Iosepa be ena famili gimaia totona, ena gaukara ia rakatania bona sibona ena namo ia laloa lasi. Ia dekenai ena famili be Iehova amo ia mai harihari gauna ta. Hari inai nega dikana lalonai tama sina be edia natudia idia naria, badina gau momo ese natudia idia hakaua kerere o edia lalona idia veria diba. Iosepa idia tohotohoa tama sina idia gaukara goada edia natudia be dika gaudia amo idia gimaia dainai, idia ita hanamoa!

Iosepa ese Ena Famili Ia Ubua

Toana be Iosepa bona ena famili be Aigupito ai idia noho daudau lasi, badina gabeai aneru ese Iosepa ia hadibaia Heroda ia mase. Iosepa ese ena famili be edia hanua korikori dekenai ia abia lao. Idaunegai peroveta herevana ta ia gwau, Iehova ese ena natuna be “Aigupito amo” ia boiria. (Mataio 2:15) Iosepa ia karaia gaudia ese unai peroveta herevana ia hagugurua, to hari ena famili be edeseniai do ia abia lao?

Iosepa ia laloa namonamo. Ia ese Heroda ena gabu ia abia tauna, Akelao, dagedage bona ala-ala tauna ia gari henia. Dirava ese Iosepa ia hadibaia ena famili be not kahana dekenai do ia abia lao, unai be ena hanua korikori, Nasareta, Galilea dekenai, unai amo Ierusalema bona ena dika gaudia amo idia daudau. Unuseniai, ia bona Maria ese edia natudia idia naria.​—⁠Mataio 2:19-23.

Edia kohu bona moni be momo lasi bona edia mauri be auka. Baibel ese Iosepa ia gwauraia kapenta tauna, unai hereva amo ia hedinarai ia be au amo ia karaia gaukaradia ia diba, hegeregere timba ia utua, ia veria lao bona muramura ia atoa, unai amo ia gaukaralaidia ruma, bouti, nesehanai, treila, taea, kohu huaia audia bona uma karaia tulu idauidau ia karaia. (Mataio 13:55) Unai be gaukara aukana. Nega momo Baibel negadiai, kapenta taudia be edia ruma o stoa badinai idia gaukara.

Iosepa ese tulu idauidau ia gaukaralaia, reana haida be ena tamana amo ia abia. Reana ia ese sikoea, plummet, chalk line, ira, iri, adze, hama, mallet, sisolo, drill, glu idauidau, bona ikoko haida ia gaukaralaia, ena be edia davana be bada.

Mani oi laloa Iesu be mero maragi bona ena heubu tamana ia itaia ia gaukara noho. Oibe, ia ese Iosepa ia karaia gaudia ibounai ia itaia namonamo, bona Iosepa ena goada bona ena diba ia hoalaia. Reana Iosepa ese ena natuna dekenai gaukara maragidia ia hadibaia, hegeregere gwarume ena kopina, idia hakaukaua vadaeni gauna, amo au ia hamanadaia. Ia gaukaralaia audia, hegeregere fig, oak, o olive, edia idau be Iesu dekenai ia hadibaia.

 Danu, Iesu ia diba unai tau goadana ese au ia utudia bona timba ia karaia sibona lasi, to ia, ena sinana bona ena tadidia ia naridia danu. Oibe, Iosepa bona Maria edia famili ia bada ia lao, Iesu murinai natudia ma siks idia havaraia. (Mataio 13:55, 56) Iosepa ia gaukara goada idia ia naria bona ubua totona.

To, Iosepa ia diba iena famili edia hetura karana Iehova ida ia hagoadaia be mai anina bada. Unai dainai nega ia atoa ena natudia dekenai Iehova Dirava bona Iena taravatu ia hadibaia totona. Ia bona Maria be hanaihanai edia natudia idia abia lao sinagoga dekenai, unai be Taravatu duahia bona ena anina herevalaia gabuna. Reana Iesu be mai ena henanadai momo bona Iosepa ia hekwarahi haere ia henia totona. Danu Iosepa ese ena famili be tomadiho ariadia totona Ierusalema dekenai ia abia lao. Lagani ta ta ibounai idia karaia Pasova ariana totona, Iosepa be wiki rua lalonai kilomita 112 bamona ia raka lao Ierusalema dekenai bena ia giroa lou.

Hari, Keristani ruma bese kwaradia be Iosepa idia tohotohoa. Idia gaukara goada edia natudia idia durua bona Dirava tomadiho henia karadia idia hadibaia, unai gaukara idia atoa guna to gau ma haida be gabeai. Keristani hebou badadia bona maragidia dekenai edia natudia idia abia lao. Iosepa bamona, idia diba edia natudia durua totona unai idia karaia be mai anina bada.

“Lalohekwarahi Bada”

Iesu ena mauri lagani be 12 neganai, Iosepa be vaia ia karaia bamona, ena famili be Ierusalema dekenai ia abia lao. Unai be Pasova aria negana, bona famili momo be gabu mai ena flaoa namodia edia huanai idia raka lao. Ierusalema ena ororo gabuna idia lao kahirakahira neganai, momo be salamo anedia idia abia. (Salamo 120-134) Ierusalema hanua ai taunimanima tausen momo idia noho. Pasova aria murinai, famili ibounai be edia noho gabuna dekenai idia giroa. Reana Iosepa bona Maria be gau momo idia karaia dainai, idia laloa Iesu be idia lao hebou taudia huanai ia noho, reana edia famili taudia ida. To dina ta murinai, idia laloparara Iesu be idia ida ia noho lasi.​—⁠Luka 2:41-44.

 Ierusalema dekenai idia giroa lou, Iesu tahua totona. Dala dekenai idia raka lao bona edia natuna ena ladana idia boiboilaia. Mero be edeseniai? Dina ihatoina ai, Iosepa ia lalohekwarahi, ia laloa Iehova amo ia abia gaukarana ia karaia namonamo lasi. Gabeai, dubu helaga dekenai idia lao. Unuseniai ia idia tahua ela bona daiutu ta, Taravatu diba momo taudia idia haboua gabuna ai Iesu idia davaria, ia be idia huanai ia helai! Iosepa bona Maria edia hemami mani oi laloa!​—⁠Luka 2:45, 46.

Iesu be unai Taravatu diba momo taudia edia hereva ia kamonai bona idia dekenai henanadai ia henia. Unai taudia be iena laloparara bona haere karana idia hoalaia. Danu Maria bona Iosepa be ia idia itaia neganai idia hoa bada. Iosepa be hereva ta ia gwauraia lasi. To Maria be idia ruaosi totona ia hereva, ia gwau: “Natugu e, dahaka dainai ai dekenai inai bamona oi karaia? Lau bona emu tamana be mai lalohekwarahi bada ida oi ai tahua noho.”​—⁠Luka 2:47, 48.

Baibel ese inai sivarai kwadogina amo tama sina edia gaukara badana ia hahedinaraia. Ia be mai ena hekwarahi​—⁠herevana natuna ia goevadae! Hari inai tanobada dikana ai, natudia naria gaukarana ese tama sina dekenai “lalohekwarahi bada” ia havaraia, to Baibel ese edia hekwarahi ia herevalaia dainai idia lalogoada.

Iesu be dubu helaga ai ia noho bona ia mamia unuseniai ia be ena guba Tamana, Iehova, kahirakahira ia noho, bona ia ura dikadika gau momo ia dibaia. Unai dainai, ena tama sina ia haere henidia, ia gwau: “Dahaka dainai lau umui tahua? Umui diba lasi lau be egu Tamana ena ruma dekenai lau noho be namo, ani?”​—⁠Luka 2:49.

Iosepa be nega momo unai hereva ia laloa. Reana gabeai ia moale bada, badina ia gaukara goada iena heubu natuna ia durua Iehova Dirava dekenai unai lalohadai ia abia totona. Iesu ia mero maragi neganai, ena hetura karana Iosepa ida ese ia durua dainai, tama lalokauna ena kara ia dibaia.

Bema oi be tama ta, oi diba oi abia hahenamo ta be emu natudia oi durua, tama lalokauna ena kara idia dibaia totona, a? Unai hegeregerena, bema oi be mai emu heubu natudia, namona be Iosepa ena haheitalai oi laloatao bona idia ta ta oi kara namo henidia. Namona be idia oi durua edia guba Tamana, Iehova Dirava kahirakahira idia lao totona.

Iosepa Ia Haheauka

Baibel ese Iosepa ena sivarai haida sibona ia herevalaia, to ita lalodia namonamo be mai ena namo. Baibel ia gwau Iesu be ena tama sina edia “henunai ia noho.” Danu “Iesu ia  tubu daekau, ena aonega ia bada ia lao bona Dirava bona taunimanima ese ia idia ura henia bada.” (Luka 2:51, 52) Unai hereva amo Iosepa dekenai dahaka ita dibaia? Ita diba Iosepa be ena famili ia hakaua noho, unai dainai ena goevadae natuna ese ena kwara dagina ia matauraia bona badinaia.

Danu ita diba Iesu ena aonega ia bada ia lao. Momokani, Iosepa ia gaukara goada ena natuna ia hadibaia totona. Unai negai, Iuda taudia edia aonega herevana ta be inai: Idia laga-ani momo taudia sibona be idia aonega, to gaukara idia diba momo taudia, hegeregere kapenta taudia, biru taudia, bona auri idauidau karaia taudia be “hahemaoro goeva karana idia gwauraia hedinarai diba lasi, bona idia be parabole gwauraia taudia huanai ita davaria diba lasi.” Gabeai, Iesu ia hahedinaraia unai aonega herevana be anina lasi. Ia be mero maragi neganai, nega momo ena heubu tamana, kapenta tauna unai, ese Iehova ena “hahemaoro goeva karana” ia hadibaia namonamo.

Danu ita diba Iosepa ese Iesu ia naria namonamo. Unai dainai Iesu ia bada neganai, ena tauanina ia goada. Ma danu, Iosepa ese ena natuna ia hadibaia gaukara idauidau ia karaia namonamo totona. Iesu idia gwauraia kapenta tauna ena natuna sibona lasi, to “ia be kapenta tauna” danu. (Mareko 6:3) Unai dainai Iosepa ena hadibaia karana ese anina namona ia havaraia. Ruma bese kwaradia be Iosepa idia tohotohoa bona edia natudia idia durua, unai amo gabeai sibona idia naria diba.

Iesu ena mauri lagani 30 lalonai ia bapatiso ena sivarai be Baibel ai ita duahia neganai, Iosepa ena sivarai ta ita davaria lasi. Idia vara gaudia ese idia hahedinaraia Iesu ese ena hesiai gaukara ia hamatamaia neganai, Maria be vabu. (Rau 27 ai maua ladana, “Iosepa be Edena Negai Ia Mase?” itaia.) To, Iosepa ia do mase lasi neganai, ia hahedinaraia ia be ena famili ia gimaia, ia ubua, bona ia haheauka. Tama, ruma bese kwaradia, o Keristani taudia ma haida ese Iosepa ena haheitalai idia tohotohoa be namo.

[Footnotes]

[Box on page 27]

Iosepa be Edena Negai Ia Mase?

Ita diba Iesu ena mauri lagani be 12 neganai, Iosepa ia do mauri noho. Iuda matamata taudia edia mauri lagani be 12 neganai, tamadia edia gaukara idia dibaia matamaia bona edia mauri lagani be 15 neganai unai diba idia gaukaralaia. Toana be Iosepa ia mauri lalonai Iesu dekenai kapenta gaukara ia hadibaia. Iesu ena mauri lagani be 30 bona ena hesiai gaukara ia hamatamaia neganai, Iosepa ia do mauri noho, a? Reana lasi. Baibel ese ia hahedinaraia unai negai Iesu ena sinana, tadina bona taihuna idia do noho, to Iosepa ia herevalaia lasi. Nega ta taunimanima ese Iesu idia gwauraia “Maria ena natuna,” to Iosepa ena natuna lasi. (Mareko 6:3) Baibel ese ia hahedinaraia Maria be sibona gau idauidau ia abia hidi bona ia karaia, to adavana ia nanadaia guna lasi. (Ioane 2:1-5) Baibel negadiai hahine be unai bamona idia karaia lasi bema edia adavana idia do mauri noho. Gabeai, Iesu ia mase gwauraia neganai, aposetolo Ioane ia hamaoroa ena sinana do ia naria. (Ioane 19:26, 27) Iesu be unai bamona do ia hereva lasi bema Iosepa ia mauri noho. Unai dainai, reana Iesu be mero matamata neganai, Iosepa ia mase. Iesu be vara guna natuna dainai, ena tamana ena kapenta gaukara bona famili ia naria ela bona ia bapatiso.

[Picture on page 24]

Iosepa be sibona ena ura ia dadaraia ena natuna gimaia totona

[Picture on page 25]

Iosepa ia gaukara goada ena famili ubua totona

[Picture on page 26]

Hanaihanai Iosepa ese ena famili be tomadiho totona Ierusalema dekenai ia abia lao

[Picture on page 28]

Iosepa ese ena natuna dekenai kapenta gaukara ia hadibaia