ABELA be ena mamoe serina ia itaia ororo badinai ava idia ania noho. Bena ia roha lao daudau amo diari ta ia itaia. Ia diba unai diari be kaia ta mai ena lahi ia giroagiroa, Eden umana ena vareai dalana ia koua. Guna ena tama sina be unuseniai idia noho, to hari idia bona edia natudia idia vareai diba lasi. Mani inai oi piksaia, adorahi ena lai ia toa lalonai Abela be guba ia raraia bona ena Havaraia Tauna ia laloa. Reana ia laloa gauna be inai, taunimanima bona Dirava idia hetura lou diba, a? Abela ia ura dikadika unai do ia vara.

Abela be hari oi ia hereva henia noho. Reana oi laloa unai ia vara diba lasi, badina Abela, Adamu ena natuna iharuana unai, be idaunegai ia mase. Lagani 6,000 bamona ia hanaia vadaeni, bona iena tauanina be kahu ai ia lao. Baibel ese mase taudia ia herevalaia neganai, ia gwau: “Mase taudia be gau ta idia diba lasi.” (Hadibaia Tauna 9:5, 10) Danu, Baibel ai Abela ia gwauraia herevadia idia torea lasi. Unai dainai, edena dala ai ita ia hereva henia noho?

Aposetolo Paulo be Dirava ena hahekau henunai Abela ia herevalaia neganai, ia gwau: “Ena be ia mase vadaeni, to ena abidadama dainai ia do hereva noho.” (Heberu 11:4) Edena dala ai Abela be ita ia hereva henia? Iena abidadama amo. Abela be abidadama karana ia hahedinaraia tauna ginigunana. Ia ese unai kara ia hahedinaraia goevagoeva dainai, hari ia ita tohotohoa diba. Bema iena abidadama ia hahedinaraia dalana ita diba bona tohotohoa, unai be hegeregere ita ia hereva henia noho.

To, Baibel ese Abela ia herevalaia momo lasi dainai, edena dala ai iena abidadama karana ita dibaia? Mani ita itaia.

Adamu bona Heva idia mauri noho lalonai Abela ia vara. Gabeai Iesu ese Abela bona inai hereva, “taunimanima be tanobada ai idia vara negana,” ia gwauraia hebou. (Luka 11:50, 51) Iesu ese ia herevalaia “taunimanima” edia dika be Dirava ese do ia gwauatao. Adamu, Heva, Kaino bona Abela edia negai, Dirava ese ena dika ia gwauatao tauna ginigunana be Abela. a Unai ese ia hahedinaraia Abela be haheitalai dikana idia hahedinaraia taudia huanai ia tubu daekau.

Ena be unai negai taunimanima be momo lasi, to mauri ia auka. Abela ena tama sina, Adamu bona Heva be mai edia hairai bona edia tauanina ia goada. To idia diba idia be kerere badana ta idia karaia. Guna idia be goevadae taudia bona idia mauri hanaihanai diba. To Iehova Dirava idia gwau-edeede henia bona edia noho gabuna Paradaiso, Eden umana amo ia luludia. Idia be sibona edia ura idia laloa bada​—⁠edia natudia edia namo idia laloa lasi​—⁠dainai mauri goevadaena bona mauri hanaihanai idia haboioa.​—Genese 2:15–3:24.

Adamu bona Heva be Eden umana murimurinai idia noho neganai, mauri be ia auka. To edia natuna ginigunana Kaino ia vara neganai, Heva ia gwau: “[Iehova] ena durua dekenai mero ta lau abia  vadaeni.” Iena hereva ese ia hahedinaraia reana ia be Iehova ese Eden umana ai ia karaia gwauhamata ia laloa. Iehova ia gwau hahine ese “garana” ta do ia havaraia bona ia ese Adamu bona Heva ia hakaua kerere tauna, do ia haorea vaitani. (Genese 3:15, BHḡ; 4:1) Reana Heva ia laloa ia be unai hahine bona Kaino be gwauhamata “garana.”

Bema unai bamona ia laloa, iena lalohadai be kerere. Danu, bema ia bona Adamu be Kaino idia hamaoroa ia be unai “garana,” vadaeni idia ese Kaino ena hekokoroku karana idia habadaia. Gabeai, Heva ese natuna mero iharuana ia havaraia, to ia dekenai hanamoa hereva ta idia gwauraia lasi. Ena ladana idia gwauraia, Abela, reana ena anina be “Ita Hahodi Hodahoda Sibona” eiava “Anina Lasi.” (Genese 4:2) Adamu bona Heva ese Abela dekenai idia henia ladana ese ia hahedinaraia idia be ia laloa maragi, bona Kaino idia laloa bada, a? Unai ita diba lasi.

Hari tama sina ese Adamu bona Heva edia kara amo gau haida idia dibaia. Umui ura emui hereva bona kara amo natudia dekenai hekokoroku bona sibona laloa bada karana umui hadibaia, a? Eiava idia umui hadibaia Iehova Dirava idia lalokau henia bona tura henia totona, a? Madi, tama sina ginigunadia be edia maduna idia huaia namonamo lasi. To, edia natudia totona helaro namona ia noho.

Kaino bona Abela idia tubu daekau lalonai, Adamu ese gaukara karaia daladia ia hadibaia, unai amo famili idia durua. Kaino be biru gaukara ia karaia, bona Abela be mamoe naria tauna ai ia lao.

To, Abela be mai anina bada gauna ta ia karaia. Idia hanaia laganidia lalonai, ena abidadama ia hagoadaia, bona Paulo ese gabeai unai kara namona ia herevalaia. Mani oi laloa, Abela ia tubu daekau lalonai haheitalai namona ia hahedinaraia tauna ta be lasi ia ese ia tohotohoa totona. Vadaeni, dahaka ese Abela ia durua Iehova Dirava ia abidadama henia totona? Iena abidadama ia hagoadaia gaudia toi mani ita herevalaia.

Iehova ese ia havaraia gaudia.

Iehova ia gwau, au ginigini bona ava ginigini be tano dekenai idia tubu, unai dainai aniani idia tubu namonamo lasi. To idia tubu aniani be hegeregere Abela bona ena famili totona. Bona Dirava ese ia havaraia gaudia ibounai be mai edia hairai, hegeregere, animal, manu, gwarume, ororo, gohu, sinavai, davara, guba, ori, dina, hua, bona hisiu. Momokani, Abela ia itaia gaudia ibounai ese Iehova Dirava, gau ibounai ia havaraia tauna, ena lalokau, aonega, bona kara namodia idia hahedinaraia. (Roma 1:20) Unai gaudia ia laloa dobu neganai ena abidadama ia hagoadaia.

Abela be nega ia atoa Iehova ia laloa totona. Iena mamoe ia naria dalana mani oi piksaia. Mamoe naria tauna be nega momo gabu daudau ia raka. Iena mamoe ia hakaua lao ororo dekenai, o koura bona sinavai idia hanaia rei gabuna namona, ranu bona laga-ani gabuna namona davaria totona. Dirava ese ia havaraia animal ibounai amo mamoe be goada lasi dainai, toana be ta ese idia ia naria bona  gimaia be namo. Oi laloa Abela danu ia ura aonega bona siahu bada Diravana, taunimanima ia hereaia tauna unai, ese ia ia hakaua, gimaia bona naria be namo, a? Ita gwau diba Abela be ena guriguri lalonai unai gaudia ia herevalaia, unai dainai iena abidadama ia goada ia lao.

Iehova ena gwauhamata.

Reana Adamu bona Heva be edia natudia memero dekenai Eden umana ai idia vara gaudia bona Dirava ese ia luludia ena badina idia herevalaia. Unai dainai Abela be gau momo ia laloa dobu diba.

Iehova be tano do ia dika herevana ia gwauraia. Abela ia itaia unai hereva ia guguru badina tano dekenai au ginigini bona ava ginigini idia tubu. Danu, Iehova ia peroveta Heva be rogorogo ena hekwarahi bona mara ena hisihisi do ia mamia. Abela be ena tadina idia vara neganai, ia itaia ena sinana dekenai unai hereva ia guguru. Iehova ia peroveta Heva be iena adavana do ia ura henia bada bona Adamu ese do ia biagua. Abela ia itaia ena tama sina dekenai unai ia vara. Ia itaia Iehova ese ia gwauraia gaudia ibounai idia vara momokani. Unai dainai, Abela be Dirava ese ia gwauhamatalaia “garana” ia abidadama henia, bona ia diba unai garana ese Eden umana ai idia vara hekwakwanai do ia hamaoromaoroa.​—Genese 3:15-19; BHḡ.

Iehova ena hesiai taudia.

Abela be haheitalai dikana idia hahedinaraia taudia huanai ia noho, to unai negai tanobada ai aneru haida edia abidadama karana ia itaia bona ia tohotohoa. Dirava ese Adamu bona Heva be Eden umana amo ia luludia neganai, gau ta ia karaia unai amo idia o edia natudia be tanobada Paradaisona ai do idia vareai lasi. Iehova ese kerubi, dagi bada anerudia, ia haginidia uma gabu gimaia totona. Danu, kaia ta mai ena lahi ia atoa, bona unai kaia be hanaihanai ia giroagiroa.​—Genese 3:24.

Mani oi laloa, Abela ia maragi neganai, ia be unai kerubi ia itadia. Edia toana be taunimanima bamona bona mai edia goada. Danu, ia hoa badina “kaia” ta mai ena lahi, hanaihanai ia giroagiroa gauna ia itaia. Abela ia tubu daekau neganai, oi laloa ia itaia unai kerubi idia hesiku bona edia gaukara idia rakatania, a? Lasi. To unai aneru, mai edia siahu bona aonega, be dina bona hanuaboi ibounai, o lagani handred handred momo lalodiai edia gini gabuna idia rakatania lasi bona edia gaukara idia karaia. Unai dainai Abela ia diba, Iehova Dirava be mai ena kara maoromaoro hesiai taudia bona edia gaukara idia laloa bada. Abela ia itaia unai kerubi anerudia be Iehova idia badinaia bona kamonai henia, to iena famili taudia be unai bamona lasi. Momokani, unai aneru edia haheitalai namona ese Abela ena abidadama ia hagoadaia.

Iehova be ena havaraia gaudia, ena gwauhamata, bona ena hesiai taudia edia haheitalai amo ena kara ia hahedinaraia, bona Abela ese unai gaudia ia laloa dobu dainai ena abidadama ia goada momokani. Oibe, Abela ena haheitalai amo gau momo ita dibaia, ani? Matamata taudia ese Iehova Dirava abidadama henia karana idia hagoadaia diba, herevana edia famili taudia be unai bamona idia karaia lasi. Hari inai negai, Dirava ese ia havaraia gaudia, Baibel, bona abidadama taudia momo edia haheitalai namona ese eda abidadama ia hagoadaia diba danu.

Abela ena abidadama Iehova dekenai ia goada dainai, ia ura kara ta amo unai ia hahedinaraia. To, taunimanima ese iunives Havaraia Tauna dekenai dahaka idia henia diba? Dirava be taunimanima amo harihari gaudia o edia heduru ia abia be anina lasi. Gabeai, Abela be mai anina bada gauna ta ia lalopararalaia: Bema mai kudouna ibounai ida Iehova dekenai gau namo hereana ta ia henia, iena lalokau guba Tamana ese unai do ia moalelaia.

Unai dainai, Abela be ena mamoe serina amo vara guna mamoe namo hereadia haida ia abia hidi bena ia bouboulaia. Kaino ia ura Dirava ese ia do ia hanamoa danu, unai dainai iena uma anianidia ia bouboulaia. To Kaino ena lalohadai be Abela ena amo ia idau. Edia boubou gaudia idia henia neganai unai ia hedinarai.

Adamu ena natuna ruaosi be boubou gaudia henia totona reana boubou patana bona lahi idia gaukaralaia,  bona reana kerubi edia vairanai unai idia karaia​—⁠unai nega ai kerubi be Iehova ena gwaukau taudia tanobada ai. Iehova be dahaka ia karaia? Baibel ia gwau Iehova be “Abela ena harihari gauna dekenai ia moale.” (Genese 4:4) Dirava ese unai harihari gauna ia abia dae dalana be Baibel ese ia gwauraia lasi. To dahaka dainai Dirava be Abela dekenai ia moale?

Dirava be Abela ese ia bouboulaia gauna dainai ia moale, a? Abela ese mauri animal ia bouboulaia neganai ena rara ia bubua, bona unai ese mauri ia laulaulaia. Reana Abela ia diba unai boubou gauna be mai anina bada. Lagani handred momo murinai, Dirava ese ena hesiai taudia ia hamaorodia, namona be bero lasi mamoe idia bouboulaia, unai be iena Natuna goevadaena, o “Dirava ena Mamoe Natuna” ia laulaulaia, gabeai iena rara goevadaena ia bubua. (Ioane 1:29; Esodo 12:5-7) To, reana Abela ia diba lasi gabeai Iehova be boubou gaudia do ia gaukaralaia.

Ita diba gauna be inai: Abela be ia dekenai ia noho gau namo hereana ta ia bouboulaia. Iehova be unai boubou gauna ia abia dae bona Abela dekenai ia moale. Abela be Iehova ia lalokau henia bona abidadama henia dainai iena boubou gauna ia henia.

To Kaino be unai bamona lasi. Iehova ese “Kaino, mai ena boubou gauna ia abia dae lasi.” (Genese 4:5) Kaino ese ia bouboulaia gauna be kerere lasi; gabeai Dirava ena Taravatu ia gwau taunimanima ese uma aniani idia bouboulaia diba. (Levitiko 6:14, 15) To Baibel ia gwau, Kaino “sibona ena kara be dika.” (1 Ioane 3:12) Kaino ia laloa Dirava tomadiho henia karana be toana sibona amo ia hahedinaraia be hegeregere bona hari momo be unai bamona idia laloa. Kaino ena kara amo ia hahedinaraia ia be Iehova ia abidadama henia lasi bona ia lalokau henia lasi.

Iehova ese Kaino ena boubou gauna ia abia dae lasi neganai, oi laloa Kaino be ena kara ia haidaua bona Abela ia tohotohoa, a? Lasi. To ena tadina dekenai ia badu dikadika. Iehova be Kaino ena lalohadai ia diba, unai dainai mai haheauka ida ia durua. Bona ia hamaoroa bema ena lalohadai ia hamaoromaoroa lasi, kerere badana ta ia karaia diba. Danu ia gwau, bema Kaino ese ena kara ia haidaua ‘iena boubou gauna do ia abia dae.’​—Genese 4:6, 7.

Kaino be Dirava ena sisiba ia abia dae lasi. To, ena tadina ia noia uma idia lao, bena unuseniai Kaino ese Abela ia botaia bona ia hamasea. (Genese 4:8) Ita gwau diba, Abela be ena abidadama dainai ia mase tauna ginigunana. Ena be ia mase vadaeni, to hari iena sivarai ita do herevalaia noho.

Unai be hegeregere, Abela ena rara be Iehova Dirava dekenai ia boiboi ena mase davana do ia karaia totona. Kaino ena kara dika dainai, Dirava ese ia hahemaoro henia. (Genese 4:9-12) Mai anina bada gauna be, hari Abela be ena abidadama amo ita ia do hereva henia noho. Abela ia mase neganai, reana ena mauri lagani be 100 ia hanaia lasi, unai negai idia noho taudia edia mauri lagani bamona lasi, to ena kara amo Dirava ia hamoalea. Ia diba ena guba Tamana Iehova be ia ia lalokau henia bona ia lalonamo henia. (Heberu 11:4) Ita diba momokani, Iehova ese Abela ia laloatao noho, bona tanobada paradaisona ai do ia hatorea isi lou. (Ioane 5:28, 29) Oi ura unuseniai ia oi hedavari henia, a? Bema Abela ena abidadama oi tohotohoa, ia oi hedavari henia diba.