Lau be taoni maragina, Texcoco ai lau vara. Unai negai, dala be kolta lasi dainai, kahu be bada. Emai hanua badinai idia noho hanua taudia momo ese edia hoihoi gaudia be doniki latanai idia atoa bona taoni dekenai idia abia mai. Emai famili be ogogami, ai natudia ibounai be 9 bona lau be natuna namba 7. Tamagu be guaraches o tamaka hanamoa gaukara ia karaia, famili ia sapot totona. To egu mauri lagani be 7 neganai, tamagu ia mase. Unai nega amo, sinagu ia gaukara goada famili ia sapot totona.

Egu tubuna tau be vaiolin ia gadaralaia bona ia be orchestra ta ena conductor​—⁠iena grup be dubu edia klasikal miusiki idia gadaralaia taudia. Egu famili memba ta ta be miusiki instrument ta ta idia gadaralaia diba. Sinagu be dubu ai ane abia grup ida ane ia abia, bona egu vavana be opera ane abia tauna bona piano ia gadaralaia. Ai ibounai be Katolik taudia​—lau be pris durua gaukara lau karaia (altar boy), bona lau ura misinari ta ai lau lao. Danu, karate muvi lau itaia momo dainai, badu haraga tauna ai lau lao.

Puebla ai, lau be tomadiho sikuli ta dekenai lau vareai. Lau ura Katolik pris ta ai lau lao. To egu sikuli lagani ginigabena ai, Katolik Dubu taudia edia kara haida lau moalelaia lasi. Katolik sista ta ia ura matabodaga karadia ai karaia hebou, to unai lau dadaraia. Gabeai, headava lalohadaina lau abia. Danu, lau itaia pris haida be idia hadibaia  gaudia idia badinaia lasi bona matabodaga karadia idia karaia. Unai dainai, pris ta ai lau lao lalohadaina lau dadaraia.

Gabeai Mexico City ai, National Conservatory of Music dekenai miusiki lau stadilaia. Sikuli lau haorea murinai, lau headava, bona gabeai natudia foa ai havaraia. Egu famili lau sapot totona, Katolik Dubu ai ane lau abia.

Ai headava negana amo ai moale lasi. Badina nega momo ai mama heheni bona ai heatu. Matamanai, ai hepapahuahu sibona, to gabeai, ai heatu. Lagani 13 murinai, ai parara bona gabeai ai divos.

Egu adavana ida lau do parara lasi neganai, Iehova ena Witnes taudia lau davaria. Witnes taudia rua be emai iduara ai idia pidipidi, idia ura Baibel ai herevalaia hebou. Lau laloa tomadiho dekenai egu diba be bada dainai, lau ura hahedinaraia idia hadibaia herevadia be koikoi. Henanadai aukadia lau henia badina lau laloa haere do idia henia lasi. To lau hoa badina Baibel amo haere maorodia idia henia. Lau itaia tomadiho dekenai egu diba be bada lasi. To, egu adavana be Witnes taudia ia ura henidia lasi, bona lau bisi dainai, idia vadivadi lou lasi.

Lagani faiv murinai, lau be hahine ma ta, Elvira ida lau noho. Unai neganai Iehova ena Witnes taudia lau davaria lou. Elvira be Witnes taudia ia abia dae dainai, nega ibounai idia ida Baibel lau stadilaia be auka lasi. Ena be lau stadi, to lagani haida lalonai lau hekwarahi egu kara haida lau haidaua totona.

Lau laloparara mai kudouna ibounai ida Iehova lau tomadiho henia totona, gau haida lau haidaua be namo. Ginigunana be, Katolik Dubu ai ane abia karana lau hadokoa, anina be egu famili lau sapot totona moni gaukara idauna lau tahua be namo. (Apokalupo 18:4) Iharuana be, Elvira ida emai headava ai rejista be namo.

Ihatoina be, egu badu haraga karana lau biagua be gau badana. Baibel siri rua ese lau idia durua: Salamo 11:5 (NW) ese ia hahedinaraia, Iehova be dagedage karadia ia inai henia, bona 1 Petero 3:7 ese lau ia hadibaia Iehova ese egu guriguri ia kamonai totona, egu adavana lau matauraia be namo. Unai siri lau lalodia dobu bona Iehova lau guriguri henia dainai, ia ese lau ia durua egu badu karana lau biagua totona.

Hari, egu famili maurina lau moalelaia. Lau ura egu headava ginigunana ai idia vara natudia memero ida egu hetura karana lau hanamoa. Danu, lau ura Elvira ida emai natudia lau durua Dirava ai badinaia noho totona.

Lau maragi neganai, lau ura pris ta ai lau lao bena taunimanima lau durua. Hari, egu famili sapot totona, miusiki hadibaia gaukara lau karaia, bona moale korikorina lau abia. Iehova lau tanikiu henia badina mai haheauka ida lau ia durua egu mauri lau haidaua bona tau namona ai lau lao!