Dirava be taunimanima idauidau edia guriguri ia kamonai. (Salamo 145:18, 19) Baibel ese ita ia hagoadaia ita lalohekwarahilaia gaudia be Dirava dekenai ita gwauraia totona. (Filipi 4:6, 7) To, Dirava be guriguri haida ia kamonai lasi. Hegeregere, Dirava ia ura lasi guriguri lalonai gau tamona ita gwauraia loulou.​—Mataio 6:7 duahia.

Danu, Iehova be ena taravatu idia utua loulou taudia edia guriguri ia kamonai lasi. (Aonega Herevadia 28:9) Hegeregere, Baibel negadiai, idia ala-ala Israela taudia edia guriguri be Dirava ese ia kamonai henia lasi. Unai dainai, Dirava ese eda guriguri ia kamonai totona, ena taravatu ita badinaia be namo.​—Isaia 1:15 duahia.

Mai abidadama ida Dirava ita guriguri henia. (Iamesi 1:5, 6) Namona be ita abia dae Dirava be ia noho bona ita ia laloa bada. Eda abidadama ita hagoadaia totona, Baibel ita stadilaia, badina abidadama korikori ena anina be inai: Ita abia dae Baibel amo ita dibaia gaudia be momokani.​—Heberu 11:1, 6 duahia.

Mai momokani bona manau ida ita guriguri be namo. Iesu ia guriguri neganai, manau karana ia hahedinaraia. (Luka 22:41, 42) Namo lasi Dirava ita hamaoroa dahaka ia karaia, to Baibel ita duahia amo ena taravatu ita lalopararalaia toho. Bena eda guriguri be Dirava ena ura hegeregerena ita gwauraia.​—1 Ioane 5:14 duahia.