Ia maoro Davida ese Dirava be unai bamona ia hamaoroa, a? Dirava be oi ia laloa, a? Taunimanima momo idia laloa siahu ibounai Dirava ese idia ia laloa lasi. Dahaka dainai?

Badina ta be Dirava be guba ai ia noho bona taunimanima amo ia daudau. Dirava ia itaia bese ibounai be “ranu ena hetuturu tamona bamona, . . . edia metau . . . be tano ena kahu maragidia bamona.” (Isaia 40:15) Dirava ia abia dae lasi toretore tauna ta ia gwau, “Dirava ese ita karaia gaudia ia laloa bada be heagi lalohadaina.”

Ma danu, taunimanima haida idia laloa edia kara dainai Dirava ese idia ia laloa lasi. Hegeregere, tau ta ladana Jim ia gwau: “Hanaihanai maino bona sibona biagua karana totona lau guriguri, to daudau lasi murinai lau badu lou. Dokonai, lau laloa egu kara be dika dainai Dirava ese lau ia durua lasi.”

Dirava be taunimanima amo ia daudau dainai, ita ia laloa lasi, a? Dirava ese goevadae lasi taudia be edena bamona ia laloa? Bema Dirava ese ena sivarai ia hahedinaraia lasi, ta ese Dirava dainai idia vara henanadai edia haere do ia davaria lasi. To, Dirava ena hereva, Baibel, ese ita ia hadibaia Ia be ita amo ia daudau lasi, bona ita ta ta ia laloa. Oibe, Baibel ia gwau: “Ia be ita ta ta amo ia noho daudau lasi.” (Kara 17:27) Dirava ese ita ia hadibaia ia be ita ta ta ia laloa, bona unai ia hahedinaraia dalana be atikol ma foa ese do idia herevalaia.