DABAI, Rahaba be ena ruma ena windo amo murimuri kahana ia itaia noho, bona dina be Ieriko hanua ia hagegea ororodia ia hadiaria. Unuseniai, Israela ena tuari oreana ia haboua noho. Idia ese Ieriko hanua idia rakaia hegege lou neganai, tano ena kahu ia daekau lou bona taunimanima be kibi regena idia kamonai lou.

Ieriko be Rahaba ena noho gabuna dainai, unuseniai idia noho strit, ruma, maketi, stoa bona ena taunimanima ia diba namonamo. Ia diba ena hanua taudia edia gari ia bada ia lao, badina dina ta ta ai, Israela taudia be Ieriko idia rakaia hegege loulou. Danu, edia kibi regena dainai, Ieriko hanua ai idia noho taudia bona dala ai idia raka taudia be kibi regena idia kamonai diba bona idia gari dikadika, to Rahaba ia gari lasi.

Dina namba 7 ai, Rahaba ia itaia tuari oreana be Ieriko ia rakaia hegege lou. Idia huanai hahelaga taudia be kibi idia hiriria bona Taravatu Maua idia huaia​—unai ese ia hahedinaraia edia Dirava, Iehova be idia danu ia noho. Reana Rahaba ese ena imana be ena windo (Ieriko ena magu bada hereana ena murimuri kahanai ia noho gauna) amo ia hadihoa varo kakakaka latanai ia atoa. Unai varo amo Rahaba ia laloatao, ia bona ena famili be hanua hadikaia negana lalonai do idia roho mauri. Oi laloa Rahaba be ena hanua taudia edia mase dalana ia karaia, a? Iehova be unai bamona ia laloa lasi, to Ia itaia Rahaba ena abidadama be ia goada. Rahaba ena sivarai matamana mani ita laloa lou, unai amo gau haida ita dibaia diba.

Rahaba be ariara hahinena. Baibel idia diba bada taudia gunadia haida be unai hereva idia kamonai neganai idia hoa bona idia gwau, Rahaba be ariara hahine lasi, to ia be laolao taudia edia ruma naria hahinena. To Baibel be unai ia hunia lasi, ia gwau hedinarai Rahaba be ariara hahinena. (Iosua 2:1; Heberu 11:31; Iamesi 2:25) Herevana Kanana taudia ese Rahaba ena ariara karadia idia abia dae sibona, to reana Rahaba ia diba ia karaia karadia be maoro lasi​—badina Iehova be ita ibounai dekenai lalomamina ia henia, unai amo maoro bona kerere edia idau do ita diba. (Roma 2:14, 15) Reana Rahaba ia hemarai badina ia diba kara kereredia ia karaia. Hari iseda negai kerere idia karaia taudia momo bamona, reana Rahaba ia mamia ariara karadia ese ia idia guia bamona, bona ena famili ia naria o ubua dalana tamona be unai.

Ita diba Rahaba be noho dala maorona ia tahua noho. Iena hanua be dagedage, famili taudia idia sihari heheni karana, animal sihari henia karana, bona kara bodagadia amo ia honu. (Levitiko 18:3, 6, 21-24) Ieriko ai dubu taudia ese unai kara dikadia idia habadaia. Dubu lalodiai, momo ese ariara karadia idia karaia, demoni diravadia hegeregere Bala bona Moleka idia tomadiho henia, bona natudia be lahi lalonai idia gabua, boubou gauna totona.

Iehova ena matana ia kepulu lasi. Ia itaia Kanana taudia be kara dikadia momo idia karaia dainai, ia gwau: “Idia edia kara ese edia tano idia hamiroa. Unai dainai dika davana be unai tano dekenai lau henia noho. Vadaeni unai tano ese, ia  dekenai noho taudia ia luludia, bona idia rakatania noho.” (Levitiko 18:25) Edia “dika davana” be dahaka? Dirava be Israela ia hamaoroa: “Lohiabada emui Dirava ese inai bese metairametaira umui emui vairanai do ia luludia.” (Deuteronomi 7:22) Lagani momo gunanai, Iehova ia gwauhamata Kanana tanona be Aberahamo ena bese dekenai do ia henia, bona Dirava “ia koikoi diba lasi.”​—Tito 1:2; Genese 12:7.

To danu, Iehova be Israela taudia ia hagania unai tano taudia haida idia aladia ore be namo. (Deuteronomi 7:1, 2) Iehova be “tanobada ibounai ena kota biaguna,” kara maoromaoro do ia karaia Diravana, taunimanima edia kudouna ibounai ia diba, bona ia diba daika be mai ena ura ida kara dikadia o matabodaga karadia ia karaia noho. (Genese 18:25; 1 Sivarai 28:9) Rahaba be unai hanua dikana ai ia noho neganai, ena hemami be edena bamona? Bona Israela taudia edia sivarai ia kamonai neganai, ena hemami be edena bamona? Ia kamonai Dirava ese Aigupito ena igui hesiai taudia, Israela taudia unai, ia hakaudia, bona Aigupito ena tuari orea goadana ia halusia. Israela taudia be hari idia ura Ieriko idia tuari henia! To, Ieriko taudia be kara dikadia idia karaia noho. Unai dainai, hari ita diba dahaka dainai Baibel ese Rahaba ena Kanana turadia ia gwauraia, “gwau-edeede taudia.”​—Heberu 11:31.

Rahaba be idau. Lagani momo lalodiai, reana ia be Israela taudia bona edia Dirava, Iehova edia sivarai ia laloa loulou. Iehova be Kanana taudia edia dirava bamona lasi! Tuari ai ena taunimanima ia durua Diravana, edia mauri ia hadikaia lasi, idia ia durua kara goevadia idia karaia o idia miro lasi totona. Dirava be hahine ibounai ia matauraidia, ia ura lasi tau ese hahine ia hoia bena matabodaga karadia idia karaia, ia ura lasi idia ita hoihoilaia, o ia ura lasi idia ita doria dirava koikoi idia tomadiho henia totona. Reana Rahaba ia lalohekwarahi badina ia itaia Israela taudia be Ioridane kahanai edia kamepa idia haginia, bona Ieriko idia tuari henia neganai, Rahaba ena taunimanima be dika bada do idia davaria. Iehova ese Rahaba ia itaia bona laloa bada, a?

Hari, momo be Rahaba bamona. Kara dikadia ese idia guia noho dainai, idia hemarai, moale lasi, bona idia laloa ta ese ia lalodia bada lasi. To Rahaba ena sivarai ita moalelaia badina ita ia hadibaia Dirava be ita ta ta ia laloa bada. Ena be ita lalometau, to Dirava “be ita ta ta amo ia noho daudau lasi.” (Kara 17:27) Ia be ita kahirakahira ia noho, bona ia noho hegaegae ia idia abidadama henia taudia ia durua totona. Oi laloa Rahaba be unai bamona ia karaia, a?

Israela taudia ese Ieriko idia do rakaia hegege lasi neganai, tatau rua be Rahaba ena ruma idia lao. Unai tatau idia ura lasi ta ese ia itadia, to Ieriko taudia momo idia gima noho, Israela ena spai taudia idia vareai garina. Reana maoromaoro Rahaba ia diba unai tatau be Israela taudia. Ena be tatau idauidau be Rahaba ena ruma idia vadivadi badina idia ura kara bodagadia idia karaia, to Israela ena tatau be unai lasi to mahuta daiutu sibona idia tahua.

Unai tatau ruaosi be Israela ena spai taudia.  Edia tuari biaguna, Iosua, ese ia siaidia Ieriko taudia edia goada bona manoka idia itaia totona. Ieriko be Israela taudia ese do idia tuari henia Kanana hanua ginigunana bona reana goadana. Iosua ia ura ia diba ia bona ena tuari oreana ese dahaka idia karaia be namo. Momokani, spai taudia ese Rahaba ena ruma idia vadivadi henia ena badina maorona ia noho. Reana tatau idauidau be ariara hahinena ena ruma idia lao mai momo dainai, spai taudia idia laloa ta do ia laloparara lasi idia be daidia. Eiava, spai taudia idia ura unuseniai tatau edia herevahereva amo gau haida do idia dibaia.

Baibel ia gwau, Rahaba ese “spai taudia ia abidia dae.” (Iamesi 2:25) Herevana Rahaba ia daradara unai tatau ruaosi be daidia o dahaka dainai idia vadivadi, to ena ruma dekenai ia abidia dae bona idia noho. Reana ia ura edia Dirava, Iehova ena sivarai ma haida ia dibaia.

Daudau lasi murinai, Ieriko ena king ena hesiai taudia idia ginidae! Momo idia gwau Israela ena spai taudia be Rahaba ena ruma ai idia noho. Rahaba be dahaka do ia karaia? Bema ia ese unai idau tatau rua ia hunia, reana ia bona ena ruma bese idia mase diba, ani? Eiava Ieriko taudia ese Rahaba bona tatau ruaosi do idia hamasea, ani? To, Rahaba ia diba hari idia vadivadi tatau be Israela taudia. Reana ia diba Iehova be Dirava hereadaena bona dirava ma haida ia hanaia dainai, ia ura Iehova ena kahanai ia gini.

Ena be nega be kwadogi vadaeni, to Rahaba be kara maorona ta ia karaia haraga. Ia ese spai taudia ruaosi be iena ruma ena guhi ai ia haboua vadaeni kurukuru henunai ia hunidia. Bena king ena hesiai taudia dekenai ia gwau: “Momokani, unai tatau be lau dekenai idia mai, to edeseni idia mai gabuna lau diba lasi. Vadaeni dina ia diho neganai, hanua ena magu iduara kahirakahira do idia koua neganai, idia be lauegu ruma idia rakatania. Edeseni idia lao gabuna be lau diba lasi. To do umui lao haraga, idia do umui lulua lao, bona do umui abidia diba.” (Iosua 2:4, 5) Mani oi piksaia, Rahaba be king ena hesiai taudia edia vairana ia itaia. Oi laloa Rahaba ia wari, dika king ena hesiai taudia ese do idia davaria ia be ia koikoi, a?

Rahaba be king ena hesiai taudia ia koidia, ani? Unai hesiai taudia be maoromaoro Ioridane sinavai idia lao. (Iosua 2:7) Reana Rahaba ia moale. Ia ese unai ala-ala taudia​—idia ese hereva momokani idia dibaia be anina lasi​—be gabu idauna dekenai ia siaidia lao dainai, Rahaba ese Dirava momokanina, Iehova, ena hesiai taudia namodia ia hamauria.

Rahaba be guhi ia lao haraga bona ia karaia karana be spai taudia dekenai ia gwauraia. Ia gwauraia hereva badana ma ta be inai: Ieriko taudia be goada lasi bona idia gari dikadika. Unai dainai, reana spai taudia idia moale. Kanana taudia be Israela  ena Dirava goadana hereadaena, Iehova, dekenai idia gari! Rahaba ese ita dekenai mai anina bada gauna ta ia hadibaia. Ia gwau: “[Iehova] emui Dirava be guba dekenai ia noho, bona inai tanobada dekenai ia noho danu.” (Iosua 2:11) Ena be Iehova ena sivarai sisina ia kamonai, to ia abia dae Israela taudia edia Dirava be momokani. Oibe, Iehova ia abidadama henia.

Rahaba ia daradara lasi, Iehova be ena taunimanima do ia hakwalimua. Unai dainai, ia ese spai taudia ia noia ia bona ena famili idia hebogahisi henia bona hamauria totona. Spai taudia ese Rahaba ena noinoi idia abia dae, bona idia hamaoroa edia sivarai be ta do ia hadibaia lasi, bona ena windo ai varo kakakakana do ia kwatua namonamo, unai amo tuari taudia ese ia bona ena famili idia hamauria diba.​—Iosua 2:12-14, 18.

Rahaba ena abidadama sivaraina amo gau ta ita dibaia. Baibel ia gwau: “Taunimanima be hereva idia kamonai murinai, idia abidadama.” (Roma 10:17) Rahaba be Iehova Dirava ena siahu bona hahemaoro goeva edia sivarai namodia ia kamonai dainai, Iehova ia abidadama henia. Hari, ita be dala idauidau ai Iehova ena sivarai namodia ita dibaia noho. To ita gaukara goada Baibel amo Iehova ita dibaia noho, unai amo ita abidadama henia diba, a?

Rahaba ena hereva hegeregerena, spai taudia be windo ai idia kwatua varo amo idia diho bona ororo dekenai idia heau lao. Ieriko ena not kahanai kohua be momo dainai, reana spai taudia be unuseniai idia komu ela bona gabu ia seifi. Nega sisina murinai, idia be Israela ena kamepa dekenai idia giroa bona Rahaba amo idia kamonai sivarai namodia idia gwauraia.

Gabeai, reana Ieriko taudia idia gari dikadika badina be idia kamonai Iehova ese hoa dalanai Ioridane Sinavai ia hakaukaua bena Israela taudia idia raka hanaia. (Iosua 3:14-17) To unai ese Rahaba ia hagoadaia Iehova ia abidadama henia totona.

Bena dina siks lalonai, Israela taudia be Ieriko idia raka hagegea​—dina ta ta ai nega tamona hanua idia rakaia hegege. To dina namba 7 be idau sisina. Paragraf ginigunana ena hereva hegeregerena, tuari oreana be dabai idia raka hamatamaia, bona Ieriko idia rakaia hegege loulou. (Iosua 6:15) Israela taudia be dahaka idia karaia?

Dina namba 7 ai, tuari oreana be nega 7 Ieriko idia rakaia hegege murinai, tuari oreana idia gini. Kibi ena regena idia stopu. Regerege ta be lasi. Reana Ieriko taudia idia gari dikadika. Bena Iosua ia gwau, “Umui boiboi” neganai, nega ginigunana Israela ena tuari taudia ibounai idia boiboi bada herea. Ieriko ena magu ataiai idia gini gadi taudia idia laloa Israela taudia edia boiboi ese dika ta do ia havaraia lasi, a? Bema oibe, vadaeni idia kerere. Edia aena henunai ia noho magu be ia mareremarere noho ela bona ia makohia bona tano dekenai idia moru diho! Kahu ia ore neganai, magu ena kahana tamona sibona, Rahaba ena ruma unai, be ia moru lasi, badina ena abidadama ia goada. Reana Rahaba ia moale dikadika badina ia itaia Iehova ese ia bona ena famili ia hamauria! a​—Iosua 6:10, 16, 20, 21.

Israela taudia ese Rahaba be ena abidadama dainai idia hamauria. Magu ena kahana tamona sibona ia moru lasi neganai, idia diba Iehova be unai hahine bona ena famili ia hamauria. Gabeai, Rahaba be Israela ena kamepa kahirakahira ai ia noho neganai, idia koua lasi. Daudau lasi murinai, Rahaba be Israela tauna ladana, Salamona ia adavaia. Edia natuna merona ladana be Boasi​—ena abidadama ia goada. Ia ese Moaba hahinena, Ruta ia adavaia. b (Ruta 4:13, 22) King Davida bona gabeai, Iesu Keriso, Mesia unai, be unai bese amo idia vara.​—Iosua 6:22-25; Mataio 1:5, 6, 16.

Rahaba ena sivarai ese ia hahedinaraia, Iehova be ita ia laloa bada. Iehova ese eda kudouna bona lalona ia diba dainai, ia moale dikadika bema ia itaia eda abidadama be Rahaba ena bamona. Iena abidadama dainai, ia be kara ta ia karaia. Baibel ia gwau: “Iena kara dainai Dirava ese ia danu ia gwauraia maoromaoro.” (Iamesi 2:25) Iena abidadama ita tohotohoa be aonega karana!