Lau be Moundsville ai lau vara, ia be U.S.A ena not West Virginia, Ohio Sinavai badinai ia noho taoni maragina ta. Ai natudia ibounai be foa, memero toi bona kekeni tamona, lau be mero iharuana bona emai famili maurina ai moalelaia. Egu tama sina be gaukara goadagoada taudia, kara maoromaoro idia badinaia bona taunimanima idia lalokau henia. Ena be ai be taga taudia lasi, to gau ta dekenai ai dabu lasi. Egu tama sina be Iehova ena Witnes taudia, bona ai maragi neganai idia hekwarahi Baibel ena hakaua herevadia be ai idia hadibaia.

Egu mauri lagani be 13 ia lao 19 huanai neganai, egu tama sina ese lau idia hadibaia gaudia lau dadaraia matamaia. Lau laloa Baibel ena hakaua herevadia lau badinaia neganai do lau moale lasi. To, bema sibona egu ura karadia lau karaia moale korikorina do lau davaria. Daudau lasi murinai, Keristani heboudia lao henia karana lau hadokoa. Egu kakana bona taihuna danu be unai bamona idia karaia. Emai tama sina idia hekwarahi bada ai idia durua totona, to edia heduru ai dadaraia.

Unai nega ai lau diba lasi, lau ura henia mauri dalana ese gabeai lau dekenai hekwakwanai momo do ia havaraia. Dina ta sikuli murinai ruma dekenai lau giroa lou lalonai, egu turana ta ese lau dekenai kuku ta ia henia, bona lau abia. Unai nega amo, lau ese tauanina hamiroa gaudia idauidau lau tohoa matamaia. Gabeai, drag dikadia idauidau lau gaukaralaia, alkahol lau inua bona matabodaga karadia lau karaia. Lagani haida murinai, drag aukadia lau tohoa bona unai gaudia ese lau ia biagua bamona. Unai lau manadalaia dainai, drag lau hoihoilaia matamaia unai amo drag ma haida lau hoia diba.

Nega momo egu lalomamina ese lau ia hadibaia lau karaia karadia be kerere, to unai lau laloa bada lasi. Danu lau mamia egu kara lau haidaua be auka. Ena be pati bona konset gabudiai taunimanima momo edia huanai lau noho, to nega momo lau mamia lau be sibona lau noho, bona lau lalometau. Nega haida lau laloa egu tama sina be taunimanima namodia, to dahaka dainai lau be kara dikadia lau karaia.

Lau laloa egu kara do lau haidaua diba lasi, to haida be unai bamona idia laloa lasi. Lagani 2000 ai, egu tama sina ese lau idia boiria Iehova ena Witnes taudia edia distrik hebouhebou ta lau lao totona. Ena be lau ura lasi, to lau lao. Lau hoa badina egu kakana bona taihuna be unai hebouhebou idia lao danu.

Hebouhebou ai lau noho neganai, lau laloatao lagani gunanai unai gabu tamona dekenai rok konset totona lau lao. Hebouhebou ai bona konset ai lau itaia gaudia be idau, bona unai ese egu kudouna ia hamarerea. Konset neganai, unai gabu be momoru bona kuku ena kwalahu amo ia honu. Konset idia lao taudia momo edia kara be namo lasi, bona idia anelaia herevadia ese ta ia hagoadaia lasi. To hebouhebou ai, lau be moale taudia huanai lau noho, idia be mai moale ida lau idia hedavari henia, ena be lagani daudau idia lau itaia lasi. Danu hebouhebou gabuna be ia goeva, bona idia herevalaia gaudia be vaira nega ai do idia vara gau namodia. Baibel ese taunimanima edia mauri ia hanamoa dalana lau itaia neganai, sibona lau laloa dahaka dainai guna unai lau dadaraia.​—Isaia 48:17, 18.

Hebouhebou murinai, egu lalona lau hadaia Keristani heboudia lau lao be namo. Egu kakana bona taihuna be hebouhebou ai idia kamonai gaudia ese edia lalona ia veria bona hebou idia lao danu. Ai toi be Baibel stadi ai abia dae.

Lau ia hagoadaia sirina be Iamesi 4:8, ia gwau: “Dirava kahirakahira do umui lao bona ia be umui kahirakahira do ia mai.” Lau laloparara bema lau ura Dirava kahirakahira lau lao, namona be egu mauri lau haidaua. Namona be drag bona kuku ania karana, bona alkahol inua karana lau hadokoa.​—2 Korinto 7:1.

Egu tura gunadia lau rakatanidia, bona Iehova tomadiho henia taudia lau bamoa. Baibel amo lau ia hadibaia Keristani elda tauna ese lau ia durua bada. Nega momo lau ia rini henia bona egu ruma dekenai lau ia vadivadi henia lau ia sekea totona. Unai nega amo ema bona hari ia be egu turana namona ta.

Lagani 2001 ai, lau, egu kakana, bona taihuna be Dirava dekenai emai mauri ai gwauhamatalaia bona ranu lalonai ai bapatiso. Egu tama sina bona tadina mero idia moale bada badina hari ai ibounai be Iehova ai tomadiho henia.

Guna lau laloa Baibel ena hakaua herevadia lau badinaia be auka, to hari lau diba unai hakaua herevadia ese lau ia gimaia. Baibel ena heduru dainai drag gaukaralaia bona hoihoilaia karana lau hadokoa diba bona egu kara lau hanamoa.

Iehova idia tomadiho henia tadikaka oreana lalonai lau noho be hahenamo ta. Unai tadikaka oreana lalonai ta ta idia lalokau henia bona mai lalotamona ida Dirava idia hesiai henia. (Ioane 13:34, 35) Bona lau moalelaia hahenamo ma ta be, egu adavana lalokauna Adrianne ida eda Havaraia Tauna ai hesiai henia.

Hari lau be sibona egu ura karadia lau karaia lasi, to lau volantia Dirava lau hesiai henia ful-taim, unai amo taunimanima lau hadibaia Dirava ena Hereva amo heduru idia abia. Unai gaukara namona dainai lau moale bada. Mai egu kudouna ibounai ida lau gwau diba, Baibel ese egu mauri ia haidaua. Moale korikorina lau davaria.