RAU 4 ela 5 ai ita itaia, Iesu be moale korikorina ia abia. Unai dainai, bema ita ura moale korikorina ita abia, Iesu ena haheitalai ita tohotohoa bona ena sisiba ita kamonai be namo.

Iehova ese ita ia hamaoroa unai bamona ita karaia be namo, ataiai Baibel sirina ena hereva bamona. Iesu hegeregerena do ita raka ena anina be, dina ta ta ai Iesu ena haheitalai ita tohotohoa bona ena hahediba herevadia ita badinaia be namo. Unai bamona ita karaia neganai, Dirava ese ita do ia lalonamo henia bona moale korikorina do ita abia.

Iesu ena hakaua herevadia ese ita idia durua ia hegeregerena ita raka totona. Unai hakaua herevadia haida be Iesu ena Ororo Harorona ai do ita davaria. Mani idia haida bona eda mauri lalonai ita badinaia diba daladia ita herevalaia.

EDENA DALA AI UNAI ESE ITA IA DURUA MOALE KORIKORINA ITA ABIA TOTONA?

Iesu ese ia hahedinaraia, taunimanima ese Dirava idia dibaia be namo. Ita ura henanadai haida edia haere ita diba, hegeregere: Dahaka dainai ita vara? Dahaka dainai inai tanobada ai hisihisi idauidau idia vara? Dirava ese ita ia laloa, eiava? Mase murinai mauri ta ia noho, a? Unai henanadai edia haere ita diba be namo, unai amo moale korikorina do ita abia. Iesu ia diba Dirava ena Hereva sibona ese unai henanadai ia haerelaia diba. Iena Tamana ia guriguri henia: “Oiemu hereva be momokani.” (Ioane 17:17) Momokani, Baibel ese ita ia durua diba Dirava ita diba bona ita moale totona.

SIVARAI MOMOKANINA:

Esa be rok miusiki ena grup ta ena ane abia tauna dainai, ia be ladana bada tauna ta ai ia lao diba. To, moale korikorina ia abia lasi. Ia gwau: “Ena be unai grup ai lau noho dainai lau moale, to moale korikorina lau tahua.” Gabeai, Esa be Iehova ena Witnes tauna ta ia hereva henia. Ia gwau: “Lau ese ia dekenai henanadai momo lau gwauraia. To, Witnes tauna ese Baibel amo haere ia henia karana ese egu lalona ia veria dainai, ia lau noia lau ia durua Baibel lau stadilaia totona.” Esa be Baibel amo ia dibaia gaudia ese ena kudouna idia hamarerea dainai, Iehova dekenai ena mauri ia gwauhamatalaia. Ia gwau: “Guna, hekwakwanai bona metau idauidau lau davaria, to hari, moale korikorina lau abia.”

EDENA DALA AI UNAI ESE ITA IA DURUA MOALE KORIKORINA ITA ABIA TOTONA?

Hebogahisi anina be, ma haida dekenai kara namo ita hahedinaraia. Iesu be heduru idia abia be namo taudia dekenai hebogahisi ia hahedinaraia. Unai dainai, ia ese ma haida edia hisihisi ia hanamoa. (Mataio 14:14; 20:30-34) Iesu bamona, ma haida dekenai hebogahisi ita hahedinaraia neganai, moale korikorina ita abia. (Kara 20:35) Eda heduru idia ura taudia dekenai hebogahisi ita hahedinaraia dalana be inai: Idia dekenai hereva bona kara namo ita hahedinaraia. Momokani, hebogahisi karana ita hahedinaraia neganai, moale korikorina ita abia.

SIVARAI MOMOKANINA:

Maria bona ena adavana, Carlos, be hebogahisi taudia. Maria ena tamana be dogae, bona lagani haida gunanai ia gorere bona bedi ai ia hekure sibona. Unai dainai, idia ruaosi ese ia idia abia lao edia ruma dekenai idia naria. Hanuaboi momo idia mahuta namonamo  lasi. Nega haida Maria ena tamana ena suga gorere ia bada neganai, hospital idia abia lao haraga. Idia gwau nega haida idia hesiku bada. To Iesu ena hereva hegeregerena, idia moale badina idia diba idia be Maria ena tamana idia naria bona durua noho.

EDENA DALA AI UNAI ESE ITA IA DURUA MOALE KORIKORINA ITA ABIA TOTONA?

Edena dala ai maino karaia taudia ese moale korikorina idia abia diba? Ma haida ida maino ita karaia neganai, hetura karana namona do ita moalelaia. Baibel ena sisiba ita badinaia, ia gwau: “Bema mai dalana bona bema umui karaia diba, taunimanima ibounai ida maino ai do umui noho.” (Roma 12:18) Inai hereva, “taunimanima ibounai” anina be emu famili memba bona emu tomadiho idia abia dae lasi taudia. Momokani, “taunimanima ibounai” ida maino idia karaia taudia ese moale korikorina idia abia diba.

SIVARAI MOMOKANINA:

Hahine ta, Nair mani oi laloa. Lagani haida gunanai, ena famili lalonai idia vara hekwakwanai idauidau dainai, maino ai ia noho be ia auka. Lagani 15 gunanai ena adavana ese ia rakatania negana amo, ia sibona be ena natuna memero rua bona kekeni tamona ia naria. Ena natuna mero ta be drag dikadia ia ania, bona nega haida ena sinana bona taihuna ia hagaria, ia gwau idia do ia botaia. Unai hahetoho idauidau lalonai, Nair ia gwau Baibel amo ia dibaia gaudia ese ia idia durua maino ai ia noho totona. Ia ura lasi gau idauidau dainai ia badu o heai. Ma haida ia kara henidia, ia hebogahisi henidia, bona edia hemami ia lalopararalaia. (Efeso 4:31, 32) Nair ia gwau: ‘Maino karaia dalana lau dibaia neganai, unai ese lau ia durua egu famili bona ma haida ida ai hetura namonamo totona.’

Bema Iesu ena hakaua herevana ita badinaia, do ita moale. To moale korikorina ita abia totona, vaira negana ai do idia vara gaudia ita diba danu be namo. To edena dala ai moale korikorina ita abia diba bema ita diba nega ta do ita buruka, gorere bona mase? Vaia, taunimanima ibounai dekenai unai idia vara.

To sivarai namona be inai: Iehova be ‘Iesu hegeregerena idia raka’ taudia dekenai hahenamo momo do ia henia. Iehova ia gwauhamata, kahirakahira tanobada matamatana do ia havaraia, bena kara maoromaoro taudia ese do idia noholaia​—do idia gorere lasi bona mase lasi. Baibel ia gwau: “Dirava ena palai rumana be taunimanima ida ia noho, bona ia be idia ida do ia noho, bona idia be ena taunimanima ai do idia lao. Bona Dirava be idia ida do ia noho. Bona ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.”​—Apokalupo 21:3, 4.

Maria (rau 3 ai ita herevalaia mauri lagani 84 hahinena) be mai moale ida unai Baibel sirina do ia guguru negana ia naria noho. Oi be edena bamona? Oi ura “mauri korikorina”​—Dirava ena Basileia henunai do oi abia gauna​—ena anina oi diba, a? (1 Timoteo 6:19) Bema oibe, vadaeni Iehova ena Witnes taudia oi nanadaia o inai magasin karaia taudia oi tore henidia diba. a