Dirava ia noho, a? Bema oibe, vadaeni edena bamona unai oi hamomokania? Ita itaia gaudia ibounai ese idia hamomokania Dirava ia noho, ia be mai ena aonega, siahu, bona lalokau. To unai idia hamomokania gaudia haida be dahaka? Aposetolo Paulo ese Roma Keristani taudia dekenai ia torea revarevana ese unai ia haerelaia.

Paulo ia gwau: “Ena be Dirava be ta ese ia itaia diba lasi, to gau ibounai ia havaraia negana amo ema bona hari, taunimanima ese iena siahu bona iena kara idauidau idia lalopararalaia diba. Bona ia karaia gaudia amo unai idia lalopararalaia, danu idia diba iena siahu be ia doko diba lasi bona momokani ia be Dirava. Vadaeni badina namona ta ia noho lasi, Dirava diba lasi herevana idia gwauraia totona.” (Roma 1:20) Paulo ena hereva bamona, Dirava ese ia karaia gaudia ibounai be ita itaia diba. Paulo ena hereva mani ita laloa.

Paulo ia gwau, Dirava ese “gau ibounai ia havaraia negana amo ema bona hari,” Dirava ena kara idia hunia lasi. Paulo ena hereva ena anina be, Dirava ese tau ginigunana ia karaia negana amo ema bona hari idia noho taudia be Dirava ena kara namodia idia itaia diba.

Ita idia hagegea gaudia ibounai​—gau badadia bona maragidia​—amo ita ‘laloparara’ iseda Havaraia Diravana ia noho bona ia be mai ena kara namodia. Tanobada ai gau momo ese idia hahedinaraia Dirava ena aonega be bada herea. Guba mai ena hisiu bona davara ena hurehure goadadia ese Dirava ena siahu idia hahedinaraia. Danu, iseda uduna ai aniani idauidau ita mamia bona dina ia daekau bona diho neganai guba ena kala idauidau mai hairaidia ese idia hahedinaraia, Dirava be taunimanima ia lalokau henidia.​—Salamo 104:24; Isaia 40:26.

Unai ibounai ita itaia, ani? Unai dainai Dirava idia abia dae lasi taudia dekenai “badina namona ta ia noho lasi, Dirava diba lasi herevana idia gwauraia totona.” Diba bada tauna ta ese haheitalai ta ia gwauraia: Mani oi piksaia, saini ta ia gwau “Stopu​—Lauri Kahana Oi Lao” to motuka draiva be idiba kahana ia lao. Pulisi tauna ese draiva ia hastopua bona ia hamaoroa faini monina do ia henia. Draiva ia gwau saini ia itaia lasi. To draiva ia matakepulu lasi bona saini ia hedinarai. Danu, unai bamona saini itaia bona badinaia karana be draiva ena maduna. Unai hegeregerena, Dirava ese ia karaia gaudia ibounai be hunia gabunai idia noho lasi, unai “saini” bamona idia hedinarai. Unai dainai, Dirava ia noho lasi herevana ita gwauraia be kerere.

Momokani, Dirava ese ia karaia gaudia ibounai be buka ta bamona, ita dekenai Dirava ena kara namodia idia hadibaia. To buka ma ta ladana, Baibel, ese Dirava ia sivarailaia namo herea. Unai buka ese inai henanadai badana ia haerelaia: Dirava ia ura iseda tanobada bona taunimanima totona dahaka ia karaia? Ena haere ese oi ia durua diba Dirava kahirakahira oi lao totona. Momokani, Dirava ese tanobada ai ia karaia gaudia ibounai amo ‘iena kara idauidau ita lalopararalaia’ diba.