Lau laloatao lau maragi neganai, France ena saut kahanai, egu tama sina ida ruma ta dekenai ai noho. Egu tamana ese egu siso ta ia karaia, bona lau ura dikadika uma ai lau gadara. Lagani 1966 ai, Iehova ena Witnes taudia be ai idia vadivadi henia neganai, nega bada lalonai egu tamana ida idia herevahereva. Hua seven murinai, egu tamana be ena lalona ia hadaia Iehova ena Witnes ta ai ia lao totona. Gabeai, egu sinana danu be Witnes ta ai ia lao. Unai dainai lau be famili namona lalonai lau tubu daekau.

Egu tama sina edia hanua Spain dekenai ai giroa neganai, gorere ta lau davaria. Egu imana bona aena dekenai hisihisi bada lau mamia matamaia. Lagani rua lalonai doketa idauidau ai itaia murinai, roki gorere ena doketa (rheumatologist) ta ai davaria, bona unai doketa ia gwau, “Inai be leiti vadaeni.” Egu sinana ia tai matamaia. Doketa ese egu tama sina ia hamaoroa egu roki gorere do ia ore lasi, bona gorere koua siahuna (immune system) ia goada lasi dainai, sel namodia do idia dika bona egu joini do idia gudu bona hisihisi do lau mamia. Ena be egu mauri lagani be ten to lau diba egu gorere hanamoa dalana be lasi.

Doketa ia gwau, namona be natudia edia hospital dekenai heduru lau abia. Unuseni lau ginidae neganai, unai hospital ena toana lau moalelaia lasi. Katolik sista edia kara be auka. Idia ese egu huina idia utua bona iunifom gunadia lau karaia. Lau tai bona egu lalonai lau gwau, ‘Iniseniai hahetoho do lau haheaukalaia diba eiava?’

Egu tama sina ese lau idia hadibaia Iehova lau hesiai henia be namo. Unai dainai lau ura lasi hospital ai Katolik edia tomadiho karadia lau karaia. Katolik sista idia laloparara lasi dahaka dainai lau ura lasi edia tomadiho karadia lau karaia. Guriguri amo Iehova lau noia lau ia rakatania lasi totona, bona lau mamia Iena imana amo lau ia rosia bona gimaia, tama lalokauna ta bamona.

Egu tama sina idia hamaoroa, Saturday sibona  lau do idia vadivadi henia bona nega sisina sibona do ai herevahereva. Idia ese Baibel bukadia idia abia mai, unai amo do lau duahia bona egu abidadama do lau hagoadaia noho. Katolik sista ese natudia idia taravatua buka do idia abia lasi, to lau be gwaumaoro idia henia egu buka bona Baibel lau dogoatao dainai, dina ta ta lau duahidia. Danu, kekeni ma haida dekenai tanobada Paradaisona ena helaro lau herevalaia, unuseniai ta do ia gorere lasi. (Apokalupo 21:3, 4) Ena be nega haida lau lalohisihisi bona lau mamia lau be sibona lau noho, to lau moale badina Iehova abidadama henia karana ia goada ia lao.

Hua siks murinai, doketa ese ruma dekenai lau idia siaia. Ena be egu gorere ia ore lasi, to lau moale badina egu tama sina ida lau noho. Egu joini idia dika dainai hisihisi bada lau mamia. Egu mauri lagani be 13 neganai, egu tauanina ia manoka momokani. To, egu mauri lagani be 14 neganai, bapatiso lau abia, bona lau gwauhamata egu guba Tamana do lau hesiai henia. To, nega haida Dirava dekenai lau lalohisihisi. Guriguri lalonai ia lau nanadaia: “Dahaka dainai lau dekenai inai ia vara? Mani egu gorere oi hanamoa. Oi itaia hisihisi bada lau ania, a?”

Egu mauri lagani ia bada lalonai, egu hisihisi ia bada. Lau diba egu gorere do ia namo lasi. Lau itaia egu turadia idia gorere lasi bona idia moale, to lau be lasi. Lau mamia lau be anina lasi dainai, lau hemarai. To, egu famili bona turadia ese lau idia durua. Egu turana namona Alicia​—ena mauri lagani be 30 ia hanaia​—lau laloatao. Ia ese lau ia durua egu gorere lau laloa momo lasi, to ma haida edia namo lau laloa bada totona.

Egu mauri lagani be 18 neganai, egu gorere ia bada, bona nega momo Keristani heboudia lau reaia. To, ruma dekenai egu nega lau gaukaralaia Baibel lau stadilaia namonamo totona. Baibel bukadia Iobu bona Salamo ese lau idia durua dainai, lau laloparara ena be hari Iehova Dirava be eda gorere ia kokia lasi, to ita ia durua Ia ita tura henia totona. Egu guriguri loulou dainai, “taunimanima edia siahu ia hereaia gauna” bona “Dirava ena maino, laloparara ibounai ia hereaia gauna,” lau abia.​—2 Korinto 4:7; Filipi 4:6, 7.

Egu mauri lagani be 22 neganai, wilsea lau gaukaralaia. Lau abia lalohadai dikana be inai, ‘Reana taunimanima idia itaia gorere hahinena be wilsea ai ia helai sibona.’ To, wilsea amo lau sibona be gau haida lau karaia diba. Egu turana ta, Isabel, ese lau ia hamaoroa namona be tahua gauna lau atoa, hegeregere hua tamona lalonai ia ida hora 60 do ai haroro.

Matamanai, lau laloa lau hegeregere lasi unai lau karaia totona. To, Iehova lau noia lau do ia durua, bona egu famili bona turadia ese lau idia durua dainai hora 60 lau hagugurua. Unai bisi huana ia ore haraga, bona lau mamia egu gari bona hemarai idia ore. Haroro gaukara lau moalelaia dainai, lagani 1996 ai regula painia gaukara lau hamatamaia​—anina be hua ta ta ai hora 90 lau hagugurua be namo. Unai disisen namona dainai Dirava kahirakahira lau lao bona egu tauanina ia goada. Haroro gaukara ai egu abidadama be momo dekenai lau herevalaia, bona haida lau durua Dirava ena turana ai idia lao totona.

Lagani 2001 ai, motuka aksiden amo egu aena ruaosi idia makohia. Hospital bedi ai lau hekure bona hisihisi bada lau mamia neganai, egu lalona ai lau guriguri: “Plis, Iehova, lau oi rakatania lasi!” Hahine ta be egu badinai ia noho bedi dekenai ia hekure bona lau ia nanadaia, “Oi be Iehova ena Witnes ta, a?” Egu kwarana sibona lau hamarerea badina egu goada be hegeregere lasi lau haere totona. Ia gwau, “Umui lau diba! Nega momo emui magasin lau duahia.” Ena hereva ese lau ia hagoadaia. Ena be lau hisihisi, to lau moale badina taunimanima idia diba lau be Iehova ena hesiai hahinena.

Lau namo lou neganai, egu haroro lau habadaia. Egu aena ruaosi be semensi amo idia kumia dainai, hospital wodi lalonai egu sinana ese wilsea amo lau ia loalaia. Dina ta ta ai, gorere taudia haida ai vadivadi henia, idia lau nanadaia idia namo eiava, bona Baibel idia herevalaia bukadia  haida lau henidia. Ena be unai vadivadi murinai lau hesiku, to Iehova ese goada ia henia.

Lagani haida murinai, egu hisihisi ia bada bona egu tamana ia mase dainai, lau lalometau bada. To, lalohadai maorona lau abia. Edena dala ai? Nega haida egu turadia bona varavara lau bamoa neganai, unai ese lau ia durua egu hekwakwanai lau laloa momo lasi totona. Bona sibona lau noho neganai, lau duahiduahi, Baibel lau stadilaia, eiava telefon amo haida lau haroro henidia.

Danu, nega haida lai parakana o flaoa edia bonana namona lau moalelaia. Unai gaudia dainai, Dirava lau tanikiu henia. Lau kiri neganai, egu mamina ia namo. Dina ta, haroro gaukara ai egu turana ta ese wilsea amo lau ia doria. Ia stopu bena ena noutbuk ai gau ta ia torea lalonai, wilsea ia heau diho, bona ia stopu motuka ta dekenai ia bampa. Ai ruaosi ai gari, to ai itaia gau ta ia vara lasi. Ai kiri dikadika.

Egu mauri lalonai gau momo lau karaia diba lasi. Lau ura vaira negana ai unai gaudia lau karaia. Nega haida egu matana lau koua bena lau piksaia Dirava ia gwauhamatalaia tanobada matamatana lalonai lau noho. (2 Petero 3:13) Lau piksaia egu gorere ia ore, lau raka loaloa, bona egu mauri lau moalelaia. King Davida ena hereva lau laloa: “Lohiabada dekenai do umui abidadama henia. Do umui laloa goada, daradara lasi.” (Salamo 27:14) Ena be egu tauanina ia manoka noho, to Iehova ese lau ia hagoadaia. Egu gorere lalonai, goada lau davaria noho.