MEDU bada ia diho bona rau 13 ena laulau bamona, lagatoi ai Noa ena famili ida be dibura masemase daiutu ta lalonai idia helai kahirakahira, oela lamepa idia diari, edia matana idia kehoa badabada, bona lagatoi ena guhi dekenai medu ia diho regena bona davara ena hurehure ese lagatoi ena saidi haba idia botaia regena idia kamonai. Reana regerege be bada herea.

Noa be ena famili (adavana lalokauna bona edia natuna tatau goadadia toi mai edia adavadia) edia vairana ia itaia neganai, Dirava ia tanikiu henia. Reana ia moale badina ia lalokau henia taudia ibounai be unai nega dikana lalonai ia badinai idia noho bona idia mauri. Momokani, Noa be guriguri amo Dirava ia tanikiu henia mai boiboi ida, unai amo ibounai idia kamonai diba.

Noa ena abidadama be goada dainai, ena Dirava, Iehova, ese ia bona ena famili ia gimaia. (Heberu 11:7) To medu ia diho matamaia neganai, oi laloa edia abidadama idia hagoadaia be mai anina bada, a? Oibe, badina unai ese idia do ia durua gabeai do idia vara hahetoho idia hanaia totona. Hari nega aukadia lalonai, eda abidadama ita hagoadaia be gau badana danu. Noa ena abidadama amo ita dibaia gaudia haida mani ita itaia.

Lagatoi murimurinai, medu be “dina 40 bona hanuaboi 40” ia diho. (Genese 7:4, 11, 12) Ranu ia daekau noho lalonai Noa ia itaia diba, iena Dirava, Iehova, be kara maoromaoro taudia ia gimaia bona kara dika taudia ia panisia.

Abata ese aneru edia gwau-edeede karana ia hadokoa. Satani bamona, aneru momo be sibona edia namo idia tahua dainai, “edia gabu korikori,” guba ai, idia rakatania bena tanobada hahinedia idia adavaia, bona natudia Nepili idia havaraia. (Iuda 6; Genese 6:4) Reana Satani ia moale badina ia itaia taunimanima (Iehova ese tanobada ai ia karaia gau hereadaedia) be idia gwau-edeede bona kara dika rohorohodia idia karaia.

To abata ia bada daekau neganai, gwau-edeede anerudia be edia tanobada tauanina idia rakatania, edia gabu korikori dekenai idia giroa lou, bona idia be hegeregere lasi taunimanima ta bamona idia lao totona. To, edia adavadia, natudia, bona ma haida be ranu lalonai idia mase ore.

Enoka ena nega amo, Iehova ese taunimanima ia hadibaia, ia ese kara dika taudia do ia hadikaia. (Genese 5:24; Iuda 14, 15) Lagani 700 bamona lalonai, taunimanima be kara dika idia habadaia​—⁠tanobada idia hadikaia bona idia dagedage. To, hari abata ia ginidae inai! Oi laloa Noa bona ena famili idia moale badina kara dika taudia idia mase, a?

Idia bona edia hebogahisi Diravana be unai idia moalelaia lasi. (Esekiela 33:11) Iehova be heduru ia henia, momo ia hamauria totona. Ia be Enoka amo taunimanima ia hadibaia, bona Noa ia oda henia lagatoi ia karaia totona. Lagani momo lalonai, Noa bona ena famili be lagatoi idia karaia, taunimanima be unai idia itaia diba. Danu, Iehova ese Noa ia hamaoroa “kara maoromaoro ia harorolaia.” (2 Petero 2:5) Guna Enoka bamona, Noa ese taunimanima ia hadibaia, Dirava be tanobada do ia hadikaia. To taunimanima be dahaka idia karaia? Iesu be guba ai unai ia itaia dainai, gabeai ia ese Noa ena negai idia noho taudia be inai bamona  ia herevalaia: “Idia laloa lasi ela bona Abata ia mai bona idia ibounai ia abia lao.”​—Mataio 24:39.

Mani oi piksaia: Iehova ese lagatoi ena iduara ia koua murinai, Noa bona ena famili be lagatoi lalonai dina 40 idia noho. Dina ta ta ai medu bada ia diho lalonai, reana idia 8 be gaukara haida idia karaia​—⁠idia heduru heheni, edia daiutu idia hagoevaia, bona animal idia ubua. Bena lagatoi ia mareremarere bona tano ia rakatania. Momokani, ranu ia daekau noho dainai ‘lagatoi ia abia isi.’ (Genese 7:17) Siahu Ibounai Diravana, Iehova be ena siahu ia hahedinaraia!

Reana lagatoi lalonai Noa ia moale badina ena famili ida idia mauri sibona lasi, to Iehova be idia amo taunimanima ia hadibaia abata ese dika do ia havaraia. Ena be unai lagani lalodiai idia haroro goadagoada, to taunimanima idia kamonai lasi! Mani oi laloa​—reana Noa ena boga tamona taudia bona edia natudia be abata ia do mai lasi neganai idia noho danu, to Noa ena ruma bese taudia sibona be Noa idia kamonai henia. (Genese 5:30) Unai dainai, lagatoi ai taunimanima 8 sibona idia mauri. Momokani, idia moale badina idia laloatao, matamanai idia be nega ibounai taunimanima idia haroro henia, idia roho mauri totona.

Noa ena nega amo, Iehova ena kara be ia idau lasi. (Malaki 3:6) Iesu Keriso ia gwau, eda nega be “Noa ena nega bamona.” (Mataio 24:37) Kahirakahira dika badana ta do ia vara, unai ese inai tanobada oromana dikana do ia haorea. Hari, Dirava ena hesiai taudia ese unai sivarai be kamonai taudia dekenai idia harorolaia. Dahaka do oi karaia? Bema unai sivarai oi kamonaia vadaeni, ma haida do oi hadibaia, a? Namona be ita ese Noa bona ena famili ita tohotohoa.

Reana gadobada ena hurehure ese lagatoi ena timba badadia idia botaia ena regerege be Noa bona ena famili ese idia kamonaia diba. To oi laloa Noa ia lalohekwarahi badina hurehure idia bada o lagatoi ia makohi diba, a? Lasi. Reana hari inai negai abidadama lasi taudia be unai bamona gaudia do idia laloa momo, to Noa be unai bamona lasi. Baibel ia gwau: “Noa ia abidadama dainai,  . . . lagatoi ta ia karaia.” (Heberu 11:7) Noa be dahaka ia abidadama henia? Matamanai Iehova ia gwauhamata, Ia ese Noa bona ia badinai idia noho taudia ibounai be Abata amo do ia hamauridia. (Genese 6:18, 19) To iunives, tanobada bona mauri gaudia ibounai ia havaraia Diravana ese lagatoi ia gimaia diba, ia makohi lasi totona, a? Oibe! Noa ia diba, Iehova be ena gwauhamata do ia hamomokania. Momokani, Noa bona ena famili “be abata amo idia roho mauri.”​—1 Petero 3:20.

Dina 40 bona hanuaboi 40 murinai, medu ia doko. Iseda kalenda ai unai be reana December 2370 B.C.E. To, Noa ena famili ida be lagatoi idia rakatania lasi. Animal amo ia honu lagatoi sibona be ranu latanai ia hure noho, ororo ataiai. (Genese 7:19, 20) Mani ita piksaia: Noa be gaukara metaudia ia haria, unai amo ia bona ena natudia​—⁠Sema, Hama, bona Iapeta​—⁠be animal idia ubua bona gabu idia hagoevaia. Bema Dirava ese unai uda animal ia hamanaua bena lagatoi lalonai ia hakaudia vareai, anina be Abata neganai danu Dirava be animal ia durua noho. a

Toana be Noa ese sivarai ibounai ia torea namonamo dainai, ita diba medu be edena negai ia diho bona ia doko. Danu ia hahedinaraia, medu be dina 150 ia diho. Gabeai, ranu ia maragi matamaia. Dina ta ai, lagatoi be metairametaira “Ararata Ororo dekenai” ia kamokau​—⁠iseda negai unai ororo be Turkey dekenai. Unai be April 2369 B.C.E. Dina 73 murinai, June ai, ororo ibounai idia hedinarai. September ai, Noa be lagatoi ena guhi haida ia kokia. Ena be unai guhi ia kokia be gaukara badana, to diari bona lai paraka ia vareai. Danu, Noa ia ura diba tano ia kaukau eiava. Unai dainai, ia ese galo manu ta ia siaia, reana ia roho lao roho mai, bona nega haida lagatoi latanai ia laga-ani; bena pune manu ta ia siaia, to unai manu ia lao bona Noa dekenai ia giroa mai loulou​—reana pune be unai bamona ia karaia loulou ela bona helai gabuna ta ia davaria.​—Genese 7:24–8:13.

Noa be Dirava tomadiho henia karadia ia atoa guna. Mani ita piksaia: Hanaihanai Noa ena famili ia haboua bena idia guriguri, bona edia guba Tamana, idia ia gimaia Diravana idia herevalaia. Noa be Iehova dekenai ia tabekau, disisen maorona ia karaia totona. Ena be Noa ia itaia tano ia “kaukau vadaeni,” bona lagani ta mai kahana lagatoi lalonai ia noho vadaeni, to ia ese lagatoi ena iduara ia kehoa lasi bona ena famili bona animal be lagatoi idia rakatania lasi. (Genese 8:14) Oibe, Noa be Iehova ena hereva ia naria!

Hari inai negai, ruma bese kwaradia be Noa idia tohotohoa diba. Noa be ena gaukara ia karaia namonamo, ia gaukara goada, ia hesiku haraga lasi bona ena henari henunai idia noho taudia ia naria namonamo. To gau badana be inai: Ia be Iehova Dirava ena ura ia atoa guna. Bema unai bamona gaudia dekenai Noa ena abidadama karana ita tohotohoa, ita lalokau henia taudia ibounai be namo do idia davaria.

Dokonai, Iehova ese Noa ia hamaoroa: “Lagatoi dekena amo oi diho, oi bona oiemu adavana, bona oiemu natuna memero, mai edia adavadia danu.” Unai oda hegeregerena, Noa ena famili idia raka-lasi murinai, animal idia raka-lasi. Dahaka ia vara? Idia raka kerere kerere bona doria lao doria mai, a? Lasi! Baibel ia gwau: “Ibounai be lagatoi dekena amo idia diho, ta ta edia orea, edia orea hegeregerena.” (Genese 8:15-19) Noa bona ena famili be lagatoi amo idia diho murinai, hodahoda namona idia bonaia, bona Ararata ena ororo bona tano goevana idia itaia. Nepili, dagedage, gwau-edeede anerudia bona tanobada oromana dikana be lasi! b Anina be bese matamatana ia vara be namo.

Noa ia diba dahaka do ia karaia. Iehova tomadiho henia karana ia matamaia. Boubou patana ia karaia bona Dirava matanai idia goeva animal haida​—⁠lagatoi dekenai idia udaia animal goevagoeva  “ibounai 7-7” unai​—ia abia bena lahi lalonai ia bouboulaia, Iehova vairanai. (Genese 7:2; 8:20) Iehova be Noa ena tomadiho karana ia abia dae, a?

Baibel ia gwau: “Lohiabada ese bonana namona ia kamonai.” Matamanai Dirava ia badu badina tanobada be dagedage amo ia honu, to hari Ia moale badina famili ta be tanobada ai Ia idia tomadiho henia bona Dirava ena ura idia karaia. Iehova ia diba unai famili taudia be idia goevadae lasi, badina Baibel ia gwau: “Taunimanima . . . be maragi negana dekena amo, edia laloa be dika.” (Genese 8:21) Iehova ese taunimanima ia hebogahisi henia bona haheauka henia daladia haida mani ita itaia.

Dirava ese tano ia hadikaia lasi. Adamu bona Heva idia gwau-edeede murinai, Dirava ia gwau tano do ia dika​—unai dainai, uma ai aniani hadoa bona anina abia be mai ena hekwarahi. Noa ena tamana, Lameka, ese ena natuna ena ladana ia hatoa Noa (anina be “Laga-ani,” o “Lalohisihisi hamaragia”) bona ia ese Noa be inai bamona ia perovetalaia: “Lohiabada ese tano ia hadikaia vadaeni kara dekena amo inai mero ese ita do ia hamauria, iseda imana edia gaukara, bona iseda hekwarahi dekena amo do ita laga-ani totona.” Reana Noa ia moale badina unai peroveta herevana ena anina ia guguru, hegeregere ia itaia taunimanima be uma idia karaia bona aniani idia tubu namonamo. Ma Baibel ia gwau, Noa be biru tauna!​—Genese 3:17, 18; 5:28, 29; 9:20.

Unai negai danu, Iehova ese Noa ena bese dekenai auka lasi taravatu haida ia henia, mauri idia matauraia totona​—rua be inai: Rara gaukaralaia kerere bona ala-ala karana be taravatu. Ma danu, Dirava be taunimanima dekenai ia gwauhamata, abata ese mauri gaudia do ia hadikaia ore lou lasi. Unai gwauhamata hamomokania totona, Iehova ese guba ai kevau (rainbow) ia hahedinaraia​—unai be nega ginigunana taunimanima ese unai hairai gauna idia itaia. Hari, kevau ita itaia neganai, ita ese Iehova ena gwauhamata ita laloa.​—Genese 9:1-17.

Noa ena sivarai be gori lasi, bona unai kevau be sivarai dokona lasi. Noa be taunimanima korikorina, bona iena mauri lalonai ia hekwarahi danu. Unai negadiai, taunimanima be nega daudau idia mauri, bona tau namona Noa be ma lagani 350 ia mauri noho lalonai, hisihisi bona metau momo ia davaria. Nega ta ia kekero bona kerere badana ta ia karaia, to unai sibona lasi, ena tubuna merona Kanana be kerere dika rohorohona ta ia karaia​—unai ese Kanana ena bese dekenai dika bada ia havaraia. Noa be nega daudau ia mauri dainai, ia itaia ena bese taudia be kara dikadia idia karaia, hegeregere Nimiroda ena negai kaivakuku idia tomadiho henia bona idia dagedage. To Noa ese ia itaia haheitalai namona be inai: Sema ena bese taudia be Dirava idia abidadama henia goadagoada.​—Genese 9:21-28; 10:8-11; 11:1-11.

Hekwakwanai idauidau lalonai, Noa bamona ita gini goada bona Dirava ita abidadama henia. Ma haida ese Dirava idia dadaraia, o hesiai gaukara idia rakatania neganai, namona be ita ese Noa ena kara ita tohotohoa. Iehova be unai bamona gini goada taudia ia laloa bada. Badina Iesu ia gwau: “Ia haheauka ela bona dokona tauna be do ia mauri.”​—Mataio 24:13.