Lau be Australia ena New South Wales taoni maragina ladana, Warialda dekenai lau tubu daekau. Unuseniai fama taudia be mamoe bona boromakau idia naria, bona uma aniani idia hadoa. Unai taoni ia goeva bona raskol taudia be momo lasi.

Ai natudia ibounai 10 amo lau be roboana dainai, egu mauri lagani be 13 neganai, moni gaukara lau karaia egu famili lau durua totona. Sikuli badana lau lao lasi dainai, fama gaukara lau karaia. Egu mauri lagani be 15 neganai, lau be stockman gaukara lau karaia​—dagedage hosi lau treinini henia, idia manau totona.

Fama gaukara be mai ena namo bona dika. Ena namo be inai: Hanuaboi ai egu kamepa badinai lahi lau karaia, hua bona hisiu lau itaia, bona uda lau moalelaia. Lau laloatao, nega ta lau gwau unai gau namodia ibounai ia Havaraia Tauna ta ia noho. Fama gaukara ena dika be inai: Fama taudia haida ese lau idia hakaua kerere. Nega momo haida be hereva mirodia idia gwauraia bona siga idia ania dainai, edia kara lau tohotohoa be auka lasi. Gabeai, unai kara lau manadalaidia.

Egu mauri lagani be 18 neganai, Sydney dekenai lau lao. Lau ura ami lau vareai, to lau idia abia dae lasi badina egu edukeisen be bada lasi. Moni gaukara ta lau abia bona Sydney ai lagani ta lau noho. Unai negai Iehova ena Witnes taudia lau davaria. Nega ta lau idia boiria edia kongrigeisen hebou ta lau lao, bona maoromaoro lau laloparara idia be hereva momokani idia hadibaia.

Daudau lasi murinai, fama gaukara lau karaia lou. Bena Queensland ena taoni ta ladana, Goondiwindi ai lau noho. Moni gaukara ta lau abia, lau headava, to danu, bia lau inua momo.

Emai natudia memero rua idia vara murinai, sibona lau nanadaia: ‘Gabeai, egu mauri be edena bamona?’ Unai  negai, Sydney ai guna Iehova ena Witnes taudia edia hebou ai lau kamonai herevana lau laloatao, bona egu lalona lau hadaia egu mauri lau senisia be namo.

Gima Kohorona gunana ta lau abia, bena Iehova ena Witnes taudia edia Australia brens ofesi ena adres lau itaia. Revareva ta lau siaia, edia heduru lau noia. Idia ese Iehova ena Witnes ta idia siaia. Bena, ia ese lau ia durua Baibel ena diba lau abia totona.

Unai negai lau laloparara, egu mauri ai senisi badadia lau karaia be namo. Lau ia durua sirina be, 2 Korinto 7:1. Unai ese lau ia hadibaia ‘tauanina hamiroa gaudia ibounai amo lau goeva’ totona.

Egu lalona lau hadaia siga bona kekero muramura do lau rakatania. Unai be auka badina lagani momo unai kara lau manadalaia. To Dirava ese ia moalelaia dalana lau badinaia be gau badana. Lau ia durua bada siri ma ta be Roma 12:2, ia gwau: “Inai nega oromana ai idia noho taudia do umui tohotohoa lasi, to emui lalona do umui hamatamataia karana amo emui kara do umui haidaua noho.” Lau manadalaia karadia lau hadokoa totona, namona be lau abia dae unai kara mirodia be Dirava ese ia inai henidia. Dirava ena heduru dainai, siga ania karana bona inuinu momo karana lau hadokoa.

Hereva mirodia gwauraia karana lau hadokoa be auka. Lau diba Efeso 4:29 ia gwau: “Namo lasi hereva bodagadia umui gwauraia.” To, hereva mirodia lau gwauraia noho. Isaia 40:26 ena hereva lau laloa dobu karana ese lau ia durua. Unai siri ia gwau: “Emui matana do umui negea, guba do umui itaia. Daika ese hisiu ia karaia? Dirava ese edia orea be ta ta, dekena amo idia ia mailaia hedinarai, bona idia ta ta ibounai edia ladana ia atoa noho. Iena siahu be bada herea dainai, hisiu ta ia boio diba lasi.” Bena sibona dekenai lau gwau, bema Dirava ena siahu be bada herea dainai, iunives ia karaia bona lau itaia neganai lau moalelaia, anina be Dirava ese lau dekenai goada do ia henia egu mauri lau haidaua totona. Lau guriguri bona lau gaukara goada ela bona gabeai hereva mirodia gwauraia karana lau hadokoa.

Egu gaukara be hosi sibona lau treinini dainai, taunimanima ida lau herevahereva momo lasi. Danu, unuseniai fama taudia be momo lasi. To, Iehova ena Witnes taudia edia hebou ese lau ia durua ma haida lau hereva henia totona. Danu, unai ese lau ia durua Dirava ena Basileia ena sivarai namona be ma haida dekenai lau harorolaia totona.​—Mataio 6:9, 10; 24:14.

Idia hanaia laganidia lalonai kongrigeisen ai elda gaukara lau karaia. Lau moale badina unai gaukara namona amo egu abidadama tamona taudia lau durudia diba. Lau moalelaia gauna be inai: Lau, egu adavana, bona natudia be mai lalotamona ida Iehova ai tomadiho henia noho.

Iehova lau tanikiu henia badina ena be sikuli badana lau lao lasi, to ia ese lau ia hadibaia. (Isaia 54:13) Aonega Herevadia 10:22 ena hereva lau abia dae, ia gwau: “Lohiabada ena hanamoa sibona ese, kohu momo oi dekenai ia henia noho.” Lau bona egu famili ai ura Iehova ai dibaia bona hesiai henia noho.