Inai tanobada be ponografi a amo ia honu. Ia be reana advataismen, fashion, muvi, miusiki, magasin, TV, vidio gadara, mobael fon, Web sait, bona taunimanima ese Intanet ai idia atoa foto ai idia hedinarai. Hari inai negai, toana be momo ese ponografi idia abia dae. Tano momo ai, taunimanima momo be ponografi idia itaia, guna be unai bamona lasi.​— “Ponografi Ena Ripoti” mauana itaia.

Danu, ponografi karaia dalana be ia senisi noho. Profesa Gail Dines ia gwau: “Hari, ponografi laulaudia be dika rohoroho to taunimanima be mai moale ida idia itaia, ena be guna unai idia abia dae lasi.”

Ponografi ia bada ia lao karana bona taunimanima edia lalohadai ponografi dekenai ia senisi noho karana be edena bamona oi laloa? Ponografi be ta ia hadikaia eiava lasi? Iesu ia gwau: “Au namona ena huahua be ia namo, to au dikana ena huahua be ia dika.” (Mataio 7:17) Ponografi ese dahaka huahua ia havaraia? Haere ita diba totona, henanadai haida ita laloa guna.

DIBA BADA TAUDIA IDIA GWAU: Ponografi ese taunimanima ia guia diba, bona tahua gaukara idia karaia taudia bona doketa haida idia gwau ponografi be kokein drag bamona.

Hanaihanai Intanet ai ponografi ia itaia tauna, Brian b ia gwau: “Gau ta ese lau ia stopua diba lasi. Lau be drag lau ania bamona. Egu tauanina ia heudeheude bona egu kwarana ia hisihisi. Lau ura unai kara lau hadokoa, to lagani momo murinai, unai kara lau karaia noho.”

Ponografi itaia momo taudia be nega momo hunia gabudiai unai kara dikana idia karaia, bona ma haida dekenai idia herevalaia lasi. Idia davaria hekwakwanai haida be inai: Idia mamia idia be turana lasi, idia hemarai, wari, lalometau, bona badu. Haida be sibona hamasea lalohadaina idia abia. Dina ta ta ai ponografi be ena mobael fon dekenai ia daonloud tauna, Serge ia gwau: “Lau laloa lau be anina lasi, egu lalomamina ia dika, lau be turana lasi, bona lau mamia gau ta ese lau ia guia bamona. Lau hemarai bona lau gari dainai, haida edia heduru lau tahua lasi.”

Ena be nega sisina sibona eiava ita misteik dainai ponografi laulaudia ita kehoa bona ita itaia, to dika ita davaria diba. Doketa Judith Reisman be ponografi dekenai tahua gaukara ta ia karaia murinai, komiti ta (U.S. Senate committee) ia hamaoroa: “Ponografi laulaudia be kwarana ai idia kamokau bona harana ena gaukara ia senisia haraga dainai, lalona o memori amo ita kokia be ia auka.” Guna Web sait ai ponografi ia itaia bona ena mauri lagani 19 kekeni, Susan ia gwau: “Unai laulau be egu lalona ai idia kamokau. Nega haida egu lalona ai idia hedinarai kava bona lau kokia be auka.”

ENA DIKA: Ponografi ese ta ia guia o hadikaia.​—2 Petero 2:19.

DIBA BADA TAUDIA IDIA GWAU: “Ponografi ese headava taudia bona famili edia mauri ia hadikaia.”​—The Porn Trap, by Wendy and Larry Maltz.

Ponografi ese headava taudia bona famili edia mauri ia hadikaia daladia haida:

• Headava taudia idia trust heheni lasi, hetura lasi, bona lalokau heheni lasi.​—Aonega Herevadia 2:12-17.

• Ta be sibona ena namo ia tahua, ia ura sibona ia noho, bona ena adavana ia moalelaia lasi.​—Efeso 5:28, 29.

• Ia ura dikadika ta ia mahuta henia bona ia lalohadailaidia danu.​—2 Petero 2:14.

• Headava taudia ia doria edia adavadia dekenai matabodaga kara dika rohorohodia idia karaia totona.​—Efeso 5:3, 4.

• Haida edia hemami bona tauanina ia hadikaia.​—Mataio 5:28.

 Baibel ia gwau, tau o hahine ese adavana ia “koia” lasi be namo. (Malaki 2:16, NW) Ponografi ia itaia tauna o hahinena be iena adavana ia koia bamona, unai ese headava hapararaia o hadokoa karana ia havaraia diba, bona edia natudia edia mauri idia hadikaia diba.

Ponografi idia itaia natudia ese dika idia davaria danu. Matamanai ai sivarailaia merona, Brian ia gwau: “Egu mauri lagani be 10 neganai, komukomu (hide-and-seek) gadara lau karaia lalonai egu tamana ena ponografi magasin lau davaria. Vadaeni hunia dalanai unai magasin ena laulau lau itadia momo. Unai laulau lau ura henia ena badina lau diba lasi. Laulau dikadia lau itaia loulou ela bona lau bada.” Ripoti haida idia gwau, ponografi ese matamata taudia ia doria idia matamata lalonai mahuta hebou karana idia karaia, taunimanima idauidau ida idia mahuta hebou, mai dagedage ida matabodaga karadia idia karaia, bona edia lalomamina ia dika.

ENA DIKA: Ponografi ese famili ena hetura karana ia hadikaia bona hisihisi ia havaraia.​—Aonega Herevadia 6:27.

DIRAVA ENA HEREVA IA GWAU: “Unai dainai emui tauanina ena kahadia idauidau umui hamasea, idia havaraia gaudia be inai, matabodaga karadia, kara mirodia, matabodaga urana, ura dikadia, bona mataganigani, unai be kaivakuku tomadiho henia karana.”​—Kolose 3:5.

Iehova c Dirava be ponografi ia inai henia. To, ia ese mahuta hebou karana ia gwauraia dika lasi. Dirava ese mahuta hebou urana be iseda lalona ai ia atoa, badina ia ura headava taudia idia moale, idia lalokau heheni, bona natudia idia havaraia.​—Iamesi 1:17.

To dahaka dainai ita gwau diba Iehova be ponografi ia inai henia? Badina haida be inai:

• Ia diba ponografi ese taunimanima edia mauri ia hadikaia.​—Efeso 4:17-19.

• Ia be ita ia lalokau henia bona ia ura lasi dika ita davaria.​—Isaia 48:17, 18.

• Iehova ia ura lasi headava taudia bona famili idia parara.​—Mataio 19:4-6.

• Ia ura kara goevadia ita karaia bona ma haida edia maoro (rights) ita matauraia.​—1 Tesalonika 4:3-6.

• Ia ura mahuta hebou karana ita matauraia bona dala maorona ai ita gaukaralaia.​—Heberu 13:4.

• Iehova ia diba ponografi be Satani ena lalohadai​—⁠Satani ia ura headava ia hadikaia bona ia ura taunimanima be sibona edia namo idia laloa.​—Genese 6:2; Iuda 6, 7.

ENA DIKA: Ponografi ese eda hetura karana Dirava ida ia hadikaia diba.​—Roma 1:24.

To, haida idia ura ponografi itaia karana idia dadaraia vaitani​—unai bamona taudia be Iehova ese ia hebogahisi henidia. Baibel ia gwau: “Lohiabada be mai ena bogahisihisi, bona mai ena hariharibada. Ia ese iena badu ia hakerua noho. Iena lalokau bona bogahisihisi be bada herea. Dirava ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” (Salamo 103:8, 14) Ia ese manau taudia ia boiria ia kahirakahira do idia lao, ‘unai amo hebogahisi do idia davaria bona iena hebogahisi hereadaena amo, heduru be nega maorona ai do idia abia.’​—Heberu 4:16; “ Ponografi Itaia Karana Hadokoa Daladia” mauana itaia.

Momo be Dirava ena heduru idia abia dae. Unai ese namo ia havaraia, a? Kara dikadia idia dadaraia taudia be Baibel ese inai bamona ia gwauraia: “Dirava ese umui ia hagoevaia, umui ia hahelagaia, bona iseda Lohiabada Iesu Keriso ena ladanai bona iseda Dirava ena lauma amo umui ia gwauraia maoromaoro.” (1 Korinto 6:11) Idia be aposetolo Paulo bamona idia gwau: “Lau dekenai siahu ia henia tauna amo goada lau abia gau ibounai lau karaia totona.”​—Filipi 4:13.

Ponografi itaia karana ia hadokoa kekenina, Susan ia gwau: “Iehova ese oi ia durua diba ponografi itaia karana oi hadokoa totona. Bema Ia oi noia oi ia durua bona hakaua, iena vairanai oi be goeva tauna ai oi lao diba. Ia ese oi do ia rakatania lasi.”