Momo idia gwau December 21, 2012 ai, tanobada dekenai senisi badana ta do ia vara. Unai hereva dekenai dahaka oi laloa? Reana oi gari badina oi laloa gau dikana ta do ia vara, eiava oi moale badina oi ura ia vara gauna oi itaia, eiava oi lalohisihisi badina gau ta ia vara lasi. Oi laloa taunimanima be tanobada dokona totona deit kererena idia gwauraia, a?

Baibel ese “tanobada dokona” be edena bamona ia herevalaia? (Mataio 24:3, Buka Helaga) Haida idia gari badina idia laloa tanobada be lahi ese do ia gabua ore. To, haida idia ura dikadika tanobada dokona ai do idia vara gaudia idia itaia. Momo idia lalohisihisi badina idia naria daudau bona gau ta ia vara lasi. To badina haida dainai unai bamona idia laloa, a? Baibel ese tanobada dokona be edena bamona ia herevalaia?

Baibel ese tanobada dokona ia herevalaia dalana dekenai reana do oi hoa. Mai moale ida dokona negana ita naria ena badina be Baibel ese ia herevalaia. Danu, Baibel ia gwau haida be dokona negana idia naria, to gau ta ia vara lasi dainai idia lalohisihisi o idia hesiku. Taunimanima ese tanobada dokona totona idia henia henanadai be Baibel ese ia haerelaia. Oi ai noia Baibel ena haere oi itaia totona.

 BAIBEL ENA HAERE: “Oi [Dirava] ese inai tanobada oi karaia goada, ena gabu korikori dekenai, bona inai tanobada ia goada noho, ia marere sisina diba lasi, lasi momokani.”​—SALAMO 104:5.

Tanobada be lahi o ma gau haida ese do idia hadikaia lasi. Badina Baibel ia gwau tanobada be taunimanima edia noho hanaihanai gabuna. Salamo 37:29 ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.”​—Salamo 115:16; Isaia 45:18.

Dirava ese tanobada ia havaraia murinai, ia gwau, tanobada be “namo herea,” bona hari unai bamona ia do laloa noho. (Genese 1:31) Dirava ia ura lasi tanobada ia hadikaia, to ia gwauhamata ‘tanobada idia hadikaia taudia do ia hadikaia ore,’ bona tanobada do ia gimaia gau ta ese ia hadikaia lasi totona.​—⁠Apokalupo 11:18.

Reana 2 Petero 3:7 ena hereva dekenai do oi daradara. Unai siri ia gwau: “Guba bona tanobada be lahi ese ia araia totona idia naria noho.” Unai ese ia hahedinaraia tanobada be lahi ese do ia araia ore, a? Baibel ese nega haida inai hereva “guba,” “tanobada,” bona “lahi” be laulau dalanai ia gaukaralaia. Hegeregere, Salamo 97:1 ia gwau: “Tanobada, do oi moale!” Inai hereva “tanobada” ena anina be taunimanima.

Unai dainai 2 Petero 3:7 ena badina siridia ese idia herevalaia guba, tanobada, bona lahi be gau haida idia laulaulaia danu. Siri 5 bona 6 be Noa ena negai ia vara Abata ia herevalaia. Unai nega ai ia noho tanobada be abata badana ese ia hadikaia ore, to guba bona tanobada korikoridia idia ore lasi. To Abata ese taunimanima dikadia, “tanobada” ese ia laulaulaia taudia unai, ia haorea. Danu Abata ese tanobada ena lohia taudia, “guba” ese ia laulaulaia taudia unai, ia haorea. (Genese 6:11) Unai hegeregerena, 2 Petero 3:7 ena peroveta herevana (“hari idia noho guba bona tanobada be lahi ese ia araia”) anina be Dirava ese taunimanima dikadia bona lohia taudia dikadia do ia haorea vaitani.

BAIBEL ENA HAERE: “Tanobada bona ena ura be do ia ore, to Dirava ena ura ia karaia tauna be do ia noho hanaihanai.”​—1 IOANE 2:17.

“Tanobada” do ia ore ena anina be, tanobada korikorina do ia ore lasi, to Dirava ena ura idia badinaia lasi taudia do idia ore.  Kensa gorere ia abia tauna ia mauri totona doketa ese ena tiuma ia kokia be namo. Unai hegeregerena kara namo taudia be mai moale ida tanobada ai idia mauri noho totona, Dirava ese kara dika taudia ia kokia be namo. (Salamo 37:9) Unai dainai ita gwau diba, “tanobada dokona” ai gau namona ta do ia vara.

Aiemai Nega Matamata Baibel ese inai hereva “tanobada dokona” be inai bamona idia hahanaia, “inai nega oromana ena dokona.” (Mataio 24:3) Bema Dirava ese kara dika taudia ia haorea, vadaeni tanobada be kara maoromaoro taudia ese do idia noholaia bona edia mauri do ia namo herea, ani? Baibel ese unai ia hamomokania, badina inai hereva “do ia mai nega oromana” ia gwauraia.​—⁠Luka 18:30.

Iesu ese unai nega ia gwauraia “gau ibounai hamatamataia negana.” Unai negai, Iesu ese taunimanima edia noho do ia hanamoa lou, unai be Dirava ena ura hegeregerena. (Mataio 19:28) Bena inai gaudia do ita moalelaia

• Tanobada paradaisona mai maino bona noho namo.​—Isaia 35:1; Mika 4:4.

• Gaukara namodia.​—Isaia 65:21-23.

• Gorere do idia ore.​—Isaia 33:24.

• Buruka taudia do idia matamata lou.​—Iobu 33:25.

• Mase taudia do idia toreisi lou.​—Ioane 5:28, 29.

Bema “Dirava ena ura” ita karaia tanobada dokona do ita garilaia lasi. To, mai moale ida unai nega do ita naria.

BAIBEL ENA HAERE: “Unai gaudia idia vara umui itaia neganai, umui diba Dirava ena Basileia be ia kahirakahira.”​—LUKA 21:31.

Profesa Richard Kyle ena buka (The Last Days Are Here Again) lalonai ia gwau: “Tanobada ai senisi idia vara haraga bona taunimanima edia mauri ia dika ia lao dainai, taunimanima be dokona do ia mai ena deit idauidau idia gwauraia.” Unai dainai, taunimanima be unai gaudia idia vara ena badina idia diba namonamo lasi.

To, Baibel ena peroveta taudia ese dokona idia herevalaia neganai, idia be edia negai idia vara gaudia edia badina idia herevalaia lasi. To, Dirava ena hahekau henunai idia perovetalaia gaudia ese ia hamomokania tanobada dokona be ia kahirakahira. Mani inai peroveta herevadia haida oi itaia bena oi laloa, inai gaudia be iseda negai idia vara o lasi.

•   Tuari, hitolo bada, tano mareremarere bona daihanai goreredia.​—Mataio 24:7; Luka 21:11.

• Taravatu utua karadia do idia bada idia lao.​—Mataio 24:12.

• Taunimanima ese tanobada do idia hadikaia.​—Apokalupo 11:18.

• Taunimanima be sibodia do idia laloa bada, moni bona moale karadia do idia ura henia bada, to Dirava do idia lalokau henia lasi.​—2 Timoteo 3:2, 4.

• Ruma bese maurina do ia dika.​—2 Timoteo 3:2, 3.

• Taunimanima do idia laloa dokona negana do ia mai lasi.​—Mataio 24:37-39.

• Dirava ena Basileia ena sivarai namona be tanobada ibounai dekenai do idia harorolaia.​—Mataio 24:14.

Iesu ia gwau, “unai gaudia ibounai” ita itaia neganai, namona be ita diba tanobada dokona be ia kahirakahira. (Mataio 24:33) Iehova ena Witnes taudia idia abia dae dokona be ia kahirakahira, bona Baibel ai idia dibaia gaudia be tano 236 dekenai idia harorolaia.

BAIBEL ENA HAERE: “Inai hereva, ‘Maino bona noho namo!’ idia gwauraia neganai, karaharaga dika bada herea be idia latanai do ia ginidae, rogorogo hahinena ese mara ena hisihisi ia abia bamona, bona do idia heau mauri diba lasi.”​—1 TESALONIKA 5:3.

Baibel ese tanobada hadikaia ore negana be rogorogo hahine ia mara gwauraia ena hisihisi ida ia hahegeregerea​—ia vara neganai ta ese do ia koua diba lasi. Dokona negana ena toa idauidau be rogorogo hahine ta bamona, ia mamia hisihisi amo ia diba ena beibi be kahirakahira do ia havaraia. Reana doketa ese beibi ena vara dinana ia makaia danu. Herevana ia makaia dinana ai beibi ia vara lasi, to rogorogo hahinena ia diba kahirakahira ena beibi do ia vara. Unai hegeregerena, ena be taunimanima ese idia gwauraia dinana ai tanobada dokona ia ginidae lasi, to idia vara toa idauidau ese idia hamomokania ita be “dina gabediai” ita noho.​—2 Timoteo 3:1.

Reana do oi henanadai: ‘Bema toa idauidau ese idia hahedinaraia dokona negana be kahirakahira, vadaeni dahaka dainai taunimanima ese unai idia lalopararalaia lasi?’ Baibel ia gwau, taunimanima be dokona negana ia kahirakahira ena toa idauidau  do idia laloa bada lasi. Dina gabediai do idia vara senisi badadia do idia itaia, to do idia abia dae lasi dokona be kahirakahira, bona mai hevaseha ida do idia gwau: “Emai sene taudia be mase lalonai idia mahuta negana amo ema bona hari, gau ta ia idau lasi, Dirava ese gau ibounai ia havaraia negana hegeregerena.” (2 Petero 3:3, 4) Ita gwau diba, dina gabedia edia toa idauidau ita itaia noho, to momo be unai do idia abia dae lasi.​—⁠Mataio 24:38, 39.

Inai kahana lalonai Baibel ena siri haida ese idia hamomokania dokona be ia kahirakahira. a Oi ura gau ma haida oi dibaia, a? Bema oibe, mani Iehova ena Witnes taudia oi tore henidia, unai amo ta be oi ida davana lasi Baibel stadi ia karaia diba. Emu ruma, o gabu ma ta, o telefon amo umui stadi diba. To namona be stadi totona nega oi atoa, unai amo gau momo do oi dibaia.